2010–2019
Anjo̧ jān Laļ
Eprōļ 2017


Anjo̧ jān Laļ

Anjo̧ jān laļ ejjab jelet an juon kōmeļeļeiki iien ko an ilo mour in, bōtaab ijjelo̧kin ej juon mour ej kitbuuj iien ko me rej kōmeļeļeik mejān kajjik eo am̧ indeeo.

Elōn̄ iiō ko remootļo̧k, Būreejtōn David O. McKay ekar kwaļo̧k kake juon imminene em̧m̧anm̧ōn ekar iioone ke ekar ejjerakrōr ilo juon wa ļo̧k n̄an Samoa. Ālkin an oļo̧kļo̧k im kiki, ekar “loe juon ettōņak juon men eo ekanooj kam̧ōņōņō. Jān ettoļo̧k,” ekar ba, “Ikar loe juon bukwōn emouj aeboojoj. … Wōjke ko ekaijoļjoļ leer … im wut ko wutieer em̧m̧an aer waļo̧k ejjeplōklōk ijōko jabdewōt. … Juon idepdep in armej [rekar] jibadektok jikin kweiļo̧k eo. Kajjojo iaer ej kōņak juon kopā mouj. … Ilo kanooj m̧ōkaj aō ekar eļļo̧k, … kalimjōkļo̧k ritōl eo aer, im men̄e imaron̄ loe jōkjōk in rokjān … , ikar kūle e iien eo wōt āinwōt aō Rilo̧mo̧o̧r! Meram … eo ilo turin mejān [ekar] kanooj aiboojoj. … Aenōm̧m̧an [eo] kake e … ekar kwojarjar!”

Būreejtōn McKay ekar etal wōt, “Jikin kweilo̧k eo … ekar an … Jikin kweilo̧k eo Indeeo; im armej ro rej ļoore rōkar n̄an mour ilo aenōm̧m̧an im m̧ōņōņō indeeo.”

Būreejtōn McKay ekar kejōkļo̧kjeņ, “Wōn [rein]? [Armej armej rein?]”

Ej kōmeļeļeiki ta eo ej waļo̧k tokālik:

“Āinwōt n̄e Rilo̧mo̧o̧r ejeļā ļōmņak eo aō, ekar uwaak ilo kalikkar n̄an [naan ko ilo] juon jōkjōk in doulul … ekar waļo̧k ioer [armej ro], … jeje ilo kouļ … :

“‘Armej Rein Rej Er Ro Em̧ōj Aer Anjo̧ jān Laļ—

“Ro Em̧ōj Aer Lukkuun Bar Ļotak!’”1

Ium̧win elōn̄ iiō ko, em̧ōj aō keememej naan ko: “Armej rein rej er ro em̧ōj aer anjo̧ jān laļ.”

Kōjeraam̧m̧an ko me Irooj ekar kallim̧ur n̄an ro rōkar anjo̧ jān laļ rej kabwilōn̄lōn̄. Renaaj “kanuknuk er mouj … im [etāer ilo] bok in mour eo.” Irooj “Enaaj kalikkar [etāer] im̧aan [eo] Jemān, im im̧aan enjeļ ro an.”2 Kajjojo enaaj wōr “aer ilo jerkakpeje eo m̧oktata,”3 bōk mour indeeo,4 im “jab bar dieojļo̧k”5 jān im̧aan mejān Anij.

Ej ke maron̄ n̄an anjo̧ jān laļ im bōk kōjeraam̧m̧an kein? Aaet, ej maron̄.

Iakwe n̄an Rilo̧mo̧o̧r eo

Ro rej anjo̧ jān laļ rej kōm̧m̧ane juon iakwe eļap n̄an ad Irooj im Rilo̧mo̧o̧r, Jisōs Kraist.

