Mluu el Mei me bo Mngai
A lmuut el mo er Ngii me a nguu a diak a ulebengelel klengeltegat el ngii a denguu lokiu a meruul e urekodel a telbiil a kot el meklou a ultutelel el moktek el kid el do mdasu a momeruul.
Rodam me a rodos, ng kuk mocha ngerchelek el mo mengedecheduch er kemiu, e a ngercheliu a mo orrenges. A moktek er ngak a mo merek ra ngercelek ruchei er kemiu. Ak mor sel kot el ngar bab el sebechek.
A ikal betok el rak, e ak mla mesa el kmo tirkel kudmokl a betok er tial beluulechad a tirkel ngarngii a lomes er ngii el kirel a klengar er tir, el ngarngii a loruul meng diak el iiu chosengir ra moktek er tir el blechobech el bo loruul. Sel modengelii obo er ngii e mekera obor er ngii eng sebechel meskau a belkul, moktek, ma obom kdmokl er tial klengar.
A rebebil a meringel el mesa klekakerous er a moktek mea uldasu dilmerekmo bo lodengei el kmo a moktek a sel ulebongel, el de borngii e a uldasu sel rael el ngoikau el mo re ngii. El ua tiakid, ng sebechel a moktek el omekall el mora basio el diak de sal medengelii, el uaikel modengei e rodos, el kmo kemam el sechal a blechoel lomdasu el kmo a ki medengelii a rael—el blechoel el mo uaitakid, “Ak medengei kede locha di kab er sei.” A bechik a klimechur.A moktek a mle bleketakl, eng di dimlak a ungil uldasu el mekedmokl el sebechel ngoikak el mor sel kbo er ngii.
A le ngarngii a moktek er kid eng klou a ultutelel el omuchel lomes er sel kau a soam a blal le mekedmokl. E a uldasu a ikel tekoi el mo kudmeklii. Sel ngoikid el mora deureng a ultuir er a klemedengei er kid er sel de bo er ngii el ngii a klou a ultutelel—e mo chemoit a temed, dechal a rengud, ma osenged el kirel el ngii a meral mo ngoikid el mo er ngii.
A Dios, el Demad er a Babeluades, a mla meskid a kmal ungil okesiul a omengedmeklel a moktek er kid me a uldasu el kirel. A moktek er Ngii a mo “olsobel er a rebek el chad a sechal [me a redil],”1 e a omengedmeklel tiang a uldasu er a osobelir.
A uldesuel a ungil Demad er a Babeluades uldimukl a mo sebeched el mukeroul, mongimes, mesuub, e kiei ra beluulechad el ngii a ngoikid el sebeched el di mouai Ngii. El milii a rengud loba bedenged; e kiei loltirakl a osisechakl me a llechul a Ngelekel, el Rubak el Jesus Kristo; e a chodbechel a diak a ulebengelel telungalek a meskid, el okiu a Tngakireng er a Osobel, el mo otaut a moktek er a Dios er a mo diak a kodall me a diak a ulebengelel klengar er a Rengelekel lobengkel er a sel kot el ngarbab el Rengedel.
A ungil moktek er kid a kirel morngii a klemedengei el kmo a kedeb a temel moktek a mekedmokl alsekum e ng mo kudmeklii sel kemanget el ngii a moktek er kid. A kuumerang el sel klou a ultutelel el kirel a deuil a rengud a mo meduch el remuul a moktek e kudmokl a mo urerall el kirel el ngii a ulsiseb er sel diak a ulebegelel el uldesuel a Demad er a Babeluades. Alsekum osenged a ngar tial uldasu, e kid a diak dokor el lemuut el mo Obengkel.
Ng ungil a le ngarngii a mokttek ma uldesued el kirel a mo urered, skuled, dirrek a dousekool a golf. Ng dirrek el klou a ultutelel a le ngarngii a moktek er kid el kirel a mo chebechieled, telungalek er kid, ma miting ra roungerachel ra Ikelesia ma ngercheled; e kmal kirir a remissionary. E ng di sel kot el ngarbab ra rokui el goal a kirel ungil soiseb er a diak a ulebengelel el uldesuel a Chedam er a Babeluades. A Jesus a dilu el kmo, “Mosiik el kot a rengedel a Dios me a kldung, e a ikal rokui a mo medechel el ekor er kau.”2
A re semmong el kirel omeruul el moktek er kid a ouchais el kmo sel le beot el bleketakl, eng klou a klisichel mekedmokl. Sel dechoit a bebil ra moktek mel di bol chimong malechub eng teblo el ngarngii a belkul el bleketakl, e tiakid el moktek a mo obengked e mo omekrael a rokui el domdasu e meruul. A kumdasu eng ngarngii a ikal eru el tekoi el ngii, el tekoi, a cholechotel a moktek er a Dios el kired el ngii a kot el klou a ultutelel el moktek er kid. A ikal tekoi a lmuut ma ngmai.
