Kuhtanglah Facluh
In kuhtanglah facluh tiac pacl ahkuhtweyac sefanna luhn moul uh, tuhsruhk pacl luhn moul nohfohn ma ahkkahlwemye moul ma pahtpaht.
Yac puhs somlah ah, Prestuhn David O. McKay el sruhmuhn ke sie puhla sacohk lal ke el fuhfahsryucsr fin soko oak nuh ke acn Samoa. Tukun el mutullac ah, el “tuh liye aruhruhma se sie ma suc sacohk ac muhtahl. Nuh metoh kuhtuh,” el fahk, “Nga liye siti kahto ac fasrfasr. … Sahk ac kain in fukunsahk emwem … ac ros fahrweng kahto ke acn nuhkwewa. … Sie mwet pucspucs acl nuh ke siti sac ah. Kais sie selos nukum nuknuk na oaskuh fasrfasr. … In pacl sac muhtuhk … siyac na mwet kol lalos, ac tuh nga kuh in liye luhmahl na muhkwena … nga akihlenwack in pacl sac na lah El pa Mwet Lahngo luhk! Wolacna luhn finsroal lihksreni na … kahlmwelihk. … Mihs ma raunwellah ah … arulacna muhtahl!”
Prestuhn McKay El tahfwelah, “Siti sac … ma lal … Siti Ma Pahtpaht; ac mwet ma fahsr tohkohl ah elos pa ac muhta we ke mihs ac engan ma pahtpaht.”
Prestuhn McKay el nuhnkuh, “Suc [elos] uh? [Suc mwet inge?]”
El ahkkahlwemye ma sikyak tok:
“Oacna Mwet Lahngo Elan riti nuhnak luhk ah, El topuk ke El srihsrsrihsr nuh ke [kahs ma] raun lac … oan lucng [mwet ah], … sihmlac ke kol … :
“‘Pa Inge Elos Suc Kuhtanglah Facluh—
“Suc Pwacyena Sifilpac Isuslac!’”1
Ke yac puhs, nga esam kahs inge: “Pa inge elos suc kuhtanglah facluh.”
Mwe insewowo ma Leum El olwelah nuh sin elos suc kuhtanglah facluh pa wolacna yohk. Elos fah “nuknukyang ke nuknuk fasrfasr … ac [sihmlac ke] puk luhn moul.” Leum El “fah fahkwelihk [inelos] ye muhtuhn Pahpah, ac ye muhtuhn lihpufacn.”2 Kais sie fah eis ip nuh ke sifil moulyak3 se met, eis moul ma pahtpaht,4 ac tiac sulpac fahsrwelihk5liki inmahsrlon God.
Yac kuht kuh in kuhtanglah facluh ac eis mwe insewowo inge? Ahok, kuh.
Luhngse nuh sin Mwet Lahngo
Elos suc kuhtanglah facluh ahkyohkye luhngse suwohswohs nuh sin Leum ac Mwet Lahngo lasr, Jisus Kraist.
Isuslac muhtahl Lal, moul suwohswohs Lal, Iwaclah ma pahtpaht Lal ke Gethsemane ac Golgotha, ahkpwacyeye sifil moulyak luhn kais sie sesr. Ac ke auliyak pwacye lasr, El muhkwena kuh in ahknwacsnwacsye kuht liki ma koluk lasr, suc ma oruh kuht kuh in fohlohk nuh yurin God. “Kut lungse, mweyen God El lungse kut meet.”6
Jisus El fahk, “Kowos in pulaik na! Nga kutangla faclu tari.”7
Tok El ahkkahlwemye lah El kena kuht in kuhtanglah facluh.8
In kuhtanglah facluh tiac pacl ahkkahlwemye sefanna luhn moul uh, tuhsruhk pacl luhn moul nohfohn ma ahkuhtweyac sie moul ma pahtpaht.
Ma inge kuh in muhtwacwacack ke sie tuhlihk srihsrihk el lotwelah in pruhe ac on in alu, “Nga srihke in oacna Jisus.”9 Tuhtahflah ke mwet se lutlut ke moul luhn Mwet Lahngo ke Wuhlweacng Sasuc ac motko ke kuh luhn Iwaclah luhn Mwet Lahngo ke Puk luhn Mormon.
Pruhe, auliyak, ukwe Mwet Lahngo, ac eis pahkomuhta Lal kol kuht nuh ke kahlwem suwohs lah efuh kuht oasr inge ac suc kuht enenuh in eklac nuh kac uh.
