Stanap Insaed mo Stap Fulwan Insaed

Sam yia i pas, yang apu pikinini gel blong mitufala i ron i kam long mi mo talem wetem glad, “!Bubuman, Bubuman, mi skorem evri trifala poen long futbol gem blong mi tedei!”

Wetem glad mi ansa, “!Hemia i naes tumas, Sera!”

Mama blong hem i luk long mi wetem smael long ae blong hem mo talem, “Sko i bin tu wan.”

!Mi nomo wantem askem se huia i bin win!

Konfrens i wan taem blong tingtingbak, kasem revelesen mo samtaem daereksen.

I gat wan kampani blong rentem trak wetem wan GPS (wan sistem blong faenemaot o soemaot ples we yu stap long hem raon long wol) sistem we oli singaotem Neva Lus. Sapos yu go long wan rong rod afta yu putum ples we yu wantem go long hem, voes blong gaed bae i no talem, “!Yu krangke!” be wetem wan naes voes, bae talem, “Jenisim rod blong yu—sapos i posibol tanemraon.”

Long Esikel yumi ridim naesfala promes ia:

“Be sapos wan man nogud i tanem tinting blong hem nao i no moa mekem sin, mo i holem ol loa blong mi mo i mekem ol samting we i stret mo i gud, bambae hem i no save ded, i save stap gud.”

“Bambae mi fogivim hem, mi tekemaot ol sin blong hem, mo mi no moa save tingbaot olgeta bakegen. …”¹

Hemia wan naesfala promes, be i nidim tu “ful” aksen blong kasem nambatri promes. Tanemraon long evri samting, kipim evri samting; afta bae yu kasem fogivnes long evrisamting. Hemia i askem blong “stap fulwan insaed”

Yumi no mas kam olsem man we Wol Strit Niuspepa, i ripotem we i sendem wan envelop we i fulap long mane, wetem wan leta we i no gat nem long hem i go long Internal Revenue Service (dipatmen blong kolektem takis blong gavman blong YS)we i talem, “Dia IRS plis faenem hemia kaon blong mane blong ol takis blong mi blong bifo. Not: Sapos afta long hemia tingting blong mi i no kwaet, bae mi sendem haf we i stap.”²

!Yumi no mekem olsem ia! Yumi no wet blong luk se i go daon kasem mak we yumi save ronwe long hem. Lod i nidim wan hat mo wan maen we i wantem mekem samting.³ !Ful hat blong yumi! Taem yumi baptaes, yumi draon fulwan olsem wan saen blong yumi promes blong folem Sevya fulwan be i no hafhaf. Taem yumi komitim yumi fulwan mo “stap fulwan insaed”, yumi kasem blesing i kam long heven.⁴ Taem yumi wom o komitim yumi hafhaf, yumi lusum sam long ol bigfala blesing blong God.⁵

Plante yia i pas, mi bin karem ol Skaot i go kamp aot long draeples. Ol boe oli slip kolosap long wan bigfala faea we oli mekem, mo olsem evri gudfala lida blong Skaot, mi silip long kat blong trak blong mi. Long moning taem mi sidaon mo lukluk i go long ples blong kamp, mi luk wan Skaot we bae mi singaotem Pol, we i luk olsem hem i no slip gud. Mi askem olsem wanem hem i bin slip mo hem i ansa, “I no gud tumas.”

Taem mi askem hem from wanem, hem i talem, “Mi kolkol; faea i bin ded.”

Mi ansa, “Ok, ol faea olsem ia nao. ?Bag blong silip blong yu i no hot inaf?”

I nogat ansa.

Mo afta wan long nara Skaot i talem wetem wan laod voes, “Hem i no yusum bag blong slip blong hem.”

Mi askem wetem sapraes, “?From wanem, Pol?”

Nogat ansa—afta i ansa wetem sem: “ Ok, Mi ting se sapos mi no stretem bag blong silip blong mi, bae mi no nid blong foldem bakegen.”

