Ekkewe Kon Sia Konu me Ekkewe Sise Konu

“Mi wor saram non nguni ikenai,” Eliza Hewitt a makei, “a ning me saram nap seni saram meinisin fan nang, pun Jises I ai saram.”¹ Mi wor pwapwa non ewe konun chon nuku non Kraist mi nom, sia chok emenimen nupwen sia konu. Nge ikenai ua mochen kapas usun eu wokisin non ewe kon minne epwe tongeni anisikich non ekkewe ran sise mochen kon are emenimen me “ekkewe fansoun mi apwapwa” rese “fisita.” Ika fan ew kose tongeni fiti ekkewe chon konu kon mi pwapwa, ua tungor kopwe chechemeni ewe wokisin non ei kon mi apochokuna ngenikich pwe “Jises a rongorong ekkewe kon [kose] tongeni konu.” ²

Pokiten kich noun Kot me sia manau won ei fonufan mi tur mi wor ekkoch ran mi weires, ekkei ran mi sotuni ach nuku me pochokun. Ekkei sosot mi tongeni feito seni ach nipwakingau, an ekoch nipwakingau, are nipwakingauen manau, nge ese nifinifin ewe popun, ra tongeni sonani ach tufichin konu ekkewe kon sia mochen konu me ra tongeni orochano ewe “fansoun pwapwa non ngunuch” ³ minne Eliza Hewitt a pwapwaiti non eu wokisin non an kon.

Iwe met sipwe fori non ekkei fansoun? Eu mettoch, sipwe etiwa ewe kapsen pesepes an ewe Apostel Paul me “epinukunuk ren [minne] sise kuna… [iwe] sipwe asuku ren engino.” ⁴ Nupwen ewe konun pwapwa a kukunitiw tori sise chuwen tongeni konu, naman mi namwot sipwe witiwit non mosonoson ren och fansoun me ausening ngeni ekkoch, sipwe angei pochokun seni ekkewe kon unukuch. Chommong meneich ekkewe mi “nipakingau ne kon” sia angei aninis me a anapano ach tufichin kon nupwen sia mommot ren emon a nipwakoch ne kon. Iwe ren ach konu ekkewe kon usun mettochun ngun, sipwe mommot arapakan ngeni ewe Chon Amanau me Chon Angasenon fonufan—ewe a wesen angoch ne kon. Iwe sipwe angei aninis seni an tufich ne rongornong met sise tongeni apasa me angei apinukunuk seni An konun achesefan fanitach. Ennet “nupwen ewe Samon a karap” iwe “ewe machangen kinamwe a kon non netipei me ekkewe puniran chen mi pwa.” ⁵

Won ekkewe ran nupwen sia mefi pwe ach kon ese ningoch, a kukkun seni met sia kuna me rong seni ekkoch, upwe tungor ngenikich, napengeni ekkewe serafo non ewe Mwichefen, ach sipwe chechemeni pwe Kot ese mochen pwe ekkewe chon kon non an Kot mwichen kon repwe nono chok. Mi namwot epwe wor sokopatin ngingi—ngita me ngitiw—pwe ewe kon epwe ningoch. Upwe aporausa och kapas seni ruemon fefin chon ewe Mwichefen, “Mi wor nenian Noun Kot meinisin non An Mwichen Kon.”⁶ Nupwen sise aucheani ach sokofesin me achocho ne fiti ekiekin aramas mi mwan—ekiek mi feito seni an aramas mochenia me mi pwa won facebook—ningen ewe kon minne Kot a mochen nupwen a fori masowen fonufan mi sokopat a ngaueno

. Esapw wewen pwe chon ewe mwichen kon mi chok tongeni pwisin poputa ar repwe puchor nupwen chok ra mochen! Ach sokofesin esap efisata mettoch mi akurong, me mi namwot chon kon repwe kaeo—ren ach afanafan ikenai upwe aea ewe kapas chon kaeo—nge nupwen sia etiwa ekkewe kapasen ewe kon seni nang me etikin ewe kon mi for me mwen ewe fonufan a for, Semach won Nang a mochen rong ach kon non pwisin ngingich, esap ngingin emon. Nuku non pwisin ami, me nuku non I. Ousap nikitano aucheami me met oua tongeni fori. Nap seni meinisin, ousap nikitano neniemi non ewe mwichen kon. Pwata? Poketeni ami mi sokopat me ese wor emon a tongeni fori wisemi. Ika emon ese chuwen fiti ewe kon, a osukosuka ekkewe ekkoch chon kon, ina mwo ika ra mefi pwe ir chon ekkis non muun aramas are non ewe Mwichefen.

Nge nupwen ua pesengeni meinisin ami oupwe nuku ren ekkewe kon epwe weires ne konu, ua pwan esina pwe mi pwan wor och popun I osukosuk ren pwan ekkoch kon ita upwe konu—nge use mwo konu.

Nupwen ua kuna watten sokofessin moni non ewe fonufan, ua sau ren ai upwe fiti Mrs. Hewitt ne kon usun “ekkewe feioch minne [Kot] a niffang ngeni ei iei, [me] ekkewe pwapwa mi monetaasan.” ⁷ Sise tongeni ennetin nukuchar ren ach konu ekkei kapas tori sia anisi ekkewe mi osupwang. Osukosuken moni mi eu mettoch a sopweno ne efeingaua aramas, iteiten ier me tapin aramas. A efeingaua inis, ngun, famini, me atai an aramas mochen. Ika sia tongeni anapano ach achocho ne anisi ekkewe mi osupwang, usun met Jises a urenikich ach sipwe fori, naman ekkoch ekkewe mi osupwang non fonufan repwe tongeni keran ekkis konu ewe kon “Mi Wor Saram non Nguni Ikenai.” Ach nuku pwe epwe keran aewin non manawer.

