Npaj txoj Hau Kev

Thaum kuv muaj 30 xyoo, kuv pib ua hauj lwm rau ib lub tsev muag khoom hauv Fabkis teb. Muaj ib hnub tus thawj tswj hwm rau lub tsev lag luam, uas yog ib tug neeg siab zoo uas koom lwm txoj kev ntseeg, tau hu kuv mus ntsib nws hauv nws lub hoob kas. Nws lo lus teb ua rau kuv xav tsis thoob nws hais tias: “Es kuv nyuam qhuav hnov hais tias koj yog ib tug pov thawj hauv koj lub koom txoos. Qhov ntawd puas muaj tseeb?”

Kuv teb tias, “Aws, yeej muaj tseeb mas. Kuv tuav lub pov thawj hwj.”

Nws muaj ntsis xav tsis thoob, ces nug ntxiv hais tias, “Tiam sis koj puas tau kawm tej hoob kawm vaj lug kub?”

Kev teb hais tias, “Yeej kawm los mas, thaum kuv muaj hnub nyoog 14 mus rau 18 xyoos, kuv tau kawm hoob seminary yuav luag txhua hnub!” Nws yuav luag poob los ntawm nws lub rooj zaum.

Ob peb lim tiam tom qab ntawd kuv xav tsis thoob thaum nws rov qab hu kuv los rau hauv nws lub hoob kas, nws xav tsa kuv los ua ib tug thawj coj hauv nws ib lub tsev lag luam. Kuv xav tsis thoob kiag li thiab qhia nws tias kuv hluas dhau thiab tsis tau ua hauj lwm ntau txaus los ua ib txoj hauj lwm loj npaum li no. Nws luag nyav thiab hais tias, “Txawm qhov ntawd muaj tseeb los, kuv tsis khe li. Kuv paub koj tej ntsiab cai, thiab kuv paub hais tias koj tau kawm tej yam dab tsi hauv koj lub koom txoos. Kuv xav tau koj.”

Nws yeej hais qhov tseeb txog tej yam uas kuv tau kawm hauv lub Koom Txoos. Tej xyoos tom qab ntawd yeej nyuaj heev, thiab kuv tsis paub yog tias kuv yuav ua tau zoo yog tias kuv tsis tau kawm tej yam hauj lwm hauv lub Koom Txoos txij thaum kuv ua tub hluas los.

Kuv muaj hmoov vim kuv loj hlob hauv ib ceg ntseeg me me. Vim hais tias peb muaj mej zeej tsawg tsawg, cov tub ntxhais hluas raug hu los ua ntau yam hauj lwm hauv ceg ntseeg ntawd. Kuv los tsis khoom kiag thiab nyiam qhov uas kuv muaj hauj lwm ntau. Thaum Hnub Caiv kuv tau ua tej kev cai ntawm lub rooj noj lub cim nco txog, tau ua hauj lwm hauv kuv pawg pov thawj hwj, thiab ua ntau yam hauj lwm. Tsis tas li ntawd kuv tseem nrog kuv txiv thiab lwm cov neeg laus hauv lub pov thawj hwj mus qhia tej yim neeg tom tsev, tau mus nplij cov neeg mob thiab cov neeg txom nyem lub siab, thiab pab cov neeg uas muaj kev xav tau. Lawv sawv daws tsis tau xav hais tias kuv hluas dhau los ua tej hauj lwm no los sis ua ib tug thawj coj. Rau kuv mas, tej no yog tej yam uas yus ua xwb.

Tej hauj lwm uas kuv ua thaum kuv ua tub hluas ntawd tau pab kuv muaj ib zag lus tim khawv thiab pib ua neej muaj txoj moo zoo ua lub hauv paus hauv ntsis. Tau muaj cov txiv neej siab zoo thiab muaj kev hlub tshua nyob ib puag ncig kuv uas tau rau siab ntso siv lawv lub pov thawj hwj foom koob hmoov rau lwm tus neeg. Kuv tau xav rais los mus ua neeg zoo li lawv. Thaum ua hauj lwm pab lawv, kuv tsis tau paub tiam sis, kuv kawm ua ib tug thawj coj hauv lub Koom Txoos thiab hauv lub ntiaj teb tib si.

