Sel Klebokel el Uldesuel a Demad

Sel luchele a omesubek el mo toktang, eng mla er ngii a techellek el mo olngeseu er a chedil el mechelii a kot el ngelekel. Ng mle chelelakl, omtab, e ungil a rengul. Sera lemechell ngika el tolechoi, eak ngilu el msang. Ma iuechel a medal a mereberebt eleng ungil a rengul, e milechulii ngikal tolechoi e omes er a btelul el mo er a ochil. Ngulureked er ngii e oubeltik el reng el mo er ngii el dital chedil a sebechel uaisei. Ng kmal mle ungil techall el kblara cheslel tial delmerab lobengkel.

A cheroll a uchelel a klengar el merkid el rokui. Engdi a cherelled kmal mle uchelel? A beluulechad a medengei el kmo a cheroll ma kodall a uchelel ma ulebengellel. Engdi sel chedaol moktel a Dios, e kid a medengei el kmo a cheroll ma kodall a di meklou a belkul tekoi er tial omeroled el mo er a diak a ulebengelel klengar lobengkel a Demad er a Babeluades.¹ Aikang a meklou a belkul er sel moktel a Chedam—sel chedaol el taem el klengar er a tech ma babeluades a mo kebetech. Chelchang, sel kumedasu aikel blak suubel el kirel a cheroll ma kodall er a chelsel aikal rak er a kltoktang ma urelel a Ikelesia, eng soak louchais er tial klebokel el moktel a Chedam.

“Sera uchei er a demechell, e kid a mle kiei lobengkel a Dios, el Chedam er a delbenged. Kid [rokui] el ngara tial beluulechad a rodam e rodos” er a telungalek er Ngii,²e ta ma ta er kid a meringel el chad el mo er Ngii. Kid a mle kemanget el taem Dobengkel kiei er a uchei er a cherelled er a tech—el mesuub, melilt, e mengedmokl er kid.

Ele Demad er a Babeluades a betik a rengul er kid, Ngii a soal meskid a kot el lungil sengk, el sengk er a diak a ulebengelel klengar.³ Ng dimlak el dil beot er ngii a meskid tial sengk; kid a nguu tial sengk sel dolilt el mo oltirakl er Ngii ma Omerolel. Meng kired el remiid er a bita er Ngii e omuchel er a ungil ma omlasm el omerolel a klaumerang, omekeroul, el mo ungil chad. Tial omerael el Demad a kildmeklii el mer kid a domekedong er ngii el moktel er a olsobel malechub eng klou el luldaseu el kirel a deureng.⁴

Sel klou el ongdibel er a uchei er a beluulechad ea Chedam a uluchasi er kid el kirel tial Moktek.⁵ Sera bo dodengelii tiang, e kid a kmal mlo ungil a rengud meke doldiu loba deureng, e sel “mochu tutau e a btuch a dilak el mengitakl.”⁶

Tial moktel a mlokedechor lokiu a edei el meklou el chelsakl: el chelsakl er a diak ulebengelel klengar.⁷

Sel kot el chelsakl a Blebelel a beluulechad, el luchelel a klengar er a tech.⁸

Sel ongeru el chelsakl sel Rebetir a re mle kot el demad ma delal er a beluulechad. Eleng uchul tial Rebetel, e mlor ngii a ungil tekoi el mer kid. Kid a mlo sebeched el mo mechell e nguu a bedenged er a tech.⁹ Ak blechoel mereng a sulel a delak el milchellak ngak me a rodam er ngak el mer tial beluulechad e olisechakl er kemam el kirel a Dios.

