Kesihnenda Sand Loale oh Wia Ahmw Kak Koaros
Menlau kitail song kamwahuiala dahme konehng en mwahula oh kilengla mwowe ki koapwoaroapwoar oh pwoson. Menlau kitail “kesihnenda sang loale” sang ni atail pahn kehlail oh wia uwen atail “kak koaros.”
Pahr kei samwalahro nein nei serepein laud nah kisin serepein tangedo rehi oh nda, “Ipa Ipa I wiahda deng silu nan kamwadong en soccer me se wia rahnwet.”
I sapengki ni ngilen peren “Udahn Mwahu douluhl pwa, Sarah!”
Ah nohnohu ahpw kilengdo oh mesen men kourhurki oh inda, “Dengo mihmi niriau ni ehu.”
I sto men idek isime kana!
Ansoun kapokon kan iei ansou en pwurehng kilang iawasa kitail mihmi ie, alehdi kaudiahl oh ekei pak wia ansounpwurehng ale kaweid.
Mie wasahn rend sdohsa ieu me mie mehn kaweid(GPS) ieu loale me kahdanki SohteSalohngala Ma ke pahn tangala nan ahl me sapwung koh ahpw kiheng wasa me ke men kohla iehu, ngeilen mehn kaweido sohte pahn nda, “Ke sahliel! Ahpw e pahn nda, ni ngihl mwahu. “Kapwkapwungala ahl—ansou me ke kak ah ke wekidekla oh pwurala.”
Kitail kin wadek inou ksaelel wet sang nan pwuken Ezekiel:
“Ma aramas suwed men pahn tokedihsang wiewia suwed oh kapwaiada ei kosonned akan ma e pahn wia dahme pwung oh mwahu, e pahn mourla, e sohte pahn mehla.
“Dipe kan koaros pahn lapwda, e ahpw pahn mourla pwehki eh wiadahr me pung.”1
Ia uwen kaselel en inou wet, Ahpw kitail anahne kapwiada wiewia riauo koaros me sansalehr powe pwe kitail en kak alehdi inou kesiluho. Met anahne kitail en wia wen atail “kak koaros”!
Kitail sohte anahne duehete ohl emen me, nin duen dame Wall Street Journal repwohtkihier, kadarala enpelop ieu me audaudkihda mwohni oh pil iangahki kisin likou me sohte sansal isime intingiedi ohng pwihn me kin pwukoahki palien tax me inda, “Ohng IRS, Menlau kumwail kilang mwohni me I pweipwandkihong kumwailo. Oh e pil kapatahieng. Ma ei madamadau pil kapwkapwunodeie te, I pahn kadarowei luhweh.” 2
Kaidehn Ih mwommwen atail pahn momouren met! Kitail sohte kin koledi mehkot oh kilang dahme kitail kak wia pwehn pitsang kadeik. Kauno anahne atail mohniong oh atail kak.3 Atail mohngiong unsek! Ansou me kitail pepdaisla, kitail koduhdi ni unsek kasalepen me kitail pahn papah sounkomouro ni unsek, kaidehn ekiste-inengieng. Ansou me kitail kin mehleliong oh wia wen atail “kak koaros,” Kauno kin kapaikitailda. 4 Ansou me kitail sohte kin mehleliong de wia wen atail kak koaros, kitail sohte kin iang alehdi kapai kesempwal teikan. 5
Pahr kei samwalahro I wahda kisin pwutak kei oh kohla pweidi nan wasahiue me dohsang ihmw. Kisin pwutak koa meir limwahn kisiniei me re wiahdahu, ah I meir nan mwurin werei sdohsahu. I pirida ni mensengo oh kilangada emen kisin pwutak me adaniki Paul eh wie mwomwohd. Nghei eri idek reh iairen ah meir. Ah e sapengki, “E sto nohn mwahu.”
Ansou me I idek pwehda, ah e nda, “I pouda; kisinieio kunla.”
Ah I sapengki, “Kisiniei udahn kin kunla. Ahmw mehn meir koa sto itar?”
E sohte sapeng.
Ah emen kisin pwutak koa nda, “E sohte doadoahk ki ah mehn meir koa.”
I pwuriamwei oh idek reh. “Pwe dahme soh ki eh Paul?”
E nennenla oh—e ahpw sapeng: “Ahki I medewe me ma I sohte pahn kihpeseng ah I sohte pahn anahne kihkihpene.”
