Kōpooj Iaļ eo

Ke eaar 30 aō iiō, ikar jino jerbal n̄an juon kurub in m̧ōn wia ilo Būranij. Juon raan kom̧bani būreejtōn eo, juon em̧m̧aan em̧m̧an jān bar juon tōmak, kar kūrļo̧k eō n̄an opij eo an. Kajjitōk eo an ekar kailbōk eo: “Ij kab jeļā ke kwe pris ilo kabun̄ eo am̧. Em̧ool ke menin?”

Ikar uwaak, “Aaet, menin em̧ool. Ij kabwijer priesthood eo.”

Ewaļo̧k itoklimo kōn uwaak eo aō, ekar bar kajitōk, “Ak kwaar ke ekkatak ilo juon jikuuļ in baibōļ?

“Aaet,” ikar uwaak, ikōtaan iiō ko 14 im 18, im ikar ekkatak jemenere katak ko enan̄in aolep iiō!” Ebaj wōtļo̧k wōt jidik jān jea eo an.

N̄an jon̄an ilbōk eo aō, jet wiik tokālik ekar kūr eō n̄an opij eo an n̄an letok n̄an eō juon mānija in tōreektōr eo jerbal ilo juon iaan kom̧bani ko an kurub eo. Ekar kanooj in ļo̧kjenaō im kwaļo̧k aō n̄ūrbōkta bwe ikar kanooj dik im jab kapeel n̄an bōk eddo aorōkrōk in. Kōn juon ettōn̄dikdik jouj, ekar ba, “Men ņe emaron̄ m̧ool, bōtaab āinwōt juon. Ijeļā pedped kaņe am̧, im ijeļa ta ko kwaar katak ilo kabun̄ eo am̧. Ij aikuji eok.”

Ekar jim̧we kōn ta ko ikar katak ilo Kabun̄ in. Iiō ko me tokālik rōkar n̄an mālijjon̄, im ijaje eļan̄n̄e inaaj kar maron̄ tōprak n̄e ekar jab imminene ko ikar būki jān jerbal ilo Kabun̄ in jān wōt iien ko ikar juon likao.

Ikar jeraam̧m̧an ilo aō kar rūttoļo̧k ilo juon branch jidikdik. Kōnke oran nōm̧ba ko am raar iddik, jo̧dikdik ro kar kūr er n̄an niknik bōk ko̧naer ilo aolepān kōttōpar ko an branch eo. Ikar kanooj poub im kar en̄jaake iakwe eo ewōr tokjān. Ilo Jabōt ko ij kōjeraam̧m̧ani ilo tebōļ in kwōjkwōj eo, jerbal ilo doulul eo an priesthood eo aō, im jerbal ilo bar jet kūr ko. Ilowaan wiik eo ij m̧ōttan jema im priesthood rūtto ro jet ilo am loļo̧k membōr ro jet, kaenōm̧m̧an ro rej nan̄inmej im liaajļoļ, im kar jipan̄ ro rej aikuj. Ejjeļo̧k juon ekar ļōmņak ikar kanooj dik n̄an jertbal ak n̄an tōl. N̄an n̄a, āinwōt aolep kōn ekkā im menin letok.

Jerbal ko aō ikar wujlep ilo iiō in jo̧dikdik ko aō kar jipan̄ eō ejaake kam̧ool eo aō im emjake mour in aō ilo gosepl eo. Kar jeepoļe eō jān em̧m̧aan ro rem̧m̧an im tūriam̧o̧kake ro rōkōn ujlepļo̧k n̄an kōjerbal priesthood ko aer n̄an kōjeraam̧m̧an mour ko an ro jet. Ikar kōņaan bwe in āinwōt er. Ilo jerbal ippāer, ekanooj ļapļo̧k jān kar aō kōtmāne ilo iien eo, ikar katak bwe in juon ritōl ilo Kabun̄ eo im barāinwōt ilo laļ in.

Elōn̄ ippād likao ro rej kobatok ak rej itok n̄an kweilo̧k in jo̧ten in ro rej kabwijer Aaronic Priesthood eo. Ilo aō kalimjōk jarlepju in, ij lo elōn̄ iaami kom̧ij jijet iturin em̧m̧aan ro rerūtto, bōlen ro jemāmi, ro jim̧m̧aami, ļaddik ro rerūtto jeimi, ak priesthood ritōl ro ami—aolep ro rej kabwijer Melchizedek Priesthood eo. Rej io̧kwe kom̧, im ilo m̧ottan eo eļap, rōkar kobatok jo̧ten in bwe ren pād ippāmi.

