Raiburari
Ana Babaire ae Mimitong Tamara


Ana Babaire ae Mimitong Tamara

Ibukin ana babaire te Atua ae tabu, ti ataia bwa te bungiaki ao te mate bon taai aika kakawaki ni mwanangara nakon te maiu are akea tokina ma Tamara are i Karawa.

Ni moan au kataneiai n riki bwa te taokita, I karekea au tai ni buoka te tina ataei ni bungiakin ana moan nati. E maem, kakauongo, ao ni kukurei. Ngke e a tia ni bungia natina, I anganna natina bwa e na nooria. Ma raninmatana aika waanako iaon ubuna, e anaa te merimeri ni baina ao n tuoa rabwatana ni kabane. E koonna ni mwanokaia n aron ana tangira te tina. Bon te kabwaia menau n te ruu arei ma neienne.

N aron te bung bon moan waakin maiura ibukira ni kabane. Irarikina bungiakira bon te moan waaki? Te aonaaba e noora bungiakira ao matera n aron te moan ao te toki. Ma ibukin ana babaire te Atua ae tabu, ti ataia bwa te bungiaki ao te mate bon taai aika kakawaki ni mwanangara nakon te maiu are akea tokina ma Tamara are i Karawa.1 Bon ngaiia mwakoron ana babaire Tamara are i Karawa—taai aika tabu ngke te maiu n rabwata ao karawa a kaitibo. N te bong aei, n iangoa te bwai are I a tia n reiakinna man matakuakinan te bung ao te mate inanon au ririki ni kataneiai n taokita ao ibuobuoki n te Ekaretia, I kan kaota ana babaire ae mimitong Tamara.

“Imwaain bungiakira, ti maeka ma te Atua, taman tamneira. Ngaira [ni kabane] iaon te aba bon mwaanera ao tarira” inanon Ana utu,2 ao ngaira n tatabemaniira nako ti kakawaki Irouna. Ti maeka ma Ngaia n te tai ae rangin maan imwaain bungiakira n rabwata—reiakinaki, rinerine, ao te katauraoi.

Ibukina e tangiriira te Tama are i Karawa, E tangiriira bwa ti na karekea te bwaintangira ae moan te korakora are E kona n anga, te bwaintangira are te maiu ae akea tokina.3 E aki ti anganiira te bwaintangira aei; Aio e tangiria bwa tina nako mai irouna ao ni moana mwanangara ae Tamaroa ni kataakin ara onimaki, n rikirake, ao n riki bwa te aomata ae raoiroi. Te mwananga are e katauraoia Tamara ibukira e aranaki bwa te babaire ni kamaiu ke te babaire ni kakukurei.4

N te boowi ae bubura n te aonaaba n tamnei e tuangiira Tamara are i Karawa ibukin Ana babaire.5 Ngke ti mataata iai, ti rangin kukurei ao tatakarua ni kimwareirei, ma “n anene ma itoi ni ngaina.”6

Te babaire anne e kateaki iaon teniua boua aika moan te bubura: taian boua aika akea tokiia.7

Te moan boua bon Karikan aonaaba, bairean mwanangara n rabwata.8

Te kauoua ni boua bon Bwakaia ara moan karo iaon te aba, Atam ao Nei Ewa. Ibukin te Bwaka, ti anganaki tabeua bwaai aika kamiimi. Are tina bungiaki ao ni karekei rabwatara.9 I kakaitau n taainako nakon tinau ibukin karokoau ma tariu nakon te aonaaba ao n reireiniira taekan te Atua.

Te Atua e anganiira naba inaomatara—te konabwai ao tibwangara n rinerine ao ni mwakuri i bon ibukira.10 Ni buokiira n rinerine raoi, Te Tama are i Karawa e anganiira taian tua. Ni katoa bong, ngkai ti kawakin Ana tua, ti kaotia nakon te Atua bwa ti tangiria ao E kakabwaiai maiura.11

