Uta non Pekin Ngun me Unusan Achocho
Amo sipwe awena ach fetan pwe sipwe neneno ren epinukunuk me nuku. Pwe sipwe “Uta non pekin ngun” ren ach tiniken me “unusan achocho.”
Non ekkewe ier a no noun neum nengin a sato me a puchor non pwapwa, “Papachi, Papachi ua wanong poin fan unungat non am ewe urumoten saker ikenai!”
Ua pwapwa ne ponueni, “Fakkun murinno, sarah!”
Inan a nengeni o apasa non an emenimen, “Ewe poin a chok ru ngeni eu.”
Use mochen eis ika ion a win.
Mwichenap ina a eu fansoun ekieki nesokuru, pwarata, me fan ekkoch kunusefan.
Mi wor ewe nenien taraku me a wor GPS ra aita ngeni EseRukuno. Ika ka mwan ne kunu seni ewe aan om kopwe tori neniom, ewe mongungu ese apasa, “Ka umwes!” nge, a pwetete ne apasa, “Upwe kutta sefanni om aan—ika mi tufich okunusefani ewe waa.”
Non Ezekiel sia anneani ei pwon mi murinno:
“Ika emon mwan mi ngau a ukutiw ne fori tipis o a apwonueta ai kewe annuk, ika pwe a fori met mi pung o murinno, esap mano, nge epwe fakkun manau.
“Tipisin kewe meinisin a fori me nom, resap chuen mo pwan pwaranongeni.” 1
Mwa met me ochun ena pwon, nge mi namwot epwe ru sokkun meinisin ika sipwe angei ewe aunungatin pwon. Kunu seni meiinisin; anneasochisi meinisin; tipis meinisin repwe musuno. Mi namwot sipwe “unusan achocho”!
Sisap usun ewe mwan minne ewe a foriporausenewe Wall Street Journal a tinano ewe tukutukun taropwe mi ur ren moni me echo taropwe ngeni Internal Revenue Services (IRS), ewe a apasa, “Angengicheng IRS: iei ewe moni ren ai takises ese kamotiw. Ika ua chiwen netipangau mwirin, upwap tinano unusen noumi ewe moni.” .”2
Esap ina usun sia fori! Sisap kapach ngeni ach achocho me pi ika mi nafoch. Ewe Samon mi anamwota netipach me ach ekiek3. Unusan netipach! Nupwen sia papatais, sia mono fan konik pwe esisinen ach pwon ach sipwe unusan tapweno mwirin ewe Samon, esap ekis chok. Nupwen sia ennetin fiti me “unusan achocho,” nang a chechech pwe sipwe feioch ren. 4Nupwen sia chok ekis pwich ika ekis achocho, sia nusuni chommong feioch seni nang. 5
Chommong ier ano, ua fiti ekkewe Boy Scout won eu sai ngeni fonupon ne campout. Ekkewe at ra mour unukun ewe ekei ra keni, me ngang ewe Meinap, ua mour non wai. Nesesor ua neno o nengeni neniem, me ua kuna emon Scout, upwe aita ngeni Paul, a toropas. Ua eis ika ifausun an mour, me a era, “Ese och.”
Ua eis ika pwata, o a era, “Ua fou; ewe ekei a morono.”
Ua ereni, “Inausun ewe ekei. Om we pet ese pwichikar?”
Ese ponu.
Emon ekkewe pwan at a pwarata, “I ese aia ewe pet.”
Use nuku nge ua eis, “Pwata , Paul?”
Faneno—iwe mwirin a ponueno: “Iwe, ua nuku pwe ika use wau ai pet, usap pwan isoni sefan.”
Kapas ennet: a fakkun fou non fitu aua pun ese mochen angang ren nimu minich. Sia ekieki: Mwa umwesin! Ion epwe ina sokkun? Iwe, meinisin sia pwan fori non ekkoch napanap mi efeiengau. Kich, fan ekkoch, sise wau ach pet non pekin ngun ika sise ennetin iotek, anneani pukefel, me manaueni ewe kapas allim iteiten ran; esap chok ewe ekei epwe morono, nge esap wor tumun me sipwe fou non ngunuch.
Ika sia chipwang ren ach pwon mi pin, sipwe etiwa niwinin. Ewe Samon a fonu kich sipwe tumunu pwisin kich me auseningoch ngeni kapasan manau ese much. 6Me a pwan apasa, An chaa ese nimwoti ekkewe rese rongorong. 7
Non ennetin, mi mecheres ika sipwe “unusan achocho” nap seni an epwe ekis chok. Nupwen sia chok ekis achocho ika sise kan fori, mi wor kapasen non ewe Star Wars “mi wor met ese pung”. Kich sise nonno ngeni mochenin Kot me ina minne sisap nonno ngeni nonnomun napanapen pwapwa. 8 Isaia a a apasa:
Ekkewe aramas mi nagu ra usun chok ewe sat ese nua nongawan kewe rese kouno ne punguri arosset o ra chok wato nimengau.