Ļotak eo An ekkwojarjar, mour eo An ewāppen, Pinmuur eo An ilo Gethsemane im Golgotha kar kalikkar Jerkakpeje eo An n̄an kōj kajjojo. Im jān ukeļo̧k ko ad em̧ool, E make ej maron̄ kwaļ kōj jān jerawiwi ko ad, kōm̧m̧an bwe jen jepļaak n̄an im̧aan mejān Anij. “Jej yokwe e, bwe Ear yokwe kōj m̧okta.”6

Jisōs ekar ba, “Kom̧win m̧ōņōņō; N̄a Iar bōk anjo̧ ioon laļ.”7

Tokālik E ekar kakkobaba, “I kōņaan bwe kom̧in anjo̧ jān laļ.”8

Anjo̧ jān laļ ejjab jelet an juon kōmeļeļeiki iien ko an ilo mour in, bōtaab ijjelo̧kin ej juon mour ej kitbuuj iien ko me rej kōmeļeļeik mejān kajjik eo am̧ indeeo.

Emaron̄ ijjino āinwōt juon ajri ej ekkatak jar im al kanooj kautiej, “Ij kajjieon̄ āinwōt Jisōs.”9 Ej etal wōt āinwōt juon armej katak kōn mour eo an Rilo̧mo̧o̧r ilo Kallim̧ur Ekāāl im ej kejōkļo̧kjeņ kōn kajoor in Pinmuur eo an Rio̧mo̧o̧r ilo Bok in Mormon.

Jar, ukeļo̧k, ļoor Rilo̧mo̧o̧r, im bōk jouj eo An rej tōlļo̧k kōj n̄an an ļapļo̧k ad meļeļe etke jej pād ijin im wōn eo jej aikuj n̄an erom.

Alma ekar kalikkare ilo wāween in: “Juon oktak ekajoor [ej] barāinwōt kōm̧m̧an ilo burueer, im rej [kōttāik] er make im likūt aer lōke ilo Anij em̧ool im emour … [dāpij] aer niknik n̄an jem̧ļo̧kin.”10

Ro rej anjo̧ jān laļ rejeļā bwe renaaj jerbal n̄an Jemāer Ilan̄. Lukkuun oktak im ukeļo̧k jān jerawiwi ko rejako aer bōbrae bōtaab kanemkwōj, āinwōt “jerawiwi ko [an] āinwōt būrōrō … [rej erom] mouj in wōt sno.”11

Bōk Eddo n̄an Anij

Ro jān laļ in ewōr eddo ko aer n̄an Anij reppen n̄an er—āinwōt juon ajri eo ej bade ilo m̧weo im̧ōn jinen im jemān ilo aer jako jāne, em̧ōņōņō kōn ainikien eļap, m̧akoko in ļōmņak kake ta eo enaaj waļo̧k n̄ane eļan̄n̄e jinen im jemān rej jepļaaktok 24 awa tokālik. 

Laļ in eļapļo̧k an kabwilōn̄lōn̄ ilo ad kōtļo̧k piktokin armej ilo kōj im jab kadikļo̧k e ilo kōj.

Anjo̧ jān laļ ejjab juon jodik eļap bōtaab juon ņojak, ad make pata, eaikuji ad jibwe pein doon pata ippān kōjdat ko ilo kōj make.

Anjo̧ jān laļ in meļeļein kōjparok kien eo eutiejtata: “Kwōn yokwe Irooj am̧ Anij kōn aolepān buruōm̧ im kōn aolepān am̧, im kōn aolep am̧ ļoļātāt, im kōn aolepān am̧ kajoor.”12

Rikirijin rijeje eo C. S. Lewis ekar kalikkare ilo wāween in: “Kraist ekar ba, ‘Letok aolepān n̄an Iō. Ijjab kōņaan eļap jān iien ko am̧ im eļap jān jāān ko am̧ im eļap jān jerbal ko am̧: Ij kōņaan kwe.’”13

Anjo̧ jān laļ ej dāpij kallim̧ur ko ad n̄an Anij—peptaij eo ad im bujen ko ad ilo tampeļ im kallim̧ur ko ad n̄an kanooj tōmak n̄an eo karejerad indeeo. Anjo̧ jān laļ ej tōlļo̧k kōj n̄an kanooj ettā n̄an tebōļ in kwojkwoj eo ilo kajjojo wiik, kajjitōk kōn joļo̧k bōd im kallim̧ur n̄an “kememej e im kōjparok kien ko an,” “bwe Jetōb eo An en maron̄ pād [ippād] iien otemjej.”14

