O Lo Tatou Leoleo Mamoe Lelei

Tatou te maua sina vaaiga i le uiga o lo tatou Tama Faalelagi pe a tatou iloaina Lona agaalofa na’ua mo tagata agasala ma talisapaia le eseesega Na te faia i le va o le agasala ma i latou e agasala.O lenei vaaiga itiiti e fesoasoani ia i tatou ia maua se “[malamalamaaga] sa’o o lona tagata, tulaga atoatoa, ma uiga paia”¹ ma o le faavae lea o le faatinoina o le faatuatua ia te Ia ma i Lona Alo, o Iesu Keriso. O le agaalofa o le Faaola e tusa lava po o a o tatou le atoatoa, e tosina atu ai i tatou ia te Ia ma faaosofia ai i tatou i a tatou tauiviga faifai pea ia salamo ma mulimuli ia te Ia. A oo ina tatou avea atili e faapei o Ia, tatou te aoao ia taulimaina isi e pei ona Ia faia, e tusa lava po o a ni uiga ma ni amioga faaalia.

O le aafiaga o le iloaina o le eseesega i le va o uiga faaalia o se tagata ma le tagata lava ia e tutotonu i le tusifaitau o le Les Misérables, a le tusitala Farani o Victor Hugo.² I le amataga o le tusifaitau, na folasia mai ai e le faamatalaupu o Bienvenue Myriel, le epikopo o Digne, ma talanoaina ai se faafitauli na feagai ma le epikopo. Pe tatau ea ona ia asiasi atu i se tagata na tautino mai e le talitonu i se Atua ma na inosia e le nuu ana amioga i le tuanai i Vevesiga i Farani?³

Na ta’ua e le faamatalaupu e faapea sa ono mafai lava ona lagona e le epikopo se lagona ita i lea tagata. Ona fai mai lea e le faamatalaupu se fesili faigofie: “Pe tatau ea i le leoleo mamoe ona aluese ona ua papala le mamoe?”⁴ I le tali atu mo le epikopo, na tuu mai ai e le faamatalaupu se tali maoti, “Leai”—ona faaopoopo mai lea o se tala mālie: “Ae ese foi lea mamoe sole!”⁵

I lenei fuaitau, ua faatusatusa ai e Hugo ia “vaivaiga” o le tagata i se faama’i o le pa’u i mamoe ma faatusatusa le epikopo i se leoleo mamoe o le e le aluese pe a faafeagai ma se mamoe ua ma’i. O le epikopo e agaalofa ma mulimuli ane i le tusi na faaalia ai lea lava agaalofa talitutusa mo se isi tagata, le tagata autu i le tusi, o se pagota inosia, o Jean Valjean. O le alofa mutimutivale ma le agaalofa o le epikopo na uunaia ai Jean Valjean e sui le auala o lona olaga.

Talu ai e faaaoga e le Atua faama’i e fai ma faatusa mo agasala i tusitusiga paia, e talafeagai lava le fesili faapea, “E faapefea ona tali mai Iesu Keriso pe a feagai ma o tatou faama’i faafaatusa—a tatou agasala?” Ae e pei ona fetalai le Faaola Na te “le mafai ona vaai i luga o le agasala ma sina tikeri itiiti o le faatagaina”;⁶ e mafai la faapefea ona Ia silasila mai ia i tatou, i lo tatou le atoatoa, e aunoa ma le aluese atu i le inoino ma le ita?

O le tali e faigofie lava ma manino. I le avea ai ma Leoleo Mamoe Lelei,⁷ e silasila mai Iesu Keriso i faama’i o Ana mamoe o se tulaga e manaomia ia togafitiga, tausiga, ma le agaalofa. O lenei leoleo mamoe, lo tatou Leoleo Mamoe Lelei, e mauaina le olioli i le silasila mai i Ana mamoe mama’i o agai i luma i le faamalologa.

