Luhngse Pwacye uh Luhslah Sahngweng
Lwelah kuht in sislah sahngweng lasr ac moulkihn engan, puhsisacl, finsrak, ac luhlahlfongi kuh in kuht sifacna lah Leum el wi kuht.
Tamuhlwel ac tahmtahel sacohk wiyuck, kawuck sacohk, pacl na wowo se ac engan se in tuhkweni ekihn Alu sefanna facluh ke luhlahlfongi ac luhngse nuh sin God ac tuhlihk nahtuhl.
Yohkna nga srui ke oasr luhn mwet pahluh sacohk lasr, Thomas S. Monson. Prestuhn, kuht ac sikalweni in eis kahs in kol, kahsruh, ac lahlmwetmwet lom nuh insiyacsr. Kuht luhngse kom, Prestuhn Monson, ac kuht pruhe keim pacl nuhkwewa.
Yac somlah, ke nga kuhlwacnsap ekihn prestuhn luhn stek fin acn Frankfurt, Germany, sie tahmtahel na sacohk tuhsruhk suhpwacr fahsryak nuh yuruk ke sahflahiyacn sie miting lasr ke stek sac.
“Kuh tiac koluk?” el fahk. “Mwet ahkosr kuh limekohsr mutul ke kom sramsram ah!”
Nga wetoklac nuhnkuh ac topuk, “Nga muh mutul ke alu pa mutul ma wo emet nuh ke kuh luhn mahno.”
Muhtwacn sacohk kiyuck, Harriet, el lohnglah sramsram se lasr inge ac tohkoh fahk muh top se nga oruh ah pa sie top ma wo emet inmahsrlon top ma nga muhta oruh uh.
The Great Awakening
Yac siofok kuhtuh somlah fin acn North America, sie mukwikwi suc pahngpahng “Great Awakening” fahsrwelihk nuh fin acn sac. Sie srihpac la an pa in okasack mwet ma liyeyuck muh mutul ke moul in nguhn lalos.
Mwet Fuhsr Joseph Smith el moklweyuck ke ma ma el lohng sin mwet luti inge suc ma tuhkuh ke u in alu suc ma srihke in okasack mwet ke moul in nguhn lalos. Pa sie srihpac ma oruh el otwelah in kwacfweacng suk luhngse luhn Leum ke el muhkwena pruhe.
Atacn luti luhn mwet luti inge arlacna utuftuf, moklweack mwet uh, luti lalos inge etweyuck ke puhsra na upac ke ahksahngweng luhn isis ma soano mwet koluk.1 Sramsram lalos tiac ahkmutulyelah mwet uh—tuhsruhk sahp sang kuhtuh mwemwe koluk nuh sin mwet uh. Srihpac ac atacn luti lalos oacna in ahksahngwengye mwet uh in tuhkuh wi alu.
Sahngweng uh Ekuhllah
Emetme, sahngweng uh kwacna orekmakihnyuck in mokle mwet uh in mukwilac oruh ma se. Pahpah ninac orekmakihn nuh sin tuhlihk nahtuhlos, mwet sifac ke orekma orekmakihn nuh sin mwet orekma lalos, ac mwet kol luhn kafucrmacn orekmakihn nuh sin mwet fot uh.
Mwet pihsrlac ke pisnis uh kahlwem ke kuh luhn sahngweng ac kwacna orekmakihn. Pa oruh kuhtuh actfucrtais uh srihke in tahfwelah pweng ma fahk muh fin kuht tiac moli siriuhl kuh vitio kem sasuc kuh sacl fon sasuc, na kuht sifacna iskuhtyang ke moul in sensen ma ac pwacnwacng moul lasr uh in toasr, suc ma pwenkuhtlac nuh ke muhkwena suhpwacr ne misac.
Kuht isracsr nuh sesr sifacna ac nuhnkuh muh kuht ac fah tiac puhtatyang nuh ke inkacnek in ekuhllah nuhnak, tuhsruhk kuhtuh pacl uh kuht oruh. Koluk likina, kuhtuh pacl uh kuht orekmakihn inkacnek in ekuhllah nuhnak in oruh mwet sahyac in oruh kena lasr.
Oasr srihpac luo ke pweng luhk mihsenge uh: Ma se met pa in salkwe kuht in nuhnkuh ac nuhnkwaclah luhpah ma kuht orekmakihn sahngweng in mokle mwet sahyac—finne kuht sifacna. Ma se ahkluo an pa in fahk sie ohiyac ma wo liki ngwacn.
Elyah ke Sahngweng
Ma se met, lwelah kuht in sramsramkihn elyah ke sahngweng uh. Tukun ma inge kwewa, suc sesr soenna pahtokyuck ke sahngweng in mongo wo, orekmakihn sit pacl an, ahsrosr in yohk, sef mani, kuh auliyak ke ma koluk?
