2010–2019
Ai Kinamwe epwe nonnom Remi
April 2017


“Ai Kinamwe epwe nonnom Remi”

Semach won Nang a churi kemi ren Ngunun an epwe ekinamwei kemi, pesei kemi, me auroura kemi ne nikitu.

Fefinei achengicheng, sia feioch ren ewe Ngunun Kot non ei pwinin. Ekkewe poraus mi pwarata me ren ewe Ngun mi Fel seni ekkei fefin mi pochokun me ekkewe kon ra fen apochokuna ach nuku me anapano ach mochenin apwonueta ekkewe pwon mi pin sia fori ren Samach won Nang mi tong. Sia mefi napenon ach tong fan iten ewe Samon Jises Kraist me kinisou ren amwararen niffangen An we Achasefan.

Ai poraus non ei pwinin mi chok mecheres, Kich meinisin sia fen mefi kinamwe non ei pwinin. Kich meinisin sipwe fen mochen mefi ei sokkun kinamwe fan chommong, non ach famini me pwan ren ekkewe aramas unukuch. Ewe Samon a pwonei kinamwe ngeni noun kewe chon kuno me mwen chok epwe feino senir. A pwan ani ei pwon rech. Nge a asasa pwe epwe awora kinamwe non an napanap esap napanapen fonufan. A awewe usun an awora kinamwe ren:

“Nge ewe Chon Echip, I ewe Ngun mi Fel, minne ewe Sam epwe tinatiw fan itei, epwe aitikemi mettoch meinisin, me chemato mettoch meinisin minne ua apasa ngeni kemi.

“Kinamwe ua ngenikemi, ai kinamwe ua ngeni kemi: esap non napanapen fonufan ai ngeni kemi. Ousap mut ngeni netipemi epwe osukosuk, are niuokus.” (John 14:26–27).

Ekkewe anuon noun Mosaia mochen ena kinamwe otun ra poputani ar misin ngeni ekkewe chon Leiman. Nap seni ekis aurek nupwen ra apareni auchean ar angang, ra iotek fan iten apinukunuk. Iwe “ewe Samon a churi ir ren ngunun we, me apasa ngeni ir: Oupwe kinamwe. Iwe ra kinamweno” (Alma 17:10; nengeni pwan Alma 26:27).

Eni oua fen mochen ena kinamwe otun oua kuna weires me osukosuk chapur. Ekkewe anuon noun Mosaisa ra kaeo met minne ewe Samon a aiti Moronai. Ew kapasen surur fan itach: “Iwe ika aramas repwe feito rei upwe pwari ngeni ir ar apwangapang. Ua ngeni aramas apwangapwang pwe repwe tongeni tipetekison; iwe ai chen a naf ngeni aramas meinisin [ekkewe ra] etipetekisona inisir me mwei; pun ika ra etipetekisona inisir me mwei, me a wor ar nuku non ngang, iwe upwe fori mettoch mi apwngapwang repwe pochokun ngeni ir” (Ether 12:27).

Moronai a apasa pwe nupwen a “rongorong ekkei kapas,” a “kinamweno” (Ether 12:29). Ua apinukunu pwe repwe pwan ekinamwei ngeni kemi. Ekkewe ir rese kuna ar apwangapwang resap fefeita. Ami sinei usun ami apwangapwang ina ew feioch, pokiten a anisikemi oupwe tekison me akunu kemi ngeni ewe Chon Amanau. Ewe Ngun mi fel ese chok echipa kemi, nge mi pwan etufichi ewe Achasefan epwe angang non netipemi me ennetin siwinikemi. Ekkewe mettoch mi apwangapwang repwe pochokun.

Fan ekkoch Satan epwe sotuni ami nuku; mi fis ngeni meinisin noun Jises Kraist kewe chon kuno. Ami epet ngeni ekkei sossot ina om kopwe chiechi ngeni ewe Ngun mi fel. Ewe Ngun mi Fel epwe wato kinamwe ngeni ngunumi. Epwe pesekemi pwe oupwe sopweno non nuku. Epwe achemato ekkewe fansoun oua fen mefi ewe saramen me tongen Jises Kraist.

Eni achechem epwe ew me nein ekkewe niffang mi unusen auchea ewe Ngun a tongeni ngenikemi—ne “achema ngeni kemi mettoch meinisin minne [ewe Samon a fen] ereni kemi” (John 14:26). Eni ewe achem epwe ew ponuwen iotek, achemen ew angangen pristut, ew pungunon kapasen pwarata, ika achemen ew fansoun nupwen oua kuna angangen Kot non manauemi. Menin non ew ran mwach nupwen mi auchea ngeni kemi pochokun, ewe Ngun epwe achema ngeni kemi ekkei memef oua mefi non ei mwich. Ua iotek pwe epwe ina.

