Karōk eo an Jemed ilo Ilan̄

Ilo kar jinoin ekkatak eo aō āinwōt juon taktō, ikar lukkuun utiej n̄an jipan̄ juon kōrā kōlo̧take ajri eo kein kajuon nejin. Ekar lukkuun meļak, ron̄jake wōt, im m̧ōņōņō. Ke nin̄nin̄ eo ekar ļo̧tak, ikar leļo̧k n̄an jinen. Ekar dān in kōm̧jaļaal turin mejān im m̧ōņōņō, ekar jubūri ajri in im kalimjeke jān bōran n̄an neen. Ekar lukkuun bakwiji im iakwe āinwōt an juon m̧am̧a maron̄ kōm̧m̧ane. Ikar jeraam̧m̧an bwe in pād ippān ilo ruum̧ eo.

Āinwōt in ekar waļo̧k n̄an kōj jinoin mour ko ad. Ak ļo̧tak eo aō ilo mour in ekar ke lukkuun jinoin eo? Laļ in ej lo ke ļo̧tak im mej āinwōt jinoin im jem̧ļo̧kin. Ak kōnke karōk eo ekwojarjar an Anij, jej jeļā bwe ļo̧tak im mej rej jet iien ko raorōk ilo iaļ in ad n̄an mour indeeo ippān Jemedwōj Ilan̄.¹ Rej m̧ōttan ko raorōk an karōk eo an Jemed—iien ko rekwojarjar ijo mour in im lan̄ rej ioon doon. Rainin, relikļo̧k ilo men eo ikar ekkatak jān aō lale ļo̧tak im mej ium̧win iiō in kamminene ko aō im jerbal in jipan̄ eo aō ilo Kabun̄ in, ikōņaan in kam̧ool kōn karōk in eaiboojoj an Jemed.

“M̧okta jān ad ļo̧tak, jekar mour ippān Anij, Jemān jetōb ko ad. [Kōj wōj] kajjojo ioon laļ in rej jem̧jān jem̧jati” ro ilo baam̧le in An,² im kōj kajjojo ej aiboojoj Ippān. Jekar mour Ippān ium̧win juon iien eaitok m̧okta jān ad ļo̧tak ilo mour in—ekkatak, kālet, im m̧aanjabpopo.

Kōnke Jemedwōj Ilan̄ ej iakwe kōj, Ekōņaan bwe jen bōk mennin letok eo eļaptata Emaron̄ in letok, mennin letok eo an mour indeeo.³ Ejjab maron̄ baj letok n̄an kōj mennin letok in; jej aikuj bōke jān ad kālet E im wāween ko An. Menin ej aikuj bwe jen em̧m̧akūt jān im̧aan Mejān im jino juon iaļ ekabwilōn̄lōn̄ im eapan̄ ilo tōmak, eddōkļo̧k, im erom. Iaļ in Jemād ekar kōpooje n̄an kōj ņaetan karōk in lo̧mo̧o̧r ak karōk in m̧ōņōņō eo.⁴

Ilo kar ko̧o̧njeļ eo eļap ilo mour eo m̧okta, Jemād ekar jiron̄ kōj kōn karōk in An.⁵ Ke jekar meļeļe menin, jekar lukkuun m̧ōņōņō bwe jekar lam̧ōj kōn lan̄lōn̄ im al ippān doon.⁶

Karōk in ej ekkal ioon katak kein jilu Kabun̄ in ej pedped ioer: Kōm̧anm̧an eo, Wōtlo̧k im Pinmuur eo.⁷

Pedped eo kein kajuon ej Kōm̧anm̧an eo an laļ in, kōm̧m̧an n̄an ito itak eo an laļ in.⁸

Pedped eo kein karuo, ej Wōtlo̧k eo an ro jined im jemād ilaļ, Adam im Iv. Kōn Wōtlo̧k eo, elōn̄ men ko rekabwilōn̄lōn̄ rekar letok n̄an kōj. Jekar maron̄ ļo̧tak im bōk juon ānbwin.⁹ Inaaj aolep iien kam̧oolol kōn jinō kōn an kar bōktok ļaddik ro jeiū im jatū n̄an laļ in im katakin kōm̧ kōn Anij.