Tru stori: Hemi kolkol blong plante aoa from hem i no wantem mekem wan wok we bae i tekem hem faef minit nomo blong mekem. Yumi save tingting: !Krangke stret! ?Huia bae mekem olsem? Be, yumi mekem olsem evri taem long ol fasin we i gat moa denja. Yumi, long en, yumi no wantem blong stretem bag blong silip blong spirit blong yumi taem yumi no tekem taem blong prea wetem tru hat, stadi mo folem gud gospel evri dei; bae faea bae i no ded nomo, be bae yumi nogat proteksen mo kam kolkol long saed blong spirit.

Taem yumi no wari long ol kavenan blong yumi, yumi kam responsibol long ol risal we bae i kam. Lod i kaonselem yumi “blong yufala i lukaot gud long saed blong yufala, blong yufala i mas wok strong wetem strong tingting blong folem ol toktok blong laef we i no save finis.”⁶ Mo Hemi talem moa, “blad blong mi bae i no save klinim olgeta sapos oli no lisin long mi.” ⁷

Long laef, i isi moa blong “stap insaed evriwan” bitim blong stap hafhaf insaed. Taem yumi stap hafhaf insaed o yumi no insaed nating, long lanwis blong muvi blong Sta Wo, “i gat samting we i stopem paoa.” Yumi no folem tingting blong God mekem se yumi no stap long sem laen wetem fasin blong glad.⁸ Aesea i talem:

“Be ol man we fasin blong olgeta i nogud, oli olsem solwota nomo we i no save stap kwaet, oltaem i kam stap brok long sanbij mo i stap karem ol doti mo ol rabis i kam.

“Ol man nogud oli no save kasem gudfala laef. Mi mi hae God, mo hemia tok blong mi.” ⁹

Laki se, nomata long weaples yumi stap long hem o wea yumi bin stap long hem, yumi no stap longwe nating long help blong Sevya we i talem: “Taswe, eni man we i sakem sin mo kam long mi olsem wan smol pikinini, hem bae mi akseptem hem, from olgeta ia i gat raet long kingdom blong God. Luk, from olgeta olsem, mi bin givim laef blong mo bin tekem bakegen.”¹⁰

Taem yumi gohed blong sakem sin mo dipen long Lod, yumi kasem paoa taem yumi kambak blong kasem tingting we i stap daon mo fet olsem blong wan smol pikinini,¹¹ we i rij wetem waes tingting we i kam long wan laef we i fulap long ol eksperiens. Job i talem, “Olgeta oli wantem tumas blong ol narafala man oli stap tinghae long olgeta, nao oltaem oli stap bilif strong moa se tok ya blong olgeta i stret.”¹² Tenison nao i raetem, “Paoa blong mi i olsem hemia blong ten man from hat blong mi i klin gud.”¹³ Lod i bin talem, “Stanap long ol tabu ples, mo no muv.”¹⁴

Boe blong mitufala, Jastin i bin ded taem hem i gat naentin yia afta we hem i bin sik longtaem. Long wan sakramen miting toktok we hem i givim bifo hem i ded, hem i serem wan stori we hem i bin stap tingbaot abaot wan papa mo boe blong hem we tufala i go long wan stoa blong pleplei we i gat wan bag we oli stap faetem we oli blu long hem mo hem i stap long sep blong man. Boe ia i faetem plastik man ia i go daon mo kwik taem nomo man ia i stanap bakegen afta long evri taem we hem i faetem. Papa i askem boe blong hem from wanem plastik man ia i stap kambak antap. Boe ia tingting blong smol taem mo afta i talem, “Mi no save. Mi ting se from hem i stap stanap insaed.” Blong yumi stap “insaed evriwan” yumi nidim blong “stanap insaed,” nomata wanem yumi save fesem.¹⁵

Yumi stanap insaed taem yumi wet long Lod blong karemaot o givim yumi paoa blong fesem ol rop nil we oli stikim bodi.¹⁶ Ol rop nil ia i save ol sik, disabiliti, sik blong tingting, ded blong wan we yumi lavem mo plante nara moa trabol.

