« O to’u nei hau ta’u e hō atu nō ’outou »

E au mau tuahine here, ’ua ha’amaita’ihia tātou e te Vārua o te Atua i teie pō. ’Ua ha’apūai te mau parau poro’i fa’auruhia a te mau vahine fa’atere ’e te hīmene, i tō tātou fa’aro’o ’e ’ua fa’arahi i tō tātou hina’aro ’ia ha’apa’o i te mau fafaura’a mo’a tā tātou i rave i mua i tō tātou Metua here i te Ao ra. ’Ua ’ite tātou i te tupura’a i te rahi tō tātou here i te Fatu ia Iesu Mesia ’e te mauruuru nō te hōro’a nehenehe o tōna tusia tara’ehara.

E mea ’ohie roa tā’u parau poro’i i teie ’āru’i. ’Ua fāri’i tātou pā’āto’a i te hau i teie pō. Tātou pā’āto’a o te hina’aro nei e fāri’i pinepine i te reira huru hau i roto ia tātou iho, i roto i tō tātou ’utuafare ’e i roto i te mau ta’ata e ha’ati nei ia tātou. ’Ua fafau mai te Fatu i te hau i tāna ra mau pipi ’a fa’aineine ai ’oia e fa’aru’e mai ia rātou. ’Ua hōro’a ato’a mai ’oia i te reira fafaura’a ia tātou. Tera rā ’ua parau mai ’oia ē, e hōro’a mai ’oia i te hau mai te au i tāna ravera’a, ’eiaha mai tā tō te ao nei ravera’a. ’Ua fa’a’ite mai ’oia i tāna ravera’a nō te hāpono mai i te hau:

« Na te Fa’aa’o rā, nā te Vārua Maita’i ra, o tā te Metua e tono mai ma tō’u nei i’oa ra, Nāna e ha’api’i mai ia ’outou i te mau mea ato’a; ’e e fa’a’ite fa’ahou mai ho’i ia ’outou i te mau parau ato’a tā’u i parau atu ia ’outou na.

« E hau tā’u e vaiiho ia ’outou nei, ’o tō’u nei hau tā’u e hō atu nō ’outou; e ere mai tā tō te ao nei hōro’a tā’u hōro’a ia ’outou. ’Eiaha e taiā tō ’outou ’ā’au, ’eiaha ho’i e mata’u » (Ioane 14:26-27).

’Ua hina’aro te mau tamaiti a Mosia i taua hōro’a o te hau ra ’a ha’amata ai rātou i tā rātou ’ohipa i rotopū i te ’Āti Lamana. Mā te mana’o taiā ri’i i te ’itera’a i te rahi o tā rātou ’ohipa, ’ua pure rātou nō te tāmarū i te ’ā’au. E « ’ua h’ōro’a mai ho’i te Fatu i to’na Vārua ia rātou, e ’ua na ō maira ia rātou: Ia mahanahana ’outou. E ’ua mahanahana ratou » (Aalma 17:10; hi’o ato’a Alama 26:27).

I te tahi taime e mana’ona’o paha ’outou i te hau ia farerei ana’e ’outou i te tapitapi e i te mau fifi e fā maira. ’Ua apo mai te mau tamaiti a Mosia i te ha’api’ira’a tā te Fatu i ha’api’i ia Moroni. ’Ua riro te reira ’ei arata’i nō tātou pā’āto’a. « E ia tae mai te ta’ata ia’u nei, e fa’a’ite atu ai au ia rātou i tō rātou paruparu. Te h’ōro’a noa ra vau i te paruparu i te ta’ata, ia tupu tō rātou haeha’a ; e e au maita’i to’u aroha i te mau ta’ata ato’a i fa’ahaeha’a ia rātou iho i mua ia’u ra ; ia fa’ahaeha’a ho’i rātou ia rātou iho i mua ia’u, e ia fa’aro’o ia’u, ’ei reira e fa’ariro vau i te mau mea paruparu ’ei mea ’eta’eta nō rātou » (Etera 12:27).

