Magbalik kag Magbaton

Mga kautoran ko, buluhaton ko ang magpamulong sa inyo, kag ang inyo buluhaton amo ang magpamati. Luyag ko nga matapos ang akon buluhaton antes ninyo matapos ang inyo. Himuon ko ang labing maayo nga mahimo ko.

Sa mga tinuig nga nagligad, naobserbahan ko nga ang mga tawo nga madamo sang nahimo sa sining kalibutan amo yadtong may bisyon sa ila mga kabuhi, upod ang mga kalab-uton nga nagapatumod sa ila sa ila bisyon kag may mga plano pangtaktika kon paano nila matuman ang mga ini. Ang pagkabalo kon diin ka makadto kag kon paano ikaw nagalaum nga mag-abot didto makahatag sang kahulogan, katuyoan, kag kadalag-an sa kabuhi.

Ang pila ka tawo nabudlayan magkilala sa tunga sang kalab-uton kag plano tubtob matun-an nila nga ang kalab-uton isa ka padulongan ukon isa ka katapusan, samtang ang plano amo ang rota pakadto didto. Halimbawa, may ara kita sang kalab-uton nga magmaneho pakadto sa isa ka di-naandan nga lokasyon, kag ang pila sa inyo mahal nga mga sister nakabalo, kami nga mga lalaki nagahunahuna sing masami nga nakabalo kami kon paano magkadto didto—masami magsiling, “Nabal-an ko—siguro ara lang ina sa dason nga kanto.” Ang asawa ko pat-ud nga nagayuhum. Ang kalab-uton maathag, apang wala sang maayo nga plano agud makaabot sa padulongan.

Ang paghimo sang kalab-uton amo ang magsugod nga may tuyo sa kaisipan. Kag ang pagplano amo ang paghimo sang paagi nga malab-ut inang tuyo. Ang isa ka yabi sang kalipayan ara sa paghangop kon ano nga mga padulongan ang matuod nga importante—kag dayon maggamit sang aton panahon, pagtinguha, kag atensyon sa mga butang nga nagalakip sang pat-ud nga paagi nga makaabot didto.

Ang Dios, ang aton Langitnon nga Amay, naghatag sa aton sang perpektong halimbawa sang paghimo sang kalab-uton kag pagplano. Ang kalab-uton Niya amo ang “magpahanabo sang imortalidad kag kabuhing walay katapusan sang lalaki [kag babayi],”¹ kag iya mga paagi nga matuman ini amo ang plano sang kaluwasan.

Ang plano sang mahal nga Dios nagalakip sa paghatag sa aton sang nagapalambo, nagapaunat, nagapatuon nga mortalidad agud kita mangin kasubong Niya. Ginbistihan sang lawas ang aton mga espiritu; mangabuhi suno sa mga panudlo kag mga sugo sang Manluluwas; kag magtukod sang mga pamilya nga walay katapusan nagatugot sa aton, paagi sa Pagpasag-uli ni Cristo, nga matuman ang kalab-uton sang Dios nga imortalidad kag kabuhing walay katapusan para sa Iya mga anak upod sa Iya sa selestiyal nga ginharian.

Ang maalam nga paghimo sang kalab-uton nagalakip sang paghangop nga ang malip-ut-panahon nga mga kalab-uton epektibo lamang kon ang mga ini nagapadulong sa maathag nga mga kalab-uton sa mas malawig nga panahon. Nagapati ako nga ang isa ka importanteng yabi sa kalipayan amo ang paghimo sang aton kaugalingon nga mga kalab-uton kag plano sa sulod sang balayan sang plano nga walay katapusan sang Dios. Kon kita magtumod sa sining walay katapusan nga banas, pat-ud mangin takus kita nga magbalik sa Iya presensya.