Peb muaj coob tug tub hluas uas koom los sis mloog lus hauv txoj kev sib ntsib hmo no uas tuav lub Pov Thawj Hwj Aloos. Thaum kuv ntsia nej sawv daws, kuv pom nej zaum ntawm cov txiv neej laus, tej zaum yog nej leej txiv, yawg, yawm txiv, nej cov tij laug, los sis cov uas yog nej cov thawj coj hauv lub pov thawj hwj—lawv cov uas tuav lub Pov Thawj Hwj Mekixedes. Lawv yeej hlub nej, thiab hmos no ho tuaj vim xav nrog nej sib koom ua ke.

Qhov uas ntau tiam neeg no los sib sau ua ke hmos no qhia tseeb hais tias Vajtswv ob lub pov thawj hwj no yeej sib koom siab thiab sawv daws ua kwv ua tij. Txawm tias nyias muaj nyias txoj hauj lwm thiab txoj cai, lub Pov Thawj Hwj Aloos thiab lub Pov Thawj Hwj Mekixedes yeej sib koom tes los pab cawm tib neeg txoj sia. Ob lub yeej sib koom tes thiab ib lub yeej xav tau lwm lub txoj kev pab.

Qhov piv txwv txog txoj kev sib raug zoo ntawm ob lub pov thawj hwj yeej muaj nyob ntawm Yexus thiab Yauhas tus uas Muab Neeg Ua Kev Cai Raus Dej txoj kev sib raug zoo. Yus xav puas tau txog qhov uas muaj Yauhas tus uas Muab Neeg Ua Kev Cai Raus Dej tiam sis tsis muaj Yexus li? Yexus txoj hauj lwm yuav zoo li cas yog tias Yauhas tsis tau npaj kev rau Nws?

Yauhas tus uas Muab Neeg Ua Kev Cai Raus Dej tau txais ib txoj hauj lwm tseem ceeb tshaj plaws: “nws raug hu los npaj kev tos tus Tswv,”¹ yuav muab Yexus ua kev cai raus dej, thiab npaj tib neeg tej siab los txais yuav Nws. Tus “[txiv neej] dawb huv … thiab … siab ncaj no,”² uas raug tsa los rau lub pov thawj hwj yau zog, paub hais tias nws txoj hauj lwm tseem ceeb npaum li cas thiab nws txoj hauj lwm thiab txoj cai muaj tej ciaj ciam zoo li cas.

Tib neeg tuaj zom zaws mloog Yauhas cov lus qhuab ntuas thiab kom nws muab lawv ua kev cai raus dej. Lawv saib nws ua Vajtswv ib tug txiv neej uas txaus qhuas thiab txaus hwm. Tiam sis thaum Yexus tshwm los, Yauhas thiaj li ua siab mos txo hwj chim rau tus uas loj dua ntais thiab hais tias, “Kuv muab neeg ua kev cai raus dej: tiam sis muaj ib tug uas sawv ntawm nej, … yog tus uas tab tom lawv kuv qab los, tiam sis kuv twb tsis tsim nyog daws nws txoj nyuag hlua khau.”³

Hais txog Yexus Khetos mas, tus uas yog Vajtswv Tib Leeg Tub, tus uas tuav lub pov thawj hwj siab dua, yeej txo hwj chim vim Nws to taub Yauhas txoj cai. Hais txog nws ces, tus Cawm Seej hais tias, “Txhua tus uas yug los ntawm poj niam, tsis muaj ib tug muaj hwj chim npaum li Yauhas tus uas Muab Neeg Ua Kev Cai Raus Dej.”⁴

Nej sim xav seb yuav muaj xwm dab tsi hauv peb tej pawg pov thawj hwj yog hais tias muaj kev sib raug zoo hauv ob lub pov thawj hwj ib yam li tus txheej txheem uas Yexus thiab Yauhas tus uas Muab Neeg Ua Kev Cai Raus Dej tau qhia rau peb yoog. Kuv cov kwv hluas hauv lub Pov Thawj Hwj Aloos, zoo li Yauhas, nej txoj hauj lwm yog kom “npaj txoj hau kev”⁵ rau txoj hauj lwm tseem ceeb hauv lub Pov Thawj Hwj Mekixedes. Nej ua ntau yam kom pab tau li no. Nej ua tej kab ke muab neeg ua kev cai raus thiab thiab ua lub cim nco txog. Nej yuav pab npaj tib neeg tej siab rau tus Tswv thaum nej qhia txoj moo zoo, thaum “[mus xyuas] txhua tus mej zeej lub tsev,”⁶ thiab thaum “[saib xyuas] lub koom txoos.”⁷ Nej txhawb pab cov neeg pluag thiab cov neeg txom nyem thaum nej mus nqa cov nyiaj yoo mov, thiab nej pab tu lub Koom Txoos tej tsev sib ntsib thiab lwm yam khoom. Nej txoj hauj lwm yeej tseem ceeb heev, xav tau, thiab dawb ceev.