N ataakina bwa n taainako ti na bae n aki kona n rinerine raoi—nanona ti na kona ni, bure—Tamara e anganiira te kateniua ni boua: te Tia Kamaiu Iesu Kristo ao Ana Mwakuri ni Kamaiu. Rinanon korakaina, Kristo e kabooa matera n rabwata ao ara bure.12E reirei: “Ba E tangiri’a aomata te Atua n te aro are E anga natina ae te Rikitemanna iai, ba e aonga n aki mate ane onimakinna, ma e na reke i rouna te maiu ae aki toki.”13

Iesu Kristo e kororaoi maiuna, E kawakin ana tua Tamana n taainako. “E nakonako ni kawain Baretain,” e reirei koaua aika akea tokiia, e kamarurungiia aoraki, e karaoia aika mataki bwa a na nooraba, ni kateirakeia maate.”14 E “nakonako ni karaoa ae raoiroi”15 ao ni butiia ni kabane bwa a na iriira Ana katooto.”16

N tokin maiuna N rabwata, E katorobubua n tataro, e kangai:

“Tamau, ngkana e riai i Roum, Ko na uota nako te mangko aei mai Rou: ma akea au taeka, ma e na tauaki am taeka. …

“Ao e bati n rawawata nanona, ao e kakorakora ana tataro: ao maonona ai aron timtim n rara aika bubura, aika b’aka i aontano.”17

Kristo e buokira ni kamataataira raoi ni mwaitin korakaina ngke E tuanga te Burabeti Iotebwa Timiti:

E, taku te Tia Kamaiu, bwa e a tia ni korakai ni bwaai ni kabane ibukiia ni kabane bwa a aonga n aki korakai ngkana a rairi nanoia.

Ma ngkana aki rairi nanoia a na riai ni korakai n aron are e riki Nakoina;

Are te korakai are e karaoai, te Atua, te kabanea n korakora ibuakoia, n ruru ibukin te maraki, ao ni waanako te rara man bwangabwangan rabwatau, ni korakai n te rabwata ao n te tamnei.18

Ikanne n te Onaroka are Ketetemwane, E moana ni kabooi ara bure ao aorakira, marakira ao mamaarara.19 Ibukina E karaoia, ti na bon aki kona ni maroaa inanon mamaarara ngkana ti rineia n Iriiria. “E katikaki ao ni kabuakakaaki iaon bukibuki aika kewe, kabureaki ni kakukureia nanon te kamwarua, ao ni motikaki taekana bwa e na mate iaon te kaibangaki i Korokota.” E [anga] maiuna iaon te kaibangaki ni kamaiuiia aomata ni kabane ibukin aia bure n te bwaintangira are e karaoia ae te kabanea ni korakora ibukiia ni kabane ake a maeka iaon te aba.”20

E kabwarabwara:

“Nooria, bon Iesu Kristo Ngai, are a kakoaua ibukina burabeti bwa e na roko nakon te aonaaba

“Ao Nooria, Ngai te ota ao maiun te aonaaba; are a kakoauaa ibukina burabeti ba e na roko nakon te aonaaba; ao I a ti a ni mooi n te mwangko ae mao are e a tia n anganai te Tama, ao e a tia ni mimitong te Tama irou ngke I katoka iaou buren aonaaba.”21

Ngkanne, ni moan bongin te wiiki,22 E uti man te rua ni mate ma rabwatana ae kororaoi, n aki manga kona ni mate. Ao ibukina ngke E karaoia, ngaia are ngaira naba.

I kakoaua bwa Kristo e bon uti man te rua ni mate. Ma n uti man te rua ni mate, E riai moa ni mate. Ao ngaia are ngaira naba.

Teuana te kakabwai ibuakon maiu bon namakinan kaaniau ma karawa inanon taai aikanne ngke I tekateka irarikin aia kainiwene aomata ngke a mate. N te moaningabong teuana tabeua te ririki n nako, I rin ruun teuana te onaoraki ae mena iai te aine ae mate buuna ae kakaonimaki are e kaentia. Uoman ibuakoia natina a tekateka ma ngaia. Ngke I nako rarikin ana kainiwene, I waekoa ni kunea bwa e aikoa korakai, ibukina bwa e a bon tibwa mate.

