Mara M’Asomdwee na Medze Gya Hom

Me nkyerɛbaa adɔfo, wɔdze Nyame no Sunsum ehyira hɛn anafua yi. Nkenyan nsɛm ofi nkyerɛbaa baanodzifo a wɔyɛ ndam na ndwom no ahyɛ hɛn gyedzi dzen na wɔato hɛn pɛ mu dɛ yɛbesie ahyɛmudzi a yɛnye hɛn Ɔsor Egya dɔfo ayɛ no. Yeenya Ewuradze Jesus Christ ho dɔ na enyisɔ mbordo ama No werdam afɔrbɔ akyɛdze nwanwa no.

M’asɛm anafua yi yɛ kakra ara. Hɛn nyina yeenya asomdwee ho atsenkã anafua yi. Hɛn nyina yɛbɛpɛ dɛ dɛm asomdwee yi bi no yɛtaa tse no hɛnankasa hɛn mu, hɛn ebusua ebusua mu, nye nkorɔfo a woetwa hɛn ho ehyia no mu. Ɔkã kakra ma Oegya hɔn hɔ no, Ewuradze dze asomdwee bɔɔ N’esuafo no anohoba. Ɔabɔ hɛn so anohoba kor noara. Mbom Ɔkãa dɛ Ɔbɛma asomdwee wɔ nankasa No kwan do, nnyɛ wiadze n’akwan do bi a. Ɔkyerɛɛ No kwan a ɔdze asomdwee ba no mu:

“Na Okyigyinafo no a ɔyɛ Sunsum Krɔnkrɔn no a Egya no bɔsoma no wɔ me dzin mu no, ɔno na ɔbɛkyerɛkyerɛ hom ndzɛmba nyina: ɔbɛkaakaa hom dza makã akyerɛ hom nyina.

“Asomdwee na medze gya hom; mara m’asomdwee na medze mema hom. Mma hom akoma nntutu, eso mma ɔmmbɔ hu.” (John 14:26–27).

Nna Mosiah ne mbabanyin no hia dɛm asomdwee akyɛdze yi ber a wɔhyɛɛ hɔn asɛmpakã ase wɔ Lamanfo no mu no. Wɔtsee hɔn edwuma no ne kɛseyɛ ho nkã no, ɔmaa wɔdze enyimia bɔɔ mpaa hwehwɛɛ ho awerɛhyɛmu. Na “Ewuradze dze no Sunsum bɛseraa hɔn, na ɔsee hɔn dɛ: Hom nya awerɛkyekyer. Na wonyaa awerɛkyekyer.” (Alma 17:10; hwɛ Alma 26:27 so).

Ɔtɔfabi a, wo yamu a nkyɛ enya asomdwee ber a ehyia dza innyim n’ekyir na dza ɔyɛ dɛ ɔdze ɔhaw reba. Mosiah ne mbabanyin no sũaa adzesuadze no a Ewuradze dze kyerɛɛ Moroni no. Ɔyɛ kwankyerɛ ma hɛn nyina. Na sɛ adasa ba me nkyɛn a mebɛma woehu hɔn mberɛwyɛ. Mema adasa mberɛwyɛ ama wɔaabrɛ hɔn ho adze, na m’adom sõ [hɔn] nyina a wɔbrɛ hɔnho adze wɔ m’enyim no do; na sɛ wɔbrɛ hɔnho adze wɔ m’enyim, na wonya gyedzi wɔ mo mu a, nna mebɛyɛ ma ndzɛmba a ɔyɛ mberɛw no ahyɛ dzen ama hɔn”(Ether 12:27).

Moroni see dɛ ber a “[ɔ]tsee dɛm nsɛm yi no, [o]nyaa awerɛkyekyer” (Ether 12:29). Obotum ayɛ awerɛkyekyersɛm ama hɛn nyina. Hɔn a wonnhu hɔn mberɛwyɛ no nnutum nntu mpon. Iruhu wo mbɛwyɛ no yɛ nhyira ber a ɔboa wo ma inya ahobrɛadze na ɔdan wo kɔ Agyenkwa no hɔ. Sunsum no nnkyekye wo werɛ nko, mbom Ɔyɛ yɛmafo a Werdambɔ no dua do dzi dwuma dze sesã w’awosu ankasa no. Nkyii na ndzɛmba a ɔyɛ mberɛw no bɛhyɛ dzen.