Soai mehlel pwoat met: e wie popouki awa kei pwehki e songosong en pitsang doadoahk en minit limau. Kitail kak medewe, “Ia uwen Pweipweio! Isime pahn wia soahngo?” Udahno, kitail koaros kin wia soangen mwekid wet ni soangen ahl keper kei. Kitail, duehte, pil kin sohte men kihpeseng atail mehn meir en pali ngehn ansou me kitail sohte kin kapakap mehlel, onop, oh kin nantiheng en momouriki rongamwahuo rahn koaros; kaidehnte kisinieio pahn kunla ahpw kitail pahn peuda ni pali ngehn.
Ansou me kitail sohte kin mehleliong atail inou kan, kitail kin alehdi kahpwal. Kauno ketin mahsanihong kitailehr “en kin kanaiehng pein kitail oh kin rong mwahu kaweid en mour soutik.” 6 E pil doulahte oh mahsanih, “Ntahi sohte pahn kamwakeleirailda ma irail sohte pahn rongie.” 7
Ni mehlelo, udahn e mengei kitail en wia wen atail “kak koaros” sang ekiste. Ansou me kitail kin wia ekiste de sohte douluhl, mie, nan kasdohn Star Wars koasoaieu me nda, “mie mehkot sapwung.” kitail sohla kin ehuong kupwuren Koht oh pwehki met kitail solahr mihmi nan irair en peren. 8 Isaiah masahnih:
“Aramas suwed kan rasehng ilok en nan madau me sohte kak tokedi, oh kin kahrehda kiried oh dihpw.
“Kauno ketin mahsanih, sohte mahk ohng me dipan akan.” 9
Kitail pai pwehki, mendahte iawasa kitail mihie de iawasa kitail lelehr ie, kitail saikinte sipelehla koasoandi en sounkomouro, me kosoia: “Mehmen me pahn koluhla oh kohdo rehi nin duen seri men, I pahn alehda, pwe ihme pahn sohsohki wein Koht. Kilang, irail me kahrehda Ahi pwilikihdi ahi mour oh pil pwurehng alehda.” 10
Ni atail pahn doulahte oh kin koluhla oh koapwoaroapwoarki Kauno, kitail pahn alehdi kehlail ansou me kitail pahn pwurala oh aktikitikla oh pwosonla duehla seri kan, 11 oh alehdi marain me kin kohdo sang dahme kitail kin lelohng. Sohp kosoia, “Me pwung kan pahn kin tengedi, oh mehmen me mour mwakelekel pahn kehkehlaila.” 12 Soun nting Tennyson ntingihdi, “Ahi kehlail duehte kehlail en aramas ehk, pwehki ahi mohngiong mwakelekel.” 13 Kauno mahsaniher, “kesihnenda wasa sarawi oh sohte mwekid.” 14
Nait pwutak keieu laud Justin kepinsalehdala ni ah sounpar 19[eisek duau] mwurin ah sousoumwahuki ansou werei. E wia padahk ieu nan ehu kamadipw sarawi mwohnte ah kepinsalehdalahu, e soia soai ehu me kesemwpwalohng ih mehlel me pid duen pahpa men oh nah kisin pwutak pwulopwul men me kohla nan wasahn netkihla mehn mwadong kan oh mie mehn paker ieu me kin kak popoukda oh e mih ni mwomwen ohl emen. Kisin pwutako pakere ohl me popoukdahu oh e kin pwupwte pwurehng pwurada. Pahpahu idek rehn nah kisin pwutako dahme karehda ohlo kin pwurehngki inenda. Kisin pwutako medmedewehki ansou kis oh ahpw nda, “I sehse. Mwein e kin kesihnenda masloale.” Pwehn wia wen atail “kak koaros,” kitail anahne “uhkihda loaletail,” “ohng dahme pahn kohdo.” 15
Kitail kin kesihnenkihda loaletail kan ansou me kitail kin kanengamah oh awih Kauno en kak kihsang de kihiong kitail kehl en kak powehdi atail kahpwal kan. 16 Soangen kahpwal pwukat kakete soumwahu, anahn tohrohr, soumwahu en nan madamadau, mehlahn kehmpoakepahtail kan, oh pil iangahki soahngen kahpwal tohto.