Ese wor kinamwe ren ekkewe chon tipis anon Kot.” 9
Sia feioch pun ese nifinin ia sia nom ia ika ia sia feito me ia, ewe Samon mi chiwen tongeni torikich, ewe a apasa: “Iei minne, ion chok epwe aier me feito rei usun emon kukkun semirit, I upwe etiwa, pun ena sokkun ewe I seni ewe muun Kot. Nengeni, fan iten ena sokkun ua fen fangeno manuei, me ua fen angei sefani.” 10
Ika sipwe sopweno ne aier me anongonong won ewe Samon, sipwe angei pochokkun ren ach kunu sefan non tipetekison me nuku usun semirit, 11me angei pochokkun seni met manauach a aitikich. Job a apasa, “Ekkewe ra era pwe mi wor sufonur ra fakkun nuku pwe ir mi pung.” 12 Ina Tennyson ewe a makei, “Ai pochokkun usun engon mwan, pun netipei a nimoch.” 13Ewe Samon a pesei, sipwe uta non neni mi pin me sisap mwokut. 14
Noum we at Justin a mano me 19 [engon me tiw] ierin mwirin an uri semwen non fansoun nangatam. Non eu afanafan non fan mwen chok a no senikich, a awewe eu poraus usun afakkun weweiti usun emon sam me noun at ra feino non sitowa me a wor eu niousun emon mwan. Ewe at a efonu ewe nious me a turutiw me uta chok sefan iteiten a efonu. Ewe sam a eisini ewe at ika pwata a chok uta sefan. Ewe at a ekieki o apasa, “Ngang use sinei. Ua nuku pun I a chok uta non pekin ngunun.” Ika sipwe “unusan achocho,” mi namwot sipwe pwan “uta non pekin ngun,” “ina esenifinifin chok met a fis.” 15
Ika sipwe uta non pekin ngunuch sia witi ewe Samon pwe epwe angei ika ngeni kich pochokkun pwe sipwe pworacho ira fonufon non pekin manauach. 16Ekei ira fonufon repwe semwen, nepkingau, semwenin tupuach, manon aramasach, me sokkopaten sossot.
Uta non pekin ngun ika sipwe ekieta ekkewe pau mi turutiw. Sia uta non pekin ngun ika sipwe tumunu ewe ennet seni ngauan ei fonufan mi napano an fiu ngeni ewe saram, me kokkori ewe ngau och me och ngau17me “ra apungu ekkewe mi tupwen pokiten ar wenechar.” 18
Uta non pekin ngun ina mo mi weires nge mi tufich pokiten ach ekiek mi fatoch, ewe pochokkun seni ewe Ngun mi Fel me ach weiweiti met mi nom mwach a auchea seni miritin ei fonufan. 19Non manauach won nang sia pwapwa o puchor pwe sipwe nom won fonufan. 20 Kich sia “unusan achocho” pun sia mochen tumunu an Semach won Nang kokkot. Iei atun supwe uta me tumunu An kokkot sefan.
Semei we a keran mano a 97 [tiwe me fisu] ierin. Ika emon a eisini ika ifa usun a sou ponueni, “Seni eu ngeni engon, ngang ua rue me nimu!” Iwe mo ei mwan ese tongeni uta ika momwot, me a weires an kapas, nge a chok pwan ina met a ponuen ngeni. I a chok uta non pekin ngunun.
Nupwen semei we a 90 [tiwe] ierin, aua nom non airmic me ua eisini ika upwe angei efoch wan wheelchair. A era, “Apw, Gary—usa mo chinnap.” Me a sopweno, “Nengeni, ika ua pekus ne fetan upwe chok sa.” Ika sise tongeni sipwe “unusan achocho” ren ach fefetan, meni sipwe sa; meni sipwe ekieki aanen ach sai. Meni mi namwot sipwe kununo. Meni sipwe achocho non ach anneani, apochokkuna ach iotek, ika nikitano mettoch pwe sipwe kapach won met mi auchea. Meni sipwe pwotano fonufan pwe sipwe kapach won manau ese much. Semei a weweiti ei mettoch.
Nupwen a sounfiu won ssip non World War II, a wor ekkewe non ewe watte me womongun imw21ra urumwotei an nuku; ruemon chienan won sipw, Dale Maddox me Don Davidson, ra kuna nge rese urumwotei. Ra eis, “Sabin, pwata ka sokkono seni kem? En mi nimoch me kese un sakau, supwa ika kapasingau, nge ka kinamwe me pwapwa.”
