Rov Qab Los thiab Txais Tau

Kuv cov kwv tij thiab cov muam, tam sim no kuv muaj hauj lwm hais lus rau nej thiab nej muaj hauj lwm mloog kuv lus. Kuv lub hom phiaj yog ua kuv txoj hauj lwm tiav ua ntej nej ua nej li tiav. Kuv yuav sim ua li ntawd seb.

Tau ntau xyoo, kuv twb pom qhov uas cov neeg uas ua tau ntau tshaj hauv lub ntiaj teb no yog cov uas muaj lub zeem muag txog lawv lub neej, lawv muaj hom phiaj uas pab lawv tsom ntsoov rau lawv lub zeem muag thiab npaj lub tswv yim kom ua tau. Qhov uas yus paub yus mus qhov twg thiab paub tias yus yuav ua li cas kom mus txog qhov ntawd ua rau yus lub neej muaj lub ntsiab thiab kev vam meej.

Nyuaj rau ib txhia paub tias ib lub hom phiaj thiab ib lub tswv yim txawv li cas mus txog thaum lawv kawm tias ib lub hom phiaj yog ib qho chaw yus xav mus los yog qhov kawg, tiam sis ib lub tswv yim yog kev xav tias yus yuav taug txoj kev twg kom mus txog qhov ntawd. Piv txwv hais tias, peb muab tau ib lub hom phiaj mus rau ib qho chaw uas yus tsis tau mus dua, thiab ib yam li nej cov muam paub, peb cov txiv neej xav tias peb paub mus qhov ntawd—peb thiaj li hais tias, “Kuv paub ntshe nyob ntawm kev sib tshuam tom ntej no xwb.” Nyaj kuv tus poj niam tab tom luag nyav. Lub hom phiaj twb meej heev, tiam sis tsis muaj ib lub tswv yim zoo kom mus txog qhov chaw ntawd.

Kev cuab hom phiaj yeej yog kev pib ua tom qab xav txog qhov kawg. Thiab kev npaj tswv yim yog kev tsim ib txoj kev kom txog qhov kawg ntawd. Kev zoo siab nyob ntawm seb tej qhov chaw twg muaj nqi tiag tiag—ces peb siv sij hawm, siv dag zog, thiab tsom ntsoov rau tej yam uas yuav pab peb mus txog tej qhov chaw ntawd.

Vajtswv, peb Leej Txiv Saum Ntuj Ceeb Tsheej, tau coj yam ntxwv zoo tag nrho txog kev cuab hom phiaj thiab kev npaj tswv yim. Nws lub hom phiaj yog ua kom tib neeg txais tau txoj kev tsis txawj tuag thiab txoj sia nyob mus ib txhis.¹ thiab Nws txoj hau kev kom ua tau li ntawd yog txoj kev cawm seej.

Peb Leej Txiv Saum Ntuj Ceeb Tsheej txoj hau kev yog kev txib peb nyob rau hauv lub ntiaj teb kom raug tej kev sim siab, kawm tej yam, loj hlob tuaj, thiab muaj cev nqaij daim tawv thiaj li hloov los ua neeg zoo li Nws. Peb ua raws li Vajtswv lub hom phiaj kom Nws cov me nyuam tsis txawj tuag thiab muaj txoj sia nyob mus ib txhis nrog Nws nyob hauv Nws lub nceeg vaj xilethi-aus thaum peb cov ntsuj plig uas nyob mus ib txhis txais tau cev nqaij daim tawv, thaum peb ua raws li Nws Leej Tub, tus Tswv Yexus Khetos, cov lus qhia thiab cov lus txib, thiab koom ua ke nrog peb tsev neeg, dhau los ntawm tus Cawm Seej txoj Kev Theej Txhoj.

Cov txawj ntse uas cuab hom phiaj to taub tias tej lub hom phiaj uas yuav ua tsis ntev tom ntej yeej pab tau tsuas yog tej ntawd pab yus ua tau tej lub hom phiaj uas yus to taub tias yuav siv sij hawm ntev ntxiv ua. Kuv ntseeg tias ib qho tseem ceeb rau peb txoj kev zoo siab yog kev kawm cuab hom phiaj thiab npaj tswv yim kom muaj raws li peb Leej Txiv Saum Ntuj Ceeb Tsheej txoj hau kev uas nyob mus ib txhis. Yog tias peb tsom ntsoov rau txoj kev mus ib txhis no, peb yeej yuav rov qab los nrog Nws nyob.

