Te Tangira ae Kororaoi E Kanakoa te Maaku
Ti na katukui maakura ao ni maiu n oneamwiina ma te kukurei, nanorinano, kantaninga, ao te mweeraoi n ninikoria bwa te Uea e raoniira.
Tariu ao mwaaneu aika tangiraki, raou aika tangiraki, ai kakukureira te tibwanga ni kaitibo inanon te Ekaretia ni katobibia te aonaaba are ti a katiteuanaaki iai n ara onimaki ao tangiran te Atua ao Natina.
I kakaitau ibukin raonakira iroun ara burabeti, Thomas S. Monson. Beretitenti, ti ururing n tainako am taeka ni kairiiri, kauntira, ao wanawanam. Ti tangiriko, Beretitenti Monson, ao ti tataro n tainako ibukim.
Ririki aika a nako, ngke I riki bwa te titeiki Beretitenti i Frankfurt, Tiaman, te titita ae tangiraki ma e aki kukurei e kawarai n tokin teuana ara boowi n te titeiki.
“E aki buakaka?” e taku. “Tao aman ke niiman aomata aika matunako n tain am maroro!”
I iango tabeua te miniti ao imwiina I kaeka, “I taku bwa matun te Ekaretia anne bon teuana ibuakon matu ni kabane ae te kabane ni kamarurung.”
Kainnabau ae kakateke, Harriet, e ongo te maroro ao imwiina e taekinna bwa anne bon teuana te kaeka ae te kabanea n tikiraoi are I a tia n anga.
Te Kabwarabwara ae Kautimata
Tabeua te ririki n nako i Amerika Meang, te kakamwakuri ae aranaki bwa te “Kabwarabwara ae Kautimata” e a buta iaon te aba. Teuana ana botoniango bwa e na kauti mataia aomata ake a taraa n nimatutu ni kaineti ma bwain te Tamnei.
Te Kairake ae Iotebwa Timiti e anaaki nanona ni bwaai ake e ongo irouia taan kabwarabwara ake kain te kautimata n te aro. Bon teuana bukin are e baireia iai n ukoukora ana kantaninga te Uea inanon te tataro ae onoti.
Taan kabwarabwara aikai iai aroia ni kamwakuri, ni kabwarabwara ae katang, ma kabwarabwara ake a ataaki ibukin mwaitin aia kabwarabwara iaon kakaamakun te boobuaka i moone are tataningaia taan bure.1 Atuun aia maroro e aki kamatuuia aomata—ma e kona ni kariki tabeua miibuaka. Aia kantaninga ao teia e taraa ni kakamaakuia aomata inanon te Ekaretia.
Te Ongotaeka n te Maku
E kaman bwainaki man ngkekei, te maaku e a tia n tainako ni kabonganaaki ni kammwakuriia aomata. Kaaro a tia ni kabongana irouia natiia, taan kammwakuri ma taan mwakuri, ao kain te tautaeka ma taan rinerine.
Taan rabakau n te iokinibwai a ata mwaakan te maaku ao n tabetai a kamwakuria. Aio bukina ngkai tabeua katanoata a taraa ni kabonganai rongorongo are tao ngkana ti aki kabooa te bwai ae eti n te bwai n irewi ke ni kana te kaingabong ae eti, ti na karekea te kaangaanga ni maiuakinan te maiu ao ni mate n tii ngaira man aki kukurei.
Ti ngare n aei ao n iangoia bwa ti na bon aki kabwaka n aekakin nako kakamaku aikai, ma n tabetai ti karaoia. E a korakora riki, n tabetai ti kabonganai aekakin kawai aikai nakoia tabeman bwa a na karaoa are ti tangiria.
Au rongorongo iai bukina aika uoua n te bong aei: Te moan bon te kaungai ngkami bwa kam na iango ao ni karaka riki nakon are ti kabongana te maaku ni kaungaia tabeman—n ikotaki ma ngaira. Te kauoua bon taekinan kawai aika tamaroa riki.
Te Kaangaanga n te Maaku
Te moan, ti na kaineta te kaangaanga ma te maaku. E bon kairua bwa ti na ongotaeka man te maaku? Imwiin aikai, antai mai iroumi ae kakamaakaki bwa e na katamaroa riki amwarakena, kabongana te roo n te kaintekateka, kabatia te kakamwakuri, kawakin mwane, kabanea riki ana tai ma naake e tangiriia, ke n rairannano man te bure?