Ua pwan mefi pwe a weires upwe konu ekkewe kapas mi apwapwa nupwen chommong mi nom unukuch mi osukosuk ren semwinin ekiek me pwan inis. Sonapen, ekkei osukosuk mi chok nonnom inamwo pwe chommong aramas mi ennetin achocho ne anisir. Ua iotek pwe sisap mut ngeni ekkei noun Kot repwe riaffou non mosonoson me pwe sipwe angei An tufichin rongorong ekkewe kon rese tongeni konu iei.

Me non ekoch ran ua apinukunuk pwe chon fonufan mienisin repwe chufengen ne konfengen ren sokopatin aramas, repwe konu pwe pistor, kapasen esit, me kapasen oput esap ina usun sipwe awesano osukosuken aramas. Ekkewe kapas seni nang mi kechiw ngenikich pwe sia chok tongeni awesano osukosuken fonufan ren ach tongei Kot me aponueta An kewe annuk, me tongeni suki ewe asam ngeni ewe, an ach sipwe tongei monun unukuch. Ewe soufos Ether a aitikich ach sipwe “apinukunuku ew fonufan mi murino.” Ach anneani ekkei kapas eungoru ier mwirin, Moronai nupwen a pekus ren maun me fiu a apasa pwe ewe “aan mi kon echipwer” ngeni ena fonufan epwe ewe kapas alliminen Jises Kraist. ⁸

Sia ennetin kinisou pwe non ekkei sokun osukosuk, fan ekkoch, mi wor eu kon mi sokono minne sise tongeni konu, nge ren pwan och popun. Iei nupwen ekkewe memmef me kon mi anonnon me auchea me pin ngenikich, iwe sise tongeni awewei—usun an Cordelia tong fan iten seman, minne a apasa, “ Ai tong . … a watte seni ai upwe apasa . …Use tongeni ai upwe awewei mefien netipei.”⁹ A feito ngeni kich usun eu mettoch mi pin, sise tongeni awewei ekkei memmef—a watte ar manaman—usun chok ewe iotek minne Jises a ioteki fan iten noun ekkewe chon Nifai. Ekkewe mi kuna met a fis mi makkei,”

“Ewe mas esamo kukuna, ewe pwan sening esamo rongorong, … fokkun auchea me amwarar ekkewe mettoch usun am aua kuna me rongorong an Jises kapas ngeni ewe Sam; 

… ese wor channaw a tongeni apasa, rese pwan tongeni makketiw me ren emon aramas, are netipen aramas rese pwan tongeni ekiekieta ekkei auchean me amwararen mettoch usun am aua kuna me rongorong Jises a apasa.”¹⁰

Sise kapas usun ekkei sokkun fansoun pokiten sisap tongeni awewei, me ika sia tongeni esap naf.

Pwi me fefinei, sia nomw non eu fonufan mi uren kon sise tongeni konu are sise mo konu. Nge ua tingoreikich meinisin ach sipwe nomotam me nukuchar non ewe mwichen kon, ian sipwe tufichin aucheani ewe kon mi auchea nap seni meinisin—“ewe konun tongen amanau.”¹¹ Sia feioch pwe, aramas meinisin mi tongeni aea ewe Achesefan. Mi wor nenian ekkewe mi sinei kapasen sokopatin fonu, mi pwapwaiti erenien sokopatin neni, me mi nom non chommong fonu. Mi wor nenien ekkewe mi nipich, ekkewe mi pupunu, chon famini mi watte, me ekkewe ese wor nour. Mi wor nenin ekkewe mi wor ar kapas eis usun ar nuku me nom me ekkewe mi wor ar kapas eis iei. Mi wor nenien ekkewe mi osukosuk ren ar sani at ika nengin. Iwe, mi wor nenien aramas meinisin mi tongei Kot me aponueta An kewe annuk pwe usun sia nuku an aramas pwisin foffor, pun ika ewe tongen Kot mi nom non ach kon fengen, ennet ach achocho ne anneasochisi I mi pwan nom non ewe kon. Ren ekkewe annukun tong me nuku, aier me tong ennet, wenechar me omusomus, mi wor nenien aramas meinisin mi mochen nom non ei mwichen kon. ¹² “Oupwe chok feito ese nifinifin napanapemi,” Semach minne a tongeikich a apasa ngenikich, nge A pwan apasa, “Ousap ekieki pwe ousap pwan siwini napanamemi.” Sia emenimen me chechemeni pwe Kot a mochen siwinikich ach sipwe winiti met sise ekieki pwe sia tongeni winiti.

Non ei kon mi amwarar, An kokkotun ach manau ese much, amo ita sipwe tapweno mwirin An emwen me sopweno ne achocho ne konu ekkewe kon sise tongeni konu, tori sia pwan tongeni konu ekkewe “kon ngeni [ach] King.”¹³ Iwe fan eu ran, usun ewe kon a apasa:

Ua pwarata pwe ena aua epwe feito, pwe Kot Semach Ese Much epwe tinatiw Noun we Anemon ngeni fonufan, pwe epwe nemeni pwe I ewe Kingen King meinisin fenfeino. Ua pwarata pwe iei An Mwichefen mi niwinsefan me a wisen awora ekkewe afafan me angang mi pin an An kapas allim ngeni aramas meinisin. Nupwen An kapas allim a tori fonu meinisin me chuk meinisin, ¹⁵ Jises epwe “emeninem ngenikich,”¹⁶ me epwe ennetin wor saram non ngunuch non ena ran. Ua iotek pwe iei aua mi pwon epwe feito, fan iten Jises Kraist, amen.