Ol Singsing we Oli Stap Singsing mo Olgeta we Oli No Singsing long Olgeta

“I gat sansaen long sol blong mi tedei” Eliza Hewitt i bin raetem, “ we i saen i moa bitim laet long skae, from Jisas i laet blong mi.”¹ Wetem glad long evri not, gudfala olfala Kristin hym ia, i no posibol blong singsing mo no smael long hem. !I no posibol nomo! Be tedei, mi wantem karemaot wan laen nomo blong hym ia we bae i save help long ol dei we yu faenem i had blong singsing, o smael, mo taem we ol taem blong pis oli no kam nomo. Sapos, blong smol taem, yu mo famli i no save singsing ol naes song ia we yu harem ol narawan oli singsing long hem, mi askem yu blong holemtaet strong long laen long hym ia we i talem, “Jisas i stap lisin, i save harem ol singsing we yu no save singsing.” ²

Long ril laef we yumi stap fesem olsem ol pikinini blong God we yumi stap laef long wan wol we i foldaon, i we, i gat sam dei we i had, sam dei taem fet mo strong paoa blong yumi i stap fesem tes. Ol jalenj ia, oli save kam from yumi slak, o narawan i slak, o from i no gat wan samting long laef, be nomata wanem risen, yumi luk se i stilim ol singsing we yumi wantem singsing long olgeta mo i putum tudak long promes ia se i gat springtaem long sol ³ blong yumi, we Eliza Hewitt i selebretem long wan ves blong hem

?Bae yumi mekem wantem long kaen taem olsem? Yumi save akseptem advaes blong Aposol Pol mo “hop from samting ia we yumi no save luk mo stap wet longtaem from.”⁴ Long ol taem ia we miusik blong fet i foldaon daon bitim paoa blong yumi save talem, maet bae yumi stanap kwaet blong smol taem mo lisin long ol narawan, yumi karem paoa long naesfala miusik raon long yumi. Plante long miusik we i gat jalenj long miusik, tras mo singsing blong yumi i kam gud moa taem yumi stanap long saed blong wan we i gat wan sua mo strong voes. Yes, taem yumi stap folem mo singsing long ol hym blong taem we i no save finis, yumi sapos blong stanap kolosap moa long Sevya, Ridima blong wol we Hem i gat stret tiun. Afta, yumi save karem strong paoa long tingting long paoa blong Hem blong harem kwaet blong yumi mo yumi tekem hop se bae Hem i toktok long bihaf blong yumi long fored blong Papa. I tru nomo se “taem Lod i stap kolosap nao, dav blong pis i singsing long hat blong mi, mo flaoa blong gladhat oli open.”⁵

Long ol dei we yumi filim se yumi no stap sing long stret tiun, i no kasem wanem we yumi ting se yumi stap luk o harem long ol narawan, bae mi askem yumi bakegen, speseli ol yut blong Jos, blong yumi tingbaot se i tru long wan tabu plan we evri voes insaed long kwaea blong God oli no semmak. I nidim fulap kaen—ol soprano, alto, tena mo bes—blong mekem ol rij miusik. Blong tekem wan toktok we mi karem long ol naes leta blong tufala gud Lata-dei Sent woman: “Evri strenj man i gat wan ples insaed long kwaea.”⁶ Taem yumi daonem yumi se yumi no spesel, o yumi traem blong fit long ol kaen tingting blong man long wol ia i neva glad, mo sosol media i sapotem, nao yumi lusum rij tiun mo bit blong miusik we God i tingting long hem taem Hem i bin krietem wan wol we i gat fulap defren kaen samting long hem.

