Plwacn Wolacna luhn Pahpah Tuhmasr

Ke luti luhk emet nga sie mwet ono, oruh sacohk luhk ah in kahsruh sie ninac fuhsr isus tuhlihk se met nahtuhl. El mihs, nuhnak suwohswohs, ac engan ah. Ke ahwowo ah isus, nga fihliyac ahwowo sacohk se nuh sel. Ke tong in engan puhtati liki muhtahl, el eislah ahwowo sasuc se nuh ke pahol ac ngwetngwet el ke sifac nuh ke kufun niyuck. El sruhkilyac el fototo ac luhngse el oacna ninac sefanna kuh. Sie puhlakihn wowo in wi infuckihl se inge yohrohl.

Insewowo yohk se ma muhtwacwacack luhn moul luhn kais sie sesr. Yac isus lasr uh muhtwacwackiyac nuh pwacye? Facluh uh liye isus ac misac ke muhtwacwacack ac sahflah. Tuhsruhk mweyen plwacn muhtahl luhn God, kuht etuh lah isus ac misac pa ip luhlahp se ke fuhfahsryucsr lasr nuh ke moul ma pahtpaht yurin Pahpah tuhmasr Inkuhsrao.¹ Elos pa ip yohk srihpac luhn plwacn luhn Pahpah tuhmasr—pacl muhtahl ke ma mahno ac inkuhsrao fahsrweni. Mihsenge, motkoi luhk ke ma nga etwaclah sin liyeyac isus ac misac ke yac luhk ke mwet ono ac kuhlwacnsap in Alu, nga kena fahkwelihk ke plwacn wolacna luhn Pahpah tuhmasr.

“Met liki kuht isuslac, kuht muhtana yurin God, El Pahpah luhn nguhnasr. Nuhkwewa [sesr] fin facluh pa tamuhlwel ac tahmtahel” nuh pwacye ke sucu Lal,² ac kais sie sesr sacohk nuh Sel. Kuht muhta Yohrohl ke yac ekahsr met liki isuslac in mahno lasr—etwaclah, sulaclah, ac ahkolah.

Mweyen Pahpah Inkuhsrao El luhngse kuht, El kena kuht in eisyuck mwe insewowo yohk emet El kuh in use, mwe sang se luhn moul ma pahtpaht.³ El tiac kuh in use mwe sang se inge na; kuht enenuh in eisyuck ke sulaclah El ac oruh Lal. Ma inge kai kuht in som Luhkwel ac muhtwacwacack fuhfahsryucsr wolacna ac upac ke luhlahlfongi, kapwack, ac eklac. Fuhfahsryucsr se Pahpah tuhmasr El ahkolah kacsr pahngpahng plwacn in molwelah kuh plwacn in engan.⁴

Ke toeni luhlahp met liki moul uh, Pahpah tuhmasr El sruhmuhn nuh sesr ke plwacn Lal.⁵ Kuht kahlwem ke, kuht engan nuh upac lah kuht lihksreni fahk ke engan, ac “itu luhn lututacng on tuhkweni.”⁶

Plwacn sacn pa muhsahyak nuh ke yot fokoko tolu: yot ke ma pahtpaht.⁷

Yot se met pa Muhsahyak luhn facluh, acn se ma ke fuhfahsryucsr mahno lasr.⁸

Yot ahkluo pa Puhtatlac luhn pahpah ac ninac tuhmasr se met, Adam ac Eve. Mweyen puhtatlac se inge, kuhtuh ma wolacna pa use nuh sesr. Kuht in kuh in isuslac ac eisyuck mahno se.⁹ Nga tarilacna ne tok nuh sin ninac kiyuck ke el isus tamuhlwel ac nga nuh ke facluh se ac luti kuht ke God.

God El oacyacpac use nuh sesr sukohsohk in sulwaclah—kuh ac mwe sang in sulwaclah ac oruh luhngse nuh lasr.¹⁰ In kahsruh kuht in sulwaclah wo, Pahpah Lucng El use nuh sesr masap. Lwen nuh kwewa, ke kuht ahkos masap Lal, kuht ahkkahlwemye nuh Sel God lah kuht luhngse El, ac El ahkinsewowoye moul lasr uh.¹¹

In etuh lah kuht ac tiac sulwaclah wo pacl nuh kwewa—kuh ke kahs sahyac, oruh ma koluk—Pahpah El use nuh sesr yot ahktolu: Mwet Lahngo se Jisus Kraist ac Iwaclah Lal. Ke kweok Lal, Kraist El moli misac luhn mahno ac ma koluk kwewana.¹² El luti, “Tuh God El lungse faclu ouinge: El ase Wen sefanna natul, tuh elos nuhkwewa su lulalfongi in el fah tia misa, a elos fah eis moul ma pahtpat.”¹³