’Ua parau Moroni ē, i tōna « fa’aro’ora’a i taua mau parau ra », « ua māhanahana » ’oia (Etera 12:29). E nehenehe te reira e riro ’ei tāmāhanahanara’a ia tātou pā’āto’a. Te feia e ore e ’ite i tō rātou paruparu, e ore ïa e haere i mua. Ia ’ite ’outou i tō ’outou paruparu, e riro ïa ’ei ha’amaita’ira’a, nō te mea, e tauturu te reira ia ’outou ia vai ha’eha’a noa e ia tape’a ia ’outou ia fariu noa i ni’a i te Fa’aora, inaha, e mana to’na nō te ha’apūai ia ’outou. E’ita te Vārua e tāmāhanahana noa ia ’outou, nā roto ato’a rā ho’i Iāna e fa’atupu ai te tāra’ehara i te hō’ē tauira’a i roto i tō ’outou nātura mau. E riro mai te mau mea paruparu ’ei mea pūai.

I te tahi taime e ha’afifi Satane i tō ’outou fa’aro’o; e tupu te reira i ni’a i te mau pipi ato’a a iesu Mesia. Tō ’outou paruru i mua i teie mau ’arora’a o te tāpe’ara’a ïa i te Vārua Maita’i ’ei hoa nō ’outou. E paraparau mai te Vārua i te hau i tō ’outou vārua. E tura’i ’oia ia ’outou i mua i roto i te fa’aro’o. E e fa’aho’i mai ’oia i te ha’amana’ora’a o te mau taime ’a ’ite ai ’outou i te maramarama e te here o Iesu Mesia.

E riro te ha’amana’ora’a ’ei hō’ē ō te mau hōro’a tao’a rahi tā te Vārua e nehenehe e hōro’a mai ia ’outou. Nāna « e fa’a’ite fa’ahou mai ho’i ia ’outou i te mau parau ato’a tā’u i parau atu ia ’outou na » (Ioane 14:26). Te ha’amana’ora’a, o te hō’ē ānei ïa pure i pāhonohia, te hō’ē ānei ’ōro’a nō te autahu’ara’a, te hō’ē ānei ha’apāpūra’a o te hō’ē ’itera’a pāpū, ’aore rā hō’ē ānei taime ’a ’ite ai ’outou i te rima o te Atua i roto i tō ’outou orara’a. Penei a’e i te hō’ē mahana i muri nei a hina’aro ai ’outou i te pūai, e riro te Vārua i te fa’aha’amana’o mai ia ’outou i te mau mana’o e tupu nei i roto ia ’outou i roto i teie purera’a. Te pure nei au ia tupu te reira.

Hō’ē ha’amana’ora’a tā te Vārua e tu’u pinepine mai i roto i tō’u ferurira’a, ’o te hō’ē ïa aru’i purera’a ’ōro’a tei fa’atupuhia i roto i te hō’ē fare vaira’a tauiha’a i Auteteria, e rave rahi matahiti i ma’iri a’e nei. Tei raro a’e te vaira’a tauiha’a i te hō’ē purumu terera’a pereo’o auauahi. Hō’ē tātini ana’e ta’ata i reira, i ni’a i te mau parahira’a ra’au i parahi ai. E vahine te rahira’a ō rātou, mea ’āpī te tahi, ’e e mea pa’ari te tahi. ’Ua ’ite au i te roi mata mauruuru ’a ’ōperehia mai ai te ’ōro’a mo’a i rotopū i teie ’āmuira’a iti. ’Ua ’ite au i te here o te Fa’aora nō te reira feiā mo’a, ’e mai te reira ato’a rātou. Tera rā, te temeio tā’u e ha’amana’o pāpū nei, ’o te māramarama ïa tei fa’a’ī i taua fare vaira’a tauiha’a ra, e tae noa atu i te hō’ē mana’o hau. E pō taua taime ra ’e ’aita ho’i e fa’aramarama, noa atu rā i te reira, ’ua māramarama te piha mai tō te mahana i te avatea.