Mber binom mu no, Satan botum agye wo gyedzi ho ekyingye; iyi to Jesus Christ esuafo nyina. W’akõban a edze begyina etsĩa dza ɔbɔ wo ntoa yinom nye ibesie Sunsum Krɔnkrɔn no dɛ wo damfo. Sunsum no bɛkã asomdwee nsɛm akyerɛ w’akoma. Ɔbɛhyɛ wo nkuran ma edze gyedzi akɔ kan. Na ɔdze dɛm mber no a itsee Jesus Christ Ne kan na No dɔ ho nkae bɛbrɛ wo.

Akyɛdze a ɔsom bo kɛse a Sunsum no botum dze ama wo nye erekaakaa. “Ɔbɛkaa hom dza [Ewuradze] akã akyerɛ hom nyina.” (John 14:26). Nkaadze no bɛyɛ mpaabɔ ne nyiano bi, asɔfodzi ayɛdze bi a agye, wo dasegye ho pisi, anaa ber bi a ihun Nyame N’akwankyerɛ nsa wɔ w’abrabɔ mu. Ibia ndaamba, ber a ibehia ahoɔdzen no, Sunsum no dze atsenkã ho nkaadze a irinya no nhyiamu yi ase no bɛbrɛ wo. Mobɔ mpaa dɛ iyi nyɛ hɔ.

Nkaadze kor a Sunsum no taa dze ba m’adwen mu nye sacrament nhyiamu bi a wɔyɛɛ no wɔ kyɛnse dan bi ase wɔ Innsbruck, Austria, mfe pii a abɛsen kɔ no. Nna dan no wɔ keteke kwan bi ase. Nyimpa du na no mboree kakra ara na wɔwɔ hɔ a, wɔtsenatsena ntaabow ngua do. Nna hɔn mu dodowara yɛ mbaa, binom mbofra binom mpanyin. Ber a wɔdze sacrament no rokɔ aporɔw wɔ mboanofo kumabaa mu no, muhun enyisɔ enyisuwa kyi. Metsee Agyenkwa No dɔ a Ɔwɔ ma dɛm Ahotseweefo no, na hɔn so wɔtsee. Mbom anwanwadze a mekaa no pefee no nye kan no a ɔhyɛɛ dɛm kyɛnse dan no mu mã a, ɔdze asomdwee nkã-tse bae no. Nna adze asã na ntokura biara nnyi ho, naaso dan no mu hyerɛnee tse dɛ ewiaber kan.

Nna Sunsum Krɔnkrɔn ne kan no ahyerɛn mbordo ara yie dɛm ewimbir no. Na ntokura no a ɔmaa kan bae no yɛ Ahotseweefo ahobrɛadzefo yinom hɔn akoma, hɔn a wɔaba Ewuradze enyim rohwehwɛ hɔn bɔn ho bɔnfakyɛ na worisi nketse dɛ wɔbɛkaa No aber nyina no. Nna ɔnnyɛ dzen dɛ ibɛkaa No ber no, na me nkaadze wɔ dɛm sũahu krɔnkrɔn no ho no ayɛ mberɛw ama me dɛ mebɛkaa No nye No Werdambɔ no, mfe pii no a woedzi do no. Dɛm da no anohoba no a ɔwɔ sacrament mpaabɔ mu no, dɛ Sunsum no nye hɛn bɛtsena no, hyɛɛ mã na dɛm ntsi ɔdze kan na asomdwee atsenkã bae.

Tse dɛ hom no, maada ho ase wɔ akwan pii mu a Ewuradze dze Ɔwerɛkyekyefo no abɛsera me ber a nna mihia asomdwee. Naaso hɛn Egya a ɔwɔ Sor nndwen hɛn ahotɔ nko ho, mbom hɛn ɔsorkɔ mpontu ho tsitsir ara. “Ɔwerɛkyekyefo” no yɛ kwan kor ara a kyerɛwsɛm mu no wɔdze da Sunsum Krɔnkrɔn no edzi no. Kor so nyi: “Na, afei, nokwar, nokwar, mese wo dɛ, fa wo werɛ hyɛ Sunsum no a ogya wo ma eyɛ papa” (N&A 11:12). Mpɛn pii no, papa no a Obegya wo ma ayɛ no bɛyɛ dɛ eroboa obi fofor ma oenya awerɛkyekyer efi Nyame hɔ.