Jisus Kraist El moulkihn sie moul suwohswohs, pacl nuh kwewa ahkos masap luhn Pahpah Tuhmwacl. “El fahsr ke inkacnek Palestine,” luti ma pwacye luhn ma pahtpaht, “ahkkweye mwet mas, oruh mwet kun elos in liye, ac ahkmoulyeack mwet misac.”¹⁴ El “tuh forfor in acn nuhkewa ac oru ma wo”¹⁵ ac “kwacfe mwet nuh kwewa in ukwe srihkasrak Lal.”¹⁶

Ke sahflahiyacn moul in mahno Lal, El sikuck muhtuhnte ac pruhe, fahk:

“Papa, fin ou lungse lom, eisla cum in keok se inge likiyuc. Tusruktu, in tia ou lungse luk, a lela ma lungse lom in orek.  …

“Ke arulacna yohk keok lal ke nunkeya, el kwafeang na in pre; ac fio kacl uh tultul oana srah nu fin fohk uh.”¹⁷

Kraist El tuh kahsrwekuht in kahlwem wo ke upaciyacn kweok Lal ke El fahk nuh sel Mwet Pahluh Joseph Smith:

Mwet Lahngo El fahk lah El kweok ke ma inge nuh sin mwet nuh kwewa elos in tiac kweok finne elos fah auliyak.

Tuhsruhktuh elos finne tiac auliyak, elos enenuh in kweok oacna El oruh.

Ke kweok oruh El—pwacyena God, yohk emet liki mwet—in kweok ke ma ngal, srah nuke pore nuh kwewa, ac kweok ke mahno ac nguhn kwewana.¹⁸

Ke acn we Imac Gethsemane, El muhtwacwacack in moli ke ma koluk lasr ac mwe mas lasr, kweok lasr ac ma suhfal lasr.¹⁹ Mweyen El oruh, wacngihn pacl an kuht sifacna ke ma kweok inge kuht fin sulwaclah in fahsr Tohkohl. “El eislah nuh ke kaclpous ac nuhnuhkuh ke kahs kikiacp, nuhnuhkuh sin ahkwoye mwet koluk, ac pahng in misac ke sahkseng soko fin acn Calvary.” Ke sahkseng soko ah “El sang moul Lal in moli ma koluk luhn mwet nuh kwewa ke sie mwe sang insewowo nuh sin mwet nuh kwewa suc fah moul fin facluh an.”²⁰

El Fahkwack:

“Liye, Nga pa Jisus Kraist, suc mwet pahluh fahkwack muh ac fah tuhkuh nuh facluh.

“Ac liye, Nga pa kahlwem ac moul luhn facluh; ac Nga tuh nihm ke kuhp mohkohl se ma P, ac tuh kaksyakihn Pahpah in eis muh feik ma koluk luhn facluh, ma Nga kweokkihn luhngse luhn Pahpah ke ma nuhkwewa e ke na muhtwacwacackiyac ah.”²¹

Na, ke lwen se met ke wik se,²² El moulyak liki tum ah ke sie mahno suwohswohs, in tiac sifilpac misac. Ac mweyen El oruh, kuht oacyacpac oruh.

Nga fahkwack lah Kraist El pwacye moulyak liki tum ah. Tuh in moulyak liki tum ah, El enenuh in misac met. Ac kuht enenuh pac.

Sulpac sie mwe insewowo yohk ke moul luhk uh pa in puhla fototoiyacn kuhsrao kac pacl nga muhtana ma siskacn mwet mas ke elos misac. Sa in sie lututacng yac ekahsr somlah, nga utyak nuh ke infuckihl ke lohm ono sin katinmas Mwet Luhlahlfongi ke Lwen-sahflah wo suc mas ke kacnsucr. Luo sin tuhlihk muhtwacn nahtuhl muhta yohrohl. Ke nga fahsr nuh ke siskacn on lal, nga sa in kahlwem lah el tilac kweok mweyen el tuhfahna misac.