Ew achem ewe Ngun a kan soun wato ngeni ai ekiek ina ewe fansoun mwichen sakramen nekunion a fis non ew imwen soko mi for seni mecha non Innsbruck Austria, chommong ier a no. Ewe imw a nom fan ewe annen train. Ina epwe chok arap ngeni engon me ruemon aramas ra nom, ra mwot won sea ira. Napengen ir fefin, ekkoch kukkun me ekkoch watte. Ua kuna surun mas nupwen a pas ewe sakramen me nein ei kukkun mwicheich. Nge ewe manaman ua chemeni ina ewe saram ua kuna me non ewe soko. Ew fansoun neran me ese wor asamwacho, nge ewe rum a saram usun ita saramen neanowas.

Ewe saramen ewe Ngun a wesen saramaram non ena pwinin. Me ekkewe asamwacho ra etiwanong ewe saram ina netipen ekkewe Souneng mi tekison, ekkewe ra feito me mwen ewe Samon ne kutta omusomusen ar tipis me pwon ne chechemeni I. Ese weires ne chechemeni I, me achemen ena ran a amecheresi ngeniei ne chechemeni I me an Achasefan non ekkewe ier mwirin. Non ena ran a ponueta ewe pwonen ewe iotekin sakramen pwe Ngunun epwe nonom rech me a wato memefin saram me kinamwe.

Usun ami, ua fen kinisou ren chommong napanap ewe Samon a fen churiei me ren ewe Chon Ekinamwe nupwen ua mochen kinamwe. Nge Semach won Nang a aureki ach kinamwe me fefeita. “Chon Ekinamwe” ina ew chok me nein ekkewe napanap ewe Ngun mi Fel a awewetiw me non ekkewe pukefel. Iei pwan ew: Ewe Ngun mi Fel mi pwan awewetiw usun ena Ngun minne a emwenikich ne fori mi och, me sia fen pesepes pwe sipwe wanong ach apinukunuk non I (Nengeni D&C 11:12). Napengeni fansoun, ewe och epwe emwen ngeni kemi epwe pachenong aninnisin pwan emon epwe pwan angei kinamwe seni Kot.

Non an mirit, ewe Samon a wakeminong non tettenin mwich me klas non An Mwichefen. A fen fori ei pwe epwe anapano ami manaman ne fori mi och. Non ekkei tettenin mwich, a wor wisemi ne angang ngeni ekkoch fan itan. Ren awewe, ika en emon fopun, ka tongeni aisini noum pisop ika ami sou emwenin Ekkewe Fopun om kopwe anisi emon Fopun engon me wonu ika engon me fisu ier ewe a ekis “patapateno.” Eni ka kon sineochu nap seni ewe pisop ika ewe sou emwenin Ekkewe Fopun. Eni ka sinei pwa a mefi osukosuk non imwan ika non sukun ika fen me ru. Eni noum sou emwen resap sinei pwata ra mefi ne tingoreok om kopwe anisi, nge ewe Samon mi sinei, me a emweni an angang seni aurouren Ngunun.

Fetanochun om achocho epwe auchea an epwe wor ew manamanen siwin non netipom me pwan netipan ekkewe kopwe anisi—me mi auchea chiechien ewe Ngun mi Fel. I epwe mut ngonuk om kopwe kuna ewe Fopun mi patapateno usun ewe Samon a kuna. Ewe Samon a sinei netipach, me I a sinei tufichin netip ar repwe siwin. A tongeni churuk ren Ngunu we ne auroura tekison, omusomus, me tong.

Ena Ngun a tongeni auroura ekkewe kapas, angang, me tipepos mi murino ngeni emon chon masen siip ngeni ier ese nifinifin ne etiwa sefani emon nam ngeni ewe mwich. Me I a tongeni pesei netipen ewe mwich ne tongei me etiwa ewe siip mi mwonucheno, pwe nupwen a niwin, epwe mefi pwe a feito neim.

Ami manaman ne fori mi och usun ew mwichen noun Kot fopun epwe anongonong, won watten, ewe tipew me tong a fis nein ami mwich. Iei pwan ew niffang a feito seni ewe Ngun mi Fel.