Maayo ang mag-angkon sang mga kalab-uton sa aton mga obra, edukasyon, bisan pa sa paghampang sang golf. Amo man sa aton mga pag-asawahay, mga pamilya, kag mga konseho sa Simbahan kag mga palangakuan; pinasahing matuod ini sa mga misyonero. Apang ang aton pinakadaku kag pinasulabi sa tanan nga mga kalab-uton dapat magsulod sa walay katapusan nga plano sang Dios. Si Jesus nagsiling, “Unaha ang pagpasakop sa ginharian sang Dios kag ang pagtuman sa iya kabubut-on, kag ihatag gid niya ang tanan ninyo nga mga kinahanglanon.”²

Ang mga batid sa paghimo sang kalab-uton nagasiling nga kon mas simple kag mas diretso ang kalab-uton, ini may mas gahum. Kon mahimo naton ang isa ka kalab-uton sa isa ka maathag nga imahe ukon duha ka mga tinaga bilang simbolo, inang kalab-uton mangin bahin naton kag magagiya sa aton tanan nga ginahunahuna kag ginahimo. Nagapati ako nga may duha ka tinaga, suno sa sining mensahi, nga magamit bilang simbolo sang mga kalab-uton sang Dios para sa aton kag sang aton pinakalabing importanteng mga kalab-uton. Ining mga tinaga amo ang magbalik kag magbaton.

Ang magbalik sa presensya sang Dios kag mag baton sang walay katapusan nga mga bugay nga nagahalin sa paghimo kag pagtuman sang mga kasugtanan amo ang pinakalabing importanteng mga kalab-uton nga mahimo naton.

Kita magbalik kag magbaton paagi sang pag-angkon sang “di-mauyog nga pagtuo kay [Ginuong JesuCristo], lubos nga nagasandig sa” Iya mga merito, nagadutdot “pasulong nga may kalig-on kay Cristo, nagaangkon sang isa ka perpektong kasanag sang paglaum, kag pagpalangga sang Dios kag sang tanan nga katawhan … , nagapaayaw sa pulong ni Cristo, kag magpadayon tubtob sa katapusan.”³

Si Lucifer wala magbaton sa plano sang Amay nga nagatugot sa aton nga magbalik sa Iya presensya kag magbaton sang Iya mga bugay. Sa pagkamatuod, si Lucifer nagrebelde kag nagtilaw nga bag-ohon sing lubos ang plano sang Amay, luyag nga magkuha sang himaya, padungog, kag gahum sang Dios para sa iya kaugalingon. Bilang resulta, sia gintabog paggwa sa presensya sang Dios upod ang mga sumulunod niya kag “nangin si Satanas, huo, bisan ang yawa, ang amay sang tanan nga butig, agud magtiplang kag magbulag sa mga katawhan, kag magdala sa ila nga ulipon suno sa iya pagbuot, bisan subong sa kadamo sang indi magpamati sa tingog sang [Ginuo] .”⁴

Bangud sang iya mga pagpili sa kalibutan antes diri, si Satanas indi sarang magbalik ukon magbaton. Ang mahimo lamang niya amo ang magsupak sa plano sang Amay paagi sa paggamit sang tanan nga posibleng pagganyat kag pagsulay agud daugon kita kag himuon nga miserable subong sa iya.⁵ Ang plano ni Satanas nga magbuhat sang iya malaut nga kalab-uton nagakadapat sa kada tawo, henerasyon, kultura, kag katilingban. Nagagamit sia sang matunog nga mga tingog—mga tingog nga nagatinguha sa pagdula sang diutay kag malinong nga tingog sang Balaan nga Espiritu nga sarang magpakita sa aton sang “tanan nga mga butang” nga dapat naton buhaton agud magbalik kag magbaton.⁶

Ining mga tingog iya sang yadtong nagabaliwala sa kamatuoran sang ebanghelyo kag nagagamit sang internet, social kag print media, radyo, TV, kag mga sine agud magpakita sa makagalanyat nga paagi sang imoralidad, kapintas, malaw-ay nga hambal, higko, kag kabastusan nga makawili sa aton palayo sa aton mga kalab-uton kag mga plano para sa eternidad.

Ining mga boses sarang man maglakip sang mga tawo nga may maayong tuyo apang nabulag sang tawhanon nga mga pilosopiya sang mga lalaki kag mga babayi nga luyag magguba sang pagtuo kag magpabag-o sa pagtumod sa walay katubtoban sang yadtong nagatinguha nga magbalik sa presensya sang Dios kag magbaton sang“tanan nga ang [aton] Amay may ara.”⁷

Nasapwan ko nga agud magpabilin nga nagatumod sa pagbalik kag pagbaton sang ginpromisa nga mga bugay, kinahanglan ko ang magkuha sang tion agud dalayon nga magpamangkot sa akon kaugalingon, “Kamusta na ako sa akon mga kalab-uton?”