Kitail kin kesihnenkihda loaletail ansou me kitail kin sewese me anahne sawas. Kitail kin kesihnenkihda loaletail ansou me kitail kin uhkihda me pwung sang me sued oh sampah me wialahr wasa me sohte marain, me kin ekeriki me sued me mwahu, oh me mwahu me sued17 oh “kin kawe me pwung kan pwehki arail pwung.” 18
Kesihnenkihda loaletail mendahte kahpwal kan kin mengei pwehki wehwehki mwahu, kakehlepen oh sawasepen Ngehn Sarawi oh madamadau soutik ehu me laudsang wehwehn sampah. 19 Mwohn mour wet kitail weriki atail peren pwehki ansou mwahu en atail pahn kohdo oh esehla duen mour pohn sampah. 20 Kitail kasalehda wen atail “kak koaros” ansou me kitail perendahr oh piladahr me kitail pahn wia soun doarepen Pilahn en Samatail Nanleng. Lelehr pilehu ansou en uhkihda oh wia doarepen Sapwellime plahno.!
Ahi pahpahu ahpwte mehla ni eh sounpar 97 [dueisek isuh]. Ansou koaros me aramas kin idek reh iaire, ah pasapeng ansou koaros iei, “ohng mehn sosohng sang [ehu lel eisek1–10, I mwein mihmi ni rieisek limau 25!” Mendahte ohl menet ah solahr kak alu de pil mwohd, oh pil kin apwaliki lokaia, ah pasapeng duhduehte. E kin uhkihda loale ansou koaros.
Ansou me ahi pahpahu sounpar 90 dueisek o, Se mihmi nan wasahn peidihn sompihr ieu iahpw idek reh ma I kak wahdo ah wheelchair o. E nda, “Soh Gary—mwein ansou mei pahn mahlah.” Ih ahpw pil nda, “Pwe, ma I pwangada alu, I kak tang ansou koaros.” Ma kitail sohte kak wia atail kak koaros nin duen atail alialu rahnwet, eri mwein kitail anahne tang; mwein kitail anahne kapwungala atail ahl. Kitail pil kakete anahne wekidek oh pwurala mwuri. Kitail mwein pil anahne koasoanehdi me kitail pahn onop, kapakap ni mehlel, de uhdihsang pwunodiki dahme sohte katepe kan pwe kitail en kak alehda soahng kan me mie katepe. Kitail mwein pil anahne pwilikihdi mour en sampah kan pwe kitail en kak kolkolahng mour soutik. Ahi pahpahu wehwehki soahng pwukat.
Ansou me e wia sounpei en nansed nan erein Mahwen Keriauo, mie ekei irail me kin mih nan ihmw me kaselel oh lapala21 kin kouruhrki ah koasoandi kan. Ienge meh riemen, Dale Maddox oh Don Davidson, me tehkada mwomwe oh sohte kouruhrki. Ira idek reh, “ Sabin, dahme kahrehda ke weksang koaros? Ahmw koasondi kehlail oh ke sohte kin sakau, simwok, de peined, ahpw ke kin meleilei oh peren.”
Ara pepehm mwahu sang ahi papahu sohte duehte dahme ira kasukuhlkihier me pid duen Mormon kan, oh ahi papahu ahneki ansou mwahu en padahkehng ira oh pepdaisihrahla. En Dale ah pahpa nohno mwehl pah oh ndahng me ma e pahn iangal mwomwohdisoht e pahn luhs sang ah mwohnlimpoak, Mary Olive, ahpw e kadaralahng serepeino misineri koa oh irail pil pepdaisiala.
Kerenlahng imwin mahweno, Presiden Heber J. Grant pakairki anahnepen misineri, iangahki ohl me pwopwoudehr. Nan pahr kid duepwiki pahisek weneu 1946, Dale oh Maryolive medewehda me e anahne iang mendahte ara pahn kaipwihdi tepin neira seri. Ira nainekihda seri duemen— pwutak silimen oh serepein wenemen. Irail meh duemeno pwon iang wia arail misin, duehte Dale oh Maryolive, me pein ira wiahier misin siluh. Nein neira seri ehk riemen pil iangehr wia arail misin. Neira pwutak riemen, John oh Matthew Maddox, iang pwihn en Koul en Tabernacle ansouet, oh pil en nein Matthew serepein ah pwoud, Ryan. Peneinei en Maddox tohtohkiher me 114 epwiki ehk pahmen oh irail wia aramas kei me kin wia uwen arail “kak koaros.”