Ne nyansaa mu no, Ewuradze dze hom aboa ano aba ekuwekuw na adzesũabea horow mu wɔ N’Asɔr mu. Ɔayɛ no dɛm ama wo tum a edze bɛyɛ papa no adɔɔ sõ. Ekuwekuw yinom mu no, hom wɔ asɛdze pɔkyee dɛ hom som binom ma No. Mfatoho, sɛ eyɛ young woman a, wo bishop anaa wo Young Women baanodzifo botum aserɛ wo ma ahwehwɛ Laurelnyi bi a ɔayɛ ma ɔtɔfabi a yɛfrɛ no “less active” no. Ibia, ibohu no yie akyɛn ma Bishop no anaa Young Women baanodzifo no nyin no. Bi a na inyim dza ɔhaw no wɔ fie anaa skuul anaa ebien no nyina mpo. Wo baanodzifo no bi a na wonnyim sianstir a wonyaa nkenyan dɛ wombisa wo ma kɔhwehwɛ no no, mbom Ewuradze nyim, na Odua No Sunsum mu nkenyan no do ma edwuma yi kwankyerɛ.

Wo mbɔdzembɔ ho konyimdzi behia nsesã anwanwadze wɔ ɔwo ankasa w’akoma mu nye young woman no a wɔasoma wo dɛ kɛgye no n’akoma mu—na dɛm ho hia Sunsum Krɔnkrɔn n’anyɛnkoyɛ. Sunsum no botum ama wo kwan ma ehu Lauralnyi no a ɔayɛ akɔtrɔbɔdwe no dɛ mbrɛ Ewuradze hu no no. Ewuradze nyim n’akoma na w’akoma, na Onyim dɛ akoma mu nsesã botum aba. Obotum Ɔdze No Sunsum asera hom beenu no dze ekenyan ahobrɛadze, bɔnfakyɛ na ɔdɔ.

Dɛm Sunsum no botum ekenyan nsɛm, ndzeyɛɛ na abotar no a ohia ma wo ma edze bɔto nsa afrɛ eguamba no ma ɔasan abɛkã nguan no ho. Na obotum akã nguan no a wɔwɔ Laurel adzesũabea no hɔn akoma ma wɔadɔ oguan no a ɔayew no, na wɔama no akwaaba, ama sɛ ɔsan ba a, ɔaatse nkã dɛ ɔaaba fie.

Hom tum a hom dze bɛyɛ papa dɛ Nyame Ne mbabaa hɔn kuw no gyina tsitsir ara, koryɛ na ɔdɔ a ɔwɔ hom mu. Iyi yɛ asomdwee akyɛdze kor so a ofi Sunsum Krɔnkrɔn no mu ba.

Alma tsee iyi ase. Dɛm ntsi na ɔtotoe serɛɛ no nkorɔfo dɛ “mma wentwiwentwi mmba obiara nye no nua ntamu, na mbom wɔmfa enyiwa kor nhwɛ kan, wɔ gyedzi kor nye enuma kor mu, akoma wɔabɔmu wɔ koryɛ mu na wɔndodɔ hɔnho nkorkor” (Mosiah 18:21).

Koryɛ hia ma hɛn ama yeenya Sunsum no wɔ hɛn adzesũabea na wɔ hɛn ebusua ebusua mu. Mbom hom nyim, dɛ mbrɛ mo so minyim no, dɛ dɛm ɔdɔ koryɛ no, ɔyɛ dzen dɛ obetsim. Ɔgye yerenya Sunsum Krɔnkrɔn no dɛ adamfo a Obobue hɛn enyiwa na Ɔadwedwe hɛn nkã-tse.

Mekaa ber bi a hɛn mfe esuon anaa awɔtwe babanyin ruhuruhuruw wɔ ne mpa do ahoɔdzen mu a modween ho dɛ annhwɛ a obobu no. Abagura atsenkã bi twaa faa mo mu, na ntsɛmara mefaa kwan dɛ mebesiesie me fie yie. Metaam me babanyin ne krado kumaa no dze maa no do wɔ sor kɛpeem dɛ hɛn enyi hyiae.

Sunsum no dze nsɛmfua bi baa m’adwen mu. Ɔyɛ dɛ ndze komm bi, naaso ɔwɔɔ m’akoma mu: “Ikura nyimpa ɔkatakyi bi.” Menye no saanee sii mpa no no dzinn na mepaa no kyɛw.