A lmuut el mo er Ngii me a nguu a diak a ulebengelel klengeltegat el ngii a denguu lokiu a meruul a urekodel a telbiil a kot el meklou a ultutelel el moktek el kid a remuul.
Ke de lmuut e ngmai sel dobang a “diak el mesim el klaumera er a [Rubak el Jesus Kristo], el ultuir” er a Urerel, e melemolem el “mesisiich el ngara Kristo, el cherrungel a urunguled, me a beltkil a rengud el mora Dios ma rokui el chad [ma redil] … , el mesuub a tekingel a Kristo, e outekang[el] el mora ulebongel.”3
A Lucifer a dimlak el soal a uldesuel a Demad el ngii ngoikid el lmuut el mo er Ngii e ngmai a klengeltengak er Ngii. E ngii, a ulemtok e melasem el melodech er sel uldesuel a Chedam, el soal melai er a klebkall, omengull, me a klisichel a Dios. Me, ng mlodik er medal a Dios ngii me a rechedal meng “mlo Diablong, oi, el mekngit el chelid, el demal a rokui el blulak, el mo mengeuid e omilkolk osengir a rsechal [me a redil], e melai er tir me bol ngar sel soal, el tirkel rokui el tir a mo diak lorrenges er [a Rubak].”4
Le uchul aikel lultilt ruchei, e a Diablong a diak el sebechel el lmuut malechub ngai. Sel di tal tekoi el lobang a mo omtok er a uldesuel a Chedam lokiu a ngii di el omengesuseu ma ngibesereng me derebet e bo llak lungil a rengud el uaingii.5 A uldesuel a Diablong el mo kudmokl a ikal mekngit el moktek er ngii a sebechel mora ngii di el chad, telecheroll, siukang, ma beluu. A Diablong a soal a omengerkes—ngor el ngii a soal lolserechakl er a kekerei e mengelulau el ngor er a Chedaol Reng el ngii a sebechel locholt a “rokui el tekoi ”el doruul e ng sebechel el lmuut e ngmai.6
A ikal ngor a mo er tirkel diak mengoit a klemerang er a ebangkelio e ousbech er a internet, social me a print media, rasio, tv, ma movie el lolecholt lungil a delngerenger, odechelakl, sius, mekikiongel, delboes el ngii a mengesang er kid ra ikel moktek ma uldesued el kirel sel diak a ulebengelel.
A ikaikid el ngor a uldimukl er ngii a rungil el chad el tir a mla mo mui ra ilkolk er a uldesuir a rechad ma redid el tir a osiik rolel el mo melemall a klaumeang e melodech a chosengir el kirel a diak a ulebengelel tirkel tir a melasem el lmuut el mora Dios e ngai a “rokui lolab a [Demad].”7
Ak mla metik el kmo sel osenged a ngara lmuut e ngmai a klengeltengat lokiu a telibil, e ak blechoel el choitii a telkib el time e oker er ngak, “Ak ua ngerang?”
Ng kmeed el diua sel di le kid, el mengedecheduch er kid. E alsekum me tia kora ngoded, e ka momdasu er tiang: ng techa er tial beluulechad a medengelkau el uai kau? Ke medengei a ngara uldesuem, tekoi el moruul, a ikel soam me a omomdasu el mo kudmokl, moktek er kau, ma ureor el kirel. Me kau a ngaruchei el medengelkau er a rokui el chad el kirel a omerollem er tial rael er a lmuut e ngmai.
Sel ngii omekrael er ngak er tial di ngak, el omes er ngak, e ng soak el mo chieuii e omdasu a dmolech el tekoi el ngara ongeim el bliongel er a Alma, el Alma a uleker: “Kau ke mla mechell el beches el ngara Rubak? A llecheklel ngullecholt er a osengem? Ke mla mo melchesuar er a kloul el ngedechel a rengum?”8 A keril a Alma a omeklatk er kid el kmo ngera ikel moktek er kid me a uldasu el kirel dolsiseb alskeum meng soad el lmuut e ngmai.
Ka bo molatk er sel ongtil Osoel el kmo “mei er ngak, kemiu el loureor e oberaod a chelngeliu, e ak mo ongellemiu.
“Mnguu a chelngelek, e mosuub er ngak; le ngak a medemedemek e ngariou a renguk: e ko mo nguu a ungil ulengull.”9
Sel lorael mo mesisiich a klaumera er kid er a klisichel a Rubak el Jesus Kristo el mo meskid a ulengelled sel lousubes a klengit, omekungil a deleuill, omekungil a telemall el chedaol tekoi el tomer a ulekeroul, e smisichid meng sebeched el omekdubech a ungil blekerdelel a Kristo, e kid a mengai el mo dmolech ra saul el kirel a klisichel a Tngakireng er a Rubak el Jesus Kristo.10
Chelecha el merael mei el sandei, e bom choit a temem el mo omes a moktek er kau, er a klengar er kau me a uldesuem el momeruul e bom kerekikl me loltirakl er a kerbil a Demad er a Babeluades er sel uldesuel el kirel a deureng er kid. Alsekum meng kirem el mo ouchel kirel a kngtim e obult a rengum, e momdasu a rulii er chelechang. Mchoit a temem lokiu a nglunguuch el mo omdasu a ikel kirem el ngmodech el mo ngosukau el urrekodel er “sel moktek er a klebkellel a Dios.”11
Ng kired el urrekodel a suobel er a ebangkelio er a Jesus Kristo el ngii a chaidirengul a moktek er kid me a uldasu el mo meruul. Alsekum meng diak Ngii, e a rokui el moktek ra diak a ulebengelel klengar a diak, el sebechel morngii e a uldesued er a diak a ulebengelel a di mo klsuul.