E koaua bwa te maaku iai korakorana ni bita te katei ke te anua. Ma te bitaki anne e kakai bitaki ao e aki nene. Te maaku e kuri akea mwaakana ni biti nanora, ao e na bon aki kona ni bitiira nakon aomata aika a tangira ae eti ao aika a tangiria n ongotaeka nakon Tamara are i Karawa.
Aomata aika a mamaaku a kona ni kangai ao a karaoi bwaai aika eti, ma aki namakina te bwai ae eti. N tabetai a namakinna bwa a aki kona ni buokaki ao a rarawa, riki a un. N te tai ae maan namakin aikai a kairi nakon te aki onimaki, aki ongotaeka, ao te kaitara.
Te kananokawaki, te kairi ae kairua nakon te nakoa ni kairiiri e aki tianaki nakon te aonaaba ae tiaki bwain te aro—e kona n reitaki naba, inanon taina, nakoira aika Itiaki ni Boong Aika Kaitira. I nanokawaki n ongo bwa kain te Ekaretia ake a kakaraoi waaki aika aki raraoi—ni mweengaia, inanon nakoaia n te Ekaretia, n te mwakuri, ke inanon aia waaki ni katoabong ma tabeman.
N tabetai, aomata a kona ni kaikoakiia raoia, ma a bon aki kona noria i bon irouia. A kairoro nakon te ongotaeka n irakin aia tua. Ngkana a rawa n iria tabeman tuua aikai, aomata aikai a kona ni katuaiia n aia taetae, aia namakin, ao n tabetai n te mwakuri.
E a tia n taekinna te Uea bwa “ngkana ti … karaoi tianakin bwaai ke karaoan kairoro nakon tamneia natiia aomata, ni waaki aika aki raraoi, … kain karawa a na kerikaaki [ao] Tamnein te Uea e na nanokawaki.”2
E na roko te tai are ti na kariiriaki iai ke ni motikaki taekara ibukin ara mwakuri ni Kakoaua bwa mwakuri nako a kakoroa mwiina ae tamaroa. Ti kona naba n iangoia bwa man tianakin, katuaeakiia, ao te kairoro e na Tamaroa ibukiia tabeman. Tiaki, bwa te Uea e a tia ni kamatata, “Uaan te Tamnei te tangira, te kimwareirei te rau, te taotaonaki n nano, te atataiaomata, te raoiroi, te kakaonimaki, te nimamanei.”3
Te Kawai ae Tamaroa
Ataakin riki Tamara are I Karawa, nooran riki aron ana anainano ao ni kairiia Natina. E aki kakai un, ni karekekai, ke ni kabomwi.4 Oin ana kantaninga—Ana mwakuri ao Mimitongina—bwa e na reireiniira, karietataira, ao e na kairiiri nakon onraken te Atua ni kabaneia.5
Te Atua ae kabwarabwara arona nakon Mote bwa e “atataiaomata ao e akoi, e teimatoa inanon te maraki, e bati te nanoanga ma te koaua irouna.”6
Ana tangira Tamara are I karawa ibukira, Natina, e katamaroa ara konabwai n iango.7
Aio e kananona bwa te Atua e katinanikui ke e tarariaoi anua ake a kaitara Ana tua? E aki, e bon aki!
Ma E tangiria ni bita ae mwaiti riki nakon ti anuara. E tangiria ni bita arora. E tangiria ni bita nanora.
E tangiriira bwa ti na arori baira ao n taua ni kamatoa te kai te biti, kaitarai maakura, ao n ninikoria ni waaki rake ao n iriira te kawai ae eti man irariki. E tangira aei ibukira ibukina bwa E tangiriira ao ibukina bwa aio te kawai nakon te kukurei.
Ngaia are, e kanga te Atua ni kaungaia Natina bwa a na Iriiria inanon ara bong?
E kanakoa Natina!
E kanakoa te Atua Ana Riki Temanna, Iesu Kristo, bwa e na kaota te kawai nakoira.
Te Atua e kairiiri rinanon te anainano, korakai ae maan, amarau, nanoanga, ao te tangira ae akea tiana.8 Te Atua e mena n ara itera. E tangiriira, ao ngkana ti bwaka, E tangiria bwa ti na teirake, ni manga kataia riki, ao ni korakora.