Ad iakwe n̄an raan in Jabōt ejjab bōjrak n̄e ej kilōk kōjem̧ in m̧ōnjar eo itulikiid ijjelo̧kin ej kōppeļļo̧k kōjem̧ ko n̄an juon raan in kakkije eo ad eaboojoj jān aolep jerbal ko ad, ekkatak, jar, im pukotļo̧k baam̧le ko im ro jet repād ilo aer aikuji kōj. Ijjelo̧kin ad en̄jake rōļo̧k in en̄jake eddodo n̄e ej jem̧ļo̧k awa in jar ko, kōjatdikdik bwe enej m̧ōkaj ad kōjo̧ tv eo m̧okta jān an game in football eo ijjino, ļōmņak ko ad rej keememej wōt Rilo̧mo̧o̧r eo im ilo raan eo An ekwojarjar.

Laļ in ej ejaje bōjrak an kar kankan jān juon ibwij an jerbal ettoon im ainikien ko rōkareelel.15

Anjo̧ jān laļ ej lōke ilo juon ainikien ej kakkōl, kaenōm̧m̧an, kōmram, im ej bōktok aenōm̧m̧an, jab āoinwōt eo laļ ej letok.”16

Jab Ļōmņak kōn E Make

Anjo̧ jān laļ ej meļeļein ukōt kōj make nabōjļo̧k, kememej kien eo kein karuo17: “A eo eļaptata iaami, enaaj ri karijerami.”18 M̧ōņōņō eo an eo pāleed eļap an aorōk jān m̧ōņōņō ko ad make. Jipan̄ ajri ro nejid iakwe Anij im kōjparok kein ko An ej juon men eaorōktata. Jej m̧ōņōņō in jake jōbōļ eo jān ad kōļļa juon m̧ōttan jon̄oul, joortak in jitlo̧k ko, im leļo̧k n̄an ro rej aikuj. Im ilo an antena in jetōb ko ad jitōn̄ļo̧k n̄an lan̄, Irooj ej tōl kōj n̄an ro jemaron̄ jipan̄.

Laļ in ej kalōk peļaak ko ipeļaakin make, ej m̧ōņōņō in ba: “Lale n̄a keidi eō n̄an eo riturū! Lale ta eo ej aō! Lale ewi jon̄an aō aorōk!”

Laļ in epidodo an kalulu, jako an itok limo, kōwadon̄, iakwe ripinik ro jān juon jarlepju tōre in anjo̧ jān laļ in ej bōktok ettā bōro, kautiej, kijenmej, im tūriam̧o̧ n̄an ro roktak jān kwe make.

Kōjparok ilo Rikanaan ro

Anjo̧ jān laļ enaaj iien otemjej meļeļein bwe jenaaj bōk jet tōmak ko rej kajjirere in laļ. Rilo̧mo̧o̧r eaar ba:

“Eļan̄n̄e laļ ej kōjdate kom̧, kom̧ij jeļa bwe ear kōjdate Eō m̧okta jān kom̧.

“Eļan̄n̄e kom̧ an laļ, laļ enaaj kar yokwe men eo an.”19

Būreejtōn Russell M. Nelson ekar ba jibbon̄ in, “Rikaļoor ro rem̧ool an Jisōs Kraist rej m̧ōņōņō in jenolo̧k jān ro jet, kōnono, im oktak jān armej ro an laļ in.”20

Juon rikaļoor an Kraist ejjab ejeurur n̄e juon men ej likūt i ilo online kōn tōmak eo an im ejjab lo 1,000 naan in nōbar ko ak jejjo wōt ro rej rie.

Anjo̧ jān laļ in ej dik inepata kōn am̧ maron̄ connect online ak eļapļo̧k am̧ inepata kōn am̧ lukkuun ekkejelļo̧k n̄an Anij.

Irooj ej letok n̄an kōj koņ ilo ad leļo̧k ad n̄an tōl eo jān rikanaan ro An remour im rijjilōk ro.