Na muai ta’u mai e le Faaola o le a Ia “fafagaina lana lafu e pei o le leoleo mamoe,”⁸ “sailia foi le ua se, … [toe] aumaia le ua tulia, … fusia le ua gau, ma … faamalosia le [ua] vaivai.”⁹ E ui ina faaalia Isaraelu fouvale i se tulaga ua faataugaina i “manu’a, ma faalavalava, atoa ma le papala ua aati,”¹⁰ o le agasala, ae sa faamalosiau pea le Faaola, apoapoai, ma folafola mai le faamalologa.¹¹

O le galuega a le Faaola i la le tino sa faailogaina moni lava i le alofa, alofa mutimutivale, ma le agaalofa. Sa lei savali o Ia ma le faatauemu i auala pefu o Kalilaia ma Iutaia, ma tau soso mamao ese pe a vaaia tagata agasala. Na te lei aloese mai ia i latou i le faateia tele. Leai, sa Ia talisua faatasi ma i latou.¹² Sa Ia fesoasoani ma faamanuia, siitia ma faagaeetia, ma suia le fefe ma le faanoanoa i le faamoemoe ma le olioli. E pei lava ona avea o Ia ma Leoleo Mamoe Lelei, Na te sailia i tatou ma maua i tatou e ofo mai i ai le toomaga ma le faamoemoe.¹³ O le malamalama ai i Lona agaalofa ma le alofa o le a fesoasoani lea ia i tatou e faatino le faatuatua ia te Ia—e salamo ai ma faamaloloina.

O loo faamaumauina i le Talalelei a Ioane le aafiaga o le agaalofa o le Faaola i se tagata agasala. Sa aumai e le au Tusiupu ma le au Faresaio i le Faaola se fafine na maua tonu o mulilua. Sa mananao i latou na moliaina o ia e tatau ona fetogi o ia i maa, ia tausisia ai le tulafono a Mose. I le tali atu o Iesu i le tuu fesili mai pea, na iu ai na Ia fetalai atu ia i latou, “O so outou e leai sana agasala, ia lua’i togi se maa ia te ia.”

Sa o ese atu e na moliaina o ia, “ua tuua na o Iesu lava, ma le fafine o loo tu i totonu.

“Ua silafia [e Iesu] ua leai se tagata, ua na o le fafine lava, ona fetalai atu lea o ia ia te ia, Funa e, o ifea ea i latou na molia oe? ua le faasala mai ea se tasi ia te oe?

“Ua fai mai o ia, Le Alii e, e leai lava se tasi. Ona fetalai atu lea o Iesu ia te ia, Ou te le faasala foi ia te oe; alu ia oe, aua e te toe agasala.”¹⁴

E mautinoa lava, sa lei faatagaina e le Faaola le mulilua. Ae sa Ia le’i faasalaina foi le fafine. Sa Ia faamalosiau ia te ia e toe faafouina lona olaga. Sa faaosofia o ia e sui ona o le agaalofa ma le alofa mutimutivale [o Iesu]. O le Faaliliuga a Iosefa Samita o le Tusi Paia o loo faamaonia ai lona avea mulimuli ane ma soo: “Ma sa vivii atu le fafine i le Atua mai lena itula, ma sa talitonu i lona suafa.”¹⁵

E ui e agaalofa le Atua, ae e le tatau ona tatou talitonu sese Na te taliaina ma manatu e faia ni fetuunaiga i le agasala. Na te le faia lena mea. Na afio mai le Faaola i le lalolagi e laveai i tatou mai a tatou agasala ma, o le mea taua, e le mafai ona laveaiina tatou i a tatou agasala.¹⁶ O se tagata atamai fai fesili, o Seseroma sa taumafai e mailei Amoleka i le fesili atu: “O le a faaolaina ea [e le Mesia o le a afio mai] ona tagata ia latou agasala? Ma sa tali atu Amoleka ma fai atu ia te ia: Ou te fai atu ia te oe e lē faaolaina e ia, ona e lē mafai e ia ona faafitia lana afioga. …E le mafai ona ia faaolaina i latou ia latou agasala.”¹⁷ Sa tautala atu Amoleka i se upumoni taua e faapea ina ia faaolaina mai ia tatou agasala, e tatau ona tatou tausisia ia “tuutuuga o le salamo,” lea e faamatuu mai ai le mana o le Togiola e laveai o tatou agaga.¹⁸