Ngaia ara tia reirei.
Bon ngaia korakorara ao ara kantaninga ae kakaawaki.
E tangiria ni kakorakoraira n te onimaki.
E onimakiniira bwa ti na reiakinaki man ara kairua ao ni karaoi rinerine aika eti.
Aio te kawai ae tamaroa riki!9
Tera ae Buakaka n te Aonaaba?
Teuana ana kawai Tatan are e tangiriira ni kamwakuriia tabeman bon katukan ao karawawataan te bure n te aonaaba.
Te koaua ara aonaaba e a tia n tainako, ao n reitinako n, aki kororaoi. A na rang mwaiti aomata aika akea aia kairua aika a na rootaki ibukin aron te karikibwai man aron naba aia akiako aomata. Te aro ni babakanikawai ao te buakaka n ara bong a bon onoti ao ni kakamaaku.
Ma n aki tarai aikai ni kabane, N na kaibibita te maiu n te tai aei ma n aekan rongorongon rimoa tabeua n te aonaaba. Ti kakabwaiaki riki n ae mwaiti n te bong aei n kakabwaia aika tuai ririki mai imwaina, kakukurei, ao n tamaroa. Riki, ti kakabwaiaki ni karekea bwaninin ana euangkerio Iesu Kristo, are e anganiira te taratara ae onoti n te kaangaanga n te aonaaba ao ni kaotia nakoira bwa ti na kanga n totokoi kaangaanga aikai ke ni kaitarai.
Ngkana I iangoi kakabwaia aikai, I tangiria ni katorobubua ao n tabeka bwanaau n nebonebo nakon Tamara are I Karawa ibukin ana tangira ae akea tokina ibukiia ni kabane natina.
I aki Kakoaua bwa te Atua e tangiriia Natina bwa a na mamaaku ke ni maeka ma te buakaka n te aonaaba “Ba e aki anganiira te Atua te nano ae mamaku; ma E anganiira te nano ae korakora, ae tatangira te aba, ae kawanawana te aba.”10
E a tia n anganiira bukina aika a mwaiti bwa ti na kukurei. Ti na tii riai ni kakaiia ao ni kinaiia. E kauringiira n tainako bwa ti na “aki maaku,” ao ni “kabebetei nanora,”11 ao “tai maaku, ngkami te nanai ae uarereke.”12
Te Uea E na Buaka Ibukira
Tariu ao mwaaneu, ngaira aika ana “nanai ae uarereke.” Ngaira aika Itiaki ni boong aika kaitira. Ti karekea man arara n te kabaeaki are ti ingainga nakon manga okin te Tia Kamaiu ao ni katauraoa te aonaaba bwa e na butimwaia. Ngaia are, ti na beku ibukin te Atua ao n tangiriia raora, ti na karaoa aio ma te mweengaraoi, ao te nanorinano, n aki kataorikaaki aro tabeua ke kurubu n aomata, Ti katauaki ni kamatebwaia ana taeka te Atua ao n ongo ni bwanaan te Tamnei, bwa ti aonga n “atai kanikina n taai, ao te kanikina n rokon Natin te Aomata.”13
Ngaira, ibukin anne, ti aki atatai n ana kakaewenako te aonaaba, ke n aki atai taai ni kaangaanga. Ma aio e aki nanonaki bwa ti riai ni karawawataira ke n teimatoa ni kakamakuia tabeman. Ngkai ti mena inanon ara kaangaanga aika mwaiti, tiaki e tamaroa riki bwa ti na boboto iaon mwaakan te Atua ae akea tokina, tamaroana, ao mwaakan Atuara, n onimakinna ao ni katauraoi ma te nano ae kimwareirei ibukin okiran Iesu Kristo?