Ma na pwacye se lah oasr ke sahngweng uh oasr kuh la in ekuhllah mukwikwi ac elah lasr uh. Tuhsruhk kuh sacn ma na nuh ke kihtin pacl ac suhloal kuh la uh. Sesahlah in oasr kuh luhn sahngweng in ekuhllah insiyacsr, ac ac fah tiac ikihlkuhtlac nuh ke mwet ma luhngse ma suwohs ac suc ma ke ahkos Pahpah Lucng.
Mwet ma sahngweng uh ac fahk ac oruh ma wo, tuhsruhk elos ac tiac puhla wo ke ma uh. Elos kwacna puhla muh elos srisrilac ac koaseyuck, finne ahngyahng. Tohkohyang puhla inge ac kohkohlah nuh ke suhlahlahlfongi, seahkostwen, finne lain.
Koluk ohiyac, inkacnek sesuwohs nuh ke moul se inge ac kolyuck se inge tiac tilokihnyucki nuh ke kasrpacn moul fin facl se inge. Nga suhpwacr ke nga lohng lah mwet ke Alu uh orekmakihn kain in ohiyac sesuwohs inge in lweum—fin mwet in lohm selos, ke kunohkohn lalos ke Alu, ke orekma ah, kuh ke asruoki lalos nuh sin mwet sahyac ke penga na lwen.
Inkaiyacn pacl uh, mwet uh nuhnuhnkuh mwet ma ahkkohsye mwet sahyac, ac elos tiac liye lah oasr pac in elos. Elos sapkihn in ahkos masap lalos sifacna, tuhsruhk ke mwet uh tiac ahkos masap lalos uh, elos ahkkohsyaclos ke kahs, ke nuhnak, ac kuhtuh pacl uh ahkkohsye mahno.
Leum El fahk ah lah ke sie mwet sruok pristut ahkyohkye oruh kuh karihngihn kuh pahtok nguhnin mwet sahyac, ke kuhtwena ohiyac sesuwohs, inkuhsrao ac som luhkwelos; ac Nguhn luhn Leum ac ahsor na upac.2
Oasr pacl ma srihfeyuck kuht in ahksuwohsye mukwikwi lasr ke kuht luhlahlfongi muh ke sahflahiyacn ma uh wona mukwikwi lasr ke srihpen oasr srihpac wowo pwacnwacng kuht oruh ma kuht oruh uh. Kuht ac sahp nuhnkuh lah ahkkohsye, ahkkolukye, ac isrlacl uh ma ac wo nuh sin mwet sahyac. Tiac ohinge, tuh Leum el oruh kahlwem lah “ a fahko lun Ngun pa lungse, engan, misla, mongfisrasr, kulang, orekma wo, [ac] oaru.”3
Inkacnek se ma Wo Liki
Ke yohkwelihk etuh luhk kacl Pahpah Lucng, yohkwelihk liye luhk ke El mokle ac kol tuhlihk Nahtuhl. El tiac ahngyahng, kohkoh muhlat, kuh fohlohksahk.4 Srihpac na pwacye lal—orekma Lal ac wolacna Lal—pa in luti kuht, sruhkkuht nuh lucng, ac kol kuht nuh ke fohnlah Lal.5
God el ahkuhtweyac Kacl sifacna nuh sel Moses oacna ““kulang ac pakoten, tia sa in mulat, sesseslana ke inse pwaye ac lungse kawil.”6
Luhngse luhn Pahpah Lucng nuh sesr, tuhlihk Nahtuhl, ahluhkwelah kuhiyacsr in nuhnkuh.7
Kuh kalmac pa God el nuhnakmuhnahs ac ngwetlah liki elah ma tiac fahsr ke masap Lal? Moh, tiac na tiac!
Tuhsruhk El ke ekuhllah tiac elah lasr uh muhkwena. El ke ekuhllah ma nuhkwewa in kuht. El ke ekuhllah nuhnak luhn insiyacsr.
El ke kuht in ahsrwelah pahosr ac lihksreni sruokyac kahs lal, tuyang lain sahngweng lasr, ac fahsr nuh met ke puhlaik ac nuh lucng ke inkacnek suwohs ac oasrihksrihk sac. El ke in ohinge nuh sesr mweyen El luhngse kuht ac mweyen pa inge inkacnek nuh ke engan.
God El ahkkweye fuhkah tuhlihk Nahtuhl in fahsr Tohkohl in lwen inge?
El suhpwacma Wen Nahtuhl!
God El suhpwacma Wen Kuloh Sefanna Nahtuhl, Jisus Kraist in ahkkahlwemye nuh sesr inkacnek pwacye.