E mea ’ana’ana ’e te pūai te māramarama o te Vārua Maita’i i taua ’āru’i ra. E te fa’aramarama tei vaiiho i te māramarama ’ia tomo mai i roto, ’o te ’a’au ha’eha’a ïa o te reira feiā mo’a, tei haere mai i mua i te Fatu nō te ’imi ’ia fa’a’orehia tā rātou mau hara ’e nō te fafau ’ia ha’amana’o tāmau noa Iāna. Nā roto i te reira, ’aita i riro fa’ahou ’ei ’ohipa ’eta’eta ’ia ha’amana’o Iāna, ’e na ta’u ha’mana’ora’a i taua ’itera’a mo’a ra i fa’a’ohie i tā’u ha’amana’ora’a iāna ’e tōna Tara’ehara i roto i te mau matahiti i muri mai. Te fafaura’a i roto i te pure nō te ’ōro’a maori rā, ’ia vai te Vārua i roto ia tātou, ’e nā te reira e hōro’a mai i te mau mana’o o te māramarama ’e te hau.

Mai ia ’outou, ’ua mauruuru vau i te mau ravera’a e rave rahi nō tō te Fatu tu’ura’a mai i te Fa’aa’o i te taime ’a hina’aro ai au i te tāmāhanahana. ’Aita rā tō tātou Metua i te Ao ra i feruri noa i tō tātou tāmāhanahanara’a, i tō tātou ato’a rā haerera’a i mua. « Te Fa’aa’o », ’o te hō’ē noa ïa o te mau tātarara’a o te Vārua Maita’i i roto i te mau pāpa’ira’a mo’a. Teie te tahi atu tatarara’a : « E i teie nei, ’oia mau, ’oia mau, te parau atu nei au ia ’oe ē, ’a fa’atae atu i tō ’oe ti’aturira’a i te reira Vārua o te fa’aarata’i atu ’ia rave i te ’ohipa maita’i » (PH&PF 11:12). Pinepine, te maita’i tāna e fa’aarata’i atu ia ’outou, ’o te tauturu ïa i te tahi atu ta’ata ’ia fari’i i te mana o te reira ato’a Vārua.

I roto i tōna pa’ari, ’ua tu’u te Fatu ia ’outou i roto i te mau pupu ’e te mau piha ha’api’ira’a i roto i tāna Ekalesia. ’Ua nā reira ’oia nō te fa’arahi i tō ’outou mana ’ia rave i te maita’i. I roto i teie mau pupu, e mau ’ohipa ta’a maita’i tā ’outou ’ia tavini ia vetahi ē Nōna. ’ei hi’ora’a, mai te peu ē, e feia āpī tamāhine ’outou, ’ua āni paha tō ’outou episekōpo ’e ’aore rā tō ’outou ti’a fa’atere feiā ’āpī tamahine ia ’outou ’ia haere e farerei i te hō’ē tārona tei riro, mai tā tātou e parau nei i te tahi taime, ’ei « mea paruparu ri’i ». E mea mātau a’e paha ’outou iāna i te ’ ’episekōpo ’aore rā i te ti’a fa’atere feiā ’āpī tamāhine. Te ’ite ra paha ’outou ē, te fifi ra ’oia i te fare ’aore rā i te fare ha’api’ira’a ’e penei a’e, i e to’opiti ato’a ra. ’Aita paha tō ’outou mau ti’a fa’atere i ’ite ē, nō te aha rātou i tura’ihia ai ’ia ani ia ’outou ’ia haere e fārerei iāna, te Fatu rā tei ’ite, ’e tē arata’i nei ’oia i teie ’ohipa nā roto i te fa’aurura’a a tōna Vārua.

E tītau te manuïara’a o tā ōuou mau tauto’ora’a i te hō’ē temeio o te tauira’a i roto i tō ’outou ’ā’au ’e i roto i tōna—’e e tītau te reira i te auhoara’a o te Vārua Maita’i. E nehenehe te Vārua e vaiiho ia ’outou ’ia hi’o i te tārona paruparu ri’i mai tā te Fatu e hi’o ra iāna. ’Ua ’ite te Fatu i tōna ’ā’au ’e i tō ’outou ’a’au, ’e ’ua ’ite ’oia i te mau rāve’a e taui ai te ’ā’au. E nehenehe ’oia e tu’u mai i tōna Vārua ia ’outou pā’āto’a nō te fa’auru i te ha’eha’a, te fa’a’orera’a hara ’e te here.