Koba in an epepen ko ej letok juon reim̧aanļo̧k ejejjet an ippān doon eo im jem̧jati eo me ealikkar ikōtaan ruo priesthood ko an Anij. Men̄e kōpālpel er kake mijen ko reoktak im mālim, Aaronic Priesthood im Melkisedek eo rej m̧ōttā jab jenolo̧k jān doon ilo jerbal in lo̧mo̧o̧r. Rej etal jibwe pein doon im ewōr aer aikuj eļap n̄an doon.

Waanjon̄o̧k in m̧ōņōkjān in jem̧doon eo epaak tata me ealikkar ikōtaan priesthood kein ruo ej waļo̧k ilo m̧akūtkūt eo ikōtaan Jisōs im Jon Ripeptaij eo. Juon emaron̄ in ke kōlmānļo̧kjeņ kake Jon n̄e ejako Jisōs? Ta naaj kar mijen eo an Rilo̧mo̧o̧r eo n̄e eaar jako jerbal in kōppopo eo kar kōm̧m̧ane jān Jon?

Jon Ripeptaij eo kar leļo̧k n̄ane juon iaan mijen ko raorōk ejjan̄in kar wōr: “n̄an kōpooj iaļ eo an Irooj,”¹ n̄an peptaiji E kōn dān, im n̄an kōpooj armej ro n̄an bōk E. En̄in “bwe … im … [em̧m̧aan] e wānōk,”² eo jar kapiti n̄an priesthood eo dikļo̧k, eaar weppān an jeļā kōn jim̧or aorōk im eo im jon̄an ko an mijen eo im mālim eo an.

Armej rōkar kurum̧rum̧ļo̧k n̄an ippān Jon n̄an ron̄jake im kar peptaij jān ippān. Kar kōjeraam̧m̧ane im kautieje ilo jim̧we eo an make āinwōt juon armej in Anij. Bōtaab ke Jisōs ekar waļo̧k, Jon ekar kōttāiki im leļo̧k n̄an Juon eutiejļo̧k jān e make im ekar kalikkare, “Ij peptaiji kōn dān: a juon ej jutak eoļōpemi, … eo ej itok ālkū, to in juj ko an i patkaki bwe in jeļate.”³

Kōn ijo koņaan, Jisōs ej Kraist, eo Emake Nejin Jemān, eo ej kabwijer priesthood eo eutiej tata, ekar kanooj ettā kūle mālim eo an Jon. Jān e, Rilo̧mo̧o̧r eo ekar ba,“Iaan ro rej ļotak jān kōrā eļap jān Jon ri Ri Peptaij.”⁴

Baj ļōmņak ta eo enaaj bōk jikin ilo doulul in priesthood eo ad eļan̄n̄e jem̧doon eo ikōtaan ro rej kabwijer priesthood ko ruo kar im̧we er jān kar karōk eo jān Jisōs im Jon Ripeptaij eo. Jo̧dikdik ro jatū ilo Aaronic Priesthood eo, āinwōt Jon, eddo eo ami ej n̄an “kōpooj iaļ eo”⁵ kōn jerbal eo rem̧m̧an an Melkisedek Priesthood eo. Kom̧ij kōm̧m̧ane menin ilo elōn̄ wāween ko reoktak. Kom̧ij kōm̧m̧ani kain̄i ko an peptaij eo im an kwojkwoj eo. Kom̧ij jipan̄ kōpooj juon armej n̄an Irooj jān kwaļo̧k kōn gosepl eo, jān “[loļo̧k] m̧ōko im̧ōn kajjojo mem̧bōr ro,”⁶ im jān [emmejraake] Kabun̄ eo.”⁷ Kom̧ij leļo̧k jipan̄ n̄an ro rijeram̧m̧ōl im riaikuj ilo ami aini joortak ko, im kom̧ij bōk koņami ilo kōjparok M̧ōnjar ko im menin aikuj ko jet. Eddo ko ami raorōk, menin aikuj, im kwojarjar.