Kuv cov kwv tij laus, txawm nej yog cov txiv tsev, cov npis sov, cov thawj coj rau Koom Haum Tub Hluas, los yog cov uas tuav lub Pov Thawj Hwj Mekixides xwb, nej ua tau raws li tus Cawm Seej tus yam ntxwv thaum nej pab nej cov kwv uas tuav lub pov thawj hwj yau zog thiab caw lawv tuaj nrog nej sib koom tes ua hauj lwm. Tiag tiag mas, tus Cawm Seej kiag caw peb li no. Nws hais tias, “Yog li ntawd, nej cia li coj cov tau muab tsa rau lub pov thawj hwj yau zog lawm nrog nej mus, thiab xa lawv ua ntej mus teem caij sib ntsib, thiab mus npaj txoj kev, thiab mus koom tej kev sib ntsib uas nej tus kheej mus tsis tau.”⁸

Thaum nej caw nej cov kwv los “npaj txoj kev,” nej thiaj pab lawv pom tau thiab saib txoj cai uas lawv tuav ntawd rau nqi. Thaum ua li no, nej pab lawv npaj lawv txoj kev rau hnub uas lawv yuav txais thiab siv lub pov thawj hwj siab dua.

Cia kuv qhia nej ib zaj dab neeg tseeb txog Alex, uas yog ib tug pov thawj hluas zoo, uas txawj xav thiab yog neeg tsis tshua kheev tham. Muaj ib Hnub Caiv, Alex tus npisov nrhiav tau nws nyob nws ib leeg hauv ib chav kawm muaj kev nyuaj siab heev. Tus tub hluas no piav hais tias mob nws siab heev rau qhov nws txiv tsis nrog nws tuaj tshawj, vim nws txiv tsis yog ib tug mej zeej. Nws kua muag poob los thaum nws piav hais tias tej zaum yuav zoo dua yog tias nws yuav tso lub Koom Txoos tseg xwb.

Vim hlub tus tub hluas no, tus npisov tau hais kom pawg ntseeg pawg sab laj sib sab laj ua ke los pab Alex. Nws lub tswv yim yog kom, pab Alex tseem tuaj tshawj thiab pab nws muaj ib zag lus tim khawv txog txoj moo zoo, yog yuav ua li ntawd ces, yuav tsum muaj neeg zoo nyob ib puag ncig nws thiab muab tej hauj lwm tseem ceeb rau Alex ua.”

Cov kwv tij hauv lub pov thawj hwj thiab tag nrho cov mej zeej hauv lawv pawg ntseeg tau los pab Alex thiab qhia tias lawv hlub thiab xav txhawb pab nws. Pawg pov thawj hlob tus thawj coj, uas yog ib tug txiv neej uas rau siab ntseeg thiab muaj kev hlub, raug tsa los ua Alex tus khub mus qhia tom tsev. Cov txiv neej hauv pawg npisov tau los pab thiab tau ua nws ib tug phooj ywg zoo.

Tus npisov hais tias: “Peb ua rau Alex tsis khoom kiag li. Nws coj neeg kev thaum muaj rooj tshoob, thaum muaj kev pam tuag, tau pab kuv thaum kuv muab cov toj ntxa fij tseg, tau muab coob tug mej zeej tshiab ua kev cai raus dej, tau tsa ib co tub hluas rau tej hauj lwm hauv lub Pov Thawj Hwj Aloos, tau qhia cov tub ntxhais hluas, tau nrog cov tub txib mus qhia neeg, tau qhib lub tsev sib ntsib thaum twg yuav muaj sab laj, thiab muab xauv thaum tsaus ntuj tom qab lub rooj sab laj. Nws tau ua lwm yam hauj lwm, tau nrog kuv mus saib cov mej zeej laus hauv cov tsev kho mob, tau hais lus hauv txoj kev sib ntsib noj lub cim nco txog, tau nqa lub cim nco txog mus muab rau cov neeg mob noj hauv lawv tsev los sis lub tsev kho mob, thiab yog ib tug ntawm neeg tsawg tsawg uas tus npisov yeej tso siab plhuav rau.”