Ini daw sa kasubong sa isa ka pribadong interbyu sa kaugalingon. Kag kon ini daw sa di-kinaandan, hunahunaa ini: sin-o sa sining kalibutan ang nakakilala sang mas maayo sa inyo? Nabal-an ninyo ang inyo mga hunahuna; ang pribadong ninyong mga buhat; ang inyo mga luyag; ang inyo mga handum, mga kalab-uton, kag mga plano. Kag kamo mas nakabalo kon paano kamo nagauswag sa banas sang pagbalik kag pagbaton.

Bilang giya para sa akon sa sining pag-interbyu sa kaugalingon, luyag ko basahon kag binagbinagon ang nagapangusisa nga mga pulong nga ara sa ika-lima nga kapitulo sang Alma, kon diin si Alma nagapamangkot: “Espirituhanon bala kamo nga nabun-ag sa Dios? Nabaton bala ninyo ang iya imahe sa inyo mga nawong? Nabatyagan bala ninyo ining daku nga pagbag-o sa inyo mga tagipusuon?”⁸ Ang mga pamangkot ni Alma isa ka pahanumdom kon ano ang aton mga kalab-uton kag mga plano dapat maglakip agud nga magbalik kag magbaton.

Dumdoma ang pangagda sang Manluluwas nga “magkari kamo sa akon, tanan kamo nga nagapangabudlay kag may mabug-at nga palas-anon, kag hatagan ko kamo sang pagpahuway.

Akua ninyo ang akon singkaw, kag magtuon parte sa akon; kay ako mapailubon kag kubos sa tagipusuon: kag kamo makasapo sang kapahuwayan sa inyo mga kalag.”⁹

Samtang ginapalambo naton ang aton pagtuo sa gahum ni Cristo nga maghatag sa aton mga kalag sang kapahuwayan paagi sa pagpatawad sang mga sala, pagtubos sa mga relasyon nga di-perpekto, pagpaayo sa espirituhanon nga mga pilas nga nagapugong sa paglambo, kag nagapabakod kag nagapakasarang sa aton nga makaangkon sang mga kinaiya ni Cristo, mas labi kita nga magpasalamat sa kadakuon sang Pagpasag-uli sang Ginuong JesuCristo.¹⁰

Sa maabot nga mga simana, maghatag sang tion agud tun-an liwat ang inyo mga kalab-uton kag mga plano sa kabuhi, kag siguradohon nga ang mga ini nagasantu sa dakung plano sang Langitnon nga Amay para sa aton kalipayan. Kon kinahanglan ninyo nga maghinulsol kag magbag-o, himoa ini karon. Magkuha sang tion agud maghunahuna nga may pangamuyo parte sa mga pagbag-o nga dapat ninyo buhaton agud magpabilin sang inyo “mata nga lubos nagatumod sa himaya sang Dios.”¹¹

Dapat ipabilin naton ang doktrina kag ebanghelyo ni JesuCristo nga ara sa tunga sang aton mga kalab-uton kag mga plano. Kon wala Sia, wala sang kalab-uton para sa eternidad nga posible, kag ang aton mga plano nga matuman ang mga ini pat-ud nga malugaw-an.

Litrato

“Ang Buhi nga Cristo” nga dokumento

Ang isa pa ka dugang nga bulig amo ang “Ang Buhi nga Cristo: Ang Pagpamatuod sang mga Apostoles,”¹² nga ginpresentar sa Simbahan sang Enero 1, 2000. Ibutang ang isa ka kopya kon diin makita ninyo ini, kag tun-i ninyo ang mga pulong sining inspiradong pagpamatuod kay Cristo sang Iya pinasahing mga saksi nga nagpirma sini.