O le agaalofa, alofa, ma le alofa mutimutivale o le Faaola e tosina atu ai i tatou ia te ia.¹⁹ E ala i Lana Togiola, ua le toe faamalieina ai i tatou i lo tatou tulaga o le agasala.²⁰ Ua manino lava le Atua i le mea e sa’o ma mea Na te taliaina atoa ai ma mea sese ma le agasala. E le o faia lenei mea ona ua finagalo o Ia ia i ai ni soo usiusitai e aunoa ma le mafaufau. Leai, e finagalo lo tatou Tama Faalelagi ia filifili Lana fanau ma le iloa ma le loto i ai ia avea e pei o Ia²¹ ma agavaa mo le ituaiga o olaga o loo Ia olioli ai.²² I le faia o lea mea, e ausia ai e Lana fanau o latou taunuuga paia ma avea ai ma ē mauaina mea uma ua ia te Ia.²³ Mo lenei mafuaaga, e le mafai ai e taitai o le Ekalesia ona fetuunaia poloaiga a le Atua po o aoaoga faavae e feteenai ai ma Lona finagalo, ina ia talafeagai pe lauiloa ai.

Peitai, i la tatou sailiga i le olaga atoa e mulimuli ia Iesu Keriso, o Lana faataitaiga o le agalelei ia i latou o e agasala e patino lava le faagaeetia. O i tatou, o e agasala, e tatau lava, ona pei o le Faaola, e aapa atu i isi i le agaalofa ma le alofa. O la tatou matafaioi foi o le fesoasoani ma faamanuia, siitia ma faagaeetia, ma suia le fefe ma le faanoanoa i le faamoemoe ma le olioli.

E aoa’iina e le Faaola tagata o ē ō ese mai isi ua latou vaai i ai o ni tagata eleelea ma ē e faamasino atu ma le faafiaamiotonu i isi ae e sili atu lo latou agasala i lo latou na.²⁴ O le lesona autu lena na faamamafa atu e le Faaola ia i latou na “faatuatua ia te i latou [lava] fa’i ua amiotonu, a e faaleaogaina nisi.” Na Ia fetalai atu i lenei faataoto:

“Na o ae i le malumalu tagata e toalua e tatalo, o le faresaio le tasi, a o le telona le tasi.

Na tulai le faresaio ua tatalo lemu atu i nei upu, Le Atua e, ou te faafetai atu ia te oe, ina ua ou le pei o isi tagata, o e fao mea, o e amio leaga, o e mulilulua, e le pei o lela telona foi.

“E tailua i vaiasosa ona ou anapogi, ou te avatu mea e sefulu a’i mea uma ou te maua.

“O le telona foi, ua tu mamao atu, e le mafaia ona tepa ae ona mata i le lagi, a ua pōpō lona fatafata, ua faapea atu, Le Atua e, ia e alofa mai ia te au le tagata agasala.”

Ona faamaea lea e Iesu e faapea, “Ou te fai atu ia te outou, na alu ifo lena tagata i lona fale ua ta’uamiotonuina, a e le faapea le isi [le Faresaio]; aua o se faamaualuga ia te ia, e faamaulaloina lea; ma o le faamaulalo ia te ia, e faamaualugaina lea.”²⁵

Ua manino lava le savali mo i tatou: o se tagata agasala ua salamo e latalata atili atu o ia i le Atua nai lo le tagata faafiaamiotonu ua ia ta’usalaina le tagata agasala.

O lagona faaletagata o le faafiaamiotonu ma le faamasino atu sa i ai foi i aso o Alema. A o “amata ona faatu atoatoa atili [e tagata] le ekalesia … sa amata ona faasolo faamaualuluga tagata o le ekalesia …sa amata ona fefete i luga tagata o le ekalesia i le faamaualuluga o o latou mata, … sa amata ona latou inoino, o le tasi i le tasi, ma amata ona latou sauaina ai i latou o ē sa le talitonu e tusa ma o latou lava loto ma filifiliga.”²⁶

I lenei sauaga sa patino lava le faasaina: “O lenei sa i ai se tulafono saʼolele i totonu o tagata o le ekalesia, ia leai se tagata e auai i le ekalesia, e tu aʼe ma sauaina i latou o e e lē auai i le ekalesia, ma ia leai ni sauaga e i ai i totonu o i latou lava.”²⁷ O le mataupu faavae o loo taialaina ai le Au Paia o Aso e Gata Ai e tutusa lava. E le tatau ona tausalaina i tatou i le sauaina o soo se tasi i totonu po o fafo atu o le Ekalesia.