A Dios a dirrek el mla meskid a mimokl el lomelilt—el techal el sebeched el melilt e meruul a tekoi el kired.¹⁰ Meng ngolngeseu er kid el mo melilt er a llemalt, ea Demad er a Babeluades a mla meskid a llechul. Bek el sils, sel doltirakl a Llechul, e kid a ochotii el mo er a Dios el kmo betik a rengud er Ngii, e Ngii a mo omekngeltengat a klengar er kid.¹¹

Klaumodengei el kmo kid a diak de blechoel melilt er a llemalt—e le kede mo meruul a klengit— ea Chedam a milskid sel ongedei el chelsakl: el Osobel el Jesus Kristo me a Tngakireng er Ngii. Ngokiu sel ringel el mlo er Ngii, a Kristo a mlo kokad a kengtil a beluulechad.¹² Ngulisechakl: “E le Dios a kmal mle betik a rengul er a beluulechad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”¹³

A Jesus Kristo a mle cherungel a klengar er ngii, el blechoel loltirakl a llechul a Demal. “Ngii a milrael er sel rael er a Palestine,” lolisechakl er a klemrang er a diak a ulebengelel, “omekungil er a resmerch, rulterir a remiku el mo omes, e ulkisii a mla mad el chad.”¹⁴Ngii “mirrael a bek el beluu el meruul a ungil”¹⁵ e ultkeu er a “rokui mebol loltirakl a Teletelel.”¹⁶

Sel ulebengelel a klengar er Ngii er a beluulechad, Ngii a mlo outibaruach e meluluuch, el kmul uasei:

“Chedam, a lungil er a rengum, e mnguu tial kob er a ringel el choridii er ngak: ngdi motirkelii a soamm elak el sel soak. …

“Ng kmal mlo chuarm er a ringel me ng mengal mlo blak a rengul el meluluuch: ma klsbengel a mlo ua ngimech el rasech el olechars er a chutem.”¹⁷

A Kristo a ngilsukid el mo ungil medengelii sel telkelel a ringel el mlor Ngii meng dilu er a Profet Joseph Smith:

Ngak, el Dios, a mlo kurusii er a ringel el kiriu el rokui, meng diak bora ringel alsekum ke mo melubet a kengtemiu;

Engdi alskeum diak lebo lolubet a kengterir e te mo er a ringel el uai Ngak;

El ngii el ringel a rirelak, ma Dios, el mesisiich er a rokui, el mo merteritem eleng tial ringel, e mo mersersech er a bek el telmerums, e mlo meringel a bedengek er a tech ma reng.”¹⁸

Meng mora tal chutem el Gethsame ngklel, meng mocha harau er a blals r a kengtid, sechered, ma ringel.¹⁹ Eleng Ngii a milruul aikang, kid a diak dil bol kid er a ikel ringel alsekum kid a melilt el mo oltirakl er Ngii. “Ngii a mlo kelbus el kirel a omeruul el dimlak loruul, el mlo kerekeriil er tirkel mekngit el chad, ea kelbsengel a mo medeel er a kerus er a Calvary.” Meng ngar “tial Kerus [eng] ngiluu a klengar er ngii el mo kokad aikel kengterir a rechad el [ngii] a kot el ungil sengk el mo er tirkel kiei er a beluulechad.”²⁰

Ng dilu:

“Kamomes, Ngak el Jeus Kristo, el reprofet a uluchais el kmo ngmei er a beluulechad.

“Me kamosang, ngak a llemesel, e klengar r a beluulechad; me ak mla melim r a kob er a mechuuached el Edam a milskak, e mla msa klebkall a Edam, ra kngai el chemol a kengtil a beluulechad.”²¹

E, sel kot sils er a sandei,²² Ngii a mikliis er a delbull el cherungel a bedengel, el diak el luut el mad. Eleng Ngii a rirelii, kid me kede mo mekiis er a kodall.

Ak ouchais el kmo a Kristo a meral milekiis er a debelel. Malsekum eng mo mekiis ra debelel, e ngii a kirel kot el mo mad. Me kid a dirrek el mo mad.

A tara dirrek el lungil kelngetengat er a kelngar er ngak a sel mo omelchesuar er a babeluades el kmeed raikel taem sel kdengchokl er a tia er a rechad el metkung. Tal tutau er a sesel rak ra mla memong, e serak soiis er a delmerab er a osbitar er a tal kedung el Uriur-klebesel el Santo el melakl el dil el kasinoma. A terung el ngelekel redil a dengchokl lobengkel. Sera kbo er a bita er ngii, eak mlo medengei el kmo mla mo diak el chau a ringel eleng mla mad.