Litrato

“Ang Buhi nga Cristo” kag ang proklamasyon parte sa pamilya

Ginaduso ko kamo nga tun-an ini upod sa “Ang Pamilya: Isa ka Proklamasyon sa Kalibutan.” Masami naton pagahambalan ang proklamasyon parte sa pamilya, apang palihug dumduma nga basahon ini nga may kaangtanan sa makaluwas nga gahum sang buhi nga Cristo. Kon wala ang buhi nga Cristo, ang pinakamatahum naton nga mga ginalauman indi matuman. Bilang ginahambal sa proklamasyon parte sa pamilya: “Ang diosnon nga plano sang kalipayan nagahimo sa mga relasyon sa pamilya nga magpadayon kapin sa lulubngan. Ang sagradong mga ordinansa kag mga kasugtanan nga ara sa balaan nga mga templo nagahimo nga posible sa mga tawo nga magbalik sa presensya sang Dios kag sa mga pamilya nga maghiliugyon nga walay katapusan.”¹³

Ini sarang matabo lamang bangud sang buhi nga Cristo nga amo ang nagapasag-uli nga Manluluwas kag Manunubos sang kalibutan.

Sa amo man nga tema, sarang man ninyo iupod ang pagtuon sang mga kasulatan agud palaparon ang inyo paghangop sang pinasahing mga kamatuoran nga makit-an sa “Ang Buhi nga Cristo.”

Ang may pangamuyo nga pagbasa sang “Ang Buhi nga Cristo” kasubong sang pagbasa sang mga pagpamatuod nanday Matthew, Mark, Luke, John, kag sang mga propeta sa Libro ni Mormon. Ini makadugang sa inyo pagtuo sa Manluluwas kag magbulig sa inyo nga nagatumod sa Iya samtang ginasunod ninyo ang inyo mga plano nga malab-ut ang inyo mga kalab-uton sa katubtoban.

Wala sapayan sa aton mga sayup, mga kakulangan, mga pagtalang, kag mga sala, ang Pagpasag-uli ni JesuCristo nagatugot sa aton nga maghinulsol, maghanda nga magbalik kag magbaton sang walay tupong nga mga bugay nga ginpromisa sang Dios—ang mangabuhi sang padayon upod sa Amay kag sa Anak sa pinakamataas nga himaya sang selestiyal nga ginharian.¹⁴

Karon subong sa nabal-an sang tanan, wala sang makalikaw sa kamatayon; busa, ang aton malawig-sa-panahon nga kalab-uton kag plano amo nga kon kita magbalik sa aton Langitnon nga Amay, kita magabaton sang tanan nga Iya ginplano para sa kada isa sa aton.¹⁵

Nagapamatuod ako- wala na sang mas dakung kalab-uton sa mortalidad sangsa mangabuhi sing padayon upod ang aton Langitnon nga Mga Ginikanan kag ang pinalangga nga Manluluwas, si Ginuong JesuCristo. Apang ini mas kapin sangsa aton lamang nga kalab-uton—ini man ang Ila kalab-uton. Sila perpekto nga nagapalangga sa aton, mas gamhanan sangsa bisan ano nga aton sarang mahangpan. Sila lubos kag padayon sa katubtoban nga nasantu sa aton. Kita ang Ila buluhaton. Ang aton himaya, Ila himaya. Mas kapin sa tanan, luyag Nila nga kita makapauli—mag balik kag mag baton sang walay katapusan nga kalipayan sa Ila presensya.

Palangga ko nga mga kautoran, sa isa ka simana, magasaulog kita sang Palm Sunday—pagsaulog sa madinalag-on nga pagsulod ni Cristo sa Jerusalem. Sa duha ka simana, kita magasaulog sang Easter Sunday—pagsaulog sa kadalag-an sang Manluluwas labaw sa kamatayon.

Samtang ginatumod naton ang aton atensyon sa Manluluwas sa sining pinasahi nga mga Domingo, dumdumon naton Sia kag magbag-o liwat sang aton bug-os kabuhi nga panaad sa pagtuman sang Iya mga sugo. Usisaon naton sang madalum ang aton mga kabuhi, maghimo sang aton mga kalab-uton kag magtumod sang aton mga plano nga santu sa iya sang Dios sa paagi nga sa ulihi kita may pribilihiyo nga magbalik kag magbaton—nga amo ang akon kubos nga pangamuyo sa ngalan ni JesuCristo, amen.