Stap Winim Wol Ia

Olgeta we oli winim wol oli kam blong gat wan bigfala lav long Lod mo Sevya blong yumi, Jisas Kraes.

Tabu taem we Hem i bon i kam long wol, stret laef blong Hem, bigfala Atonmen blong Hem long Getsemane mo Golgota oli meksua se wanwan long yumi i laef bakegen long ded. Wetem glad fasin blong sakem sin, Hemwan i save klinim yumi long ol sin blong yumi, mo letem yumi gobak long ples we God i stap long hem. “Yumi lavem Hem, from se Hem i lavem yumi fastaem.”⁶

Jisas i talem “Yufala i no fraet. Mi mi winim paoa blong olgeta samting blong wol ia finis.”⁷

Afta Hem i talem bakegen: “Mi wantem se yufala [tu] i mas winim wol.”⁸

Blong winim wol i no hapen long wan spesel taem long laef, be oli fulap taem we oli hapen long laeftaem we i talemaot taem blong yu we i no save finis.

I save stat taem wan pikinini i lan blong prea mo singsing kwaet “Mi stap traem blong kam olsem Jisas.”⁹ I gohed taem wan i stadi long laef blong Sevya long Niu Testeman mo i tingting hevi long paoa blong Atonmen blong Sevya insaed long Buk blong Momon.

Blong prea, sakem sin, mo folem Sevya, mo kasem gladhat blong Hem i lidim yumi blong andastanem moa gud from wanem yumi bin stap ia mo huia yumi mas kam.

Alma, i tokbaot long wei ia: “wan bigfala jenis i bin hapen long hat blong olgeta. Mo oli bin putum tingting blong olgeta daon mo oli putum tras blong olgeta long tru God we i stap laef,  … oli bin fetful kasem en.”¹⁰

Olgeta [we oli stap traem] blong winim wol oli save se oli mas ansa long Papa blong olgeta long Heven. Taem wan i stap jenisim mo stap sakem tru ol sin  …, nao hem i no harem se hem i fasfas, be hem i fri, semmak olsem “ol sin we oli gat mak oli kam waet olsem sno.” ¹¹

Olgeta we oli stap folem fasin blong wol oli gat hadtaem wetem fasin blong stap ansa long God—semmak olsem wan pikinini we i stap lafet long haos blong papa mo mama taem tufala i no stap, i stap glad long bigfala noes, i no wantem save long wanem bae i hapen taem papa mo mama i kambak 24 aoa afta. 

Wol i intres moa blong mekem man we i folem fasin blong wol i hapi, bitim blong mekem hem i gat kontrol.

Blong winim wol i no wan faet blong wol, be i wan praevetwan, i blong yuwan mo i nidim wan faet bitwin yu mo temtesen insaed long fasin blong yuwan.

Blong winim wol, komanmen ia we i moa hae long evriwan: “Mo yufala i mas lavem Hae God ia we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.”¹²

Kristin man we i raet C. S. Lewis i tokbaot hemia long wei ia: “ Kraes i talem: ‘Yu givim mi evri samting. Mi no wantem tumas taem blong yu, o mane blong yu, o wok blong yu. Mi wantem yu.’”¹³

Blong winim wol i blong kipim ol promes blong yumi long God —baptaes blong yumi mo ol tempol kavenan, mo promes blong stap fetful long kompanion blong yumi we i no save finis. Blong winim wol i blong lidim yumi wetem tingting i stap daon long sakramen tebol, evri wik, blong askem fogivnes mo blong plis long hem blong “tingbaot hem mo kipim ol komanmen blong hem, blong yumi save gat Spirit blong Hem oltaem i stap wetem yumi.”¹⁴

Lav blong yumi long Sabat dei i no finis taem we doa blong japel i klos biaen long yumi, be i openem doa long wan naes dei blong spel long ol evri dei wok blong yumi, stadi, prea mo go aot long ol famli mo ol narawan we oli nidim yumi. Be i no blong pulum gud win taem jos i finis, mo ronron kwik blong faenem wan televisen bifo futbol gem i stat; bae ol tingting mo lukluk blong yumi i stap nomo long Sevya mo long tabu dei blong Hem.