God El ahkkweye kuht ke kwacfe, mongfihsrwacsr, kuhlwacng, puhsisacl, ac luhngse suwohs.8 God El wi kuht lac. El luhngse kuht, ac ke pacl kuht tihkuclkuclyak, El ke kuht in tuyak, ac sifil srihke, ac in eklac fokokoi.
El pa mwet luti lasr.
El pa finsrak yohk ac sacohk lasr.
El kena in kol kuht ke luhlahlfongi.
El luhlahlfongi kuht in lutlut ke tahfonglac lasr ac oruh sulwaclah pwacye.
Pa inge inkacnek wo uh!9
Ac Ma Koluk Facluh uh?
Sie inkacnek ma Setuhn el ke kuht in ikihl mwet sahyac uh pa in muhta na ke ac finne in laheslah ma koluk luhn facluh se inge.
Pwacyena, facluh se lasr inge na ohinge emet me, ac fah tahfwelah na in, sesuwohs. Arulacna puhs mwet wo kweok ke srihpen ma sikyak ke ohiyac oacna nuh ke srahngwesroa luhn mwet uh. Ma kuhtasrihk ac koluk in lwen inge arulacna siena ac ahksahngweng.
Ne ohinge, nga tiac kuh in ahollah nga in moul ke siena pacl fin facl se inge likina nga in moul ke pacl se inge. Kuht arulacna ahkinsewowoyeyuck in moul in lwen inge suc pa lwen sesseslah ke mwe kahsruhp, kahlwem, ac ma wo. Ma se ma yohk emet, kuht ahkinsewowoyeyuck ke oasr fohnlah luhn wosasuc luhn Jisus Kraist, suc ma use nuhnak loal lasr nuh ke mwe sensen luhn facl se inge ac ahkkahlwemye nuh sesr lah kuht ac kahingkihn fuhkah mwe sensen inge kuh kuht ac ahkwoyelah fuhkah.
Ke nga nuhnkuh ke mwe insewowo inge, nga kena sikuckmuhtuhntei ac sang puhsren kaksyak nuh sin Pahpah tuhmasr Inkuhsrao ke luhngse Lal suc ma tiac wacngihnlac nuh sin tuhlihk nuhkwewa Nahtuhl.
Nga tiac luhlahlfongi muh God El ke tuhlihk Nahtuhl in sahngweng kuh muhta na ke ma koluk luhn facl se inge. “Tuh Ngun suc God El ase nu sesr uh tia mwe aktonongye kut; a ma in nwekkutla ke ngunin ku, ac lungse, ac in sifana leum facsr.”10
El use nuh sesr srihpac puhkantwen in engan. Kuht enenuh in konwacack ac akihlen ma inge. Leum el kena ahkacsmakihnye kuht in “in “tiac sahngweng,” in “enganwack,”11 ac in “tiac elyah, u srihsrihk.”12
Leum El ac Ahol Kuht Oruh Mweun Lasr
Tamuhlwel ac tahmtahel, kuht pa “un sip srihsrihk” luhn Leum. Kuht pa Mwet Luhlahlfongi ke lwen sahflah uh. Yohk srihpac nuh ke inesr pa in olwelah in ngwet nuh met nuh ke fohlohk luhn Mwet Lahngo ac ahkoekuhtlac ac facluh se inge in Esacl. Ke ma inge, lwelah kuht in kuhlwacnsuhpuh God ac luhngse mwet lili wiyacsr. Lwelah kuht in oruh ke nuhnak kuh, ke puhsisacl, tiac na srihkkihn alu sahyac kuh un mwet sahyac. Tamuhlwel ac tahmtahel, sapkihnyuck nuh sesr in lutlut ke kahs luhn God ac porongo puhsren Nguhn, kuht in muh “etuh akucl ke pacl, ac akucl ke tuhkuh luhn Wen nuhtin Mwet.”13
Ke ma inge, kuht, tiac pihlesruh ma upac luhn facluh, kuh kuht tiac lihkihnsaci ma upac ke pacl lasr uh. Tuh tiac kalmac pa kuht in ahkelyahye kuht sifacna kuh mwet sahyac ke sahngweng ke inkaiyacn pacl uh. Likina in siyac na upaciyacn elyah lasr uh, kuh tiac wo liki fin kuht siyac ma sun, ma wo, ac kuh suwohs luhn God lasr, luhlahlfongi ke El ac ahkolah ke inse engan nuh ke fohlohkoh luhn Jisus Kraist?
