Amonnata ewe Aan

Nupwen ua inik ieri, ua poputa ne angang non eu nenien amomo pisek non France. Eu ran presetenin ewe kompani, emon mwan mi murino chon pwan eu namanam, a kokorieinong non an ewe offis. Ua mairu ren an kapas eis: “Ua chok keran sinei pwe en emon pris non om mwichefen. Mi pung?

Ua apasa, “Ewer, mi pung. Ngang ua wiseni ewe wisen pristut.”

Ua kuna pwe a mairu ren ai ponueni an kapas eis, a pwan eis, “Nge en mi fiti eu sukunen seminari?

“Ewer,” ua ponueni, “nupwen ua 14[engon me ruanu] ngeni 18[engon me wanu] ieri, ua kaeo ekkewe nesenin semineri iteiten ran!” Chipu chok epwe turutiw me won nenian ewe.

Iwe ua mairu, fitu wik mwirin a pwan kokkoriei ai upwe feino ngeni an ewe offis an epwe tingor ika ua mochen wiseni wisen chon emwen non eu nein ekkewe kompani. Ua mairu me ua apasa pwe ua nuokus pwe a kukun ieri me use nuku pwe ua tongeni fori ei sokkun wis mi watte. A emenimen, me a apasa, “Naman mi ennet, nge ese nifinifin. Ua sinei nongonongen manauom, me ua senei met ka kaeo non om mwichefen. Ua mwochen en.”

A pung ren met ua kaeo non ewe Mwichefen. Ekkewe ier mwirin a weires me use sinei ika ua tongeni nipwakoch non ai angang ika use fen kaeo seni ai angang non ewe Mwichefen seni nekukuni.

Ua feiochuni ai ua mamarita non eu kukkun pranch. Pokiten ese chommong memper, ekkewe serafo mi kokko ar repwe aninis non mokutokuten ewe pranch meinisin. Ua fokkun osukosuk me ua sani ai upwe aninis. Non Raninfel ua aninis ren ewe sakramen, ua aninis non ai mwichen pris, me ua pwan fori ekkoch wis. Non ewe wik fan chommong ua fiti semei me pwan ekkoch mwan chon ewe pristut nupwen aua feino churi ekkewe memper, anisi ekkewe mi semwen me weires, me anisi ekkewe mi osupwang. Ese wor emon a ekieki pwe a kukkun ieri iwe use tongeni aninis are pwan emwen. Merei, a chok ina usun met aua fori.

Ewe angang ua fori nekukuni a anisiei ai upwe apochokuna ai kapasen pwarata me angkoni manauei non ewe kapas allim. Mi wor mwan mi murrino me uren tong unuki me ra mochen aea ar pristut ar repwe efeiochu manauen ekkoch aramas. Ua mochen appiru ir. Non ai fitir ne angang, nap seni met ua esina non ewe fansoun, ua kaeo ai upwe emon souemwen non ewe Mwichefen me pwan non fonufan.

Mi wor chommong anuon mi fiti are ausening ngeni ei mwich non ei pwinin mi chon ewe Pristut seni Aaron. Nupwen ua netiw non ei mwich, ua kuna pwe chommong me neimi mi mommot ren ekkoch mwan, naman sememi, semen sememi, pwimi kewe watte, are ami chon emwen non pristut—ir meinisin chon ewe Pristut seni Melchizedek. Ra tongei kemi, me ennet, ra feito nepwinei ar repwe nom remi.

Ei chufengen an chommong tapin aramas mi pwarata ewe angang fengen me chiechifengen nefinen ekkewe ru pristut an Kot. Ina mwo pwe ar misin me mummuta mi sokofesin, ewe Pristut seni Aaron me ewe Pristut seni Melchizedek mi kapach fengen non ewe angangen amanau. Ra angang fengen me ir me ru mi auchea.

Eu poraus mi ennetin awewe ewe angangfengen nefinen ekkei ru pristut mi nom non porausen Jises me John ewe Sou-Papatais. Emon mi tongeni ekieki usun John ewe Sou-Papatais ika rese ekieki usun Jises? Epwe fen ifa usun an ewe Chon Amanau misin ika esap punun ewe angangen ammonata minnei John a fori?

