2010–2019
“I Kihong Kumwail Popohl”
Epreil 2017


“I Kihong Kumwail Popohl”

Kauno inoukihong Sapwelime Wahnparon ko meleilei ansou me E pahn mweselsang irailehr. E pil inoukidahr inouohte ohng kitail.

Riei Lih Kesemwpwalko, kitail kapaikidahr Ngehn en Koht pwohnget.Koul oh padahk koaros silehdier atail pwoson oh kalaudelahr atail ineng en kolokolte atail inou sarawi me kitail wiadahr rehn Samatail Nanleng limpoak-o. Kitail kehnehr kalaudlahn limpoak ong Kauno Sises Krais oh kapingpen kisakis kesemwpwal sang ni meirong en Sapwellime tomwo.

Ahi padahk en pwohnget wia sawas mengei ehu. Kitail koaros kehnehr meleilei pwohnget. Kitail koaros kin men kehn soangen meleilei wet nan loaletail kan, nan atail peneinei kan, oh irail mehteikan. Kauno inoukiheong Sapwelime wahnparon kan meleilei ni ansou me e pahn mweselsang irailehr. E pil inoukidahr inouohte ohng kitail. Ahpw E ketin mahsanih me E pahn kihdo meleilei ni sapwelime koasoandi, kaidehn koasoandien sampah. E kawehwehda mwomwen pahn kihdo meleilei:

A sounsawaso, Ngehn Sarawi, me semei pahn paronehdo ni edei, iei Ih me pahn kawehweiong kumwail mehkan koaros, oh katakataman kin kumwail mehkoaros me I indahiong kumwailehr.

“I kihong kumwail popohl, pein ei popohl Mei kihong kumwail, I sohte kihong kumwail nin duen me sampah wet kin wia. Kumwail dehr insensued, oh pahtou, oh masak. ” (John 14:26–27).

Nein Mosaih pwutangko anahne kisakiso ni arail mweselda kohkolahng mehn Laman ko. Ni arail ekis salohki pwehki irail eseier uwen keper en seiloak o, irail kapakapki koapwoaroapwoar en mih rehrail.Oh “Kauno ahpw pwarehng irail ni Ah wia Ngehn, oh Mahsanihong irail: Meleilei en mih rehmwail, irail erinsenmwahula” (Alma 17:10; pil tehk Alma 26:27).

Ekei ansou, ke pahn anahnehda pepehm en meleilei ni ahmw pahn lelohng kahpwal kan me kin mwomwen me apwal douluhl. Nein Mosiah pwutak ko esehla kasukuhl me kauno kihong Moroni. E wia mehn kaweid ohng kitail koaros. “Ma meh men aleiehda I pahn kasalehieng ah luwet kan. I kihong ih luwet pwe en kak karakarahkla;oh Ien kak mahk ong [irail] koaros me kih iraildi mwohi;pwe ma irail karakarahkla mwohi, oh pwoson Ie, I pahn ale arail luwet akan oh wiahda en kak kehlaila rehrail” (Ether 12:27).

Moroni kosoia me ni ansou me e rong koasoaika,” e “ahnekidih meleilei” (Ether 12:29). Irail pil kak wia mehn kameleilei ohng kitail koaros. Irail me sohte kin kilangada arail kaluet kan sohte kin keirda. Ni ahmw kin kasawihda ahmw luwet akan e wia kapai iou,pwehki e kin sewese iuk en kak karakarahkla oh eleiong uhk en kin sohpeilahng Sounkomouro. Ngehno sohte wiahte soun kihonguhk meleilei, ahpw E wia aramas emen me kin sewese wekidala ahmw mour sang ni Tomwo. Me luet kan kin kehlaila.

Pak tohto ke pahn leldiong ansou me sehdan pahn kin song ahmw pwoson,e wiawihong her Sapwelimen Sises Krais wahnpoaron ko. Doarepomw me pahn pelianda kahpwal pwuka iei Ngehn Sarawi ni ah pahn wia kompokepahmw. E pahn lokaiahng uhk.E pahn kakehlailih iuk Ken kohkohwei ni pwoson.Oh e pahn kapwurehdo madamadau me ke ahneki ansou me ke kin kehn marain oh limpoak en Sises Krais.

Mehn ketemen kak wia ehu kisakis keiou kesemwpwal me Ngehno kak kihong uhk. E pahn “kapwurehdo soang koaros nan ahmw madamadau, me [Kauno ketin] mahsaniong uhk.” (John 14:26). Dahme ke pahn tamanda mwein wia pasapeng pen ahmw kapakap,sang tiahk sarawi en alehdi prihstuhd kan, kamehlelpen ahmw kadehdeh, de songen ansou me ke kilang an Kauno doadoahk en kaweid nan ahmw mour. Mwein ehu rahn, ma ke pahn anahne sawas en omw kehl, ngehno pahn kapwurehdo nan ahmw madamadau dahme ke pehmada nan kaudek wet. I kapakapki met en pweida.