Em̧m̧aan ro jeiū im jatū rerūtto, men̄e kom̧ij baba ro, Bisop ro, rikōkapilōklōk ro an Likao ro, ak ilo m̧ool ro rej kabwijer Melchizedek Priesthood, kom̧ maron̄ ļoor waanjon̄o̧k ko an Rilo̧mo̧o̧r ilo oktakļo̧k n̄an ro jatūm̧ rej kabwijer priesthood eo edik im kūr er n̄an jerbal ippam̧. Ilo m̧ool, kūr in ej itok jān ippān Irooj make. E ekar ba, “kōn menin, bōk ippemi ro im em̧ōj kapit er n̄an priesthood eo edik, im jilkinļo̧k er im̧aami n̄an kōm̧m̧an iien iioon doon ko, im n̄an kōpooje iaļ eo, im n̄an etal n̄an iien iioon doon ko kom̧ make kom̧ij jab maron̄ etal n̄ani.”⁸

Ilo ami kūr ļaddik ro jatim reddikļo̧k n̄an “kōpooj iaļ eo,” kom̧ij jipan̄ er kūle im kautiej mālim eo ekkwojarjar rej kabwijere. Jān wōt kōm̧m̧ane, kom̧ij jipan̄ er kōpooj iaļ eo aer make ilo aer kōbpopo n̄an raan eo me rej bōk im kōjerbal priesthood eo eutiejļo̧k.

Letok bwe in kwaļo̧k kōn juon m̧ool in bwebwenato kōn Alex, juon ejej an naan, kajoor kōļmānļo̧kjeņ, im jeļāļo̧kjeņ pris edik. Juon Jabōt, bishop eo an Alex ekar loe an make iaan ilo juon kilaajruum̧ ilo juon jōkjōk eļap liejļōļ. Likao in ekar kwaļo̧k ewi jon̄an an kōmmetak pen n̄an e ilo an itok n̄an jar ak ejako jemān, eo ekar jab juon membōr. Innām ekar dānnin kemjaaļaļ im ba āinwōt enaaj em̧m̧anļo̧k n̄an e n̄e enaaj likūt Kabun̄ in.

Kōn n̄ūrbōktak em̧ool n̄an likao in, bisop eo iien eo wōt ekar kōm̧akūt ward ko̧o̧njeļ eo n̄an jipan̄ Alex. Karōk eo an ekar pidodo: n̄an dāpij wōt niknik eo an Alex im jipan̄ e ejaake juon buruōn en̄jaake kam̧ool kōn gospel eo, rej aikuj in “kaapooļe kōn armej em̧m̧an im leļo̧k n̄ane men ko raorōk n̄an kōm̧m̧ani.”

Ejab to priesthood em̧m̧aan ro im aolep ro uwaan ward eo rōkar kuk tok iturin Alex im kwaļo̧k aer en̄jaake im jipan̄. Ritōl eo an pris ro routiej, juon em̧m̧aan in eļap tōmak im iakwe, kar kālōte bwe en m̧ōttan rūkaki in loļo̧k m̧ōko. Membōr ro an bisopdik eo rōkar bōke ilo kōjparok eo aer im kar kōm̧m̧an bwe en eo m̧ōttaer epaak tata.

Bisop eo ekar ba: “Kōm kar dāpij bwe Alex en poub. E ekar rijjipan̄ ilo iien m̧are ko, rijjipan̄ ilo iien mej ko, kar jipan̄ eō kōjeraam̧m̧an iturin lōb ko, kar peptaiji jet membōr ro, kapit likao ro n̄an Aaronic Priesthood opij ko, katakin ilo kilaaj ko an jo̧dikdik, katakin ippan̄ mijinede ro, kōpeļļo̧k m̧ōnjar eo n̄an kweļo̧k ko, im kiili m̧ōko ilo lukwōļpānļo̧k jota ālkin kweļo̧k ko. E ekar kōm̧m̧ani jerbal in jipan̄ ko, itok ippa tok ilo iien loļo̧k ko n̄an ippān membōr ro rekanooj rūtto ilo m̧ōn ko̧jparok ko, ekkōnono ilo kweilo̧k in kwojkwoj eo, bōkļo̧k kwojkwoj eo n̄an rinan̄inmej ro ilo aujpitōļ ak ilo m̧ōko im̧weer, im erom juon iaan emake wōt kanooj dik iaan armej ro me imaron̄ pedped ioon āinwōt bisop.”