Ke kuht ekihn mwet olwelah Lal, kuht enenuh in tiac muhnahslah ke sahngweng mweyen ma koluk uh ac sahp kuh in sikyak. Ac, kuht in fahsr nuh met ke luhlahlfongi, puhlaik, nuhnak fokoko, ac luhlahlfongi ke God ke kuht sun ma elyah ac finsrak wowo ma oan met liki kuht uh.14
Kuht tiac muhkwena fahsr ke inkacnek luhn mwet tuhma lutlut. Leum God lowos El ac fah wi kowos. El fah tiacna som liki kowos, a El ac fah wi kowos in kahsrwekowos.15
“Leum El fah wi kom lain, ac kom fah eis mihs lom uh.”16
Ke kuht sun sahngweng uh, lwelah kuht in sokwack puhlaik lasr, oracni luhlahlfongi lasr, ac eis luhlahlfongi ke olwelah ma “wangin kufwen mwe mweun ac fah kunauskomla.”17
Yac kuht oasr ke sie pacl koluk ac fohs? Ahok kuht oasr kac.
God Sifacna El fahk, “Ke kowos muta faclu kowos ac keok. Tusruktu kowos in pulaik na! Nga kutangla faclu tari!”18
Kuh kuht kuh in ahkyohkye nuhnak in luhlahlfongi ac in mukwikwi fal nuh kac? Kuh kuht tahfwelah in liyacacng sulwaclah ac olwelah muhtahl lasr? Kuh kuht kuh in liyacacng masap luhn God finne ke pacl upac? Ahok kuht kuh!
Kuht kuh mweyen God El olwelah, “ma nuhkwewa fah orekma tuhkweni ke wo lom, kom fin fahsr suwohswohs.19 Ke ma inge, lwelah kuht in fihliyac sahngweng lasr ac moulkihn engan, puhsisacl, finsrak, ac luhlahlfongi kac sifacna lah Leum el wi kuht.
Luhngse Pwacye El Luhslah Sahngweng
Mwet kawuck sacohk wiyuck, tamuhlwel ac tahmtahel sacohk in Kraist, fin kuht muh konwekuhtyak ke sahngweng ac tuhninfong, kuh fin kuht sokwack tuh kahs lasr sifacna, ohiyacsr, kuh mukwikwi lasr uh oruh mwet sahyac in sahngweng, nga pruhe ke kuhiyen nguhnihk nuhkwewa tuh kuht sukohsohklah liki sahngweng se inge ke ono wolacna ma sollac nuh ke sahngweng: pa luhngse pwacye luhn Kraist, tuh “luhngse pwacye el luhslah sahngweng.”20
Luhngse pwacye luhn Kraist el kuhtanglah mwe sruhf nuh ke ahkngalye, ahkkohsye, fuhnmweti, ac leum fac.
Luhngse pwacye luhn Kraist El lwelah nuh sesr in fahsr ke puhsisacl, ahkfuhlwact, ac nuhnak kuh ke kuht ekihn mwet etahwi luhn Mwet Lahngo sacohk lasr. Luhngse pwacye luhn Kraist use nuh sesr luhlahlfongi kuh in fahsr nuh met finne ke sahngweng lasr ac fihliyac luhlahlfongi nohfohn lasr ke kuh ac wo luhn Pahpah tuhmasr Inkuhsrao ac Wen Nahtuhl, Jisus Kraist.
In lohm sesr, ke acn in orekma lasr, ke kunohkohn lasr ke Alu, ke nuhnak luhn insiyacsr, lwelah kuht in ahollah sahngweng lasr nuh ke luhngse pwacye luhn Kraist. Luhngse luhn Kraist ac ahollah sahngweng ke luhlahlfongi!
Luhngse lal ac oruh kuht kuh in akihlen, luhlahlfongi, ac luhlahlfongi ke wolacna luhn Pahpah tuhmasr Inkuhsrao, plwacn wolacna Lal, wosasuc Lal, ac masap Lal.21 Luhngse God ac mwet lili wiyacsr ac ekuhllah ahkostwen lasr ke masap luhn God nuh ke sie mwe insewowo likina in sie mwe toasr. Luhngse luhn Kraist ac kahsrwe kuht in eklac kuhlwacng liki met, nuhnakmuhnahs, nuhnkuh ke mwet, ac oaruyak ke orekma Lal.
Ke kuht koanwelah insiyacsr ke luhngse luhn Kraist, kuht ac okasack sie moul in nguhn sasuc in kuht ac kuht ac fuhfahsryucsr ke engan, luhlahlfongi, okak, ac moul ke kahlwem ac wolacna luhn Mwet Lahngo sacohk lasr, Jisus Kraist.
Nga fahkwack ke luhlahlfongi, weluhl Mwet Sap John, “Wangin sangeng ke lungse luhn [Kraist].”22 Tamuhlwel ac tahmtahel, mwet kawuck sacohk, God El etwekowos na pwacye. El luhngse kowos na pwacye. El etuh ma ac sik nuh sum. El kena kom in “nimet fosrnga, a lulalfongi na”23 ac “mutana in lungse [suwos] lal.”24 Pa inge pruhe ac mwe insewowo luhk ke inen Jisus Kraist, amen.