Pija
Būreejtōn Monson ej kōnono

Būreejtōn Thomas S. Monson ekar ba: “Laļ in emaron̄ juon jikin … eapan̄ im pen. … [Ilo ad etal n̄an tampeļ eo], … enaaj ļapļo̧k ad maron̄ dibuk aolep mālijjon̄ im anjo ioon kajjojo kapo ko. … Jenaaj kōkāāl im kōkajoorļo̧k kōj.”21

Kōn an ļapļo̧k kapo, kareel ko, menin kakkure ko, laļ in ej kajjieon̄ kareel ro retiljek bwe ren jab kile en̄jake in jetōb eo ekajoor an juon, rej kōmeļeļeiki er āinwōt men in bwebwe.

Anjo̧ jān laļ in ej keememej, men̄e jej ebbeer, iien ko jekar en̄jake iakwe eo im meram eo an Rilo̧mo̧o̧r eo. Elder Neal A. Maxwell ekar kōmeļeļeiki juon iaan en̄jaake kein ilo wāween in: “Ededeļo̧k kar kōjeraam̧m̧an iō, im ikar jeļā bwe Anij ejeļā bwe ededeļo̧k kar kōjeraam̧m̧an iō.”22 Men̄e jemaron̄ ilo jidik iien en̄jaake meļo̧kļo̧ke kōj, jej jab meļo̧kļo̧k.

Anjo̧ jān laļ ejjab meļeļein jej mour ilo juon mour in erro̧o̧lol, kar kōjparok jān jab em̧m̧an im apan̄ ko an mej. Ijjelo̧kin, ej kōpeļļok eļap wōņāān ļōmņak in tōmak, kepaakļo̧k kōj n̄an Rilo̧mo̧o̧r eo im kallim̧ur ko An.

Iien in wāppen ejjab dedeļo̧k ilo mour in, anjo̧ jān laļ ej dāpij ad kōjatdikdik euruur bwe juon raan “jenaaj jutak im̧aan mejān [ad Rilo̧mo̧o̧r]; [im] lo turin mejān kōn m̧ōņōņō,”23 im ron̄ Ainikien: “Kom̧win itok, kom̧ ri m̧ōņōņō an Jema, kom̧win jolōt aelōn̄ eo ear pojak n̄an kom̧.”24

Waanjon̄ak eo an Elder Bruce D. Porter

Ilo Tijem̧ba 28 in iiō eo ejem̧ļo̧k, eo jeram eutiej im kōmij iakwe juon Ritōl eo Eutiej an Kabun̄, Elder Bruce D. Porter ekar kadedeļo̧k mour in. Ekar 64 an iiō dettan.

Ikar jino iioon Bruce ke kōmro kar rijikuuļ ilo Brigham Young University. Ekar juon iaan ro rem̧m̧an im mālōtlōt. Ālkin an bōk taktō degree eo an jān Harvard University, eo ekar lukkuun ekkatak kōn kien an Russia im bwebwenatoon, ļōmņak ko im an Bruce jeje ekar bōktok bun̄bun̄ me emaron̄ kar bōkļo̧k e iaļ eo ebōd, ak m̧weie im nōbar an laļ in rekar jab pinej mejān.25 An m̧ool n̄an Rilo̧mo̧o̧r eo an, Jisōs Kraist; n̄an kam̧pānion eo an indeeo, Susan; n̄an ajri ro nejin im jibūn.

Pija
Elder Porter ippān baam̧le eo an edik

Bruce ekar wōr jorrāān ilo kidney eo an ke ej ļo̧tak tok. Ālkin kar m̧wijm̧wij, bōtaab jān iien n̄an iien dekā in jibke ko an reitok wōt in m̧ōjņo̧ļo̧k.

Jidik iien tokālik, Bruce kar kūri āinwōt juon Ritōl Eutiej an Kabun̄ in 1995, kōm kar jerbal ippān doon ippān baam̧le ko am ilo Frankfurt, Germany, ijo me jerbal eo an ekar iookļo̧k wōt Russia im Easter Europe.

Mour n̄an Elder Porter ekar jidik kōn jidik oktak ilo 1997 ke dekā in jibke ko an rekar jab lukkuun em̧m̧an aer jerbal im ājmour ekar jino nana. Porter baam̧le eo rekar jepļaakļo̧k n̄an Salt Lake City.