Yeej yog ib qho zoo yog peb muaj hom phiaj thiab npaj tswv yim rau peb txoj hauj lwm, rau peb txoj kev kawm ntawv, los yog peb txoj kev ua si golf. Kuj yog ib qho tseem ceeb yog peb cuab hom phiaj rau peb txoj kev sib yuav, peb tsev neeg, thiab rau peb pawg sab laj thiab txoj kev hu nyob hauv lub Koom Txoos. Tiam sis peb tej lub hom phiaj tseem ceeb tshaj plaws yeej yuav tsum sib haum nrog Leej Txiv Saum Ntuj Ceeb Tsheej txoj hau kev uas nyob mus ib txhis. Yexus hais tias, “Nej yuav tsum xub nrhiav Vajtswv lub nceeg vaj thiab nws txoj kev ncaj ncees tso, thiab tag nrho tej yam no yeej yuav raug muab ntxiv rau nej.”²

Cov kwv txawj ntse uas paub txog kev cuab hom phiaj qhia hais tias yog tias ib lub hom phiaj yooj yim thiab hais meej, ces lub hom phiaj yuav pab tau yus. Thaum peb siv ib daim duab los yog ob peb lo lus uas muaj hwj huam kom ua lub cim txog peb lub hom phiaj, ces lub hom phiaj ntawd yuav coj peb kev thaum peb ua thiab xav txog txhua yam. Kuv ntseeg tias, hais txog qhov no, muaj ob lo lus uas ua tau lub cim txog Vajtswv lub hom phiaj rau peb thiab peb lub hom phiaj tseem ceeb tshaj plaws rau peb tus kheej. Ob lo lus no yog rov qab los thiab txais tau.

Ob lub hom phiaj tseem ceeb tshaj plaws yog kev rov qab los rau Nws lub xub ntiag thiab txais tau cov koob hmoov mus ib txhis uas los ntawm kev ua raws li peb tej kev khi lus.

Peb rov qab los thiab txais tau thaum peb “txoj kev ntseeg [tus Tswv Yexus Khetos] uas khov kho, vam khom tag nrho” rau Nws tej hauj lwm zoo, yuav tsum txiv “mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus … , mloog ntsoov Khetos tej lus, thiab nyiaj mus kom txog thaum kawg.”³

Luxifaws tsis tau lees yuav peb Leej Txiv txoj hau kev uas cia peb rov qab los rau Nws lub xub ntiag thiab txais Nws cov koob hmoov. Muaj tseeb tiag, Luxifaws ntxeev siab thiab sim muab peb Leej Txiv txoj hau kev pauv, vim nws xav txeeb tau tag nrho Vajtswv lub yeeb koob thiab lub hwj chim rau nws tus kheej. Yog li ntawd, nws thiab nws cov tim tswv raug ntiab tawm ntawm Vajtswv lub xub ntiag thiab “hloov los ua Dab Ntxwg Nyoog, muaj tseeb tiag, twb los ua tus dab phem, leej txiv ntawm txhua txoj kev dag, kom dag ntxias thiab ua rau neeg dig muag, thiab txhom coj lawv raws li nws siab nyiam, twb coj tag nrho cov uas tsis kam mloog [tus Tswv] lub suab.”⁴

Vim los ntawm tej yam uas nws xaiv hauv lub neej ua ntej lub neej no, Dab Ntxwg Nyoog rov qab los tsis tau thiab txais tsis tau. Ces nws tsis muaj dab tsi ua tsuas yog siv txhua yam kev haub ntxias tawm tsam Leej Txiv txoj hau kev kom peb raug txom nyem thiab ua rau peb nyuaj siab zoo ib yam li nws.⁵ Dab Ntxwg Nyoog xav ua raws li nws lub hom phiaj phem rau txhua tus neeg, txhua tiam neeg, kab lig kev cai, thiab lub sawm fem. Dab Ntxwg Nyoog siv tej lub suab nrov nrov—tej lub suab uas yuav nrov dua li tus Vaj Ntsuj Plig Dawb Huv lub suab yau yau uas qhia tau peb “txhua yam” peb yuav tsum ua kom rov qab los thiab txais.⁶

Tej lub suab no los ntawm cov uas saib tsis taus qhov tseeb ntawm txoj moo zoo thiab cov uas siv internet, cov ntaub ntawv, xov tooj cua, TV, thiab cov duab movie kom ntxias peb nyiam tej kev ua phem ua qias, kev ua lim hiam, hais lus phem, thiab kev plees kev yi ua rau peb thiaj li tsis nco qab txog peb lub hom phiaj thiab tej tswv yim uas peb tau npaj kom nyob mus ib txhis.

Tej zaum tej lub suab no yog los ntawm cov uas muaj siab zoo tiam sis ntseeg tej laj lim tswv yim ntawm tib neeg uas xav ua rau cov uas xav rov qab los cuag Vajtswv thiab txais tau “tag nrho [peb] Leej Txiv muaj”⁷ kom lawv tso lawv txoj kev ntseeg tseg thiab tsis tsom ntsoov rau kev nyob mus ib txhis.