Yumi stanap insaed taem yumi leftemap ol han we i slak. Yumi stanap insaed taem yumi difendem trutok agensem ol rabis tijing blong wan wol we i kam blong no laekem laet, i tekem ivel i gud mo gud hem i ivel¹⁷ mo “oli jajem olgeta we oli stret from stret fasin blong olgeta.” ¹⁸

Blong stanap insaed long medel blong ol hadtaem i posibol from paoa mo kamfot we i kam long Tabu Spirit mo from wan lukluk we i go bitim wanem we wol i save andastanem.¹⁹ Long laef bifo laef ia, yumi singaot wetem glad long janis blong kasem eksperiens long wol ia.²⁰ Yu evriwan i bin “stap insaed evriwan” olsem we yumi bin mekem joes ia blong stap olsem ol tru man blong difendem plan blong Papa blong yumi. !Hem i taem blong stanap mo difendem plan blong Hem bakegen!

I no longtaem i pas, papa blong mi we i gat naentiseven yia i bin ded. Eni taem wan man i askem se hem i olsem wanem, evri taem ansa i, “long skel blong wan kasem ten, !Mi kolosap long twantefaef!” Iven taem dia man ia i nomo save stanap o sidaon mo gat ol bigfala hadtaem blong toktok, ansa blong hem stap semmak. Hem i oltaem stanap insaed.

Taem we papa blong mi i bin gat naenti yia, mitufala i stap long eapot mo mi bin askem hem sapos i nid blong mi karem wan wiljea blong hem. Hem i talem, “No Gari—ating sapos taem mi olfala.” Afta hem i talem, “be, sapos mi taed blong wokbaot, bae mi save ron.” Sapos yumi no save “stap insaed evriwan” long wei we yumitu stap wokbaot naoia, ating bae yumitu mas ron; ating bae yumitu nid blong jenisim rod blong yumitu. Bae yumi nid tu blong tanemraon fulwan. Bae yumi nid blong stadi wetem tru tingting, prea wetem wan tru hat, o lego sam samting blong mekem se yumi hang long ol samting we oli moa impoten. Yumi nid blong lego samting blong wol blong mekem se yumi save hang long taem we i no save finis. Papa blong mi i andastanem hemia.

Pikja

Papa blong Elda Sabin long ami

Taem hem i stap long ami long Wol Wo Tu, i gat sam man long wan bigfala haos we i gat fulap spes²¹ we oli stap mekem fani long ol prinsipol blong hem; tu long ol man we oli wok wetem hem long sip, Del Madoks mo Don Devidson, tufala i luksave mo no mekem semmak. Tufala i askem, “Sabin, ?from wanem nao yu defren tumas long ol naraman? Yu gat ol standet we oli hae, yu no dring, smok o swea be yu stap kwaet mo hapi nomo.”

Gudfala tingting blong tufala long papa blong mi i no semmak long wanem tufala i harem abaot ol Momon, mo papa blong mi i bin save tijim mo baptaesem tufala man we i wok wetem hem long sip ia. Papa mo mama blong Del oli harem nogud tumas mo oli wonem hem se sapos hem i joenem Jos bae hem i lusum swit hat blong hem Meri Olif, be hem tu i bin mitim ol misinari mo i bin kasem baptaes tu.

Kolosap long taem we wo bae i finis, Presiden Hiba J. Gran i bin singaotem ol misinari, mo oli tekem tu ol man we oli mared. Del mo waef blong hem, Meri Olif, i bin agri se Del i bae i go long misin nomata we kolosap fas pikinini blong tufala bae i bon. Tufala i bin gat naen pikinini, tri boe mo sikis gel. Evriwan i bin go long misin, folem wetem Del mo Meri Olif we tufala i bin go long tri misin tufala nomo. Plante long ol apu oli bin givim seves. Tu boe blong tufala, Jon mo Matiu Madoks naoia oli memba blong Tabenakol Kwaea, semmak olsem palika blong Matiu, Raeyan. Madoks famli naoia oli 144 evriwan mo oli ol naesfala eksampol blong “stap fulwan insaed”