Alma el ahkuhtweyac ma inge ke ohiyac se inge: “Sie eklac na yohk oacyacpac tilyang nuh insiaclos, ac elos ahkpuhsisaclyelos sifacna ac likiyac luhlahlfongi lalos ke God pwacye ac moul … [lihksreni] oaru ne ke na sahflah.”10
Elos ma kuhtanglah facluh an etuh lah elos fah enenuh in topuk nuh sin Pahpah tuhmwaclos Inkuhsrao. Eklac ac auliyak pwacye ke ma koluk tilac kosrwaclah tuhsruhk molwelah, oacna ke “srusrala ke ma koluk … [eklac] fasrfasr oana snow.”11
Enenuh in topuk nuh sin God
Upac nuh sin mwet ma luhngse ma luhn facluh se inge in karihngihn ma kunaclos nuh sin God—oacna sie tuhlihk suc sritacl ke lohm sin pahpah ac ninac tuhmwaclos ke elos wacngihn, engan ke wohwohn, ac sruhnga nuhnkuh ke ma ac sikyak ke pahpah ac ninac kiyaclos ac fohlohk tukun ao 24 uh.
Facluh kena yohk in ahkluhngye mwet suc luhngse ma luhn facluh likina in ahkmihsyacl.
In kuhtanglah facluh uh tiac ma luhn facluh nohfohn tuhsruhk ma luhn kais sie, mweun luhn kais sie sifacna, enenuh ine sifacna lain mwe sruhf ac sofo lasr sifacna.
In kuhtanglah facluh kalmac pa liyacacng ma sap sacohk emet uh: “Ac kom fah lungse Leum God lom ke insiom kewa, ac ke ngunum kewa, ac ke nunkom kewa, ac ke ku lom kewa.”12
Mwet sihm Christian se C. S. Lewis el ahkkahlwemye ma inge ke ohiyac se inge: “Kraist El fahk ‘Use nuh Sik ma nuhkwewa. Nga tiac kena pacl lom ac mani lom ac orekma lom: Nga enenwe Kom.’”13
In kuhtanglah facluh uh pa in karihngihn olwelah lasr nuh sin God—olwelah ke pacptais ac tempuhl lasr ac olwelah ke luhlahlfongi lasr nuh sin muhtwacn kiyacsr kuh mukul tuhmasr ma pahtpaht. Kuhtanglah facluh kol kuht nuh ke insepuhsisacl nuh ke kuhfa luhn Leum, siyucklah ke nuhnak muhnahs ac fahkwack in esamwacl ac ahkos masap lal, tuh Nguhn lal in wi kuht pacl nuhkwewa.14
Luhngse lasr ke lwen Sahpuht tiac sahflah ke sruhngucl in lohm alu uh kauli, tuhsruhk ikacslah kain in sruhngucl nuh ke sie lwen kahto ke mihslac liki oruh lasr, lutlut, pruhe, ac muhtwacta yurin sucu ac mwet sahyac suc enenuh lohacng lom an, likina kom in mongi lah tari alu uh, ac elyahyak kahsruhsr in suk ke sie tifi ah met liki sritacl football ah muhtwacwacack, lwelah lohacng lasr in srackna ma ke Mwet Lahngo ac ke lwen muhtahl Lal.
Facluh uh ulul yohk ke sronot luhn puhsrwen mwe ahkmwel ac mwe sruhf in ahkkolukye kom.15
Kuhtanglah facluh uh pa luhlahlfongi ke puhsra sefanna ma sensenkihn, ahkmihsye, ahkkahlwemye, ac use mihs “tia asot oana ke faclu asot.”16
Tiac Srohwohsr
Kalmacn kuhtanglah facluh uh pa in nuhnkuh ke mwet sahyac yohk likina kom in nuhnkuh keim sifacna, esamwack masap ahkluo:17 “Eneneyuk tuh el su fulat emeet inmahsrlowos elan mwet kulansap lowos.”18 Engan luhn mukul kuh muhtwacn kiacsr pa yohk srihpac emet liki engan lasr uh. Kahsruh tuhlihk nahtuhsr in luhngse God ac ahkos masap Lal pa yohk srihpac emet. Kuht kena in akacsruhi ke mwe insewowo luhn mwe kahsruhp lasr ke sie tahfuh singucul, mwe sang lasr ke lalo, ac akacsruhi nuh sin mwet suc enenuh kahsruh. Ac ke nuhnak lasr suwohswack nuh lucng inkuhsrao, Leum El kol kuht nuh sin mwet kuht kuh in kahsruh uh.
Sie mwet luhn facluh el lohacng ke ma lal muhkwena, sruhmuhn ke engan: “Ngwetma kapsrweyuc nuh ke mwet siskuck! Liye ke ma luhk uh! Liye yohk srihpaciyuck!”