Kuv tau kawm hais tias yog kuv xav tsom ntsoov rau txoj kev rov qab los thiab txais tau cov koob hmoov uas Vajtswv cog lus tseg rau peb, kuv yuav tsum ib sij siv sij hawm nug kuv tus kheej seb “Kuv ua li cas?”

Zoo li yus xam phaj nrog yus tus kheej. Yog tias nej xav tias qhov kuv hais no txawv txav heev, cia li xav txog qhov no: leej twg nyob hauv lub ntiaj teb no paub nej tus kheej zoo dua li nej? Nej paub nej tej kev xav, tej yam nej ua thaum tsis muaj leej twg pom, tej yam uas nej xav tau thiab nej lub zeem muag, nej lub hom phiaj thiab tej tswv yim. Thiab nej paub zoo dua li lwm tus hais tias nej taug txoj kev kom rov qab los thiab txais tau deb li cas.

Thaum kuv xam phaj nrog kuv tus kheej, kuv nyiam nyeem thiab xav txog cov lus nyob hauv phau Amas tshooj tsib, uas Amas nug hais tias: “Nej sab ntsuj plig puas tau yug los ntawm Vajtswv? Nej puas tau txais nws tus yam ntxwv rau nej lub ntsej muag? Puas tau ua rau nej lub siab hloov loj heev zoo li no?”⁸ Amas tej lus nug ua rau peb nco txog peb tej lub hom phiaj thiab tej lub tswv yim uas peb tau npaj kom rov qab los thiab txais tau.

Cia li nco txog tus Cawm Seej tej lus caw kom “nej cov uas sab sab vim nej ris nra hnyav, nej cia li los cuag kuv, kuv yuav cia nej so.

“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.”⁹

Thaum peb txoj kev ntseeg tus Tswv Yexus Khetos loj tuaj, peb haj yam yuav ris Vajtswv txiaj rau tus Tswv Yexus Khetos txoj Kev Theej Txhoj, uas muaj hwj chim cia peb so los ntawm kev zam txim rau peb tej kev txhaum, ua rau peb rov qab sib raug zoo, kho tej yam mob ntawm sab ntsuj plig uas ua rau peb tsis loj hlob, thiab txhawb peb lub dag zog kom hloov los ua neeg zoo li Khetos.¹⁰

Ob peb lim tiam tom ntej, cia li nrhiav sij hawm saib nej tej hom phiaj thiab tej lub tswv yim uas tau npaj rau nej lub neej, thiab ua tib zoo saib puas sib haum nrog Leej Txiv Saum Ntuj Ceeb Tsheej txoj hau kev rau peb txoj kev zoo siab. Yog tias nej yuav tsum hloov siab lees txim, ces cia li xav txog qhov uas tsim nyog ua tam sim no. Cia li siv sij hawm thov Vajtswv xav txog tej yam uas nej yuav tsum hloov kom pab nej “ntsia ntsoov rau Vajtswv lub yeeb koob.”¹¹

Peb yuav tsum tsom ntsoov rau Yexus Khetos cov lus qhuab qhia thiab txoj moo zoo thaum cuab hom phiaj thiab npaj tswv yim. Yog tsis muaj Nws, ua tsis taus ib lub hom phiaj mus ib txhis, thiab peb yeej yuav tsis muaj peev xwm ua raws li peb tej lub hom phiaj.

Daim Duab

Daim ntawv “Tus Khetos uas Muaj txoj Sia Nyob”

Ib qho uas pab tau ntxiv yog “Tus Khetos uas Muaj txoj Sia Nyob: Cov Thwj Tim tej Lus Tim Khawv,”¹² uas tau muab rau lub Koom Txoos thaum lub Ib Hlis Ntuj hnub tim 1, xyoo 2000. Tso ib daim rau ib qho chaw uas ua yooj yim rau nej pom, thiab siv sij hawm nyeem txhua yam uas hais nyob hauv zaj lus tim khawv txog Khetos los ntawm Nws cov neeg tim khawv tshwj xeeb uas tau sau npe.