E nehenehe te reira Vārua e fa’auru i te mau parau, te mau ’ohipa ’e te fa’a’oroma’i e tītauhia i te hō’ē tia’i māmoe o te mau huru faito matahiti ato’a ’ia ani manihini i te hō’ē ’ārenio ’ia ho’i mai i roto i te nana. ’E e nehenehe tāna e ha’aputapū i te ’a’au o te nana ’ia here ’e ’ia fari’i maita’i i te māmoe mo’e ra, ’ia ho’i mai ho’i oiā ra, e ’ite ’oia ē, ’ua ho’i mai ’oia i te fare.

Tō ’outou mana nō te rave i te maita’i ’ei pupu tamahine na te Atua, tei te huru ïa, i te faito rahi roa, i te hō’ēra’a ’e te here e vai ra i rotopū ia ’outou. Teie te tahi atu hōro’a e tae mai nā roto i te Vārua Maita’i.

’Ua māramarama ’o Alama i te reira. nō reira ’oia i tāparu ai i tōna mau ta’ata « ’eiaha e mārō te tahi i te tahi, ’ia hi’o rā i mua ma te mata hō’ē, ’e ma te fa’aro’o hō’ē, ’e te bāpetizo hō’ē; ’e ma tō rātou ’ā’au i au-tahi-maite-hia i te au maite ’e te aroha, te tahi i te tahi » (Mosia 18:21).

Nō reira e mea faufa’a te hō’ēra’a nō tātou nō te fāri’i i te Vārua i roto i tā tātou mau piha ha’api’ira’a ’e i tō tātou utuafare. ’Ua ’ite rā ’outou mai ia’u ato’a nei nā roto i te mau ’itera’a ē, e ’ere i te mea ’ohie ’ia tāpe’a i te reira huru hō’ēra’a. Tītauhia ’ia fa’ariro i te Vārua Maita’i ’ei hoa nō te tāmarū i tō tātou ’ā’au ’e nō te iriti i tō tātou mata.

Te ha’amana’o nei au i te hō’ē taime, hō’ē tamaiti tā māua e hitu ’aore rā, e va’u matahiti i te ’ōu’au’ara’a i ni’a i tōna ro’i ma te pūai ’e ’ua mana’o vau ē, e nehenehe e pararī. ’Ua tupu ’oi’oi te au ore i roto ia’u, ’e ’ua ha’ape’epe’e au i te fa’atiti’aifaro i te fifi. ’Ua haru vau iāna i ni’a i tōna na tapono iti na’ina’i, ’e ’ua amo iāna i ni’a ’e tae roa mai i te faito o te mata ’e te mata.

’Ua tu’u maira te Vārua i te parau i roto i to’u ferurira’a. E au ïa i te hō’ē reo marū tera rā, ’ua puta roa i roto i to’u ’ā’au. « Te tāpe’a nei ’oe i te hō’ē ta’ata rahi ». ’Ua tu’u marū fa’ahou vau iāna i ni’a i te ro’i ’e ’ua tatarahapa atu.

I teie mahana ’ua riro mai ’oia i te ta’ata rahi tā te Vārua Maita’i i fa’a’ite mai ia’u a 40 matahiti i ma’iri a’e nei. E mauruuru mure ’ore tō’u i te Fatu tei fa’aora ia’u i te mau mana’o au ore nā roto i te tonora’a mai i te Vārua Maita’i nō te fa’ahi’o iā’u i te hō’ē tamari’i nā te Atua mai tāna i hi’o ra.