A ta ra sebechel ngosukid a sel “Di Ngar el Kristo: Klaumerang er a re Apostol,”12 el le bilsa Ikelesia er sera January 1, 2000. Mnguu a llecheklel lolia er sel sebechem el mesang, e mchoit a temem el lomes a ikel bek el tekoi el debetik er tial mlukrael el klaumera er a Kristo el mlara tokubets el sioning er Ngii el mle saing er ngii.
Ng soak mengelechel er kemiu el mo subii ngii me sel “Telungalek: Chais el mora Beluulechad.” Aki blechoel mesaod el kirel tial chais er a telungalek, e ngdi a kulengit me lak mobes el menguiu er ngii lokiu a olsobel klisichel a di ngar el Kristo. Sel sekum meng diak a di ngar el Kristo, e a rokui el dongerchir a diak el bol taut. Me sel chais ra telungalek a melekoi el kmo: “Tial uldasu el kirel a deureng a sobecheklii a deleuill er a telungalek meng melemolm e ruriul er a kodall. A chedaol ruoll me a telbiil el nga er a chelsel a templo a rullii meng mo sebechel a chad el lemuut el mo er a rengedel a Dios me a telungalek a lmuut el mo dmak el mo er a diak a ulebenglel.”13
Tia sebechel duubech e le uchul a di ngar el Kristo ngii a tngakireng el Olsobel e Mengikiid er a beluulechad.
Me ngokiu tiang, eng sebechem el mo mesuub a chedaol llechukl el mo mui a klemedengei er kau er a bebil er a klemerng el debetik er a “Di Ngar el Kristo.”
Okiu a nglunguuch el menguiu er a “Di Nga el Kristo” a di uaia donguiu er a sioning er a Mateus, Markus, Lukas, Johanes, me a re profet er a Babier er a Mormon. Ng smisichii a klauera er kau er a Osobel e ngosukau el di bedul Ngii sel moltirakl a ikel uldesuem el mo kudmokl a moktek er kau er a diak a ulebengelel.
Ng diak el iior er a blo de cheleuid er ngii, chelitechetud, tuuchakl, klengit, a Tngakireng er a Jesus Kristo a rulii meng sebeched el mo ouchel, kudmeklid el lmuut e ngmai a diak a mo uaingii el klengeltengat er a Dios el ngii a mla yakskok—el mo kiei el diak a ulebengelel lobengkel a Chedam me a Ngalek er sel kot el ngarbab el delmerab er sel kot el ngarbab el renged.14
Chelecha e ko medengei el rokui, el diak a mo imiu er a kodall; ma leuaisiei, e sel ngii a kemanget el moktek me a uldasu el kirel a kmo sel de lmuut el mora Demad er a Babeluades, e kede mo ngmai a rokui el Ngii a mla tuib kirel a derta er kid.15
Ak kuuchias el kmo ng diak a lmuut el ngarbab el moktek er tial klengar er a mo kiei el diak a ulebengelel lobengkel a Demad me a Delad me a Osobel, el Rubak el Jesus Kristo. Ng di tiang a diak el kuk dil moktek er kid—tiang a dirrek el moktek er Tir.Te cherrungel loubeltikelreng er kid, el mesisiich el diak el sebeched el moungil medengelii. Tir el rokir, el di oukerbai, el diak a ulebengelel lobengked. Kid a Urerir. A klebkelled a Klebkellir. E sel kot el ngaruchei, Tir a sorir a deluut el mo remei—el lmuut el mong e denguu a diak a ulebengelel el deureng el Obengterir.
Rodam me a rodos, chesel a ta el sandei, e kede mo outkeu er a Palm Sunday—el olechotel a klisichel a Kristo er a bolsiseb er a Jerusalem. E a chelsel a eru el sandei, e kede mo outkeu er a Baskua—el olechotel a Osobel er a bol mesisiich er a kodall.
Sel bo de ngai osenged el bedul Osobel er a ikal eru el tokubets el Sandei, e bo dolbedebek er Ngii e bo domekbeches a telbiled el mo oltirakl a Llechul. E bol dolech osenged er a klengar er kid, e doruul a ikel moktek er kid e ues a bodoruul el ngii a mo oltirakl er a Dios el mo ngoikid el bedul sel mekreos el techall el lmuut e ngmai—tia e a nglunguchek el ngara ngkel a Jesus Kristo, amen.