Pikja

Ol famli memba blong Madoks long Tabenakol Kwaea

Taem mi stap lukluk long pepa blong papa blong mi, mifala i faenem wan leta blong Jenifa Rijads, wan long ol faevfala gel blong Don Devidson. Hem i raetem: “Stret mo gud fasin blong yu i bin jenisim laef blong mifala. I had blong andastanem se bae laef blong mifala i olsem wanem sapos i nogat Jos. Papa blong mi i lavem gospel mo traem blong laef folem kasem taem hem i ded.”²²

Yumi no save skelem hamas gud samting wanwan i mekem long narawan taem hem i stanap insaed. Papa blong mi mo tufala man blong sip i no wantem blong lisin long ol man long haos ia we i gat bigfala spes we oli stap poenem fingga blong jik.²³ Oli save se i moa gud blong folem Krieta bitim bigfala grup blong ol man.

Aposol Pol i bin stap tokbaot dei blong yumi taem hem i talem long Timoti se “i gat sam man we oli lego finis ol stret fasin ya, nao oli lusum rod blong olgeta finis long ol krangke toktok nomo”.²⁴ I gat plante krangke toktok we i stap gohed long wol tedei. Hem i storian blong olgeta long bigfala haos ia we i gat bigfala spes long hem.²⁵ Plante taem i olsem wan wei blong gowe long gospel blong givim eskius long nogud fasin, o i kamaot olsem taem ol pipol oli lusum rod mo oli hariap i go. Samtaem i kam long olgeta we oli no bin pem praes blong “kam insaed evriwan” mo oli laekem blong folem man blong wol bitim blong folem profet.

Yumi glad we yumi save se bae i en olsem wanem blong olgeta we oli fetful. Taem yumi “stap insaed evriwan,” yumi gat evri sua tingting insaed long yumi se “God i stap wok long olgeta samting we oli stap kam tru long laef blong yumi, blong mekem i gud long yumi ia we yumi lavem hem .”²⁶  Olsem we Elda Nil A. Makswel i talem, “No fraet, laef folem stret fasin nomo.”²⁷

Palika blong mi i bin tij long BYY mo lavem BYY futbol be hem i no save wajem from hem i wari tumas long risal blong gem. Afta wan naesfala samting i bin hapen; oli bin krietem Vidio Kaset Rikoda we i mekem i posibol blong rekodem gem. Sapos BYY i win, bae hem i wajem vidio wetem stret tingting mo sua gud long en blong hem. !Sapos oli ravem olgeta, kasem kil o stap biaen long sko long nambafo kwota, hem i no wari tumas from hem i save bae oli win! !Yu save talem se hem i gat “wan stret no klin hop”!²⁸

Hemia i semmak long yumi. Taem yumi stap fetful, yumi save gat semmak sua tingting se ol samting bae oli wokaot gud blong yumi long en. Ol promes blong Lod oli sua. Hemia i no minim se bae laef long wol ia bae i isi o bae i nogat plante wota blong ae i ron, be olsem Pol i raetem, “God i putum gud plante samting oli rere finis blong ol man we oli lavem hem. Ol man oli no luk samting ia long ae blong olgeta, oli no harem tok blong olgeta long sora blong olgeta, mo oli no tingbaot olgeta long tingting blong olgeta, be olgeta oli rere i stap…, ol samting we God i rere long hem [blong olgeta we oli lavem hem].” ²⁹

Ol brata mo sista, i nogat wan long yumi i save sin blong tumoro. Bae yumi jenisim rod blong yumi sapos i nid blong jenisim mo lukluk fored wetem bigfala hop mo fet. Bae yumi “stanap insaed” taem yumi stap tru mo stap “fulwan insaed.” Bae yumi stap klin mo gat strong tingting blong difendem plan blong Papa blong yumi long Heven mo misin blong Pikinini blong Hem, Sevya blong yumi. Mi talemaot witnes blong mi se Papa i laef, se Jisas hem i Kraes, mo bigfala pan blong glad hem i tru. Mi prea se bae ol gudgudfala blesing blong Lod i stap wetem yu, mo mi mekem olsem long nem blong Jisas Kraes, amen.