Chelitakl el mla Mechitakl ma Dirkak

“Ng kmal ungil a renguk er a chelechal sils,”, a Eliza E. Hewitt a miluches, “el kmal klebokel e mellomes er a ngidil mekerkard er a yanged, ele Jesus a llemesek.”¹ Ngungil ongak er tial klebokel cheliteklir a rekristiano e meringel er kid a dongitakl er ngii e lak doltelechel. E ng di chelechal sils eng soak el mengedecheduch e ouchais er a kmal di imol bades er tial chelitakl el ngii a sebechel ngosukid sel bol meringel er kid el mengitakl malechube doutelechel ngii me sel “ungil taem a diak el “ dubech.” Alsekum meng ngar ngii a taem el kau a diak el sebechem el mengitakl a ikal ungil tekoi el omrenges er a rebebil, e ak kulengit me mungil sidecheklii ra rengum tial bades er tial cheltiakl el mengloi a rengud, “A Jesus a sbechel remenges aikel chelitakl el [kau] a diak el sebechem el mengitakl.”²

Uldimukl er a tekoi er a klechad el dechelbangel el ngelekel a Dios el kiei er tial lurrebet el beluulechad ea le bebil er a sils eng kmal meringel, ikel sils el klaumerang er kid ma blekenged al skeng. Aikal olasem a mei e leng ngelsengesed, ngelsngesir a rebebil, malechub eng ngelsngesel a klengar, e ng di ngii di el ngeral uchul, e kede metik el kmo a ika sebechel tomer a deureng me a omereng el saul e rulid el mo oumerang el kmo ngdiak el sebeched el mo re ngii a “deureng er [a] klengar er kid”³ el Eliza Hewitt a ouchais er a tara bades er a cheliteklel.

Me ke de mekerang er sel uasei el taem? Kot el teletael, e ke de kongei er sel osisecheklel a Paulus e “oureng er [sel] ngii a diak desang …[e] oba kllou el reng el mengiil er ngii.”⁴ Chelsel a ikel taem el klaumerang er kid a merael mo mechitechut el kid a diak dodengei, eng locha kired el mo di lemuk e orrenges er a rebebil, e mela klisiich er a ungil chelitakl el meliuekl er kid. Betok er ekid a “diak dechad er a chelitakl” a mo meduch sel bai doureor lobengterir tirkel mesisiich e ungil a chiklir. Di osisiu ngii me sel moruul a chedaol tekoi, eng sebeched el dechor el kmeed, el mora Osobel el ngii a Osebelel a beluulechad— el cherrungel a delcherul a cheliteklel. Seikid eng sebeched el smisichii a rengud er a Ngerchelel el medengei aikel dousbech el ngii a medechel ra chelsel a rengud e le borngii a urunguled el kmo Ngii a mo ngosukid el kirel a osebeled. Meng kmal merang “sel de keed er a Rubak” e a “ kumelechesiu er a budech el ngara renguk [me a] ungil klengeltengat er a krasia a mei.”⁵

A ikel sils el domelchesuar er kid el diak lungil a chikled, el diak el uaikel domes ma dorenges el ngara rebebil, eak kulengit er kid, tokubets el ngeasek er a Ikelesia, me bo modengei el kmo sel chedaol el teletael ea remengitakl a diak el di losisiu el rokui. Ng kirel ngar ngii a bekbedengel—soprano me a alto, baritone me a bass—el rulii a ungil chelitakl. Ak kusbech er sel tekoi el mla ra a ikel tengami er a teru el ungil redil er a Uriur-klebesei el Santo: “A rokui el chedal a Dios a ngar ngii a ulsbechellir er a rechad er a chelitakl.”⁶ Sel dongitechut a teleteled malechub e kede melasm el mo teloi er a teloched el uldasu lomii er a rechad —bingel a rechad el mokdubech er a buai e mengai el me mereked lokiu a social media—e ngii a mocha remiid sel lungil deleuill el Dios a rirelii er sera le bebebii a beluulechad el ngar ngii a bekbedengel a rechad.

