2010–2019
Pagbuntog sa Kalibutan
Abril 2017


Pagbuntog sa Kalibutan

Ang pagbuntog sa kalibutan dili mahitabo sa usa lamang ka makahuluganong hitabo sa kinabuhi, apan sa tibuok kinabuhi nga makahuluganong mga higayon nga modeterminar sa mahangturon nimong padulngan.

Daghang katuigan ang milabay, si Presidente David O. McKay miistorya sa iyang nindot nga kasinatian samtang nagsakay og barko padulong sa Samoa. Human makatulog, “nakakita [siya] og usa ka panan-awon sa usa ka butang nga balaan sa kahangturan. Sa layo-layo,” miingon siya, “akong nakita ang usa ka maanindot nga puting siyudad. … Daghan kaayong mga kahoy nga dunay lamian nga prutas … ug mga bulak nga hingpit na nga namuswak bisan asa. … Dakong pundok sa katawhan [ang] nagpaingon sa siyudad. Ang matag usa nagsul-ob og puti nga kupo. … Diha-diha ang akong pagtagad … natumong diha sa ilang lider, ug bisan og makita lamang nako ang porma sa iyang pagkatawo … , nakaila dayon ako kaniya nga mao ang akong Manluluwas! Ang … kasilaw sa iyang panagway mahimayaong tan-awon. … [Ang] kalinaw sa iyang pagkatawo … balaan kini!”

Mipadayon si Presidente Mckay, “Ang siyudad … iyaha … ang Mahangturong Siyudad; ug ang mga tawo nga nagsunod kaniya mopuyo didto sa kalinaw ug sa mahangturong kalipay.”

Naghunahuna si Presidente McKay, “Kinsa sila? [Kinsa kining mga tawhana?]”

Iyang gipasabut unsay sunod nahitabo:

“Daw ang Manluluwas nakabasa sa akong mga hunahuna, siya mitubag pinaagi sa pagtudlo ngadto sa [mga pulong] sa semicircle nga mitunga sa … ibabaw [sa mga tawo], … gisulat sa bulawan … :

“‘Mao Kini Sila Kinsa Nakabuntog sa Kalibutan—

“Kinsa sa Tinud-anay Natawo Pag-usab!’”1

Sulod sa daghang katuigan, nahinumduman nako ang mga pulong: “Mao kini sila kinsa nakabuntog sa kalibutan.”

Ang mga panalangin nga gisaad sa Ginoo niadtong makabuntog sa kalibutan nindot kaayo. Sila “pagasul-uban og mga bisti nga maputi … ug [malista] sa basahon sa kinabuhi.” Ang Ginoo “[motug-an sa ilang] ngalan [sa] Amahan, ug sa atubangan sa iyang mga manolunda.”2 Ang matag usa makaangkon og “bahin sa una nga pagkabanhaw,”3 makadawat og kinabuhing dayon,4 ug “dili na magagula”5 gikan sa presensya sa Dios.

Posible ba nga makabuntog sa kalibutan ug makadawat niini nga mga panalangin? Oo, posible.

Gugma alang sa Manluluwas

Kadtong makabuntog sa kalibutan makapalambo og malukpanong gugma alang sa atong Ginoo ug Manluluwas, si Jesukristo.

Ang Iyang balaang pagkatawo, Iyang hingpit nga kinabuhi, Iyang walay kinutubang Pag-ula diha sa Getsemani ug Golgota misiguro sa Pagkabanhaw sa matag usa kanato. Uban sa atong sinserong paghinulsol, Siya lamang ang makahimo sa paglimpyo kanato gikan sa atong mga sala, nagtugot kanato nga makabalik ngadto sa presensya sa Dios. “Kita nagahigugma kaniya, tungod kay siya mao man ang unang nahigugma kanato.”6

Si Jesus miingon, “Sumalig kamo; gidaug ko na ang kalibutan.”7

Unya midugang Siya, “Ako buot nga kamo kinahanglan mobuntog sa kalibutan.”8

Ang pagbuntog sa kalibutan dili mahitabo sa usa lamang ka makahuluganong hitabo sa kinabuhi, apan sa tibuok kinabuhi nga makahuluganong mga higayon nga modeterminar sa mahangturon nimong padulngan.

Magsugod kini sa dihang ang usa ka bata makakat-on sa pag-ampo ug matinahurong mokanta og, “Maninguha kong mahimong mahisama kang Jesus.”9 Magpadayon kini sa dihang ang tawo magtuon sa kinabuhi sa Manluluwas diha sa Bag-ong Tugon ug mamalandong sa gahum sa Pag-ula sa Manluluwas diha sa Basahon ni Mormon.