Mesel tial kodall, e tial delmerab a mle mui er a budech. Tirkal rengelkel a redil a mle mekngit e ungil a rengrir er a osisiu el taem eleng klaumodengei er tir er a ebangkelio ea rengrir e mle mui er a klaumerang. Te mle medengei el kmo a derir a derir a diak blal mlad ngbai mla mengai mo remei el mo er a Dios.²³Maikel taem el kmal mekngit a rengud, el di uai a lak bol cheroid tial kengtil a rengud, ea klengar a diak lungil, ea Osobel a sebechel mengelim er kid er a chelbuul eleng Ngii a mlo er tial ringel el dirrek.²⁴ Ng mle kengri er ngak el mla er tial delmerab.

Sel demad, ea delbenged a tuobed er a bedenged e kid a morsel tara omerael, el mo er a sel beluulechad er a delbenged. Tiang sel basio ra omesuub, ouchel a klengit, osubes, e uaisei²⁵el mengiil er a Okiis er a kodall.²⁶

Aikel bebil sils el ngar medad, e tirkel rokui el milechell a mo mekiis er kodall. Ea delbenged ma bedenged a mo tang el cherungel. A rokui el chad a mo mekiis er a kodall, a re mechuodel me a “re ngeasek, , … me a sechal me a redil, me a re medengerenger me a re mekedung,” ea “rokui a molmuut er a smechel cherrungel.”²⁷

Uriur er a okiis er a kodall e kid a ngeltengat el Osobel a mo oukerkeriil er kid, el dilung:

“Eak mo mengdibel er a rokui el chad el mer Ngak, me bol mukerrekeriil el kirel a urerir.

“Meng diak el boliit, el ngikei el mo ouuchel a rengul er a kengtil e mo metecholb er a ngklek a mo mui; ea loutekangel mo er a ulebongel, kamorrenges, ngii a bokdung klikiid er medal a Demak er sel sils el bokdechor loukerrekeriil er a beluulechad.”²⁸

Meng uasei, ngokiu a Kristo me a Tngakireng er Ngii, e tirkel rokui el melilt el mo oltirakl er ngii loba klaumernag, ouchel a kengtil, techolb chelid, nguu a Chedaol Reng, e outekangel el mo er a ulebongel²⁹ a mo metik el mo sel omerolir el mla mo er a ulebongel a mo nguu sel “chedaol ulebongel el klengar.”³⁰ E tir a lemuut el mo kiei logngkel a Chedam el mo cherechar. A kulengit mebo dungil melilt.

Ng kmal betok a kired meruul er a delongelel a cheroll ma kodall. Ak siotai er kemiu el mei e moltirakl er a Kristo.³¹

Ak siotai er kemiu rokui el chad er a Ikelesia er a Jesus Kriso er a Uriur-klebesel el Santo, el bek el sils, “mei er a Kristo, me bo mecherrungel er ngii, e motngakl er a kau er a rokui el mekngit, …[el] loeak a mlechubel resechel a Kristo, …me [ke] mo chedaol, el diak a dimech er kau.”³²

Ak siotai tirkel kuk dirrekak el bol chad er a Ikelesia el mei e monguiu er a Babier er a Mormon e morenges er a re missionari. Mei a bo mou merang e mouchel a kengtim. Mei e bom metecholb e mnguu a Chedaol Reng. Mei me bom kiei lungil a rengum, el klengar er ngar ngii Kristo. Me sel omei er Ngii e moltirakl a Llechul, eak yaksok er kau el kmo ke mo metik a budech ma moktel er tial meringel el teletelel a klechad ma “diak a ulebengelel klengar er sel mei el beluulechad.”³³

Mo er tirkel mla remuul aikal okesiu er a klemerang ma ngidil ngeral uchul ke ilitii a ikelesia, ak siotai er kau me mluut el mei. Mluut el mei er a chelechang. A Chedam me a Osobel a betik a rengul er kau. Ak ouchais el kmo a Kristo ngar ngii a klisichel el mo onger a kerim, e omekungil a ringel ma klengit er reng el ngar kau, e ousubes a kengtim. Ak medengei tiang a merang. Ak medengei el kmo aikal rokui a klemerang. A Kristo a ngar! Tiang a Ikelesia er Ngii. Loba ngklel a Jesus Kristo, amen.