2010–2019
Fohlohk ac Eis
Eprel 2017


Fohlohk ac Eis

In fohlohk nuh yurin God ac in eis mwe insewowo ma pahtpaht ma kuh in tuhkuh ke oruh ac karihngihnyacn masap pa mwe ahkwot ma yohk srihpac emet kuht in oakiyac uh.

Tamuhlwel ac tahmtahel wiyuck, inge ma kunuck in sramsram nuh suwos, ac ma kunowos in porongo. Mwe ahkwot luhk uh pa in ahksahfyelah sramsram luhk uh met liki kowos tui tilac porongo. Ngwac oruh kuhiyuck.

Ke yac ekahsr ah, nga liye lah elos suc oraclah ma yohk fin facluh se inge pa elos suc ma etuh lah meac elos luhngse oruh ac ahksahfyelah wo ke moul lalos, ke ahkwot in oruh elos in siyac sie mwe finsrak ac plwacnwelah mukwikwi elos in muh ahkfahsryelah mwe finsrak sacn. Fin kom etuh lah kom ac som nuh oyac ac lah kom ac sun acn sacn fuhkah ac kuh in usot kalmac, srihpac, ac wo ohiyac ke moul se inge.

Upac nuh sin kuhtuh in liye tiac oacna sie luhn mwe ahkwot ac plwacn nekena elos etwacack lah ahkwot pa sahflahiyacn fuhfahsryucsr sacn kuh sahflah, ac plwacn pa inkacnek in sun acn sacn. Fin pa ngwe, kuht kuh in ahkwot in stosah som nuh ke sie acn kuht tiac etuh, suc ma kuhtuh suwos muhtwacn an etuh tari, lah kuht mukul uh kwacna nuhnkuh muh kuht etuh lah kuht ac sun acn sacn fuhkah—sahflahiyac ah kuht kwacna fahk, “Nga etuh—kuht ac kuhracnna sun acn sacn.” Muhtwacn kiyuck uh oacna isrwacsr ingena. Mwe ahkwot uh kahlwem, tuhsruhk wacngihn plwacn wowo se in ukwe in sun acn sacn.

In oakiyac mwe ahkwot uh el yohk srihpac in etuh lah meac kom ke in sikyak ke sahflahiyac an. Ac in plwacn pa sramtweack sie inkacnek ah in muh ahksahfyeyucklac mwe finsrak an. Sie ohiyac pwacye in eis engan uh tuhkuh ke kahlwem se muh sahflahiyacn ma uh arlac yohk srihpac—ac na sislah pacl lasr, fiyoh lasr, ac lohacng lasr nuh ke ma ma ac oraclah inkacnek pwacye se in ahksahfyelah mwe finsrak uh.

God, Pahpah tuhmasr Inkuhsrao, El use srihkasrak na suwohs se nuh ke oakiyacn ahkwot ac plwacn uh. Mwe ahkwot Lal pa in use moul kawihl ac moul ma pahtpaht luhn mwet uh,1 ac inkacnek Lal in ahkfahsryelah mwe finsrak sacn pa plwacn in molwelah.

Plwacn luhn Pahpah sacohk tuhmasr Inkuhsrao pa in use moul in ikoac in kapkapwack, kihluckyak, ac etwaclah suc ma oruh kuht kuh in eklac oacna El. Fihliyucki nguhna kaul lasr nuh ke mahnosr; moulkihn mwe luti ac masap luhn Wen Nahtuhl, Leum Jisus Kraist; ac oraclah sucu ma pahtpaht ikacslah nuh sesr, ke Iwaclah luhn Mwet Lahngo, in ahkpwacyeye mwe ahkwot luhn God ke moul kawihl ac moul ma pahtpaht nuh sin tuhlihk Nahtuhl in muhta Yohrohl ke tohkohsrahi Lal celestial.

Lahlmwetmwet in oraclah sie ahkwot uh pa in kahlwem kac lah ahkwot nuh ke kihtin pacl el ac orekma muhkwena fin ac kol nuh ke kahlwem yohk nuh ke ahkwot nuh ke ma ac oan paht. Nga luhlahlfongi lah sie ma yohk srihpac nuh ke engan pa in lutlutkihn lah kuht ac oakiyac fuhkah mwe ahkwot lasr uh ac muhsaheack plwacn lasr sifacna lun akwuck ke plwacn luhn Pahpah Lucng. Fin kuht iskuhtyang nuh ke inkacnek ma pahtpaht se inge, kuht ac fal na pwacye in fohlohk nuh Yohrohl.