Facluh fihsrwacsr in foloyak, tilac lohacng, ac sap kuh, luhngse kaksyak luhn mwet sahyac, ke kuhtanglah facluh uh use insepuhsisacl, pahko muhta, muhtweng, ac luhngse pwacye nuh sin mwet ma siena liki kom sifacna.
In sef ke Mwet Pahluh
Kuhtanglah facluh pacl nuhkwewa kalmac pa ac oasr luhlahlfongi lasr ma facluh ac isrucn. Mwet Lahngo El fahk:
“Mwet faclu fin srungakowos, esam na lah elos tuh sruhgayu meet liki elos srungakowos.
“Kowos funu ma lun faclu, na mwet faclu lukun lungse kowos oana mwet lalos.”19
Oacna Prestuhn Russell M. Nelson el fahk olutu, “Mwet tuhma lutlut pwacye luhn Jisus Kraist ac kena in akihlenyuck, kuh in sramsram, ac siena liki mwet facluh uh.”20
Mwet tuhma lutlut luhn Kraist tiac enenuh in sensenkihn fin sie post ke luhlahlfongi lalos tiac eis luhngse 1,000 kuh kuhtuh emoji kuhlwacng.
In kuhtanglah facluh pa tiac nuhnak sensen nuh ke kuhpahsr lasr ke online ac yohk ke nuhnak sensen nuh ke kuhpahsr lasr nuh sin God.
Leum El use nuh sesr mwe karihngihn ke kuht lohacng nuh ke kolyuck sin mwet pahluh ac mwet sap luhngse Lal uh.
Prestuhn Thomas S. Monson el fahk: “Facluh kuh in … ma upac se. … [Ke kuht som nuh ke tempuhl], … kuh lasr fah fokokoi nuh ke kuhtanglah ma upac ac kuhtanglah kais sie mwe sruhf. … Kuht ac ahksasucyeyucklac ac fokokoi.”21
Ke yohkwelihk luhn mwe sruhf, mwe ahkfohs, ac ma eklac suhtuhuh, facluh srihke in kiacpwelah mwet yohk luhlahlfongi la in sislah puhlakihnyuck wolacna ke ma luhn nguhn ke ma somlah luhn mwet se, ahkuhtwelosi oacna ma kuhtasrihk lahlfon.
Kuhtanglah facluh pa in esamwack, finne ke kuht puhla muh kuht koflah, pacl se ma kuht puhla luhngse ac kahlwem luhn Mwet Lahngo met. Elder Neal A. Maxwell el ahkkahlwemye sie puhla se inge ke ohiyac se inge: “Nga tuh ahkinsewowoyeyuck, ac nga etuh lah God El etuh lah nga etuh lah nga ahkinsewowoyeyuck.”22Finne kuht kuh in puhla muh muhlkihnyucklac kuht, kuht tiacna muhlkuhnlah.
Kuhtanglah facluh tiac kalmac pa kuht moulkihn sie moul srwenglah, moul ma loangweyucklac liki mwe ahksuhpwacr ac ma upac luhn moul in mahno. Tuhsruhk, el use kahlwem yohk ke luhlahlfongi, oruh kuht in fototoeni nuh sin Mwet Lahngo ac olwelah Lal.
Finne suwohswohs tiac fohnlah ke moul se inge, kuhtanglah facluh oruh finsrak lasr in fokokoi oruh sie lwen kuht “ac fah tu ye Muhtahl [Mwet Molwelah lasr]; [ac] fah liye muhtahl ke engan,”23 ac lohng Puhsrwacl: “Fahsru, kowos su akinsewowoyeyuk sin Papa tumuk! Fahsru ac usrui tokosrai se su nuna akoewuklac nu suwos oe ke mutaweyen orekla faclu.”24
Srihkasrak lal Elder Bruce D. Porter
Ke Tisacmpuh 28 ke yac se tari ah, kawuck sacohk ac General Authority lasr, Elder Bruce D. Porter, el ahksahfye moul in mahno lal. El yac 64 matwac.
Pacl se met nga ohsun sel Bruce ke kuht tuh tuhlihk lutlut ke Brigham Young University. El pa sie tuhlihk lutlut wowo ac suhmaht emet. Tukun el eis doctor degree lal ke Harvard University, ituckyang ke Russian affairs, nuhnak lal Bruce ac ma el sihmihs uh sang nuh sel sie ohiyac fuhlwact ma kuh in tulohkohnohl, tuhsruhk ma kahsruhp ac kahs in ahkfuhlwactye tiacna tulokihn nuhnak lal.25 Luhlahlfongi lal pa ke Mwet Lahngo lal, Jisus Kraist; muhtwacn ma pahtpaht kiyacl, Susan; nuh sin tuhlihk ac tuhlihk nuhtin nahtuhl.