Ngkai Ana aomata ni berita, ti riai n aki kamwaukuaki ibukina bwa ti maaka te bwai ae buakaka are e kona n riki. N oneamwiina, ti kona ni waaki nako ma te onimaki, ninikoria, teimatoa, ao n onimakina te Atua ngkai ti kaitarai kakaewenako ao tibwangara aika imwaira.14
Ti aki nakonako ni kawain ana reirei n ti ngaira. “Iehova ae Atuam …boni ngaia ae airi ma ngkoe; E na bon aki kakiko, ao E na bon aki kitaniko.”15
“Ane e na buaka Iehova ibukimi, ao kam na kainababu.”16
Ni kaitara te maaku, ti na ninikoria, ni bobota ara onimaki, ao ni kaninikoriaira inanon te berita are “bon akea te bwai ni buaka ae karaoaki bwa e na kaitarako ae e na tokanikai.…Aio bon te bwai ae e bwaibwai iai ana toro te Uea.”17
Ngkai ti maeka n te tai ae kakamaku ao ni mangaongao? Eng ti maeka iai.
Te Atua are bon ngaia ae kangai, “ami bwai iaon te aba te rawawata; ma kam na kabebetei nanomi; I a tia ni kataea ana kai te aba.”18
Ti kona ni kamwakura te onimaki ni kakoaua ao ni mwakuri nako iai? Ti kona ni maiuakina kabaeakira ao berita aika tabu? Ti kona ni kawakin ana tua te Atua riki n taai ni kakaewenako? Eng ti kona!
Ibukina bwa e a tia ni berita nakoira te Atua, “Bwaai ni kabane a na nakoraoi ibukim, ngkana [ko] nakonako inanon te koaua.”19 Ai ngaia, ti na katikui maakura ao n oneamwiina ma te kukurei, nanorinano, kantaninga, ao te mweeraoi n ninikoria n ataia bwa te Uea e raoniira.
Te Tangira ae Kororaoi e Kanakoa te Maaku
Raou aika kam tangiraki, tariu ao mwaaneu inanon Kristo, ngkana ti kunea bwa ti maeka ma te maaku ke te nakonnano, ke ngkana kam kunea bwa ara taeka, anuara, ke ara mwakuri a karika te maaku irouia tabeman, N na tataro ni kabanea korakoran tamneiu bwa ti na kona ni kainaomataaki man te maaku aei man katokana are e roko mai karawa: ana tangira Kristo ae kororaoi, bwa te “tangira ae kororaoi e kanakoa te maaku.”20
Ana tangira ae kororaoi Kristo e kanakoa te kariiri ni kaikoaki, kakamaku, aonikai, ke n ribuaka.
Ana tangira ae kororaoi Kristo are ti nakonako iai n nanorinano, ma te karineaki, ao te ninikoria bwa taan iriira ara tia Kamaiu ae tangiraki. Ana tangira ae kororaoi e anganiira te ninikoria ni waaki nako rinanon makura ao n onimakina mwaakan ao tamaroan Tamara arei Karawa, ao Natina, Iesu Kristo.
Inanon mweengara, n ara tabo ni mwakuri, n nakoara n te Ekaretia, ao ni kabane ara mwakuri ma raora, ao inanora, ti na oneamwiin te maaku ma te tangira ae kororaoi. Ana tangira Kristo e na oneamwiin te maaku n te onimaki!
Ana tangira ti na kona iai n ataia, onimakinna, ao ni karekea te onimaki n tamaroan Tamara are I Karawa, Ana baire ae akea tokina, Ana euangkerio, ao Ana tua.21 Tangiran te Atua ao raora e na rairi ongotaekara nakon ana tua te Atua nakon kakabwaia nakon riki ae te rawawata. Ana tangira Kristo e na buokiira n akoi riki, ni kakabwarabure riki, n akoi riki, ao n kabanei riki nanora nakon Ana mwakuri.
Ngkai ti kaoni nanora n ana tangira Kristo, ti na kauringaki n tamaroan maiura n Tamnei ao ti na nakonako ma te kimwareirei, ni mweengaraoi, n taratara ao ni maiu inanon te maiu ao mimitonging ara Tia Kamaiu ae tangiraki, Iesu Kristo.
I kakoaua, ma te Abotoro ae Ioane, “Akea te maaku n ana tangira [Kristo].”22 Tariu ao mwaaneu, raora aika tangiraki, E kinako raoi te Atua n te aro ae kororaoi. E tangiriko ma te kororaoi. E ataia bwa tera kabwaiam n taai aika a na roko. E tangiriko bwa ko na “aki maaku, ti kakoaua”23 n “raonaki n ana tangira ae [kororaoi].”24Aio au tataro ao au kakabwaia n aran Iesu Kristo, amen.