Ansou me ngehi oh ahi peneinei koaskoasoane nein ahi pahpahu doaropwehkan, se kilangada kisin likou ehu sang Jennifer Richards, emen nein ienge pohn sohpo nah serepein limeno,Don Davidson. E ntingiedi: “Ahmw wiewia pwung wekidala aht mour. Udahn apwal en medewe ia pahn mwomwen aht mour ma sohte mwomwohdisoht. Ahi pahpahu mehkihla ah poakohng rongamwahu wet oh kin songosong en momouriki koasoandi kan lau lel imwi.”22
Udahn apwal en sohng wen dahme mwahu me emen aramas kak ahneki sang ni eh pahn kesihnenkihda loale. Ahi pahpahu iangahki ienge meh riemeno sohte men rong irailoako me mih nan ihmw kaselel oh lapalahu me kin kaweirail. 23 Irail ese me ihme keiuhn mwahu iei irail en idawehn Sounkepikipiko sang pwihn en aramaso.
Wahnparon Paul mweinte songosong en kawehwehda mwomwen atail rahn ansou me e indahng Timothy me “mie aramas ekei me sohpeisangehr mepwukat oh sapwungkilahr ar koasoakoasoaipene mwahl akan.” 24 Diren “koasoai mwahl” me kin wihwiawi nan sampah rahn pwukat. E kin wiawi sang irail akan me mihmi nan ihmw kaselel oh lapalahu. 25 Pak tohto arail koasoai kin kinehda likamw pwehn kak kasalongehla aramas sang nan ahl me pwung. Ekei pak e kin kohsang rehn irail akan me sohte kin wia wen arail “kak koaros” oh kin pilada ren idawehn tepelo me kin uheng soukohp kan.
Kalahnganki, pwehki kitail ese dahme pahn wiawihong me kin loaloapwoat kan. Ansou me kitail kin wia wen atail “kak koaros,” Kitail kin alehdi koapwoaroapwoar me “soahng koaros pahn mwahu ohng irail akan me kin poakohng Koht” 26 Elder Neal A Maxwell kosoia, “Kedehr masopwehk, Wia me pwung.”!27
En ahi pwoud ah papahu padahk nan BYU oh e udahn pereniki mwadong en football ahpw sohte kin kak kohla kilang arail mwadong kan pwehki e masak dahme pahn pwarada. Eri mehkot mwahu wiawi, VCR wiawihda, me kahrehiong ah kakala rekohtihdi (record ihdi) kamwadong kan. Ma BYU kin kana, e pahn kin kilang kasdohu ni sohte mwasopwehk, pwehki udahn e esehier dahme pahn wiawi! Ma kemwekidpen mwadongo kin sohte pahrek ohng irail, ohla, de ma re kin kereniengehr pahn luhs ni imwilahn kamwadongo, e sohte kin pwunodki pwe e esehier me irail pahn kana! Ke mwein kakete inda me e ahneki “koapwoaroapwoar unsek”!28
E pil duehte kitail. Ansou me kitail kin mehleliong, kitail kak ahneki wehwe pahrek me soahng koaros pahn pweida ohng kitail ni imwio. Sapwellimen Kauno inou kan kin mehlel. Met sohte wehwehki me kasukuhl en sampah pahn mengei de sohte pahtou mie, ahpw nin duen dahme Paul intingihdier, “soahng kan me aramas saikinte kilang de rong, soahng kan me aramas saikinte lemehda en wiawi, iei me Koht ketin kaunopadahng irail kan me kin poakohng Ih.” 29
Riei ohl oh lih akan, sohte emente dipadahr lakapw. Kitail kapwungala wasahkan me konehng oh kilengla mwowe ki koapwoaroapwoar oh pwoson. Menlau kitail “kesihnenkihda loaletail” sang ni atail pahn kehlail oh wia wen atail “kak koaros.” Menlau kitail ahneki mwakelekel oh komwadiki oh doare Sapwellimen Sahmo pilahn oh pwukoah en sapwellime Iehroso, atail Sounkomour. I kadehdehki me Sahm Nanleng ieias, me Sises iei Ihme Krais, Oh mehlel en pilahn en popohlo. I kapakapki me kauno pahn kapaikumwailda, oh I wia mepwukat koaros ni mwaren Sises Krais, amen.