Wo in oasr ahkwot ac plwacn nuh ke orekma lasr, lutlut lasr, finne nuh ke sritacl ma kuht oruh. Yohk srihpac pac in oasr ahkwot nuh ke macruht lasr, sucu lasr, ac miting ac kunohkohn lasr ke Alu; ma se inge pwacye yohkna nuh sin misineri. Tuhsruhk ahkwot fuhlwact ac yohk srihpac emet uh enenuh in kuhpahsr nuh ke plwacn ma pahtpaht lal Pahpah Lucng. Jisus el fahk, “A kowos in nunku meet ma nuke Tokosrai lun God ac ma lungse lal, na El ac fah asot ma inge nukewa nu suwos.”2

Mwet pihsrlac ke oakiyacn ahkwot uh fahk nuh sesr lah fin fihsrwacsr ac kahlwem srihpac luhn ahkwot sacn, ac arlac yohk ma oreklac kac. Fin kuht ahksrihkyelah ahkwot sacn nuh ke sie ngwetngwet na kahlwem ah kuh nuh ke se kuh luo kahs ma yohk kuh ac akucl kac, kuht ac pahlah in oruh mukwikwi lasr in ahksahfyelah ahkwot sacn ac na ac kol kuht ke ma nuh kwewa ma kuht nuhnkuh ac oruh. Nga luhlahlfongi muh tuh oasr kahs luo, ke luhmah se inge, ma luhmweyuck nuh ke ahkwot luhn God nuh sesr ac mwe ahkwot ma yohk srihpac emet nuh sesr. Kahs inge pa fohlohk ac eis.

In fohlohk nuh Yohrohl ac in eis mwe insewowo ma pahtpaht ma kuh in tuhkuh ke oruh ac karihngihnyacn masap pa mwe ahkwot ma yohk srihpac emet kuht in oakiyac uh.

Kuht fohlohk ac eis ke oasr sesr “luhlahlfongi kuh in [Jisus Kraist], fungyang nohfohn nuh ke” ohiyac wo Lal, ahkwot “nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse luhn God ac mukul nuhkwewa [ac muhtwacn] … , mongo ke kahs luhn Kraist, ac muhtweng ne ke na sahflah.”3

Lucifer el tiac insese nuh ke plwacn luhn Pahpah tuhmwacsr suc ma lwelah nuh sesr in fohlohk nuh Yohrohl ac eis mwe insewowo Lal. Ma pwacye uh pa, Lucifer el lain ac suk in ekuhllah plwacn luhn Pahpah tuhmwacsr, kena in eis wolacna, ahkfuhlwact, ac kuh luhn God nuh facl sifacna. Ke srihpac sacn, el sisilac wi nguhn ma fahsr tohkohl liki acn luhn God ac eklac Setuhn, devil, pahpah tuhmwacn ma kikiacp nuh kwewa, in kiacpwelah ac ahklohsryelah mukul ac muhtwacn, ac in kohlohloslac in srohoh ke kena lal, in oruh mwet puhs in tiac porongo puhsren Leum.4

Ke srihpen sulwaclah ma el oraclah ke moul se met ah, Setuhn el tiac kuh in fohlohk kuh eis. Ma sefanna ma el kuh in oruh an pa in lain plwacn luhn Pahpah ke orekmakihnyacn ohiyac usrnguck ac mwe sruhf in uskuhti nuh ten ac oruh kuht in suhpwacr oacna el.5Plwacn lal Setuhn in ahkfahsryelah ahkwot na suhlallacl se inge orek nuh sin mwet, fihl, facsin, ac acn nuh kwewa. Setuhn el orekmakihn puhsra yohk—puhsra ma suk in taunyac puhsra srihsrihk luhn Nguhn Muhtahl ma kuh in ahkkahlwemye “ma nuhkwewa” kuh enenuh in oruh in fohlohk ac eis.6

Puhsra inge oasr sin mwet suc pihlesruh ma pwacye ke wosasuc ac suc orekmakihn internet, inkacnek in sramsram, retio, tifi, ac petsac in ahkkahlwemye ma uh ke ohiyacn ahkmwel ma koluk, acnwuck, kahs sowac, fohkfohk, ac ma kuhtasrihk ke ohiyac ma ac lusrongkuhtlac liki mwe ahkwot ac plwacn lasr nuh ke moul ma pahtpaht.