!Nao, hemia i no minim se evriwan long kwaea i save stat blong singaot long tingting blong hem! Blong gat plante defren voes i no minim laod krangke singsing mo i nid blong gat disiplin insaed long kwaea—mo long yumi tedei, Elda Hels, bae mi talem se blong stap disaepol—be taem yumi akseptem ol tabu singsing mo ol tabu miusik we oli bin mekem bifo stat blong wol ia, nao Papa long Heven i glad blong yumi singsing long voes blong yumi, i no long voes blong narawan. Yumi no stret evriwan, be God i nidim yumi evriwan blong tekpat long tabu kwaea ia we i gat plan, mo Hem i promesem se bae Hem i help. Stap tru long yuwan, mo biliv long Hem. Yu no daonem yuwan o ting nating long help blong yu. Antap long evri samting, yu no lego pat blong yu insaed long kwaea. ?From wanem? From se yu spesel; i no gat wan i save tekem ples blong yu. Taem wan voes nomo i lus, i spolem evri narawan we oli singsing long bigfala kwaea blong yumi ol man mo woman, yumi lusum tu olgeta we oli filim se oli stap long mak o baondri blong sosaeti o blong Jos.

Be taem mi leftemap tingting blong yufala evriwan blong gat fet long saed blong ol singsing we oli had blong singing long olgeta, mi save luksave se, from samfala risen, mi traehad wetem ol narafala kaen singsing we mi sapos blong singsing be no yet.

Taem mi luk bigfala ekonomi raon long wol we i no semmak evri ples, mi filim se mi rong blong stap singsing wetem Misis Hewitt abaot ol blesing we God i givim long mi naoia, blong mi hivimap ol glad antap long heven.⁷ Kores ia, bae yumi no save singsing long hem fulwan mo stap fetful long hem sapos yumi no stap kea long ol puaman. Blong sot long mane i wan nogud tok we i stap gohed blong panisim man, yia afta yia, mo jeneresen afta jeneresen. I spolem ol bodi, i kilim ol spirit, i givim kil long famli, i prapa spolem ol drim. Sapos yumi save mekem moa blong ravemaot fasin blong stap pua, olsem we Jisas i stap ripitim long yumi blong mekem, bae sam we oli no gat tumas janis long wol bae oli save sing slo long sam laen blong “I gat Sansaen long Sol blong mi Tedei,” mo bae i fas taem long laef blong olgeta.

Mi faenem i had blong singsing ol toktok blong singsing we oli hapi taem we plante, raon long yumi, oli safa long tingting mo filing, o nara helt problem. Sore tumas, ol trabol ia oli gogohed nomata ol hadwok blong plante kaen pipol we oli kea, mo i tekem tu ol memba blong famli. Mi prea se bae yumi no letem ol pikinini ia oli safa be oli no talem, mo bae yumi kasem paoa blong Hem blong save harem ol singsing mo oli no save singsing long hem.

Mo wan dei, mi hop se wol kwaea bae oli saon naes wetem evri kala blong skin, evri lanwis oli talemaot se ol masket mo swea, vaelens mo konkon oli no rod blong stretem raorao blong ol man. Ol toktok blong heven oli kamkamaot long yumi se wan rod nomo i save stretem evri problem blong sosaeti, mo hem i blong lavem God mo blong stap obei ol komanmen blong Hem, mo hemia bae i openem doa blong wan las gud wei blong sevem yumi, we i blong lavlavem yumi olsem ol neiba. Profet Ita i bin tijim se yumi mas hop from wan wol we i gud moa. Taem hem i ridim tingting ia wan taosen yia afta, Moronae we i wari long wo mo vaelens i talem se “rod we i moa gud” blong kasem wol ia, oltaem, bae i gospel blong Jisas Kraes.⁸

Yumi talem tangkyu tumas se taem yumi stap long medel blong ol kaen jalenj olsem, wanwan taem, wan nara kaen singsing we yumi no save singsing i kam, be i from wan risen. Hemia i taem ol filing ia oli dip mo i blong yuwan, i tabu tumas, we yumi no save, mo iven yumi no sapos blong talem—semmak olsem lav we Cordelia i gat long papa blong hem, mo i tokaot olsem, “Lav blong mi, i rij moa bitim tang blong mi.  … Mi no save muvum hat blong mi i go long maot blong mi.”⁹ Ol filing ia we oli kam long yumi olsem wan tabu samting, yumi no save tokbaot—long saed blong spirit, i no gat toktok from—i olsem prea we Jisas i givim long ol pikinini blong Ol Man Nifae. Olgeta we oli bin witnesem taem ia, oli raetem:

“Ae i neva bin luk, o neva sora i bin harem, bifo, ol samting we i bigfala mo gudfala olsem we mifala i bin luk mo i bin harem Jisas i talemaot long Papa; 

“… I no gat wan tang i save talem, mo tu, i no gat eni man i save raetem, mo tu, ol hat blong ol man i no save tingbaot ol bigfala mo gudfala samting olsem we mifala i bin luk mo harem Jisas i talemaot. ”¹⁰

Ol kaen tabu taem ia, bae yumi no mas tokbaot, from sapos yumi talem, bae ol toktok we yumi yusum i no naf blong tokbaot mo bae i olsem yumi tekem i samting nating.

Ol brata mo sista. Yumi stap laef long wan wol ia we i gat fulap singsing we yumi no save o yumi stap singsing long hem yet. Be mi plis long wanwan long yufala blong stap oltaem nomo mo fetful insaed long kwaea ia, ples we bae yu save laekem blong harem oltaem hym ia we i gudfala tumas long evriwan—“singsing blong lav we i pemaot man.”¹¹ Laki, ol jea blong kam harem singsing ia, namba blong hem i no gat en. I gat rum blong olgeta we oli singgel, blong olgeta we oli mared, blong ol bigfala famli mo olgeta we oli no gat pikinini. I gat rum blong olgeta we oli bin gat kwestin long wan taem long saed blong fet mo i gat rum yet blong olgeta we oli gat kwestin. I gat rum blong olgeta we oli gat defren filing long saed blong seks. Long sot toktok, i gat ples blong evriwan we i lavem God mo i givim ona long ol komanmen blong hem olsem wan aean we i skelem fasin blong man, from we, sapos lav blong God i miusik blong singsing we yumi serem, i tru nomo, blong yumitu tugeta i stap obei long Hem, i tiun we yumi nidim blong go wetem miusik ia. Wetem olgeta samting ia we yumi mas gat, lav, fet, fasin blong sakem sin, lav mo sore, ones fasin mo fogivnes, i gat rum yet long kwaea ia blong evriwan we i wantem stap insaed long hem.¹² “Yu kam olsem we yu stap,” Papa i talem long wanwan long yumi, be Hem i ademap, “Yu no plan blong stap olsem we yu stap.” Yumi smael mo tingbaot se God i gat strong tingting blong mekem yumi kam moa bitim we yumi ting se yumi save kam.

Insaed long longfala singsing ia we i plan blong Hem blong yumi kam olsem wan god, bae yumi putum tingting i stap daon mo folem stik blong Hem mo gohed blong wok long ol singsing ia we yumi no save o no stap singsing long olgeta yet, kasem taem we yumi save “singsing ol pres long King blong yumi.”¹³ Nao wan dei, olsem tabu hym i stap talem:

Mi testifae we dei ia bae i kam yet, we bae God Papa blong yumi we I No Save Finis, i sendem bakegen Wan Stret Pikinini Ia Nomo blong Hem, be long tetaem ia blong Hem i rul mo stap olsem King blong ol king blong oltaem. Mi testifae se hemia i Jos blong Hem we Hem i putumbak mo i rod ia blong tekem ol tijing mo ol odinens blong gospel blong Hem we i sevem evri kaen man. Taem mesej blong Hem “i go kasem evri graon mo i visitim evri kantri¹⁵ bae Jisas i soem fes blong Hem we i smael.” ¹⁶ Bae i gat plante sansaen we i no save finis long sol. Blong promes aoa ia i kam, bae mi prea oltaem from, long nem blong Jisas Kraes, amen.