Bruce el isuslac ke kain in mas ke kidney. El laslas, tuhsruhk ke pacl tohkoh kidney lal ah kalweni in koluklac.
Pacl fototo tukun Bruce el pahngyak in ekihn General Authority ke yac 1995. Kuht kuhlwacnsap tuhkweni yurin sucu lasr fin acn Frankfurt, Germany, ma orekma lal Bruce som yohk nuh fin acn Russia ac Eastern Europe.
Moul lal Elder Porter lihksreni na eklac ke yac 1997 ke orekma luhn kidney lal ac kuh luhn mahnol muhtwacwacack in puhtat nuh ten. Sucu Porter fohlohklac nuh Salt Lake City.
Ke yac 22 ke kuhlwacnsap lal ke mwet Itngucul, Bruce el kauli lohm ono uh pacl puhs, weacng laslas pacl 10. Taktuh ah fahk nuh sel Susan ke pacl luo lah Bruce el ac tiac moul ke fong ah, tuhsruhk el pain moullac.
Puhs liki yac 12 ke kuhlwacnsap lal ke General Authority, Bruce el enenuh dialysis in ahknwacsnwacsye srah kacl ah. Inkaiyacn pacl sacn, dialysis orek nuh sel pa fong limekohsr ke wik se ke ao ahkosr ke kais sie muhtwacta el in muh kuh in kuhlwacnsap ke pahng lal ke lwen an sahyacn pahng luhn jacnuhruhl kanfracns ke weekend an. Ke el tiac wolac tukun ahkinsewowo luhn pristut pucspucs, Bruce el fohswack, tuhsruhk el etuh lah suc el luhlahlfongi uh.26
Ke 2010 ah, Bruce el eis sie kidney sin tuhlihk mukul se nahtuhl, David. Ke pacl se inge, mahnol tiacna sruhnga kidney sasuc sac. Sie ma na usrnguck, sang fokoko sasuc nuh sel ac tukun kuhtuh pacl lwelah el ac Susan in fohlohk nuh ke acn sacohk selos Russia, ke el kuhlwacnsap ke Prestuhnsi luhn Eria.
Ke Tisacmpuh 26 ke yac tari ah, tukun el mweuni mas lal ke lohm ono fin acn Salt Lake City, el siyuck taktuh ah in tifoki liki infuckihl sac. Bruce el fahk nuh sel Susan “lah el etuh ke Nguhn lah wacngihn ma taktuh ah kuh in oruh in molwellah. El etuh … ac lah Pahpah Inkuhsrao el ac usacl nuh lohm ah. El sesseslah ke mihs.”27
Ke Tisacmpuh 28, Bruce el fohlohk nuh lohm sin sucu lal ah. Tukun ao ekahsr, ke el rauniyucklac yurin sucu lal, ke mihs el fohlohk nuh lohm inkuhsrao sel.
Yac ekahsr tari ah, Bruce Porter el suhmuhslah kahs inge nuh sin tuhlihk nahtuhl:
“Testimoni luhk ke pwacyeiyacn ac luhngse luhn Jisus Kraist pa sie compass nuh ke moul luhk. … El [pa] nwacsnwacs, fokoko mwe loh luhn Nguhn lah El moul, lah El pa Mwet Molwelah ac kawuck luhk ke pacl nuhkwewa ke enenuh.”28
“Elyah lasr … pa in oruh in etuh [Mwet Lahngo] … ac, ke luhlahlfongi ke El, in kuhtanglah elyah ac mwe sruhf luhn facluh se inge.”29
“Lwelah kuht in muhtweng ac pwacye, luhlahlfongi ke El.”30
Bruce Douglas Porter el kuhtanglah facluh.
Lwelah kais sie sesr in kampare kuhtuh ke orekma lasr in kuhtanglah facluh, tiac lihkihnsaci ma koluk yohk tuh mongfihsrwacsr ke ma koluk srihsrihk lasr, salkweack moul in nguhn ac kahsruh yohk mwet sahyac. Ke yohkwelihk luhlahlfongi lom ke Mwet Lahngo, nga olwelah nuh suwos mwe insewowo mihs yohk ke moul se inge ac e yohk ahkpwacyeyacn moul ma pahtpaht lom, ke inen Jisus Kraist, amen.