2010–2019
Mdedesii a Rael
April 2017


Mdedesii a Rael

Me ng uaisei el ngara kakerous el mission ma ngerachel a lolab, a Aaronic Priesthood ma Melchizedek Priesthood a diak el kakeakl er a urerel a osobelir a rechad.

Se er a lokedei a rekik, e ak ulemuchel loureor er a oulterau a klalo er a France. A tara sils ea merredel er a kombalii, el ungil chad er a kuk tara klechelid, a ulekerak el mora obis er ngii. Ak kilbetiekl ra keril: “Ak dirke mlo medengei el kmo ke priest er a ikelesia er kau. Ng merang?”

A kulenger, “Oi, ng klemerang. A kuba priesthood.”

Mlo chemolt el melemlim er a nger er ngak, me ng uleker, “Ke mlo ra skuu er a tekingel a klechelid?”

“Ng uaise,” a kulenger, “se er ak ngara 14 el mo 18 a rekik, e ak milsuub a suobel ra seminary er a kmeed el bek el sils!” Kileed eng reuebet er a kingellel.

Ak kilebetiekl, el sesei el sandei ruriul eng ulkerak el lmuut el mora obis er ngii el mo omeskak a ngerachel er a omerredel er a tara ikal kombalii er ngii. Ng chilsir a renguk me ak millekoi er ngii er a simbai el kmo a kmal dirke ngeasek e diak a dechak el mo oba tial klou a ultutelel el ngerachel. Ng mle ungil a klikm er ngii, e dilu el kmo, “Ng locha uaisei, ng di ng diak a belkul. Ak medengei omoltirakl, e medengei el kmo ngera ke mla suub er a ikelesia er kau. A kuusbech er kau.”

Ng mle medengei el kirel a ikel ksiluub er a Ikelesia. A ikel rak el mla er medak a mle meringel e diak kudengei el kmo ng sebechek el mo ungil er tial ureor alsekum meng dimlak ngai a klubelek er sera kusiou el ngara Ikelesia el ulemuchel er se er ak ngeasek.

Ng klengeltengak el mlukeroul er a kekerei el ikeleisa. E le uchul e a kidi mle mekesai, me a rengeasek a mlokedong el mo teloi er a bek el omeruul el ngarngii ra ikelesia. Ak meral mle mechesang e mle soak a lousbech er ngak. Sel Sandei e ak mengedaol a chedaol belsoil, e mesiou el ngara chelechad er a priesthood, e uluureor er a bebil er a ngerachel. Chelsel a ta el sandei e ak blechoel el obengkel a demak me a rebebil ra meklou el chad lolab a priesthood el mo olisechak er a rechedal a ikelesia er a blirir, e milngelaod er a resmecher ma re ngara ringel, e olngeseu er a rengesool. Ng dimlak a ta el chad lulemsadu el kmo a kmal kekerei meng diak el sebechek el mesiou malechub ak kumtebechel. Sel denguu rengak, eng di ua bek el sils el diak a kora ngodech er ngii.

A ikel omesiungek er se er ak ngeasek a ngilsukak el toketekii a klaumera er ngak el rirdemii a klengar er ngak er a ebangkelio. Ak ulebengterir a rungil e ubechubechad el meklou el chad el mla er ngii ra rengrir ousbech ra priesthood er tir el omekngeltengat er a klengar er a rebebil. Ng mle soak el mouai tir. Me sera kusiou lobengterir, eng di mla kudengei er seikid el taem el klou er ngii, ak silubii el mo omtebechel er a Ikelesia me a dirrek el chelsel a beluulechad.

Te ngarngii a rebetok el ngeasek el buik el ngar tiang malechub e tomes er tial miting er chelechal kesus el olab a Aaronic Priesthood. Sel kumes er tial seked, e ak mesekemiu el dengchokl er bita ra delodau el chad, el locha demam, demam el rubak, obekum, malechub eng omtebechel er kau el loba priesthood— tir el rokui a olab a Melchizedek Priesthood. Te betik a rengrir er kau, e sel kot el klou a belkul, tir a mlei el me obengkem er chelechal kesus.

Tial ongdibel er chelecha el telecheroll a meskid a klebokel ues er a klta el reng me a kle odam el ngii a ngarngii er a ikal eru el priesthood er a Dios. Ngii mesel lolab a kakerou el bedengel a ureor ma ngerachel, a Aaronic Priesthood me a Melchizedek Priesthood a diak el kakerous el ombil a ureror er a osebelir a rechad. Te tmak el erung e klou a ulsbechellir er a ta ma tang.