E tae mai te hō’ēra’a tā tātou e imi nei i roto i tō tātou ’utuafare ’e i roto i te Ekalesia nā roto i tō tātou vaiihora’a i te Vārua Maita’i ’ia arata’i i te mea tā tātou e hi’o, ’a hi’o ai tātou i te tahi e tahi. E hi’o te Vārua nā roto i te here mau o te Mesia. ’A fa’aro’o mai na i te mau parau tā Moromona i fa’a’ohipa nō te tātara i te parau nō te aroha—e te rāve’a e roa’a ai te reira ia tātou: ’A feruri nā i te taime ’a fāri’i ai ’outou i te reira:

« E fa’a’oroma’ira’a roa tō te aroha, ’e te hamani maita’i, ’e ’ore te aroha e fe’i’i, e ’ore te aroha e fa’arahi, e’ita e imi i te maita’i nōna iho, e’ita e riri vave, e’ita e mana’o ino ia vētahi ē, e’ita e ’oa’oa i te parau-ti’a ’ore; e ’oa’oa rā i te parau mau, e fa’a’oroma’i i te mau mea ato’a ra, e fa’aro’o i te mau mea ato’a ra, e tia’i i te mau mea ato’a ra, e ha’amāhu i te mau mea ato’a ra.

« Nō reira, e au mau taea’e here, ’aore o ’outou e aroha, ’aita roa a ’outou e faufa’a, e ’ore ho’i te aroha e mou. nō reira a ta’ati i te aroha, o tei hau i te mau mea ato’a ra, e mou ho’i te mau mea ato’a ra—

« ’O te aroha rā, o te hina’aro mau ïa i te Mesia, e ’ore roa ïa e mou ; e ’o te ’itea te aroha i roto iāna i te mahana hope’a ra, e maita’i ïa tōna.

« Nō reira, e au mau taea’e here, e pure atu i te Metua ma te pūai hope o te ’a’au ’ia ī ’outou i teie nei aroha, ’o tāna i hō mai i te ta’ata ato’a e pe’e mai i tāna tamaiti ia Iesu Mesia, ’ia riro ’outou ’ei tamari’i nā te Atua, ’e ’ia fā mai oiā ra, ’ua riro tātou mai iāna ra te huru ; e ’ite ho’i tātou iāna i tōna ra huru mau, ’e ’ia vai māite ā teie nei tia’ira’a i roto ia tātou, ’e ’ia tāmāhia ho’i tātou ato’a mai iāna i mā » (Moroni 7:45-48).

Teie te opuara’a a te Metua i te Ao ra nō ’outou, tāna mau tamāhine tao’a rahi. E mana’o paha ’outou ē, e opuara’a ātea te reira, i roto rā i tāna hi’ora’a, āita ’outou i ātea roa. nō reira tē h’ōro’a mai nei ’oia i tōna Vārua ia ’outou na nō te tāmāhanahana ia ’outou, nō te fa’aitoito ia ’outou, ’e nō te fa’auru ia ’outou ’ia haere tāmau noa i mua.

Te vaiiho atu nei au ia ’outou na i tō’u ’itera’a pāpū ē, ’ua ’ite te Metua ia ’outou—’ua ’ite i tō ’outou mau hina’aro ’e tō ’outou i’oa—’ua here ia ’outou, ’e te fa’aro’o mai nei i tā ’outou mau pure. Te ani manihini mai nei tāna Tamaiti Here ia ’outou ’ia haere mai Iāna ra. ’E e tono mai rāua i te Vārua Maita’i nō te tauturu ia ’outou i roto i tā ’outou mau tauto’ora’a ’ia tāvini ia vetahi ē nō rāua.

Nā roto i te tāra’ehara a Iesu Mesia, e fa’atupu te auhoara’a tāmau o te Vārua Maita’i i te mo’a ’e te mā i ni’a i tō ’outou vārua. I reira e ’ite ai ’outou i te hau tā te Fa’aora i fafau e vaiiho mai i tāna ra mau pipi. Nā roto i taua hau ra e tae mai ai te hō’ē tia’ira’a māramarama ’e te hō’ē mana’o māramarama ’e te here nō ō mai i te Metua ra ’e i tāna Tamaiti Here, ’o te arata’i nei i tōna bāsileia i te fenua nei, nā roto i te heheura’a i tōna ra peropheta ora. Te fa’a’ite pāpū atu nei au i te reira, nā roto i te i’oa o te Fatu ra ia Iesu Mesia, amene.