O i latou ua sauaina mo soo se mafuaaga ua iloaina lagona e oo i ai o le le fea ma le faailogalanu. A o talavou lava ma nofo ai i Europa i le vaitau o le 1960, sa ou lagonaina le faitioina o a’u ma tauemuina ona o a’u o se Amerika ma ona o a’u o se tagata o le Ekalesia.Sa taulimaina a’u e nisi o tamaiti a’oga e pei o a’u sa nafa patino ma aiaiga faavae le lauiloa a le Iunaite Setete. Sa taulimaina foi a’u e peiseai o la’u tapuaiga o se faatiga i malo sa ou nofo ai ona sa ese mai le tapuaiga lautele a le malo. Mulimuli ane, i le tele o atunuu eseese o le lalolagi, sa tele ni tamai vaaiga i le leaga tele o le faailogalanu ma le faaitu’au na mafatia ai i latou na osofaia ona o o latou ituaiga po o tagatanuu.

E oo mai sauaga i le tele o ituaiga: faitioga, faasaunoa, faatauemu, tuliesea ma le faiesea, po o le inosiaina o le isi tagata. E tatau ona tatou tetee atu i le faailogalanu lea e siisii ona uiga leaga e faasaga ia i latou e i ai ni manatu eseese. E faailoa mai lava e le faailogalanu ia lava, i fasivaega, i le le manao e faamatuu atu le saolotoga tutusa o le faaaliga o manatu ma lagona.²⁸ O tagata uma, e aofia ai tagata o tapuaiga, ua i ai le aia tatau e faaali ai ona lava manatu i tulaga lautele. Ae e leai ma se tasi e i ai se laisene e itagia ai fua isi a o faaalia na lagona.

Ua tuuina mai i le talafaasolopito o le Ekalesia se faamaoniga tele o o tatou tagata sa taulimaina i le ita ma le faailogalanu. E matua faanoanoa tele lava pe afai tatou te taulimaina isi e pei ona sa taulimaina ai i tatou. Sa aoao mai le Faaola, “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.”²⁹ Mo i tatou e talosagaina le faaaloalogiaina, e tatau ona tatou faaaloalo atu. Ma le isi, o lo tatou liuaina moni lava e aumaia ai le “agamalu ma le maualalo o le loto,” lea e valaaulia ai “le Agaga Paia” e faatumuina i tatou i le “alofa atoatoa,”³⁰ se “alofa faamaoni”³¹ mo isi.

E le masuia lo tatou Leoleo Mamoe Lelei ma lagonaina le ala lava e tasi i le asō e uiga i le agasala ma tagata agasala e pei ona Ia lagonaina a o Ia savalia le fogaeleele. Na te le aluese lava ma tatou ona ua tatou agasala, e tusa lava pe Na te manatu i nisi taimi, “Ae e ese foi lea mamoe sole!” E alofa tele o Ia ia i tatou lea na Ia saunia ai se ala mo i tatou e salamo ai ma toe faamamaina ina ia mafai ona tatou toefoi atu ia te Ia ma lo tatou Tama Faalelagi.³² I le faia o lea mea, sa faia ai foi e Iesu Keriso le faataitaiga mo i tatou e mulimuli ai—e faaali ai le faaaloalo i tagata uma ma le le inoino i se tasi.

I le avea ai ma Ona soo, ia tatou faataitai atoatoa i Lona alofa ma tatala atoatoa atu le alofa i le tasi ma le isi ina ia le lagonaina ai e se tasi le tuulafoaiina, tuuatoatasi, po o le leai o se faamoemoe. Ou te molimau atu o Iesu Keriso o lo tatou Leoleo Mamoe Lelei, e alofa ia i tatou ma popole mo i tatou. Na te silafia i tatou ma na foai mai Lona soifua mo Ana mamoe.³³ O loo soifua foi o Ia mo i tatou ma finagalo ia tatou iloaina o Ia ma faatino le faatuatua ia te Ia. Ou te alofa ma faamemelo ia te Ia, ma ou te matua faafetai tele mo Ia, i le suafa o Iesu Keriso, amene.