Ang pag-ampo, paghinulsol, pagsunod sa Manluluwas, ug pagdawat sa Iyang grasya mogiya kanato nga mas makasabut nganong ania kita dinha ug mamahimo kitang kinsa.

Gihulagway kini ni Alma niini nga paagi: “Usa ka dako nga kausaban [ang] nahimo diha sa ilang mga kasingkasing, ug sila mipaubos sa ilang mga kaugalingon ug mitugyan sa ilang pagsalig diha sa tinuod ug buhi nga Dios … [nagpabiling] matinud-anon hangtud sa katapusan.”10

Kadtong nanagbuntog sa kalibutan nasayud nga manubag sila sa ilang Langitnong Amahan. Ang matinud-anong pag-usab ug paghinulsol sa mga sala wala na magpugong apan naghimong gawasnon, samtang ang “sala [nga] mapula … pagapution ingon sa nieve.”11

Pagkumpisal ngadto sa Dios

Kadtong kalibutanon maglisud sa pagdawat nga manubag sila sa Dios—sama sa anak samtang mibiyahe ang mga ginikanan, nag-party sa ilang balay, nalingaw sa kagubot, wala maghunahuna sa mga sangputanan kon mobalik na ang mga ginikanan paglabay sa 24 ka oras. 

Ang kalibutan mas interesado sa pagtagbaw sa kinaiyanhon nga tawo kay sa pagpugong niini.

Ang pagbuntog sa kalibutan dili pag-atake sa tibuok kalibutan apan usa ka pribado, personal nga pakig-away, nga nagkinahanglan og personal nga pakigbisog batok sa mga tintasyon sulod kanato.

Ang pagbuntog sa kalibutan nagpasabut sa pagmanggad sa labing mahinungdanong sugo: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog.”12

Ang Kristiyanong tagsulat nga si C. S. Lewis mihulagway niini sa ingon niini nga paagi: “Miingon si Kristo ‘Ihatag kanako ang Tanan. Dili kaayo nako gusto ang inyong panahon ug inyong kwarta ug inyong mga buhat: Kamo ang akong gusto.’”13

Ang pagbuntog sa kalibutan mao ang pagtuman sa atong mga saad ngadto sa Dios—sa atong mga pakigsaad sa bunyag ug sa templo ug sa atong panumpa nga magmatinud-anon sa atong mahangturong kapikas. Ang pagbuntog sa kalibutan mapainubsanong mogiya kanato sa lamesa sa sakrament matag semana, mangayo og pasaylo ug mosaad nga “mohinumdom kaniya ug maghupot sa iyang mga sugo” nga unta kita “kanunay makabaton sa iyang Espiritu uban [kanato].”14

Ang atong gugma alang sa adlaw nga Igpapahulay dili matapos sa pagsira sa pultahan sa chapel sa atong pagbiya, apan hinoon mobukas sa mga pultahan sa maanindot nga adlaw sa pagpahulay gikan sa naandang buluhaton, pagtuon, pag-ampo, ug pagtabang sa pamilya ug sa uban nga nagkinahanglan sa atong pagtagad. Imbis mobati nga nahuwasan kay nahuman na ang pagsimba, ug magdali-dali sa pagpasalida sa telebisyon sa dili pa magsugod ang dula sa football, tuguti nga ang atong mga hunahuna magpabilin sa Manluluwas ug sa Iyang balaang adlaw.

Ang kalibutan walay hunong nga giagni sa makapadani ug makatintal nga mga impluwensya.15

Ang pagbuntog sa kalibutan mao ang pagsalig sa usa ka tingog nga nagpasidaan, naghupay, naglamdag, ug nagdala og kalinaw “dili sama sa hinatagan sa kalibutan.”16

Kawalay Paghinakog

Ang pagbuntog sa kalibutan nagpasabut nga maghunahuna sa uban imbis sa atong kaugalingon, mohinumdom sa ikaduhang sugo17: “Ang labing dako kaninyo ma-inyo siyang sulugoon.”18 Ang kalipay sa atong kapikas mas importante kay sa atong kaugalingong kalingawan. Ang pagtabang sa atong mga anak nga mahigugma sa Dios ug magsunod sa Iyang mga sugo maoy nag-unang prayoridad. Andam kitang mopaambit sa atong materyal nga mga panalangin pinaagi sa ikapulo, mga halad sa puasa, ug paghatag ngadto sa nanginahanglan. Ug samtang nakapunting ang atong mga espirituhanong antena padulong sa langit, ang Ginoo mogiya kanato ngadto sa mahimo natong tabangan.