Ar murinon ekiek ren semei ese mach ngeni met ra kaeo usun ekkewe Mormon, me semei we a tongeni aitir me papataisei chienan ekkewe ruemon won sipw. Inan me Seman Dale ra song me ra esinesin ngeni pwe ika a fiti ewe Mwichefen ewe fefin a tongei, itan Maryolive, epwe su seni, nge I a pwan churi ekkewe misineri ren an tingorei me a pwan papatais.
Arapakan ngeni muchunon ewe maun, Preseten Heber J. Grant a kokkori ekkewe misiner, fiti ekkoch ra fen pupunu. Dale me Mary Olive, ra finata pwe epwe misineri ika mo repwe nouni nour nampa eu. Mwirimwirin a wor tiwemon nour, unumon at me onomon nengin. Meinisin ra misineri, fiti Dale me MaryOlive, ir ra misineri fan unungat won pusin ar. Tepetepet noun nour ra pwan misineri. Ruemon me nein nour kewe at ra fiti ewe Tabernacle Choir, me noun Matthew itan Ryan. Chochon ewe famili Maddox a tori 144 [ipuku faik me ruanu] me ir ra fakkun aitikich ach sipwe “unusan achocho.”
Nupwen am aua anneani noun semei we kewe taropwe, aua kuna echo taropwe mi mak seni Jennifer Richards, emon noun chienan semei won sipw, Don Davidson. A mak: “Om fofforoch a siwini manauem. Mi weires aupwe weweiti ifausun manauem epwe fis ika ese wor ewe Mwichefen. Semei a tongei an manaueni ewe kapas allim me a achocho tori an mano.” 22
A weires sipwe anneani aukukun fofforochun emon a ukkuta ren pekin ngun. Semei me ruemon chienan won ewe ssip rese ausening ngeni ekkewe non ewe imw mi watte me ning ren ar esiter. 23Ra fen sinei pwe mi och are tapweno ewe Chon Forata nap seni ewe mwichen aramas.
Ewe Aposel Paul a tongeni awewei ach kei ran nupwe a ereni Timoty pwe “ra fen kun seni ekkei mettoch, iwe ra rukono ren ar kapas mi chofona.” 24Mi chommong rukuno me chofona non fonufan ikenai. Ika porausun ekkewe ra nom non ewe imw watte me ningoch. 25Napengeni aramaas ra apungu ar fofforingau ika ra rikiseni ewe aan me muttir sano non mwan. Fan ekkoch a feito seni ekkewe resamo wesen moni ar “unusan achocho” me ra mochen tapweno ewe inisin aramas nge esap ewe soufos.
Kinisou,pun sia sinei nesoponon ren ekkewe mi tupwen. Ika sia “unusan achocho,” a wor an pwenninokich ne sinei pwe “non mettoch meinisin Kot a fori fanasengesin mi murrion ren ir ekkewe mi tongei i.”26 Elter Neal A. Maxwell a era, “Kosap niuokus, manauoch chok.” 27
Seman punuei I emon sensen non BYU me a sani an BYU football nge ese tongeni epwe katon ar kewe urumwot pun a chok noninen ren pungunon ewe urumot. Iwe eu mettoch mi amwarar a fis— emon a forata ewe VCR, me a tufich an epwe rekotuni ekkewe urumwot. Ika BYU a win, a katon ewe kachito non apwapwa pun a sinei nesoponon! Ika ra angangau ika emon a feiengau ika arapakan repwe kuf, I ese noninen pun a fen sinei repwe win! Meni kopwe era a wor an “unusochun saraman an epinukunuk!” 28
Ina usun ren kich. Ika sipwe nukuchar, mi pwan fat pwe mettoch repwe fisioch rech nesoponon. An ewe Samon kewe pwon mi pungoch. Esap wewen pwe ach sukun won ei fonufan epwe mecheres me sisap kechiw, nge usun Paul a makei, “Minne aramas resamo kuna are rong, mine aramas resamo ekieki pwe epwe tongeni fisita, iei ewe mettoch Kot a ammonata ngeni ekkewe ra tongei i.” 29
Pwi me fefinei kana, ese wor emon a tipis nesor. Amo sipwe awena ach fetan me neneno ren epinukunuk me nuku. Amo sipwe “ukkuta ren pekin ngun” ren ach tiniken me “unusan achocho.” Amo sipwe nimoch me pwara non ach tumunu an Semach won Nang kokkot me wisen Noun we, ach chon Amanau, ina ai iotek non iten Jises Kraist, Amen.