John ewe Sou-Papatais a angei eu wis mi nap nein ekkewe misin meinisin: “pwe epwe amonnata ewe aanen ewe Samon,”¹ ne papataisi I ren konik, me ammonata ekkewe aramas ar repwe etiwa I. Ei “[mwan] mi pung o mi pin,”² a angei ewe pristut seni Aaron, a sinei auchean me tufichin an misin me an mummuta.

Aramas ra feito ngeni John ar repwe ausening ngeni me ar repwe papatais me ren. Aramas ra sufuniti me ingeiti pokiten i emon mwan noun Kot. Nge nupwen Jises a pwa, John a kun ngeni ewe Emon mi nap seni I me a apasa, “Ua papatais ren konik, nge ewe emon ouse sinei a nomw neimi, … ien epwe feito muri epwe fen nomw mwei, nge use fich ngeni ai upwe epichi ririn noun sus.”³

Ren an kinikin, Jises ewe Kraist, Noun ewe Sam Anemon, a kommoch ewe pristut mi tekia, a tipeteison non an esina an John mummuta. Ewe chon amanau a apasa usun John, “Ese wor emon aramas won fonufan a nap seni John ewe Sou-Papatais.”⁴

Oupwe ekieki met epwe fis non ach mwichen pristut ika ewe chiechifengen nefinen chon ekkewe ru pristut mi appiru met a fis nefinen Jises me John ewe Sou-Papatais. Pwi kewe kukun chon ewe Pristut seni Aaron, usun chok John, wisemi pwe oupwe “ammonata ewe aan”⁵ fan iten ewe angang mi nap an ewe Pristut seni Melchizedek. Oua fori ei non chommong napanap. Oua fori ewe angangen papatais me ewe sakrament. Oua anisi aramas ar repwe ammonata fan iten ewe Samon ren ami afanafana ewe kapas allim, ami churi ekkewe memper meinisin,”⁶ me ami tumunu ewe mwichefen.”⁷ Oua anisi ekkewe mi apwangapwang me osupwang ren ami feino angei ekkewe asorun echikifel, me oua aninis ne tumunu ekkewe imwen fan me pwan ekkoch pisekin ewe Mwichefen. Wisemi mi auchea, namwot, me pin.

Pwi kewe watte, ina mwo ika ami sam, pisop, souemwenin Anuen, are oua chok chon ewe Pristut seni Melchizedek, oua tongeni appiru ewe Chon Amanau ren ami kun ngeni pwimi kewe mi kommoch ewe Pristut seni Aaron me tingorer ar repwe fitikemi ne angang. Ennet, ei tingor a feito seni ewe Samon Pwisin. A apasa pwe chon ewe Pristut seni Melchizedek repwe uwei chon epwe Pristut seni Aaron, me repwe mut ngeniir ar repwe fori ar kewe kokkotun churi aramas, amonnata ewe aan, me fiti ekkewe mwich minne kose pwisin tongeni fiti.”⁸

Nupwen oua tingorei pwimi kewe kukun ar repwe “amonnata ewe aan,” oupwe anisir ar repwe esina me sufeniti ewe mummuta mi pin mi nom rer. Iwe, oupwe anisir ar repwe amonnata ar pwisin aan nupwen ra amonnata ngeni ewe ran ar repwe angei me anganga ewe pristut mi tekia.

Upwe aporausa porausen Alex, emon pris mi mosonoson, kirokiroch, me mirit. Eu Raninfel an Alex we pisop a kuna pwe a akanemon non eu rum me a wesen osukosuk. Ewe at a awewei pwe a weires an epwe fiti fan nge seman ese fiti, ese mwo emon memper. Iwe a kechiw me a apasa epwe fen och ika epwe tou seni ewe Mwichefen.

Ren an ennetin mochen anisi ei at, ewe pisop a ochufengeni ekkewe souemwenin ewe wart ar repwe anisi Alex. An kokkot mi mecheres: ar repwe anisi Alex an epwe fiti fan me epwe angei an kapasen pwarata usun ewe kapas allim, mi namowt “aramas mi murino repwe ren me repwe ngeni mettoch auche an epwe fori.”