Ang kalibutanon nakatutok sa iyang kaugalingon, mapagarbuhong nagproklamar: “Tan-awa ko kumpara sa akong silingan! Tan-awa ang unsay ako! Tan-awa kon unsa ko kaimportante!”

Ang kalibutanon daling mairita, dili magpakabana, mapugsanon, ganahan sa mga pagdayeg sa katawhan, samtang ang pagbuntog sa kalibutan nagdala og pagpaubos, pagbati alang sa uban, pailub, ug kalooy niadtong lahi kaninyo.

Kasiguroan nga Luwas diha sa mga Propeta

Ang pagbuntog sa kalibutan kanunay nagpasabut nga duna kitay mga gituohan nga biay-biayon sa kalibutan. Miingon ang Manluluwas:

“Kon ang kalibutan nagadumot man kaninyo, hibaloi nga kini nagdumot na kanako sa wala pa kini magdumot kaninyo.

“Kon kamo iya pa sa kalibutan, higugmaon sa kalibutan ang mga iya.”19

Ganinang buntag miingon si Presidente Russell M. Nelson, “Ang tinuod nga mga disipulo ni Jesukristo andam nga magpabantang, motingog, ug magpalahi gikan sa mga tawo sa kalibutan.”20

Ang disipulo ni Kristo dili mahadlok kon ang iyang gi-post kabahin sa iyang pagtuo dili makadawat og 1,000 ka mga likes o bisan pipila lang ka mga friendly emojis.

Ang pagbuntog sa kalibutan mao ang dili kaayo paghunahuna sa atong mga koneksyon sa online apan mas maghunahuna sa atong langitnong koneksyon ngadto sa Dios.

Ang Ginoo mohatag kanato og kasiguroan samtang mopatalinghug kita sa paggiya sa Iyang buhing mga propeta ug apostoles.

Imahe
Si Presidente Monson nga namulong

Si Presidente Thomas S. Monson miingon: “Ang kalibutan … mahagiton. … [Samtang moadto kita sa templo], … mas makaagwanta kita sa mga pagsulay ug mas makabuntog sa matag tintasyon. … Mabag-o kita ug malig-on.”21

Uban sa nagkadaghang tintasyon, makalinga, ug mga pagtuis, ang kalibutan mosulay sa paglingla sa mga matinud-anon ngadto sa pagbaliwala sa nangagi nga kusganong espirituhanong mga kasinatian sa usa ka tawo, gipasabut kini nga binuang nga mga panglingla.

Ang pagbuntog sa kalibutan mao ang paghinumdom, bisan kon nawad-an kitag kadasig, sa mga panahon nga atong gibati ang gugma ug kahayag sa Manluluwas. Si Elder Neal A. Maxwell mipasabut sa usa niini nga mga kasinatian niining paagiha: “Napanalanginan ko, ug nasayud ko nga ang Dios nasayud nga ako nasayud nga ako napanalanginan.”22 Bisan kon temporaryong mobati kita nga nakalimtan, dili kita malimot.

Ang pagbuntog sa kalibutan wala magpasabut nga magpuyo kita og protektadong kinabuhi, gipanalipdan gikan sa kawalay kaangayan ug kalisdanan sa mortalidad. Hinoon, naghatag kini og mas dakong pagsabut sa hugot nga pagtuo, nagpaduol kanato sa Manluluwas ug sa Iyang mga saad.

Samtang ang pagkahingpit dili kompleto niining kinabuhia, ang pagbuntog sa kalibutan mopadayon sa atong paglaum nga sa moabut nga adlaw kita “mobarug sa atubangan [sa atong Manunubos]; [ug] makakita sa iyang panagway nga may kahinangop,”23 ug madungog ang Iyang tingog: “Umari kamo, O mga dinayeg sa akong Amahan, panunda ninyo ang gingharian nga gitagana alang kaninyo.”24

Ang Ehemplo ni Elder Bruce D. Porter

Niadtong Disyembre 28 sa miaging tuig, ang atong minahal nga higala ug pinanggang General Authority, si Elder Bruce D. Porter mikompleto sa iyang mortalidad. 64 anyos ang iyang edad.

Una nakong nahimamat si Bruce sa dihang mga estudyante kami sa Brigham Young University. Usa siya sa pinakamaayo ug pinaka-bright. Human madawat ang iyang doctoral degree gikan sa Harvard University, nga nakatutok ang pagtuon sa Russian nga politika ug kasaysayan, ang mga hunahuna ug sinulat ni Bruce nakapabantugan kaniya nga makapatipas unta kaniya sa saktong dalan, apan ang bahandi ug pagdayeg sa kalibutan wala gayud makaali sa iyang panan-aw.25 Maunungon siya sa iyang Manluluwas, si Jesukristo; sa iyang mahangturong kapikas, si Susan; sa iyang mga anak ug apo.