Ehu madamadau me Ngehno kin kalapw kapwurehdo nan moangeie iei kaudek en kamadipw sarawien soutik iou pahr kei samwalahro nan Innsburk, Austria nan ihmw mete iou. E mihte pahn elen reil ieu. Sohte tohto aramas me iang,mwohd pohn sehr tuhke kei. Pali laud en irail lih ekei, ekei pwulepwul oh ekei mah. I kilang pilen meserail ni ansou me kamadipw sarawio wie nehne seli nan wasahn kaudek o. I kehn limpoak en Sounkomouro ohng irail oh irail pil kehn. Ahpw me kapwuriamwei mei tamtaman douluhl iei marain me kamarainiada nan ihmw metehu, me wahdo pepehm en meleilei. Soutik iou mwo oh sohte wenihmw ie, ahpw nan perehu marain peseng likamw marain en souwas iou.

Marain en Ngehn Sarawio me lingan oh laud wasahu ni soutiko. Oh wenihmw tok me marain o serehlongodo ko kameleileidi mongiong en souleng ko,me kohdo rehn Kauno raparaphki mahk pen diparail ko oh nannantieng en tamataman Ih ansou koaros. E sohte apwal en sohte tamanda Ih ansou o, oh ahi madamadau wet me pid Irair sarawio kiong ie ahl mengei en kak tamanda Ih pahr kei mwuri. Pepehm me mie inoupe nan kapakap en kamadipw sarawio me kosoia me Ngehno pahn mih rehtail pweida oh e wahdo pepehm en marain oh meleilei.

Duwehte kowe, I pil kapingki soang tohto me Kauno ieiang ie pwe en wia mehn Kameleilei ansou me I anahne meleilei. Apw Samatail Nanleng sohte kesemwpwalkihte popohl apw mehlel atail keirda. “Mehn Kameleilei” iei ehu mepwuhk sarawi kawehwehkihda Ngehn Sarawi. Iet pilehu: “Oh met, I ndahwei,koapwoaroapworki Ngehno, me kin kaluwaiuk en wia me mwahu” (D&C 11:12). Pak tohto, me mwahu me E pahn kaluwa iukalahng en wia pahn doke ken sewese emen tohrohr en alehdi popohl sang Kauno.

Nan Sapwelime koasondi, Kauno kihkumwail penehr nan wasahkei songen pereh kei nan Sapwelime Mwomwohdisoht. E wia met pwe en kak kalaudehla amw manaman en wia me pwung. Nan wasa pwuka, ke ahneki songen pwukoa iou sang Reh pwe ken kin papah mehteikan . Ni karasepe, ma ke wia peinakapw pwulepwul men, mwein pisop de Soun sawas en Serepein Pwulepwul kan pahn peki rehmw en sewesehda emen Mia Maid me solahr kin kohdo sarawi.Mwein ke pahn ese serepein menet mwahusang pisop de irail Soun Sawas en Serepein Pwulepwul kan. Ke mwein pahn ese ma e kin ahnkei kahpwal ni ah wasahn kousoan-o de ni ah imwen skuhlo de kakete ira koaros. Ahmw Kaun kan mwein sohte pahn kak wehwehki dahme songen pepehm en peki rehmw en sewese serepein men o, apw Kauno me mwahngih,oh ihme kainene wei doadoahk wet rehmw sang sawas en Sapwelime Ngehn Sarawi.

Ni amw pahn nantieng en sewesehla, wekidek iou pahn wiawi me pahn kapwuriamwei ong nan ahmw mohngiong oh pil en peinakapw me ke pahn sewesehu—oh met pahn anahne werek en Ngehn Sarawio. Ngehno pahn kieng uhk en kak kilang Laurel me solahr pwuredohu ni duwen Kauno ah kin kilang. Kauno mwangih ah mohngiong oh ahmw, oh mwangih koapworoapwor en mongiong me kin wekidekla. E pahn kak pwarek uhk Ni pali Ngehn pwe en kak kaperenih uhk ki karakarahk, mahk, oh limpoak.

Ngehno pahn kaweidkinuhk koasoai, pekpek, oh kanengamah me ke anahne pwe ken kak luke Simpwul salongalahu en pwurodo. Oh E pil kak sair mohngiong en Laurel kan en nan perehu en poakohng oh kasamwoh peinakapw salonglahu pwe ansou me e pahn pwurodo, en kak me e pwurodohr ah wasahn kousoan.

Ahmw manaman en wia me pwung ni ahmw wia Sapwelimen Kauno serepein, pahn doadaohk, ni ngoang, sang ni ehupene oh limpoak me mih rehmwail. Met iei me wia ehu kisakis en meleilei me kohdo sang Ngehn Sarawi-o.

Alma wehwehki soang wet. Ih met me karehda E peki rehn nah aramas ko, “irail en deh uhpene nan pwungarail, apw irail en kilengwei mwohrail ni pwaoren mahs tehiou, ahneki pwoson ehute oh pepdais ehute, arail mohngiong kan en katengteng pene ni arail wia ehu oh paokpene nan pwungarail” (Mosiah 18:21).