Mwurin chok chon ewe pristut me chon ewe wart meinisin ra angangfengen ar repwe anisi Alex me ra pwarata ar tong me aninis. Ewe souemwenin pris tekia, emon mwan mi watte an nuku me tong, a kefinita an epwe chienan nefamine osukun non kewe famini. Chon ewe pisoprik ra pwisin anisi me seikata pwe chiener mei kan ngenir.

Ewe pisop a apasa: “Aua awora angang fan iten Alex. A angang non apupunu, mi ma, a anisiei ne epini peias, a papataisi memper mi fo, efeiochu anuon ngeni wis non ewe Pristut seni Aaron, a aiti nesen, a fiti ekewe misineri ne afanafan, a suki ewe fan ren mwich, me a ekesipano ewe fan nepwin mwirin ekkewe mwich. A fori chommong angangen aninis, a fitiie ai upwe churi memper mi chinnap non p pioing, a afanafan non mwichen sakramen, a uwei ewe sakramen ngeni ekkewe mi semwen non pioing me non imwer, me a winiti emon nein fitemon chok aramas minne ua tongeni nuku non wisei pisop.

Ekis me ekis, Alex a siwin. An nuku non ewe Samon a awatteno. A angei tipepochokun non pwisin an tufich me non manamanen ewe pristut a komoch. Ewe pisop a osupwano: “Alex a fen me epwe ew me nein ai kewe feioch mi nap ngeniei nupwen ua wisen pisop. Ua ennetin feioch ai upwe angang I ngeni. Ua ennetin nuku pwe ese wor emon at a fen feino won an misin mi nap monata ren an angang non ewe pristut.”⁹

Chienei kewe pisop mi acheingicheing, ouwa fen, non ami sekita ngeni wisemi pisop non ami wart, oua angei ewe wis mi pin pwe oupwe wisen presetenin ewe Pristut seni Aaron me ewe mwichen pris. Ua sinei pwe osemi mi chou, nge oupwe aucheani wisemi ngeni ekkei anuon. Ouse tongeni nikitano are awisa pwan emon an epwe fori ei wis fan itemi.

Ua tingoreikemi oupwe ekieki usun emon me emon ekkewe chon ewe Pristut seni Aaron non ami wart. Esap wor emon epwe mefi akanemon are ese wor namwotan. Mi wor emon anuon en are pwan ekkoch chon pristut mi tongeni anisi? Tingorer ar repwe fitikemi non ami angang. Fan chommong sia achocho ne apwapwai ekkewe anuon me erenir ar repwe chok katon, nupwen ar nuku me tong fan iten ewe kapas allim mi tongeni awatteno ren ar anganga ar pristut. Ren ar fiti ewe angangen amanau, repwe chufengen ren nang me repwe weweiti met ra tufichin fori.

Ewe Pristut seni Aaron esap chon eu mwichen anuon mi nonochok ierir, eu prokramin sukun, are fen eu tim minne anuon non ewe Mwichefen repwe fiti. A fen ew manaman me mummuta ar repwe aninis non ewe angang ne amanaua ngunun aramas—ngunun ekkei anuon mi komoch ei pristut me ngunun ekkewe ra angang ngeni. Sipwe anenia ewe Pristut seni Aaron non nenian mi pung, nenian mi kefin—nenian angang, amonnata, me nipwakoch fan iten ekkewe anuon meinisin non ewe Mwichefen.

Pwi kewe chon ewe Pristut seni Melchizedek, ua tingoreikemi oupwe apochokuna ewe chiechi nefinen ekkewe ru pristut an Kot. Apochokuna ekkewe chon ewe Prsitut seni Aaron ar repwe amonnata ewe aan mwemi. Erenir fiti omw nuku, “Oua namwot ngeniei.” Ngeni ami chon ewe Pristut seni Aaron, ua iotek pwe nupwen oua angang ren pwimi watte, oupwe rong mongungun ewe Samon ren an erenikemi pwe oua feioch, pwe oupwe fori mettoch mi napanap. Me oua feito, usun chok John, ne amonnata ewe aanen ewe Samon.”¹⁰ Non iten Jises Kraist, amen.