Ke pacl sac luhn misac se, infuckihl se nwacklah ke mihs. Tuhlihk muhtwacn nahtuhl kain in ahsor emwem, tuhsruhktuh insiyaclos nwacklah ke luhlahlfongi. Elos etuh lah ninac kiyaclos el som tuhsruhk el fohlohk nuh lohm inkuhsrao.²³ Pwacye ke pacl ahsor emet lasr, ke pacl oacna pacl tiac fahsr ac moul uh oacna tiac fal, kuht kuh in konwacack mihs ke Mwet Lahngo lasr mweyen El kweok pac.²⁴ Puhlakihn se inge pa insewowo nuh sihk in oasr we ke fuckihl sacn.

Ke kuht misac, nguhnasr fahsr liki mahnosr ac som nuh ke ip tok ke fuhfahsryucsr lasr, facluh luhn nguhn. Acn se inge pa acn in etwaclah, auliyak, nuhnak muhnahs, ac eklac²⁵ ke kuht sano nuh ke sifil moulyak.²⁶

Ke lwen yohk se tuhkuh, mwet nuh kwewa suc isus ah fah moulyak liki tum an. Nguhnasr ac mahnosr fah sulpac fahsrweni ke ma suwohswohs. Mwet nuh kwewa fah sifil moulyak, “mwet mahtuh ac fuhsr kwewana, … mukul ac muhtwacn kwewana, mwet koluk ac mwet suwohswohs kwewana,” ac “ma nuhkwewa fah fohlohklac nuh ke luhmah suwohs la.”²⁷

Tukun sifil moulyak se kuht fah eis mwe insewowo yohk emet in nuhnuhnkuh sin Mwet Lahngo lasr, suc fahk:

“Nga fah kohlma mwet nuhkwewa nuh Yuruk, tuh elos in kuh in nuhnuhnkweyuck fal nu ke orekma lalos.

“Ac tukun ma inge, tuh kuhtwena mwet suc auliyak ac pacptaislac ke Inek ac fah sesseslah; ac el fin muhtweng ne ke na sahflah, liye, wacngihn mwactal Sihk ye muhtuhn Pahpah tuhmuhk ke lwen sac ke Nga fah tulac in nuhnuhnkuh facluh.”²⁸

Ac na, sel Kraist ac iwaclah Lal, mwet nuh kwewa suc sulwaclah in ukwe El ke luhlahlfongi, auliyak, pacptais, eis Nguhn Muhtahl, ac muhtweng ne ke na sahflah²⁹ fah konwacack lah sahflahiyacn fuhfahsryucsr lalos pa in eis “sahflah wolacna lalos in eis moul ma pahtpaht.” ³⁰ Elos ac fah fohlohk nuh Yohrohl Pahpah in moul Yohrohl ne tok ma pahtpaht. Lwelah kuht in sulwaclah wo.

Oasr ma puhspuhs ke moul uh liki ma ma sikyak inmahsrlon isuslac ac misac. Nga suli kowos in tuhkuh ac ukwe Kraist.³¹

Nga suli mempucr nuh kwewa ke Alu luhn Jisus Kraist luhn Mwet Luhlahlfongi ke Lwen-Sahflah in, lwen nuh kwewa, “tuhkuh nuh yurun Kraist, ac ahksuwohsyeyucklac Kacl, ac lahfwekihn kowos sifacna ke ma koluk nuhkwewa, … [lah] ke kahklah luhn srah luhn Kraist, … kowos [kuh in] eklac muhtahl, tiac fohkfohk.”³²

Nga suli elos suc tiacna mempucr ke Alu uh in tuhkuh ac riti Puk luhn Mormon ac lohngwack misineri an. Tuhkuh ac luhlahlfongi ac auliyak ke ma koluk lom. Tuhkuh ac pacptaislac ac eisyuck Nguhn Muhtahl. Tuhkuh ac moul se moul engan, ac nwacklah ke Kraist. Ke kowos tuhkuh nuh Yohrohl ac ahkos masap Lal, nga olwelah nuh suwos lah kowos kuh in konwacack mihs ac srihpac ke moul okahrkahr se ac “moul ma pahtpaht ke facluh tuhkuh.”³³

Nuh sin mwet suc puhlakihn ma pwacye inge ac ke kuhtwena srihpac fahsr liki, nga suli kowos in sulpac fohlohk. Fohlohk mihsenge. Pahpah Tuhmasr ac Mwet Lahngo Elos luhngse kom. Nga fahkwack lah Kraist El sruok kuh in topuk kihsensiyuck lom, ahkkweye ma ngal ac ahsor lom, ac nuhnak muhnahs ke ma koluk lom. Nga etuh ma inge pwacye. Kraist El moul! Pa inge Alu Lal. Ke inen Jisus Kraist, amen.