Wol ia, oltaem nomo, ol voes blong pulum tingting mo switim man oli kamkamaot.¹⁵

Blong winim wol i blong trastem long wan voes ia nomo we i givim woning, i leftemap tingting, i givim pis, i givim laet we i no olsem hemia blong wol.¹⁶

Blong winim wol i minim blong tanem yumi i go aotsaed, mo tingbaot nambatu komanmen¹⁷: “Man we i moa hae long medel blong yu bae i wokman blong yufala.”¹⁸ Blong mekem hasban o waef i hapi i moa impoten bitim hapines blong yumiwan. Blong helpem ol pikinini blong yumi blong lavem God mo obei long ol komanmen blong Hem, i wan fas samting. Yumi glad blong serem ol ting blong yumi tru long taeting, fas ofring mo givim samting long olgeta long nid. Taem yumi kipim antena blong spirit blong yumi i poen i go long heven, Lod i stap lidim yumi,

Wol ia i bildim yunives raon long hemwan, i praod blong talemaot strong se: “!Luk mi komperem long neiba blong mi! !Yu luk, hemia blong mi! !Luk mi mi impoten!.”

Wol ia i save kros isi, i no gat intres, i wantem tumas, i lavem ol klap blong bigfala grup blong man. Taem yu stap winim wol i mekem yu gat tingting i stap daon, sore, longfala tingting, mo lav mo sore long olgeta we oli defren long yu.

Blong winim wol i minim oltaem se bae wol i jikim ol bilif blong yumi. Sevya i talem:

“Sapos [wol ia i no laekem yu, yufala i mas save se i no laekem mi bifo hem i no laekem yufala.]

“[Sapos yufala i man blong wol ia, bae wol i laekem ol man blong hem.]”¹⁹

Presiden Rasel M. Nelson i talem long moning ia: “Ol tru disaepol blong Jisas Kraes oli glad blong stanap, blong toktok mo stap defren long ol pipol blong wol.”²⁰

Wan disaepol blong Kraes i no wari sapos i no kasem 1,000 man i laekem wan post blong hem abaot fet blong hem o i nogat ol naes emoji.

Blong winim wol i minim blong no wari tumas long koneksen blong yumi long intanet be blong wari moa long koneksen blong yumi long heven, i go long God.

Lod i givim wan sefples long yumi taem yumi stap folem kaonsel blong ol profet mo ol aposol blong Hem we oli stap laef.

Pikja

Presiden Monson i stap toktok

Presiden Thomas  S. Monson i talem se: “Wol ia i save jalenjem yu. …[Taem yumi go long tempol], …bae yumi save go tru long ol tes mo blong winim ol temtesen. …Bae yumi kam niu bakegen mo moa strong.”²¹

Wetem plante moa temtesen o samting we i pulum tingting, wol ia i stap traem blong trikim hem we i bin fetful blong i sakemaot ol gudfala eksperiens blong hem blong bifo, se oli ol giaman wok.

Blong winim wol i blong tingbaot, iven long taem we yumi harem nogud, ol taem ia we yumi bin filim lav mo laet blong Sevya. Elda Neal A. Maxwell i bin eksplenem wan long ol eksperiens ia long wei ia: “Mi bin gat blesing, mo mi save se God i bin save se mi bin save se mi bin kasem blesing.”²² Nomata yumi filim se Hem i fogetem yumi blong smol taem, yumi no mas foget.

Blong winim wol i no minim se yumi laef we yumi sarem yumi long haos, we yumi protektem yumi long ol samting we oli no stret mo ol had taem blong wol ia. Be, i blong yumi openem tingting blong fet blong yumi, mo pusum yumi moa kolosap long Sevya mo ol promes blong Hem.

Nomata yumi no save kam stret evriwan long laef ia, blong winim wol i kipim hop blong yumi laef se wan dei, bae yumi “stanap long fored blong Ridima blong yumi mo luk fes blong Hem mo stap glad,”²³ mo harem voes blong Hem i talem: “Yufala i kam. Papa blong mi i mekem i gud tumas long yufala. Yufala i kam tekem ples blong yufala.”²⁴

Long 28  Disemba blong yia ia we i jes pas, dia fren mo gudfala Jeneral Atoriti blong yumi, Elda Bruce D. Porter i finisim wok blong hem long wol ia. Hem i gat 64 yia.