N tain te mate, e kaonaki te ruu ma te rau. Natina te aine a namakina te rawawata ma a namakina naba te raunnano ngkai a oota n te euangkerio, ma a on nanoia n te onimaki. A ataia bwa tinaia e aki mate ma e a okira mweengana.23 E ngae ngke inanon ara tai n rawawata, n taraakin ae aikoa kona ni keiakinaki taai akana a karawawata akanne ao e taraa ni katanginano te maiu, ti kona ni kunea karauannanora iroun te Tia Kamaiu ibukina ngke E marakin naba.24 Bon te kabwaia ngai ni menau inanon te ruu anne.

Ngkana ti mate, tamneira a kitani rabwatara ao ti nakon mwanekan mwanangara are imwiina, te aonaaba n tamnei. Bon te tabo n reiakinaki, rairannano, kabwarabure, ao n riki bwa te aomata ae raoiroi25 ike ti tataninga iai te Mangauti.26

N tabeua boong n taai aika imwaaira, aomata nako ake a ti ni bungiaki a na bane n uti. Tamneira ma rabwatara a na manga ikotaki nakon teia aika kororaoi. Aomata nako a na bane n uti, “ake a kara ao ake a uarereke, … mwaane ao aine, ake a buakaka ao ake a raoiroi,” ao “bwaai ni kabane a na manga kaokaki nakon aroia aika kororaoi.”27

Imwiin te Mangauti ti na karekea te kakabwaia ae kakannato ni motikaki taekara mairoun ara Tia Kamaiu, are e taku:

“N na burimaunia aomata nakoiu, bwa a na motikaki taekaia n aron aia mwakuri.

“Ao e na koro bukina bwa ane rairananona ma ni bwabetitoaki n arau e na nuai; ao ngkana e teimatoa n uaa te toki, nooria, e na bon akea ana bure imatan Tamau n te bong arei ngkana I tei ni motika taekan te aonaaba.”28

Ao ngkanne, rinanon Kristo ao Ana Mwakuri ni Kamaiu, ni kabane ake a rineia bwa a na Iriiria rinanon te onimaki, rairannano, bwabetito, ni karekea te Tamnei ae Raoiroi, ao n teimatoa ni uaa te toki,29 a na kunea bwa tokin mwanangaia bon karekean “tokin kawaia bwa taan bwaina te maiu are akea tokina.”30A na okira nakon mweengan Tamaia ni maeka ma Ngaia n aki totoki. Au kantaninga bwa ti na rinerine raoi.

E mwaiti riki ae riki nakon maiura nakon are e riki imarenan te bungiaki ao te mate. I kaoingkami n nakomai ao n iriira Kristo.31

I kaoiia kaain ana Ekaretia Iesu Kristo ibukiia aika Itiaki ni Boong aika Kaitira, ni katoa bong “nakomai nakon Kristo, ma ni kakororaoaki irouna, ao ma ni kakeai mai iroumi bwaai ni kabane aika tiaki aron Atua, … [bwa] rinanon waanakon raraan Kristo, … bwa [kam] aonga n riki ni mimitong, n aki memea.”32

I kaoiia naake a tuai kaaina te Ekaretia aei n nakomai ao ni wareka ana Boki Moomon ao n ongora irouia mitinare. Nakomai ao karekea ami onimaki ao rairi nanomi man ami bure. Nakomai ao bwabetitoaki ao karekea te Tamnei ae Raoiroi. Nakomai ao maiuna te maiu ae kakukurei, ni kaonaki ni maiun Kristo. Ngkai kam nakomai Nakoina ao ni kawakin Ana tua, I berita bwa kam kona ni kunea te rau ao te kantaninga n te maiu rabwata ae kaangaanga aei ao te maiu are akea tokina n te aonaaba are e na roko.”33

Ibukiia naake a rinanon koaua aikai ao tera bukin kitanan te Ekaretia irouia, I kaoingkami bwa kam na oki. Oki ngkai. Tamara ao te Tia Kamaiu a tangiriko. I kakoaua bwa Kristo iai mwaakana ni kaekai ami titiraki, ni kamaoi marakimi ao rawawatami, ao ni kabwarai ami bure. I ataia e koaua aei. I ataia bwa a koaua bwaai ni kabane. E maiu Kristo! Aio Ana Ekaretia. N aran Iesu Kristo, amen.