Sel ungil okesiu er a kmes el deleuill er a delongelor a reteru lolab a priesthood a de betik er ngii er a delongelel a Jesus me a Johanes el Techolb. Ng sebechel a tang el omdasu er a Johanes el techolb e diak lomdasu er a Jesus? Ng kol mo uangerang a urerel a Osobel alsekum meng dimlak sel uchelel a ureor el kildmeklii a Johanes?

A Johanes el Techolb a ngiluu a kot el kuoll el ngerachel er a ikel mla ngar ngii: “el mo meledaes er a rolel a Rubak,”1 el mo melecholb er Ngii loba ralm, e mengedmokl ra rechad el mo nguu a Jesus. Ngika el “melemalt … e … chedaol [chad],”2 el milchedaol el nguu a ngariou el priesthood, a mle ungil medengelii ngii a ultutelel me a sebechel a urerel me a ngerchelel.

Te rebetok el chad a mlora Johanes el mo orrenges e nguu a techolb er ngii. Ngii a ngiiluu omengull ma chetengakl el chedal a Dios. E ng di sera le mei a Jesus,e a Johanes a uleba ngariou el reng e mlo er ngika el Dita el ngarbab er ngii e millekoi, “Ak melecholb loba raml: eng di ng ngarngii a dechor er a delongeliu, … el ngii a mlei ruriul er ngak, e ngarbab er ngak, el lechetel a orcherel a diak klikiid el melubet.”3

E a denguu er Ngii, ea Jesus el Kristo, el Dita el Ngelekel a Chedam, a uleba ngarbab el priesthood, nguleba ngariou el reng el miltebengii a ngerachel loba Johanes. A Osobel a dilu el kmo, “Tirke el mla mechell er a redil a dirkak a mla morbab er a Johanes el Techolb.”4

Ka di momdasu a ikel mo dubech er a chelechad ra priesthood alsekum me a deleuill ra rolab a ikal eru el priesthood a mukrael el di ua telebelel sel mla mekedmokl er a Jesus me a Johanes. Ngeasek el rodam er ngak er a Aaronic Priethood, el diua Johanes, el ngercheliu a mo “meledaes er a rael”5 el kirel tial ngarbab el ureor er a Melchizedek Priesthood. Ko meruul er ngii er a bek bedengel a teletael. Ke meruul a chedaol ruoll er a techolb chelid ma chedaol belsoil. Ko molngeseu el mengedmokl er a rechad el mo nguu a Rubak sel molsisechakl ebangkelio, e “oldingel a bek el blirir re bek el chedad,”6e omekerreu er a ikelesia.”7 Ko molngeseu er a remechebuul me a rengesool sel molai a tengek ra olsengerenger, e omekerreu er a blil a miting ra Ikelesia ma lmuut el bebil er a klekedall. A ngerchelem a klou a belkul, e ulsbechall, e chedaol.

Meklou el rodam er ngak, alta e kom chedam, bishop, sensei ra re Ngeasek el Sechal, malechub e kom kuk di oba Melchizedek Priesthood, ng sebechemiu el oltirakl ra okesiul Osobel sel bo er tirka el memekere el rodam loalb a ngariou el priesthood e olengit er tir el moureor lobengkemiu. Tia mera er ngii, a ongtil a Rubak. Ngii a dilu, mngititerir tirkel mla moterkokl el oba ngariou el priesthood, e modureklterir ruchei el mo mengedmokl odngeliu, e loledaes ra rael, e kudmokl odingel el kemiu a mo diak el sebechemiu el mo er ngii.”8

Me sel molengit er a rememekerei el rodam er kemiu el mo “meledaes er a rael,” eng sebechemiu el ngosuterir el mo metebengii e kulii tial chedaol ngerachel lobang. Sel moruul er tiang, e komolngeseu er tir el dmedesii a rolir sel longedmokl el kirel sel sils el tir a mo nguu e oureor loba ngarbab el priesthood.

Msall ek bo kuuchais er a cheldechedechal a Alex, el cheklemuk, se kutab, e mellomes a rengul ngeasek el priest. A ta ra Sandei ea bishop ra Alex a miltik er ngii el di ngii el tang el ngara klas el meringel a uldesuel. Ng kal ngeasek a silodii el kmo ng kmal meringel er ngii el mei ra ikelesia el diak lobengkel a demal, el ngii a diak el chedal a ikelesia. E oumekikngit el reng e dilu ngbai ungil ngii el buik a le chitii a Ikelesia.

Meng meral mlo bekikl er ngika el buik, me ngii el bishop a di mle mereched el ngoititerir a re ward council el molngeseu ra Alex. A uldasu el bo loruul a mle beot: te olngeseu ra Alex meng dinga ra ikelesia e omekdubech er a meral klaumerang er ngii ra ebangkelio, meng kmal kirir el “iueklii er a rungil chad e mo msang a meklou a ultutelel el tekoi meng meruul.”