Alma a weweiti ei. Ina pwata a sio ngeni noun kewe aramas “pwe esap wor anini fengen nefiner, nge repwe neneno mwer ren efou maas, repwe aea ew nuku me ew papatais, netiper repwe riri fengen non ew chok me non tong nefiner” (Mosaia 18:21).

Tipew fengen mi namwot ika pwe ewe Ngun mi fel epwe nom non ach sukun me non ach kewe famini. Nge oua fen sinei usun chok ai sinei pwe ei sokkun tipwe fengen me tong a weires sipwe anomu non neniach. Mi namwot sipwe chiechi ngeni ewe Ngun mi Fel pwe epwe suk mesach me kinamwe netipach.

Ua chemeni, fan ew ai ekieta emon noum at fisu ika wanu ier ewe a pochokun ne mwet won an pet epwe fen atano. Ua kamwochuno I ren afaran mi kukkun me ekieta ren am pwe nefengen.

Ewe Ngun mi Fel a wanong ekkei kapas non ai ekiek non fatafatoch. Mi chok mosonoson nge a ku netipei: “Ena emon aramas mi murino. Met na ka fori?” Ua apwetete ne watiw sefan won ewe pet me omusomus.

Iei a winiti emon mwan murino minne ewe Ngun mi Fel a fen mut ngeniei upwe kuna 40 ier a no. Ua kinisou fochofoch pwe we Samon a fen angasaei seni ekkei memef rese och ren an tinato ewe Ngun mi Fel ai upwe kuna emon noun Kot usun I a kuna.

Ewe etipew sia kutta non ach famini me non ewe Mwichefen epwe feito nupwen sia mut ngeni ewe Ngun mi Fel ne siwini met sia kuna nupwen sia nenefengen. I epwe anisi kich ne kuna fengenikich ren tong ennet, ewe nimenimochun tong an Kraist. Ausening ngeni ekkewe kapas an Mormon ra aea ne awewei tong ennet—me ewe aanen sipwe tufich ngeni:

“Tong ennet mi nikitu, me mi kirekiroch, me ese nonowo, me ese nuapas, ese kutta pwisin an, ese songokai, ese ekieki mi ngaw, me ese pwapwa non angangangaw nge a pwapwa non ennet, engino ngeni mettoch meinisin, nuku mettoch meinisin, apinukunuku mettoch meinisin, nukuchar ngeni mettoch meinisin.

Ina minne, ami [fefinei] achengicheng, ika ese wor ami tong ennet, ami mi namotongaw, pun tong ennet ese tongeni morono. Ina minne, kamwochuno tong ennet, minne mi nap seni mettoch meinisin, pun mettoch meinisin repwe morono—

Nge tong ennet ina ewe nimenimochun tong an Kraist, iwe a nikitu ngeni feinefeino; iwe ion a pwà pwe a wor ren atun ewe ranin soponon, epwe murino ren.

“Ina minne, ami pwi achengicheng, iotek ngeni ewe Sam ren unusen pochokunen netip, pwe oupwe ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist; pwe nupwen I epwe pwato sipwe usun chok I, pun ipwe kuna I usun wesewesen I; pwe epwe or ahc apinukunuk; pwe sipwe nimenimochuno pwan mwo usun I mi nimenimoch.” (Moronai 7:45–48).

Iei ewe mettoch Semach won Nang a mochen fan itemi, noun fopun auchea. Eni epwe usun ew mettoch mi towaweno, nge me ren, ami ouse towaweno. Iwe a churi kemi ren Ngunun an epwe ekinamwei kemi, pesei kemi, me auroura kemi ne nikitu.

Ua nikiti ngenikemi ai ennetin pwarata pwe ewe Sam mi sinei ami—a sinei mochenin netipemi me itemi—a tongei kemi, me a rongorong ngeni ami iotek, pwe Noun Achengicheng a tingor ngenikemi oupwe feito Ren, me ewe Ngun mi Fel a fiti kemi non ami achocho ne angang ngeni.

Pokiten ewe Achasefanin Jises Kraist, chiechien ewe Ngun mi Fel epwe epinano me nimeti ngunumi. Oupwe mefi ewe kinamwe minnei ewe Chon Amanau a pwonei epwe annomu ren noun kewe chon kuno. Ren ena kinamwe epwe pwan wor ew saramen epinukunuk me ew memmefin tong me saram seni ewe Sam me Noun we Anemon, ewe a emweni an Muu ren noun soufos mi manau. Ua pwarata non iten ewe Samon Jises Kraist, amen.