Anij ekar barāinwōt letok anemkwoj in kālet—maron̄ im jeraam̧m̧an n̄an kālet im m̧akūtkūt n̄an kōj make.¹⁰ N̄an jipan̄ kōj kālet eo em̧m̧an, Jemedwōj Ilan̄ ekar letok n̄an kōj kien ko. Kajjojo raan, ilo ad kōjparok kien ko An, jej kwaļo̧k n̄an Anij bwe jej iakwe E im Ej kōjeraam̧m̧an mour ko ad.¹¹

Jej jeļā bwe jeban aolep iien kālet men eo em̧m̧an, ak ilo naan ko jet jerawiwi, Jemād ekar letok n̄an kōj pedped jilu—Rilo̧mo̧o̧r Jisōs Kraist im Pinmuur eo An. Jān en̄taan eo An, Kraist ekar kōļļā wōņāan eo kōn jim̧or mej in kanniōk im jerawiwi ko.¹² Ekar katakin: “Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”¹³

Jisōs Kraist ekar mour i juon mour ewāppen, aolep iien kōjparok kien ko an Jemān. “Ekar etetal ilo iaļ ko ilo Palestine, katakin m̧ool ko an indeeo, kōmour rinan̄inmej, kaloļo̧kjeņ ripilo, im kōjerkak ro remej.¹⁴ Ekar “etetal im kōm̧anm̧an em̧m̧an¹⁵ im kōm̧m̧an bwe aolep ren anōk waanjon̄ak ko An.”¹⁶

Ilo kar jemeļo̧k in mour eo An ilo lal in, Ekar bukwelōlō im jar, Ekar ba:

“Jema eļan̄n̄e Kwō kōņaan, Kwōn bōkļo̧k kab in jān Eō; a en jab ankil Aō a Am̧ wōt. …

“Im ilo An en̄taan Ej kaļapļo̧k An jar: im An menokadu āinwōt eļap pilin̄lin̄ in bōtōktōk e wōtlo̧k ioon bwidej.”¹⁷

Kraist ekar jipan̄ kōj meļeļe ļo̧k jon̄an en̄taan eo An ke Ekar jiron̄ļo̧k Rikanaan Josep Smith:

“Bwe lo, N̄a, Anij, Iaar en̄taan kōn men kein n̄an aolep, bwe ren maron̄ jab en̄taan eļan̄n̄e renaaj ukeļo̧k;

“Ak eļan̄n̄e reban ukeļo̧k renaaj aikuj en̄taan em̧ool āinwōt N̄a;

“En̄taan eo eaar kōm̧m̧an bwe N̄a, em̧ool Anij, eo Eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb—im Ikar kōņaan bwe In maron̄ kar jab idaak kap eo emeo̧, im jenlik.”¹⁸

Ilo kar jikin Kallib Gethsemane, Ekar jino kōļļāik wōņāāņ jerawiwi ko ad im nan̄inmej ko ad, metak im mōjņo̧ ko ad.¹⁹ Kōnke Ekar kōm̧m̧ane, jej jāmin makeļo̧k iaad ilo mōjņo̧ kein eļan̄n̄e jej kālet n̄an etetal Ippān. Ekar kalbuuj im kar kakkure kōn eņo̧ik ko rebōd, ņaruwōn n̄an kaju būruwōn juon rinana, im keen̄taan E ioon dōbwāāl eo ioon Calvary. Ilo ioon dōbwāāl eo, Ekar leļo̧k mour eo An n̄an pinmuur kōn jerawiwi ko an aolep armej ilo juon wāween juon mennin leļo̧k eļap ej bōk jikin aolep ro renaaj mour ioon laļ ”²⁰

Eaar kean̄:

“Lo, N̄aij Jisōs Kraist, eo rikanaan ro raar kam̧ool ke Enaaj itok n̄an laļ.

“Im lo, N̄aij meram eo im mour eo an laļ; im Iaar idaak jān kap meo̧ eo Jema eaar letok n̄an Eō, im kar kaiboojoj Jema ilo bōk Ioō jero̧wiwi ko an laļ” (^{3 Nipai 11:11}

Innām , ilo raan eo jinoin ilo wiik,²² Ekar jerkapeje jān lōb eo kōn juon ānbwinnin jerkakpeje im ewāppen, jamin bar mej. Im kōnke Ekar kōm̧m̧ani menin, jenaaj barāinwōt.

Ij kam̧ool bwe Jisōs Kraist em̧ool ekar jerkak jān lōb eo. Ak n̄an jerkak jān lōb eo, Ekar E eo jinoin n̄an mej. Im kōn menin jej aikuj.

Bar juon iaan kōjeraam̧m̧an ko reļļap an mour e aō ekar n̄an en̄jake epaake eo an lan̄ ilo iien kein n̄e ij jijet iturin armej ro rej etal jān mour in. Juon jibbon̄ jet iiō ko remootļo̧k, ikar deļo̧n̄ ruum̧ in aujipitōl eo an juon Rikwojarjar etiljek emej ļeo pāleen eo ekar kāānjer. Ruo iaan leddik ro nejin rekar jijet ippān. Ke ikar etal n̄an iturin peet eo an, ekar m̧ōkaj aō jeļā bwe ekar jako an en̄taan kōnke ej kab jako jān mour in.