Ng di mle mereched e a rodam ra priesthood ma chedal a ikelesia a ulengeseu ra Alex e ulecholt a ungil rengrir ma ngelsouir el mo er ngii. A oungerachel er a chelechad ra ngarbab el priest, el klou a klaumera er ngii ma beltkil a rengul, a mlengilt el mobengkel loldingel a blai. A rechedal a bishopric a ngiluu me te olngeseu er ngii e mlo kmeed er ngii.

A bishop a dilung: “A ki milcherei a Alex meng di mechesang. Ng ulengeseu ra merngel a chebechiil, kemeldiil, e olngeseu er ngak er el olterekoll a debull, ng millecholb ra rebeches el mo chedal a ikelesia, olterekokl ra rengeasek el buik el mora obis ra Aaronic Pristhood, olisechakl ra rengeasek, obengterir a remisionari, melai a chesmerel sel ngar ngii a klou el ongdibel, e mengesimer ra osoi sel bol merek. Ng ulngesei er a rechad, e ulbengkek el mo oldingel ra recheuodel el di ngara blai, milngedecheduch ra sacrament miting, olab a chedaol belsoil el mora resmecher el ngara osbitar ma rekeblirir, e mlo tara remekesai el chad el ngak el bishop a sebechek el ousbech er tir. ”

siasing/Llecheklel
Alex el bishop

Milekekokil, e ng mlengodech a Alex. A klaumera er ngii ra Rubak a mlo mesisiich. Ng di ngii el mlo oumerang er ngii me a klisichel a priesthood el lobang. A bishop a milrekui ra tekingel: A Alex a mle tara kot el klou e mo tara kot el klou el klengeltengat el merngak el bishop. Ng meral mle ungil techall el kulbengkel. Ak mera loumerang el kmo ng diak a ngeasek el chad el meral kldmokl el mora mission leng omesou er ngii ra priesthood.”9

Kemiu a rebishop, a uldimukl er a oterkeklem me a chedolem el bishop er a ikelesia el mngarngii, e koba chedaol ngerachel el mesiou el president er a Aaronic Prieshood me a chelechad ra priest. A kungil medenge berraod el molab, eng di kau a kirel mo ngarbab el ngerchelem tirka el ngeasek el chad. Ng diak el kirem el choitii malechub e ke mekngerchelii tial urerem el mora tang.

A kulengit me bo momdasu er a bek el ngeasek el Aaronic Priesthood el ngara ikelesia er kau. Ng diak el kirel a di chimo er tir lomelchesiu er ngii el cheloit malechub eng diak a belkul. Ng ngarngii a ngeasek el chad el kau malechub a tara odam el priesthood a sebechel ngosuir? Mokerir el mo olngeseu lobengkem. Ke de blechoel el melasem el mengelaod er tirka el ngeasek e rulleterir el ual dil oyeng, me sel klaumerang ma ebangkelio el tir a kmal sorir a sebechel ungil mukdubech sel meral loureor loba priesthood er tir. El ouedikel el kirel a urerel osebelir a rechad, e tir a mo moak loebengkel a babeluades me te mo ungil melchesuar er a chedaol klengar el sebecherir.

A Aaronic Priesthood a lmuut el ngarbab el diak el dil kirel a telutk el rekil a chad, osisechakl malechub a omeruul ra ikelesia, malechub eng kuk di tekoi lolecholt ra rengeasek el chad ra Ikelesia. Tiang a klisiich e ngerachel el mo teloi er a ngarbab el ureor er a osebelir a rechad—el kirel a reng er tirka el ngeasek el buik el obang me a reng er tirke el tir a losiou er tir. Mei me denguu el morsel meral kirel ngarngii tial Aaronic Priesthood, el ngelitel el basio—el basio er a omesiou, omengedmokl, me a ikel kildmokl a rokui el ngeasek el chad er a Ikelesia.

Kemiu el rodam er ngak ra Melchizedek Priesthood, a kulengit er kemiu el mo melisiich er sel klou a ultutelel lomak el ngii a oldak er a ikal eru el priesthood er a Dios. Molisiich er a re ngeasek el Aaronic Priesthood el mo meledaes er a rael el ngar medam. Mdu er tir el klou a rengum, “A kuusbech er kau.” E kemiu a rolab a Aaronic Priesthood, ak meluluuch el kirel me sel mosiou lobengterir a remeklou el obekum, e ko mo rongesii a ngerel a Rubak el melekoi er kemiu: el kmo kemiu a mla mukngeltengat, e le ko mo meruul a meklou a ultutelel tekoi. Kemiu a mlodurokl el mong, el di uaia Johanes, el mo meledaes er a rolek.”10 El ngara ngklel a Jesus Kristo, amen.