Mi mitim Bruce faswan taem mifala i studen long Brigham Yang Yunivesiti. Hem i wan long ol beswan mo smatwan. Afta we hem i kasem dokta digri long Havard Yunivesiti, i lukluk moa long ol wok long Rasia. Tingting mo ol wok blong Bruce i givim hem paoa we i save lidim hem i go long rong rod, be ol rij samting mo pres blong wol i no blokem ae blong hem.²⁵ Hem i gohed blong stap fetful long Sevya, Jisas Kraes, companion blong hem we i no save finis; Susan; ol pikinini blong hem mo ol apupikinini blong hem.

Pikja

Elda Porter wetem yangfala famli blong hem

Bruce i bon wetem wan problem long kidni. Oli bin katem hem, be ol taem i pas mo kidni blong hem i gohed blong gat moa problem.

I no longtaem afta long koling blong Bruce olsem wan Jeneral Atoriti long 1995, mifala i bin givim seves tugeta wetem ol famli blong mitufala long Frankfet, Jemani, wea hem i lukluk moa long Rasia mo Is Yurop.

Laef blong Elda Porter i jenis bigwan long 1997 taem kidni blong hem mo helt blong hem i stat go nogud evriwan. Porter famli i mas gobak long Sol Lek Siti.

Long ol 20 yia seves blong hem long Olgeta Seventi, Bruce i go slip long hospital plante taem mo oli katem hem 10 taem. Ol dokta oli talem long Susan long tufala taem se Bruce bae i no laef kasem moning, be hem i bin laef.

Blong ova long 12 yia we hem i stap givim seves olsem wan Jeneral Atoriti Bruce i stap kasem daealaesis tritmen we i klinim blad blong hem. Long ol taem ia, tritmen blong hem i tekem faef naet long wan wik blong fo aoa long wan tritmen, blong mekem se hem i save givim seves long deitaem mo akseptem ol wok long ol wiken. Be taem we helt blong hem i no kamgud afta long plante prishud blesing, Bruce i harem nogud, be hem i save huia blong trastem.²⁶

Long 2010, Bruce i kasem kidni long boe blong hem, Deved. Long tetaem ia, bodi blong hem i akseptem kidni ia. I wan merikel, i gat niu helt, mo i letem hem mo Susan blong gobak long Rasia long Eria Presidensi.

Pikja

Elda mo Sista Porter long Rasia

Long 26  Disemba, afta we hem i faet agensem sam soa long hospital long Sol Lek Siti, hem i askem ol dokta blong aot long rum. Bruce i talem long Susan se hem i save tru long Spirit se i no gat wan samting we ol dokta oli save mekem blong sevem laef blong hem. Hem i save se Papa long Heven bae i tekem hem i gobak hom. Hem i fulap wetem pis.”²⁷

Long 28 Disemba, Bruce i gobak hom long famli blong hem. Sam aoa afta, wetem famli we i raonem hem, long pis hem i gobak long hom blong hem long heven.

Pikja

Huia hem i Elda Bruce D. Porter

Sam yia i pas, Bruce Porter i bin raet i go long ol pikinini blong hem:

“Testemoni we mi gat se Jisas Kraes i tru mo i gat lav, i bin stap olsem kampas blong laef blong mi. Hem i wan witnes we i klin evriwan mo i laef we mi kasem long Spirit se Hem i stap laef, se Hem i Ridima mo Fren blong mi long evri taem blong nid.”²⁸

“Jalenj blong yumi, i blong kam blong save Sevya, mo tru long fet long Hem blong winim ol tes mo ol temtesen blong wol ia.”²⁹

“Bae yumi stap fetful mo tru, mo stap trastem Hem.”³⁰

Bruce Douglas Porter i winim wol.

Bae yumi traem had smol moa blong wok blong winim wol, i blong faenem eskius long ol bigfala rong blong yumi, be semtaem blong stap gat longfala tingting wetem ol smol taem we yumi glis mo foldaon, mo yumi spid mo helpem bigwan ol narawan. Taem yufala i kam blong trastem Sevya moa, mo mi promesem se bae yufala i gat ol blesing blong bigfala pis long laef ia mo moa bigfala pis moa abaot fiuja we i no save finis, long nem blong Jisas Kraes, amen.