Chelecha, e tia diak luchul el kmo rokui el chad a sebechir el ngiidi longitak! A bek bedengir a rechad a diak el belkul a kmo rokui el chad a meruul aikel sorir e ng di a rechad er a chelitakl a kirir mesuub—el kirel chelechal sils. A Elder Hales, a kmong mesiungel—e ng di sel tal dekengei lousbech a chedaol mla mocholt el bades er a me a tabesul ongak el mle kedmokl ruchei er a beluulechad, ea Demad er a Babeluadess a oldeu a rengul sel kid a meruul aikel tekoi loba iukl el dobang, e diak el ta er a chad. Moumerang er kau, e moumerang er a Rubak. Lak momdasu el kmo ng diak a belkum malechub eng diak a ngeral omrelii. Sel kot el klou a ututelel, la kom chitii tial ngerchelem er a chelitakl. Ele ngerang? E le kau a ngodech ra tang, meng diak a mo mtechau. Sel riid a di tal ngor eng mo diak lungil tirkel bebil er a rechad er a chelitakl er tial klou el cherrengelel a remengitakl er tial klengar, luldimukl er tirkel mla mo cheroid ele te omdasu el kmo a bouai a diak el kengei er tir malechub eng Ikelesia.

E ng di sel ngak oldubech er ngii er kemiu el rokui a mo ngar ngii a klaumerang er kau er a ikel ngerachel locha meringel er kau a meruul, ak melekoi el lokiu a kekesous el luchul ngak a dirrek el meringel er ngak a bebil er a ngerachelek —el kirek mla meruul —eng di ng dirkak.

Sel kumes a klekakerous er a economy er tial beluulechad, e ak kora mekngit a renguk el mengitakl lobengkel a Eliza Hewiit “klengeltengat el [Dios] a meskak er a chelechang, ma [deureng] el kldmokl er bab.”⁷ Tial chelitakl a diak el sebechel mui er a deureng di merko bo domekerreu er a remechebuul. Sel lak a ududem a ongesang el di melemolm, rak me a rak ma telcheroll er a uriur er a telcheroll. Ng tomelii a bedengem, reng, telungalek, ma aikel soam el mo meruul er a tara klebesei. Alsekum eng ngar ngii a lmuut el sebeched el meruul lolngeseu er a remechebuul, el uai a Jesus el blechoel mellach er kid el mo meruul, eng locha tirkel mechebuul er a beluulechad a sebechir lomelechesii er a telkib el “Deureng e ungil a rengrir,” el locha kot el taem el le dubech er a klengar er tir.

Ng dirrek el meringel er ngak a ungil a renguk e mui ra omereng el saul sel le betok el meliuekl er kid a chemau a secher er a uldasu ma reng, malechub eng bebil er a secher. Meng mekngit a rengud, aikal berraod a le bebil er a taem eng di ngar ngii ngii mesel lesal blak a rengrir a rubetiterir, uldimukl a rechad er a blirir. Ak meluluuch melak de bechititerir tirkal ngelekel a Dios el dilmuk el ngara ringel—e kid a mo nguu sel klisiik el mla er Ngii el mo orrenges aikel cheltiakl el diak el sebecherir el mengitakl.

Ea tara klebesei eak oureng el kmo a rechad el meliuekl er a beluulechad a mo sebecherir el dmak loureor el diak el iior a kmo techad er ker, louchais el kmo a bois ma delboes el tekoi, ma mekngit el tekoi a diak el teletelel a do mesemechokl a kle kakerous. Me sel omelkingel a babeluades a ouchais er kid el kmo a di chimol rael el meringel el tekoi er a bouai a sebechel mo ungil mesmechokl sel de betik a rengud er a Dios e oltirakl a llechul, el rulii sel klisiich el mo oubeltik el reng el mo er tang el uai a de tonari. A profet Ether a ulisechakl el kmo kid a kired loureng er a ungil beluulechad. Mesel kunguiu er tial luldasu el mla chemoit a telael el rak er a mla memong, ea Moroni a mlo mesaul a rengul el kirel a mekemad e uluchais el kmo sel kot lungil teletael el mo er a beluulechad a blechoel el ebangkelio er a Jesus Kristo.⁸

Ng meral lungil a renguk e le chelsel a ikal ringel, eng ngar ngii a chelitakl el diak sebeched el choiteklii, eleng ngar ngii a kakerous el luchul. Tiang sel reng a kmal dmolech, e chedaol, meng diak el sebechel mo chemolt—di uai sel beltkil a rengul a Cordelia el mo er a demal, meng dilu: “A beltkil a renguk … a dmolech meng diak el sebechek louchais er ngii. … E ngdi alsekum kede melatk er a diak desang el tekoi, eng mo klou a rengud el mengiil.”⁹ A dengai el chedaol, a diak el sebeched el kmung—ma reng a diak el sebechel melekoi—el di uai sel nglunguuch el Jesus a millekoi el mo er tirkel rengelkir a re Nephite. Tirkel mle sioning er tiang a milluches:

Ng dirkak lemoes er a mad, me a lechub e bla lemorrenges er a dingal a chad, …leng kmal mle meklou el mengasireng el tekoi a kimules e rirenges er a Jesus el melekoi el mo er a Edam; 

“… ngdiak a ngor el sebechel dmung, me a lechub el sesbechel meluches er a ngii dilechad, me a lechub el sebechel a rengrir a rechad el lotekau e kmal meklou el mengasireng el tekoi el kimules e rirenges er a Jesus el melekoi.”¹⁰

Aikaikid el chedaol taem a melemolm el diak el sebeched el louchais, malta alsekum eng sebeched, eng di diak el sal lungil.

Rodam ma rodos, kid a kiei er tial beluulechad el ngar ngii a betok el chelitak el diak el sebeched, malechbu eng dirrekak, bo dodengei. Engdi a kulengit ma ta ma ta er kid lolemolm lobengterir a rechad er a Ikelesia e bol klou a belkul a ngerel sel kot el meringel el chad er a rokui el chelitakl el ngii a—cheliteklel a betik el reng er a Osobel.”¹¹ Meng ungil el rokui el chad a sebechir el mo ousbech er a Tngakireng. Ngar ngii basio el mo er tirkel mengedecheduch a kakerous el tekoi, outkeu a kakerous el siukang, e kiei er a kakerous el beluu. Ngar ngii a basio el mo er tirkel mesobil, bechiil, klou el telungalek, ma diak a rengelkir. Ngar ngii a basio el mo er tirkel mle tal ngar ngii a kerrir el kirel a klaumerang er tir e dirrekl el ngar ngii a basio el mo er tirkel dirk ngar ngii a kerrir el kirel a klaumerang er tir. Ngar ngii a basio el mo er tirkel kakerous a sexual attractions er tir. Mesel kungedeb er ngii, e ngar ngii a basio el mo er a rokui el betik a rengrir er a Dios e mo menguul aikel Llechul el ngii a klou a belkul el kirel a teletelir a rechad, ele alsekum a beltkil a rengul a Dios a uchul tial chelitakl, e sel soad el mo meruul er ngii a mo oltirakl er Ngii e mo kaingeseu. Loba chedaol llach er a beltik el reng ma klaumerang, ouchel el reng ma klechubechub, me a klausubes, e ngar ngii a basio er tial chad er a chelitakl el mo er tirkel sorir el ngar ngii.¹² “Mei el di uaisei,” a betik a rengul Chedam a melekoi el merkid el rokui, e Kmul uasei, “Lak momdasu el kmo ngdiak bom ngodech.” Kid a oltelechl e medengei el kmo a Dios a soal meruul er kid el mo er a bkul rebab el sebeched.

Chelsel tial lungil chelitakl e a Moktel el kirel a diak ulebengellel klengar er kid, eak oureng mel ngariou a rengud loltirakl er Ngii e dolemolem loureor aikel tekoi el ngii a diak el sebeched el meruul, el morsel taem el kid a sesbeched locholt aikel “chelitakl el mo er a King er [kid].”¹³ Ea tara klebesei, el uai sel tara soad el chelitakl:

Ak ouchais el kmo sel sils a mei, el Dios el Diak a Ulebengelel Chedam a lemuut lodureklii a ngkel Di Chimol Ngelekel, el mo merredel el King er a re King el mo er medad. Ak ouchais el kmo tiang oltel a Ikelesia er Ngii e tiang sel mo ouchais el kirel a osisecheklel ma ruoll er a olsobel er a ebangkelio er Ngii el mo er a rokui el chad. Mesel teking a mlo er a bek el beluu,”¹⁵ A Jesus a meral mo [olecholt] er a medal ungil a rengul.”¹⁶ E meral mo ngar ngii a diak a ulebengelel dichel a sils el mo er a rechad er sel sils. Meng tial yaksok el sils el kululuuch, loba ngkel a Jesus Kristo, amen.