Sesei wɔabɛyɛ nyimpa ɔkatakyi no a Sunsum Krɔnkrɔn no ma muhunii mfe eduonan a abɛsen kɔ yi. Ɔyɛ me enyisɔ kɔ bun mu dɛ Ewuradze somaa Sunsum Krɔnkrɔn no ma Ɔmaa muhun abofra bi dɛ mbrɛ Nyankopɔn hu no no, dze maa midzii m’atsenkã bɔn do nyim.

Koryɛ no a yɛhwehwɛ no wɔ hɛn ebusua ebusua na Asɔr mu no bɛba ber a yɛma Sunsum Krɔnkrɔn no kwan ma Onya nhyɛdo wɔ dza yehu sɛ yɛhwɛ hɛn ho nkorkor a—nna ma yɛdwen fa hɛnho nkorkor mpo no. Sunsum no dze Christ No dɔ mapã no hu adze. Hom ntsie nsɛmfua a Mormon dze kyerɛɛ ayamuyie mu. Hom ndwendwen ber hom nyaa atsenkã yi:

“Ayamuyie wɔ penkyɛr, ne yamu ye, na ɔnnyɛ ahoɔyaw, ɔnnhyehyɛ noho ɔnnhwehwɛ nonko nedze, no bo nnhaw no, ommbu emumuyɛ ho akontaa, onndzi dɛw wɔ dza ɔnntsen ho, na mbom odzi dɛw wɔ nokwar ho, ɔsoa adze nyina, ɔgye adze nyina dzi, ɔwɔ adze nyina mu enyidado, ɔsɔw adze nyina.

Dɛm ntsi, mo nuanom adɔfo [na menye nkyerɛbaa kã ho], sɛ hom nnyi ayamuyie a, hom nnsɛ hwee, osiandɛ ayamuyie nntwa abrɔdɔ. Dɛm ntsi, hom ntetar ayamuyie, ɔno na ɔsõ kyɛn adze nyina, osiandɛ ndzɛmba nyina bɔbɔ adze.

Mbom ayamuyie nye Christ no dɔ mapã no, na otsim hɔ afebɔɔ; na nyia wobohu dɛ ɔwɔ bi wɔ da a odzi ewiei no mu no, obesi no yie.

“Dɛm ntsi, m’enuanom [na nkyerɛbaa] adɔfo, hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hom mã, dza ɔdze egu hɔn a wɔyɛ ne Ba Jesus Christ n’akãdofo nokwafo do no; ama hom aabɛyɛ Nyankopɔn ne mba ama ber a obopue no, yɛabɛyɛ dɛ ɔno, osiandɛ yebohu no dɛ mbrɛ ɔtse; ama yeenya dɛm enyidado yi; ama ɔaatsew hɛnho dɛ mbrɛ noho tsew no” (Moroni 7:45–48).

Iyi nye botae hom Egya a ɔwɔ Sor wɔ ma hom, Ne mbabaa a hom som bo no. Bi a ɔbɛyɛ wo dɛ botae a ɔwɔ ekyirekyir, naaso mbrɛ Ɔno osi hwɛ adze no, nnyi ekyir korakora. Ntsi Ɔdze No Sunsum bɛsera wo dze kyekye wo werɛ, dze hyɛ wo nkuran, na Okenyan wo ma ewɔwdo kɔ kan.

Megya hom me dasegye a otsim dɛ Egya no nyim hom—Onyim hom ehiadze na hom edzin—Ɔdɔ hom, na Ɔtse hom mpaabɔ. No Dɔba no roto nsa frɛ wo dɛ bra No hɔ. Na Wɔsoma Sunsum Krɔnkrɔn no ma Ɔbɔboa wo wɔ wo mbɔdzembɔ dɛ ibɔsom binom ama Hɔn.

Osian Jesus Christ No Werdambɔ no ntsi, Sunsum Krɔnkrɔn no ne daa daa anyɛnkoyɛ bɛsan na wɔatsew wo sunsum ho. Nkyii ibɛtse asomdwee no a Agyenkwa no bɔɔ anohoba dɛ Ɔdze begya N’esuafo no ne nkã. Dɛm asomdwee no dze enyidado a ɔhyerɛn na kan na ɔdɔ ho atsenkã a ofi Egya no na No Dɔba hɔ no ba, Ɔno a Odua nyikyerɛ a Ɔdze ma No nkɔnhyɛnyi tseasefo do dze dzi N’ahenman a ɔwɔ asaase yi do bano no. Megye ho dase wɔ Ewuradze Jesus Christ dzin mu, amen.