Nyob nyob ces, Alex pib hloov siab. Nws txoj kev ntseeg tus Tswv tau loj hlob tuaj. Nws pib muaj siab loj ntseeg nws tus kheej thiab vam lub hwj chim ntawm lub pov thawj hwj uas nws tuav. Tus npisov xaus lus hais tias: “Alex tau ua thiab yeej yuav yog ib txoj koob hmoov loj tshaj plaws ntawm lub sij hawm uas kuv tau ua tus npisov. Kuv muaj hmoov vim nws ua kuv ib tug phooj ywg. Kuv yeej xav hais tias tsis tau muaj ib tug tub hluas uas tau npaj siab zoo npaum li nws ua thaum tawm mus ua tub txib vim nws tau ua tej hauj lwm no hauv lub pov thawj hwj.”⁹

Nej cov npisov, nej muaj, thaum nej raug tsa los ua ib tug npisov hauv nej pawg ntseeg, nej muaj txoj hauj lwm dawb ceev ua tus thawj tswj hwm rau lub Pov Thawj Hwj Aloos thiab rau pawg pov thawj. Kuv paub hais tias nej ris nra hnyav, tiam sis nej yuav tsum saib nej txoj hauj lwm los pab cov tub hluas no ua ib qho tseem ceeb tshaj plaws. Nej tso tseg tsis tau los sis muab tsis tau txoj kev lav ris no rau lwm tus ua.

Kuv caw nej los xav txog txhua tus tub hluas uas tuav lub Pov Thawj Hwj Aloos hauv nej pawg ntseeg. Yuav tsum tsis txhob muaj ib tug uas xav tias nws nyob nws ib leeg xwb los sis tsis muaj qab hau dab tsi. Puas muaj ib tug tub hluas uas nej thiab lwm cov kwv tij hauv lub pov thawj hwj pab tau? Caw tus ntawd los ua hauj lwm pab nej. Feem ntau mas peb tsuas xav kom peb cov tub hluas yuav muaj kev lom zem thiab kom lawv saib peb ua xwb, tab sis mas lawv txoj kev ntseeg thiab kev hlub rau txoj moo zoo yuav loj hlob zoo tshaj plaws thaum lawv ua lawv tej hauj lwm hauv lub pov thawj hwj. Thaum rau siab pab ua tej hauj lwm cawm tib neeg txoj sia, lawv thiaj yuav koom tes nrog lub ntuj ceeb tsheej thiab yuav pib to taub tias lawv ua tau li cas rau lub ntuj ceeb tsheej uas kav mus ib txhis.

Lub Pov Thawj Hwj Aloos tsis yog rau ib co tub hluas xwb, tsis yog ib txoj kev qhuab qhia los sis kev ua si xwb, los sis ib lo lus rau cov tub hluas hauv lub Koom Txoos xwb. Nws yog lub hwj chim thiab txoj cai uas cia yus koom txoj kev pab cawm tib neeg dim—yeej yog rau cov tub hluas ntawd thiab rau cov neeg uas lawv mus pab tib si. Cia peb muab lub Pov Thawj Hwj Aloos hauv nws chaw yog, ib qho chaw tshwj xeeb—thiab ib qho chaw ua hauj lwm, chaw npaj siab, thiab chaw pab cov tub hluas hauv lub Koom Txoos ua tau tej yam zoo.

Kuv cov kwv tij hauv lub Pov Thawj Hwj Mekixedes, kuv caw nej los ntxiv zog rau qhov uas muab Vajtswv ob lub Pov Thawj Hwj txuas ua ib ke. Pab ntxiv hwj chim rau cov tub hluas hauv lub Pov Thawj Hwj Aloos kom npaj kev tos nej. Ua siab loj qhia lawv tias, “Kuv xav tau nej txoj kev pab.” Hais rau nej cov tub hluas hauv lub Pov Thawj Hwj Aloos, kuv thov kom thaum nej sib koom tes ua hauj lwm nrog nej cov tij laug no, nej thiaj yuav hnov tus Tswv lub suab qhia nej hais tias: “Nej muaj hmoov, vim nej yuav ua tej hauj lwm loj thiab tseem ceeb. Vim saib seb nej raug xa mus, ib yam li Yauhas, mus npaj kev tos kuv.”¹⁰ Los ntawm Yexus Khetos lub npe, amees.