Ium̧win enan̄in 20 iiō ko in an jerbal ilo Jijlimjuonn̄oul eo, Bruce ekar deļo̧n̄ ilo aujpitōļ elōn̄ kattōn, im m̧wijm̧wij 10 alen. Taktō ro rōkar ba n̄an Susan ilo ruo iien ko bwe Bruce ejjāmin mour ļo̧k n̄an bon̄ōn̄ eo, bōtaab ekar.

Ium̧win elōn̄ļo̧k jān 12 iiō ko in an jerbal āinwōt juon Ritōl Eutiej an Kabun̄ in, Bruce ekar liklik n̄an kareeoik bōtōktōkin. Enan̄in aolepān iien in, kein liklik eo ekar kōm̧m̧an ļalem alen juon wiik ium̧win emān awa ko kajjojo kōm̧adm̧ōd bwe en maron̄ jerbal ilo kūr eo an ilo raan im bōk jerbal ko an kweiļo̧k ilo jem̧ļo̧kin wiik ko. Ke mour eo an ejjab em̧m̧anļo̧k ālkin jet kōjeraam̧m̧an ko, Bruce ekar tarpok, bōtaab ekar jeļā ilo wōn ekar lōke.26

Ilo 2010, Bruce ekar bōk juon dekā in jibke jān ļaddik eo nejin David. Tōre in ānbwinnin ekar jab bane kōm̧akūt eo. Ekar juon kabwilōn̄lōn̄, jepļaaktok in mour kāāl im ekōm̧m̧an bwe e im Susan ren jepļaak n̄an ijo ej iakwe Russia, ippān jerbal ippān Eria Būreejtōnji eo.

Pija
Elder im Sister Porter ilo Russia

Ilo Tijem̧ba 26, 2016 iiō eo ļo̧k, ālkin tariņaeik jab bōjrak in jorrāān ko ilo juon aujpitōļ ilo Salt Lake City, ekar kajjitōk ippān taktō ro bwe ren likūt ruum̧ eo. Bruce ekar ba n̄an Susan, “bwe ejeļā jān Jetōb eo bwe ejjeļo̧k men eņ taktō ro remaron̄ kōm̧m̧ane n̄an dāpij mour eo an. Ekar jeļā … bwe Jemedwōj Ilan̄ enaaj kōjepļaake n̄an kapijuknen. Ekar obrak kōn aenōm̧m̧an.”27

Ilo Tijem̧ba 28, Bruce ekar jepļaaktok n̄an ippān baam̧le eo an ilo kapijuknen eo. Jet awa tokālik, jepooļe jān baam̧le eo an, ekar kanooj aenōm̧m̧an jepļaak eo an n̄an m̧weo im̧ōn ilan̄.

Pija
Pija in Elder Bruce D. Porter

Iiō ko remootļo̧k, Bruce ekar je naan kein n̄an ajri ro nejin:

“Kam̧ool eo aō kōn m̧ool im iakwe n̄an Jisōs Kraist ekar unin tōl ilo mour eo aō. … E [e] juon m̧ool, okmāāņāņ in kamhool jān Jetōb eo bwe E ej mour, bwe E ej aō Rilo̧mo̧o̧r im Jera ilo aolep iien aikuj.”28

“Mālijjon̄ ko ad … ej n̄an jeļā [Rilo̧mo̧o̧r eo], im kōn tōmak ilo E n̄an anjo̧ jān mālijjon̄ ko im kapo ko an laļ in.”29

“Jen kanooj tōmak im m̧ool, lōke E.”30

Bruce Douglas Porter ekar anjo̧ jān laļ.

Kajjojo iaad jemaron̄ ke kajjieon̄ jidik m̧aanļo̧k ilo ad kottōbar n̄an anjo̧ jān laļ, jab kōļļāik jum̧ae ko reļļap bōtaab kōn jidik jirilo̧k ko im wōtlo̧k ko, kōn ikdeelel kōm̧ōkajļo̧k ad m̧ōkaj im kanooj ettā jipan̄ ro jet. Ilo ami lōke eļapļo̧k ilo Rilo̧mo̧o̧r eo, ij kallim̧uri kom̧ kōn kōjeraam̧m̧an in eļap aenōm̧m̧an ilo mour in im juon ļapļo̧k in jejjet in am̧ kōttōbar indeeo, ilo etan Jisōs Kraist, amen.