Ilo iien eo ej jako, ruum̧ eo ekar obrak kōn aenōm̧m̧an. Leddik ro nejin rekar būrom̧ōj, ak būruweer rekar obrak kōn tōmak. Rekar jeļā bwe jineer ekar jako ak ekar jepļaakļo̧k n̄an kapijuknen eo an.²³ Men̄e ilo iien liajļōļ ko ad, ilo iien ko n̄e iien liajļōļ ko rej jāmin jako im mour in ejjab jim̧we, jemaron̄ lo kaenōm̧m̧an eo ilo ad Rilo̧mo̧o̧r kōnke Ekar en̄taan barāinwōt.²⁴ Ekar aō jeraam̧m̧an bwe in pād ilo ruum̧ eo.

Eļan̄n̄e jej mej, jetōb ko ad rej em̧m̧akūt jān ānbwinnid im jej etal wōt n̄an m̧ōttan eo juon an iaļ in ad, laļ eo an jetōb. Ej juon jikin ekkatak, ukweļo̧k, jeorļo̧k bōd, im erom²⁵ ijo jej kōttar Jerkakpeje.²⁶

Mae juon raan eļap, aolep ro rekar ļo̧tak naaj jerkak jān lōb ko. Jetōb ko ad im ānbwinnid renaaj bar koba ippān doon ilo juon nememein ewāppen. Aolep renaaj jerkakpeje, jim̧or ro reritto im reddik, jim̧or em̧m̧aan im kōrā, jim̧or rijerawiwi im riwānōk; “a men otemjej naaj kōjepļaakļo̧k naan jekjek eo eweeppān an.”²⁷

Ālkin Jerkakpeje eo jenaaj bōk kōjeraam̧m̧an eļap n̄an ekajet jān Rilo̧mo̧o̧r eo, eo ekar ba:

“Inaaj kan̄ōltok armej otemjej n̄an Eō, bwe ren maron̄ ekajet ekkar n̄an jerbal ko aer.

“Im enaaj waļo̧k, bwe eo ej ukeļo̧k im ej peptaij ilo Eta enaaj obrak; im eļan̄n̄e e ej niknik n̄an jem̧ļo̧kin, lo, Enaaj ejjeļo̧k ruōn im̧aan Jema ilo raan eo n̄e Inaaj jutak n̄an ekajet laļ.”²⁸

Innām, jān Kraist im Pinmuur eo An, aolep ro rej kālet n̄an ļoor E kōn tōmak, ukweļo̧k, peptaij, bōk Jetōb Kwojarjar, im niknik²⁹ renaaj lo bwe jem̧ļo̧kin iaļ eo aer ej n̄an bōk mejān kajjik eo eaiboojoj āinwōt rijolet ro an mour indeeo”³⁰ Renaaj jepļaakļo̧k n̄an im̧aan mejān Jemād n̄an mour Ippān n̄an indeeo. Jemaron̄ kālet kālet eo em̧m̧an.

Eļap ijo kōn mour eo m̧okta jān ta eo ej waļo̧k ikōtaan ļo̧tak im mej. Ij karuwaineneik kom̧ n̄an itok im ļoor Kraist.³¹

Ijar karuwaineneiki aolep membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata n̄an, kajjojo raan “itok n̄an Kraist, im weeppān ilo E, im kaarmejjete kom̧ make jān aolep men ko rejjab em̧m̧an, … [bwe] kōn to̧o̧rļo̧k in bōtōktōkin Kraist, … kom̧ [maron̄] kwōjarjar, ejjeļo̧k libbijinjin.”³²

Ij karuwaineneiki ro rej jan̄in membōr in Kabun̄ in bwe kom̧win itok im riiti Bok in Mormon eo im ron̄jake mijenede ro. Kom̧win itok im bōk tōmak im ukweļo̧k jān jerawiwi ko ami. Itok im peptaij im bōk Jetōb Kwojarjar. Itok im mour juon mour em̧ōņōņō, mour ippān Kraist. Ilo ami itok n̄an E im kōjparok kien ko An, ij kallim̧ur bwe kom̧ naaj lo aenōm̧m̧an im unleplep in en̄jake ko reppen an mour in im “mour indeeo ilo laļ eo ej itok.”³³

N̄an ro rekar en̄jake m̧ool kein im kōn jabdewōt un ko rekar elļo̧k, ij karuwaineneik kom̧ n̄an ro̧o̧ltok. Ro̧o̧l tok rainin. Jemād im Rilo̧mo̧o̧r eo rej iakwe kom̧. Ij kam̧ool bwe Kraist ewōr an kajoor n̄an uwaake kajjitōk ko am̧, kōmour metak ko am̧, būrom̧ōj ko, im jeorļo̧k jerawiwi ko am̧. Ijeļā menin em̧ool. Ijeļa bwe men kein rej m̧ool. Kraist ej mour! En̄in ej Kabun̄ eo An. Ilo etan Jisōs Kraist, amen.