Puhsra inge kuh in kohllah pac mwet na wowo suc ma kiyacpweyucklac ke kahs suhmaht luhn mukul ac muhtwacn ma suk in kuhnahoslah luhlahlfongi ac kihfaslah lohacng nuh ke mwe lohacng ma pahtpaht luhn mwet suc srihke in fohlohk nuh ye muhtuhn God ac eis ma nuh kwewa luhn Pahpah tuhmwacsr.7

Nga konwacack lah in muhta na ke fohlohk ac eis mwe insewowo ma wihlwihl nuh sesr uh, nga enenuh in sislah pacl yohk in sifacna siyuck sihk, “Fuhkah oruh luhk uh?”

Oacwac in kom sifacna sirapei kom. Fin ake sum, nuhnkuh ke ma se inge: Suc fin facluh se inge etwe kom oacna kom sifacna? Kom etuh nuhnak lom; mukwikwi lukmac lom; kena lom; ac mwemwe lom, ahkwot ac plwacn lom. Ac kom etuh liki nuh kwewa lah kom oasr e yac ke inkacnek nuh ke fohlohk ac eis.

In use kolyuck nuh sihk ke pacl in lukmac, sifacna sirape, nga luhngse riti ac nuhnkuh ke kahs in nuhnak ma konweyuckyak ke sapta ahk limekohsr ke Alma, ke Alma el siyuck: “Yac kowos isuslac ke nguhn luhn God? Yac kowos eis Luhmahl ke lomowos? Yac kowos puhlakihn eklac na yohk se inge ke insiowos?”8Kihsensiyuck lal Alma inge el mwe ahkacsmakihnye kuht ke ahkwot ac plwacn ma kuht enenuh in oruh in muh kuht fohlohk ac eis.

Esam suli luhn Mwet Lahngo in “fahsruh nu yuruk, kowos su orekma ac totola, tuh nga fah sot mongla nu suwos.

“Eis srenenu luk nu fowos ac lutlut sik, tuh nga fakpap ac inse pusisel; ac kowos fah konauk mongla.”9

Ke kuht ahkyohkye luhlahlfongi lasr ke kuh luhn Mwet Lahngo Jisus Kraist in use monglac nuh ke nguhnasr ke nuhnakmuhnahs ke ma koluk, ahkwoyelah asruoki koluk, unwelah kihnet in nguhn ma tulokihnyac kapwack, ac ahkkweye ac oruh kuht in kuh in muhsaheack ohiyacn Kraist, ac yohkwelihk srui lasr ke fuhlwactiyacn Iwaclah luhn Leum Jisus Kraist.10

Ke wik ekahsr fahsruh uh, sokwack pacl lom in sifacna muhta liye mwe ahkwot lom ac plwacn lom ke moul lom, ac ahklohye tuh in kihsrucngsrucng nuh ke plwacn wolacna luhn engan luhn Pahpah tuhmasr Inkuhsrao. Fin kom enenuh in auliyak ac eklac, nuhnkuh kom in oraclah ingena. Eis pacl lom in nuhnkuh ke ohiyac ma kom enenuh in oruh in kahsrwekom siyac na wolacna luhn God.11

Kuht enenuh in karuhnganwacng mwe luti ac wosasuc luhn Jisus Kraist ke koanon mwe ahkwot ac plwacn lasr uh. Fin tiac ke El, wacngihn ahkwot kawihl kuh in oreklac, ac plwacn lasr in ahkfahsryelah mwe finsrak lasr ke ma luhn God ac fah tiac sikyak.

Petsac
Pwepuh sihmlac ke “Kraist Suc Moul”

Sie pac mwe kahsruh an pa “Kraist Suc Moul: Fahkwack ke Luhlahlfongi luhn Mwet Sap,”12suc tuh tuhkahkihnyucklac nuh ke Alu uh ke Jacnweri 1, 2000. Fihliyac sie kapi an ke sie acn ma kom ac kuh in liye ac eis pacl lom in liye kais sie mwe fahkwack ma oasr ke testimoni oa ke Kraist sin mwet lohoh sacohk lal suc sainiyac ma se inge.