Jidik kōn jidik, Alex ekar oktak. An tōmak ilo Irooj ekar ļapļo̧k. E ekar bōk kapāāl ilo e make im ilo kajoor eo an priesthood eo ej kabjere. Bisop eo ekar kōjem̧ļo̧ke: “Alex ekar im naaj iien otemjej juon iaan kōjeraam̧m̧an ko aō ilo iien ko aō āinwōt bisop. Ta juon jeraam̧m̧an ekar ejaak n̄an iiaieo ippān. Ij kanooj m̧ool in tōmak bwe ejjeļo̧k likao ekar m̧ōj an pād ilo jikin mijen ekar ļap an pojak jān jerbal in priesthood.”¹⁰

Bishop ro aō jitōn bōro, kom̧ kar, kobaik ilo kain̄i ko ami im kōjenolo̧k āinwōt bisop in ward eo ami, kūr eo kwojarjar n̄an jerbal āinwōt būreejtōn an Aaronic Priesthood im doulul eo an pris ro. Ij kūle jon̄an eddo ko kom̧ij ineeki, bōtaab kom̧ij aikuj kōm̧m̧ani jerbal ko ami ņae likao ro juon iaan eddo ko ami reļļap. Kom̧ijj jab maron̄ kakkure ak leļo̧k eddo in ami n̄an ro jet.

Ij kūr ko̧m̧ n̄an kōļmenļo̧kjeņ kake kajjojo iaan likao rein rej kabwijer Aaronic Priesthood eo ilo ward ko ami. Ejjeļo̧k juon iaer en en̄jaake make iaan ak ejjeļo̧k tokjān. Ewōr ke juon likao me kwe im em̧m̧aan ro jet ilo priesthood eo maron̄ jipan̄ e? Kūr n̄an e n̄an jerbal itūrum. Ekkutkut alen ad kajjieon̄ n̄an kam̧ōņōņōik likaro ro ad im kajejtokjāer n̄an juon jerbal in rialooj, n̄e tōmak im iakwe ko aer n̄an gospel eo jemaron̄ in ejaaki ilo kanooj kalimjōk priesthood ko aer. Jān kanooj niknik ilo jerbal in lo̧mo̧o̧r, renaaj maron̄ kar ekkejel ippān lan̄ im renaaj bōk maron̄ en̄jaake kwojarjar eo aer.

Aaronic Priesthood eo eļapļo̧k jān baj juon kurub in iiō, juon katak ak m̧akūtkūt in būrokraam̧, ak aaet juon iien n̄an kūle likao ro an Kabun̄ in. Ej kajoor im mālim n̄an bōk koņaad ilo jerbal in eļap n̄an lo̧mo̧o̧ren jetōb ko—jim̧or jetōb ko an likao ro rej kabjere im jetōb ko an ro rej jerbal ippāer. Jen likūt Aaronic Priesthood eo ilo ijo jikin ejejjet, juon jikin kālōt—im juon jikin an jerbal, kōppopo, im tōprak n̄an aolep likao ro an Kabun̄ in.

Em̧m̧aan ro jitōn bōro jeiū im jatū an Melchizedek Priesthood eo, ij kūr kom̧ n̄an kōkajoorļo̧k kōta eo ejejjet me ej kobaik priesthood kein ruo an Anij. Kōkajoorļo̧k Aaronic Priesthood jodikdik ro ami n̄an kōpooj iaļ eo m̧okta n̄an kom̧. Jiron̄ er kōn lōke, “Ij aikuji kom̧.” N̄an kom̧ jodikdik ro rej kabwijer Aaronic Priesthood eo, ij jar bwe ilo ami jerbal ippān ļaddik ro jeimi, kom̧ naaj ron̄ ainikien Irooj ej kōnono n̄an kom̧: “Kom̧ jeram̧m̧an, kōnke kom̧ij aikuj kōm̧m̧an eļapļo̧k. Lo kwe em̧ōj kar jilkinļo̧k eok, em̧ool āinwōt Jon, n̄an kōpooj iaļ eo im̧aō.”¹¹ Ilo etan Jisōs Kraist, amen.