Daim Duab

“Tus Khetos uas Muaj txoj Sia Nyob” thiab zaj lus tshaj tawm txog tsev neeg

Kuv yaum kom nej kawm zaj no nrog zaj “Tsev Neeg: Ib zaj Lus Tshaj Tawm rau lub Ntiaj Teb.” Peb hais txog zaj lus tshaj tawm txog tsev neeg ntau heev, tiam sis thov kom nej nyeem thaum nej txav txog tus Khetos uas Muaj txoj Sia Nyob lub hwj chim cawm tib neeg. Yog tias tsis muaj tus Khetos uas Muaj txoj Sia Nyob, ces ntshe peb yeej yuav txais tsis tau tej yam uas peb xav tau. Raws li zaj lus tshaj tawm txog tsev neeg hais tias: “Txoj kev zoo siab los saum ntuj los ua rau kev ua niam ua txiv, ua tub ua ntxhais, ua kwv ua tij, ua neej ua tsa nyob mus li dhau lub qhov ntxa. Tej kab ke tseem ceeb dawb ceev thiab tej kev cog lus uas muaj hauv tej tuam tsev dawb huv ua rau tib neeg rov qab mus nyob tau ntawm Vajtswv lub xub ntiag thiab ua rau tsev neeg nyob tau ua ke mus ib txhis li.”¹³

Yuav muaj li no xwb vim tus Khetos uas Muaj txoj Sia Nyob yog tus Cawm Seej thiab tus Txhiv Dim ntawm Neeg Ntiaj Teb uas Theej Txhoj.

Yog li ntawd, tej zaum nej kuj yuav xav tshawb nrhiav hauv cov vaj lug kub kom to taub tej yam tseeb nyob hauv zaj “Tus Khetos uas Muaj txoj Sia Nyob.”

Qhov uas nej thov Vajtswv thiab nyeem “Tus Khetos uas Muaj txoj Sia Nyob” yeej zoo ib yam li nej nyeem Mathais, Malakaus, Lukas, Yauhas, thiab cov yaj saub hauv Phau Ntawv Maumoos tej lus tim khawv. Qhov no yuav ua rau nej txoj kev ntseeg tus Cawm Seej loj tuaj thiab pab nej tsom ntsoov rau Nws thaum nej ua raws li nej tej tswv yim uas nej npaj kom ua raws li nej tej lub hom phiaj mus ib txhis.

Txawm yog peb ua yuam kev, ua tsis tau tej yam, lug kev, thiab ua txhaum, Yexus Khetos txoj Kev Theej Txhoj cia peb hloov siab lees txim, thiaj li muaj peev xwvm rov qab los thiab txais tau cov koob hmoov uas Vajtswv cog lus rau peb—kom nyob mus ib txhis nrog Leej Txiv thiab Leej Tub nyob hauv theem siab tshaj plaws ntawm lub nceeg vaj xilethi-aus.¹⁴

Nim no nej txhua tus paub lawm hais tias, tsis muaj leej twg uas yuav dim tau kev tuag; yog li ntawd peb lub hom phiaj thiab lub tswv yim uas peb npaj yeej yuav tsum hais tias thaum peb rov qab los cuag peb Leej Txiv Saum Ntuj Ceeb Tsheej, peb yuav txais tau tag nrho txhua yam uas Nws tau npaj rau peb txhua tus.¹⁵

Kuv ua tim khawv tias, tsis muaj ib lub hom phiaj tseem ceeb tshaj plaws qhov uas peb xav nyob mus ib txhis nrog peb Leej Niam thiab Leej Txiv Saum Ntuj Ceeb Tsheej thiab peb tus Cawm Seej, tus Tswv Yexus Khetos. Tiam sis qhov no tsis yog peb lub hom phiaj xwb—yeej yog Lawv lub hom phiaj thiab. Lawv hlub peb zoo tag nrho, lawv txoj kev hlub muaj zog tshaj qhov peb to taub. Lawv yeej ua txhua yam tag nrho ua tej yam kom sib haum nrog peb lub hom phiaj. Peb yog Lawv txoj hauj lwm. Peb lub yeeb koob yog Lawv lub yeeb koob. Qhov tseem ceeb tshaj plaws, Lawv xav kom peb rov qab los tsev—rov qab los thiab txais kev zoo siab nyob mus ib txhis nyob ntawm Lawv lub xub ntiag.

Kuv cov kwv tij thiab cov muam, ib lim tiam tom ntej, peb yuav ua kev zoo siab txog Palm Sunday—kom nco txog Yexus Khetos txoj kev nkag mus rau hauv Yeluxalees. Ob lim tiam tom ntej, peb yuav ua kev zoo siab txog Easter Sunday—kom nco txog tus Cawm Seej txoj kev kov yeej kev tuag.

Thaum peb tsom ntsoov rau tus Cawm Seej rau ob hnub Sunday tshwj xeeb no, thov kom peb nco txog Nws thiab rov qab cog lus tias peb yuav ua raws li Nws cov lus txib tas peb lub neej. Thov kom peb ntsuam xyuas peb lub neej, cuab peb lub hom phiaj thiab npaj peb lub tswv yim kom sib haum nrog Vajtswv txoj hau kev ua rau peb thiaj li muaj cib fim rov qab los thiab txais tau—kuv thov Vajtswv kom muaj li no los ntawm Yexus Khetos lub npe, amees.