Petsac
“Kraist Suc Moul” ac mwe fahkwack luhn sucu sac

Nga kwacfe kom in lutlut kac wi “Sucu: Sie Mwe Fahkwack nuh fin Facluh.” Kuht kwacna sramsramkihn ke mwe fahkwack luhn sucu, tuhsruhk nuhnakmuhnahs esam in riti ke kuh luhn molwelah luhn Kraist Suc Moul. Fin wacngihn Kraist Suc Moul, mwe finsrak ma kuht luhngse emet uh ac tiac sikyak. Oacna ke fwackyuck ke sie mwe fahkwack luhn sucu: “Placn luhn God nuh ke moul ma pahtpaht oruh sucu uh in kahlwem kac lah efah sifilpac sikyak tukun kuht misac uh. Akwuck muhtahl ac olwelah uh kuh in orek ke tempuhl muhtahl e oruh mwet se kuh in fohlohk nuh yurin God ac nuh sin sucu in tuhkweni netok.”13

Ma se inge kuh in sikyak muhkwena ke srihpen Kraist Suc Moul pa Mwet Lahngo ac Molwelah luhn facluh.

Ke srihpen suhnak, kom ac ke nuhnkuh in suk ma suhmuhslah uh in ahkyohkye kahlwem lom ke ma pwacye ma konweyuckyak ke “Kraist Suc Moul.”

Pruhe in riti “Kraist Suc Moul” el oacpacna ke kom riti testimoni lal Matthew, Mark, Luke, John, ac mwet pahluh ke Puk luhn Mormon. Ac fah ahkyohkye luhlahlfongi lom ke Mwet Lahngo ac kahsrwe kom in lohacng na nuh Sel ke kom ukwe plwacn lom in sun mwe ahkwot ma pahtpaht lom uh.

Finne oasr tahfonglac, suhfallac, kihlac, ac ma koluk lasr, Iwaclah luhn Jisus Kraist el ikacslah nuh sesr in auliyak, ahkoekuhtlac in fohlohk ac eis mwe insewowo luhn God ma El olwelah—in moul ma pahtpaht yurin Pahpah ac Wen ke usru se ma fuhlwact emet ke tohkohsrahi celestial.14

Inge kowos nuh kwewa etuh, wacngihn mwet kuh in kahingkuhnlah misac; ke ma inge, ahkwot lasr nuh ke pacl tok uh ac plwacn lasr uh enenuh in pa ke kuht fohlohk nuh yurin Pahpah tuhmasr Inkuhsrao, kuht fah eis ma nuh kwewa ma El tuh plwacnwelah nuh sesr kais sie.15

Nga fahkwack lah wacngihn mwe ahkwot yohk ke moul se inge liki kuht in moul ma pahtpaht yurin Pahpah Ninac kiyacsr Inkuhsrao ac Mwet Lahngo sacohk lasr, pa Leum Jisus Kraist. Tuhsruhk yohk likina in mwe ahkwot se na lasr—ma Lalos pac pa mwe ahkwot se inge. Oasr luhngse pwacye lalos nuh sesr, fokoko likina ma nuh kwewa kuht kuh in nuhnkuh. Asruoki Lalos nuh sesr uh arulacna fas ac kaul. Kuht pa orekma Lalos. Wolacna lasr pa wolacna Lalos. Yohk likina ma nuh kwewa sahyac, Elos ke kuht in tuhkuh nuh lohm ah—in fohlohk ac  eis engan ma pahtpaht Yohrohlos.

Tamuhlwel ac tahmtahel sacohk wiyuck, tukun wik se, kuht ac ahkfuhlwactye Palm Sacnri—ahkfuhlwactyeyacn utyak luhn Kraist nuh ke siti Jerusalem. Tukun wik luo, kuht ac ahkfuhlwactye Sacnri in Eastuh—ahkfuhlwactyeyacn kuhtanglah luhn Mwet Lahngo fin misac.

Ke kuht sang lohacng yohk lasr nuh ke Mwet Lahngo ke Sacnri sacohk luo inge, lwelah kuht in Esamuhl ac ahksasucye olwelah lasr in liyacacng masap Lal. Lwelah kuht in lihksreni ngwetwacng liye moul lasr sifacna, oakiyac mwe ahkwot lasr sifacna ac lohacng yohk nuh ke plwacn lasr ma kihsrucng nuh ke plwacn luhn God ke ohiyac ma ac lihksreni kol kuht nuh ke engan sacohk lasr in fohlohk ac eis— suc pa mwe pruhe puhsisacl luhk ke inen Jisus Kraist, amen.