Kitail anahne ahneki ehupene pwe Ngehno en kak mih nana tail perehn kasukuhl kan oh nana tail peneinei kan. Ahpw kumwail esehier sang dahme kumwail lelohngehr, me dueiehte, me limpoak en ehupene wet sohte mengei en kolokol. Kitail anahne Ngehno pwehn kak ritingada mesetail kan oh kalolamwahuih kitail.

I tamanda, ehu ansou o nei sin pwutak sounpar isuh-de waluh wie lusulus laud pohn a pehto eri I medewe me e pahn ohla. I ahnekihdi pepehm en kapwunod ehu eri ngehi mwadangete koasoanehdi nan imweio. I poarok pene pwopwehu oh pwokada ileile me se kak kileng pene.

Ngehno kihongie lokaia nan ahi madamadau. E mwomwen ngihl tikitik ahpw e tengedi nan ei mohngiong: “Ke kolokol aramas kesempwal men.” I mwadangete kapwurehdi pohn pehto ngehi pekmahk reh.

Met e wialahr ohl kesempwal me Ngehn Sarawio indahngie sounpar 40[pahisek] samwalahro. I udahn kapingki mehlel pwehki Kauno Eh ketin kapitiehsang nan ahi pepehm sohte mwahuo sang ni E kadaredo Ngehn Sarawi pwehn kaweidkinie ien kilang seri men nin duen kauno e kin kilang.

Ehupene me kitail kin rapahki nan atail peneinei oh nan mwomwohdiso pahn pwarada ni ansou me kitail mweidong Ngehn Sarawi en doadoahk ansou kitail pahn kileng pene nan pwungatail—oh pil ansou me kitail kin medewe emen emen. Ngehno kin kilangki limpoak mehlel en Krais. Rong padahk me Mormon wiaier o ni ah karasa limpoak mehlel—. Medewehda ansou kan me ke kin kehn pepehmo:

“Limpoak mehlel me sohte imwi, e kin kadek,sohte peirin,sohte pohnmwahso,sohte rapahki pein ah pai, sohte kin mwadang luwetala, sohte medewe me suwed akan, oh kapingki dahme mehlel kaidehn me suwed akan,nantieng mehkoaros, kamehlele soang koaros, oh powehdi mehkoaros.

“Eri, riei ohl kesempwal oko [oh I kapatahieng riei lihoko], ma sohte limpoak mehlel rehmwail, sohte kowe mehkot, pwe limpoak mehlel sohte kin salongala. Eri, katengtengdiong limpoak me mehlelo, me iei me keiou sang mehkoaros,pwe soahng teikan kak sohrala—

Ahpw limpoak mehlel iei limpoak en Krais, oh kin dadaur kokohlahte;oh mehmen me kowahki lel imwin rahno, e pahn wia mehkot mwahu ong Ih.

“Eri riei ohl kesemwpwalko [oh I kapatahieng riei lih oko], kapakap kiong Kauno uwen ahmw kak koaros sang nan ahmw mohngiong, pwe ken kak audaudkihla limpoak wet, me e ketin pwilikihdier pohn Irail koaros me idawehn sapwellimen Kauno pwutak [oh serepein]; pwe irail en kak wiahla Sapwellimen Kauno [serepein];Eri ni asnou me E pahn pwarada, kitail pahn rasehngalaIh, oh kitail pahn kilang IH duwen IH;pwe kitail en kak ahneki koapworoapwor. Pwe kitail en kak mwakelekel la duwen ah mwakelekel” (Moroni 7:45–48).

Met wia koasoandi me Samatail Nanleng ketkihong uhk,Sapwellime serepein kesemwpwal akan.E pahn mwomwen wia koasoandi me pahn apwal en alahldi, apw sang ni Ah ketin mahsaniher, ke sohte wia soangen dohn. Eri E kin pwarek uhk ni Ah wia Ngehn pwe en kak ketkihwei meleilei, kakehlailihiuk, kaperenih iuk pwe ken kak wonlahte mwowe.

I pwilikihdi ahi kadehde mehlel me Samatailo mwahngihiuk—ese ahmw wiewia kan—poakohng uhk, oh kin karonge ahmw kapakap. Sapwellime Iehros limpoako kin luklukeiuk en kohdo Reh. Oh Ira kin kadaredo Ngehn Sarawi pwehn ieiang uhk ni omw kin nannanti oh sewese mehteikan ohng Ira.

Pwehki Tomw en Sises Krais, Ngehn Sarawi pahn ieianguhk oh pahn sewese kakehlailih oh doadoahk nan ngenomw. Koh ahpw pahn kehn meleilei me Sounkomouro inoukihong Sapwelime Wahnparonkoa. Oh pwehk meleileio, ke pahn ahnekihdi koapwoaroapwoar oh pepehm en marain oh limpoak sang Sahmo oh Sapwelime Ieroso, me kin kaukaweid sapwelime wehi pohn sampah sang ni kaudiahl kan me kin kohieng sapwelime soukohp ieias kan. I kadehdehki mepwukat ni mwaren kaun Sises Krais, amen.