Imahe
Si Elder Porter kauban sa bag-o pa niyang pamilya

Si Bruce natawo nga dunay depekto sa kidney. Gioperahan siya, apan sa kadugayan ang iyang problema sa kidney misamot.

Human gitawag si Bruce isip General Authority niadtong 1995, miserbisyo kami uban sa among mga pamilya sa Frankfurt, Germany, diin ang trabaho ni Bruce nakasentro sa Russia ug Eastern Europe.

Ang kinabuhi ni Elder Porter nausab og dako niadtong 1997 sa dihang ang iyang kidney ug panglawas misugod pagkaluya. Ang pamilyang Porter mibalik sa Salt Lake City.

Atol sa iyang 22 ka tuig nga pagserbisyo sa Seventy, si Bruce naospital sa makadaghan, lakip ang 10 ka pag-opera. Ang mga doktor misulti kang Susan sa duha ka okasyon nga dili na maabtan og buntag si Bruce, apan nakahimo siya.

Kapin sa 12 ka tuig sa iyang pagserbisyo isip General Authority, gi-dialysis is Bruce sa paglimpyo sa iyang dugo. Sa dakong bahin niana nga panahon, ang dialysis ipahigayon lima ka gabii matag semana sulod sa upat ka oras matag pagtambal aron makaalagad siya sa iyang calling sa adlawan ug makadawat og mga conference assignment sa katapusan sa semana. Sa dihang wala mouswag ang iyang kahimsog human sa pipila ka mga panalangin sa priesthood, naglibug si Bruce, apan nasayud siya kon kinsay iyang gisaligan.26

Niadtong 2010, nakadawat si Bruce og usa ka kidney gikan sa iyang anak nga si David. Niining panahona wala isalikway sa iyang lawas ang transplant. Usa kadto ka milagro, nakahatag og bag-ong kahimsog, sa katapusan nagtugot kaniya ug ni Susan sa pagbalik ngadto sa iyang gimahal nga Russia diha sa Area presidency.

Imahe
Si Elder ug Sister Porter sa Russia

Niadtong Disyembre 26, 2016, human makigbugno sa nagpadayong impeksyon sa ospital sa Salt Lake City, mihangyo siya sa mga doktor sa pagbiya sa kwarto. Gisultihan ni Bruce si Susan “nga nasayud siya pinaagi sa Espiritu nga wala nay mahimo ang mga doktor sa pagluwas sa iyang kinabuhi. Nasayud siya … nga kuhaon na siya sa Langitnong Amahan. Napuno siya sa kalinaw.”27

Niadtong Disyembre 28, mipauli si Bruce sa ilang panimalay. Paglabay sa pipila ka oras, gilibutan sa iyang mga minahal, malinawon siyang mipauli ngadto sa iyang langitnong panimalay.

Imahe
Litrato ni Elder Bruce D. Porter

Katuigan ang milabay, si Bruce Porter misulat niini nga mga pulong ngadto sa iyang mga anak:

“Ang akong pagpamatuod sa katinuod ug gugma ni Jesukristo mao ang naggiya sa akong kinabuhi. … [Kini] usa ka putli, nagdilaab nga saksi sa Espiritu nga siya buhi, nga siya mao ang akong Manunubos ug Higala sa matag panahon sa panginahanglan.”28

“Ang atong hagit … mao ang pag-ila [sa Manluluwas] … ug, pinaagi sa pagtuo Kaniya, pagbuntog sa mga pagsulay ug tintasyon sa kalibutan.”29

“Magmatinud-anon ug matinuoron kita, magsalig kaniya.”30

Si Bruce Douglas Porter mibuntog sa kalibutan.

Hinaut nga ang matag usa nato mas maningkamot pa sa pagbuntog sa kalibutan, dili ipangatarungan ang bug-at nga mga sala apan mapailubon sa ginagmay nga mga sayop ug kalapasan, matinguhaon nga paspasan ang atong paglambo ug matinabangon sa uban. Samtang mas hingpit kamong mosalig sa Manluluwas, mosaad ako kaninyo og mga panalangin sa mas dakong kalinaw niining kinabuhia ug mas dakong kasiguroan sa inyong mahangturong padulngan, sa pangalan ni Jesukristo, amen.