2010–2019
Re naq li qasaqen taawanq choq’ xaqxookil eetalil chiruheb’ li tenamit
Abril 2017


Re naq li qasaqen taawanq choq’ xaqxookil eetalil chiruheb’ li tenamit

Lix evangelio li Kolonel ut lix Iglees k’ojob’anb’il wi’chik neke’xk’e naab’al li qahoonal re naq li qasaqen a’anaq xkomon li xaqxookil eetalil chiruheb’ li tenamit.

Naab’al chihab’ chaq anajwan, naq wankin chaq jo’ aj k’utunel sa’ seminario, kiwab’i jun reheb’ li wochb’een xpatz’b’al reheb’ laj tzolonel naq te’k’oxlaq chirix li patz’om a’in: wi katwan raj sa’ lix kutankil li Kolonel, k’a’ut nakak’oxla naq laa’at kataaqe raj jo’ jun reheb’ lix tzolom? A’aneb’ ke’wulak xk’oxlankil naq li ani neke’taaqen re li Kolonel anajwan ut neke’xyal wank jo’ xtzolom, maare ke’xb’aanu raj ajwi’ sa’ li hoonal a’an.

Chalen chaq li kutan a’an, nintz’il rix li patz’om a’an ut li k’a’ru xe’xsume chirix. Rajlal ninpatz’ chanru kiweek’a raj laa’in rab’inkil li Kolonel naq kixye li aatin jultikanb’il chiru li tzuul:

“Laa’ex lix kutan li ruuchich’och’; Junaq tenamit k’ojk’o sa’ xb’een tzuul ink’a’ naru xmuqb’al.

“Chi moko nalochman junaq saqen re xtz’apb’al sa’ uk’al, re b’an taawanq sa’ xna’aj, ut chi jo’kan tixkutanob’resi chixjunileb’ li wankeb’ sa’ kab’l.

“Jo’ka’in naq chilemtz’unq lee saqenkil chiruheb’ li tenamit, re naq te’ril lee chaab’il b’aanuhom ut te’xnima xloq’al lee choxahil Yuwa’ ” (Mateo 5:14–16).

Ma naru nakak’oxla chanru kaweek’a raj rab’inkil lix yaab’ xkux li Kolonel? Relik chi yaal, ink’a’ raj yal taqak’oxla. Xb’aan naq choq’ qe, rab’inkil lix yaab’ xkux li Qaawa’ ak xwulak jo’ jun li osob’tesiik rajlal naqak’ul xb’aan naq rab’inkil xyaab’eb’ xkux lix moos, chanchan ajwi’ rab’inkil lix yaab’ xkux a’an.

Sa’ 1838, sa’ jun seraq’ chanchan li aatin jultikanb’il chiru li tzuul, sa’ xtz’uumal re li profeet aj Jose Smith li Qaawa’ kixye a’in:

“Xbʼaan naq joʼkaʼin taayeemanq re lin iglees saʼ rosoʼjikebʼ li kutan, aʼanaq ajwiʼ Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan.

“Chi yaal ninye eere chejunilex: Waklinqex ut lemtzʼunqex chaq, re naq lee saqen taawanq choqʼ xaqxookil eetalil chiruhebʼ li tenamit” (Tz. ut S. 115:4–5).

Li qakutankil k’a’jo’ xchaq’al ru, jo’kan naq kik’ute’ chiru li profeet aj Isaias sa’ k’utb’esinb’il matk’; a’an ajwi’ kiril ut kixye li profeetil aatin chirix li kutan a’in re lix k’ojob’ankil wi’chik lix Iglees li Jesukristo ut li rajb’al naq kixye: “Tixtaqsi jun eetalil choq’ reheb’ li tenamit, tixch’utub’eb’ wi’chik eb’ laj Israel li ke’isiik sa’ lix tenamiteb’, ut tixk’ameb’ chaq laj Juda li cha’cha’inb’ileb’ sa’ chixjunil li ruchich’och’ ” (Isaias 11:12).

Sa’ eb’ lix yaalal li loq’laj hu, jun li xaqxookil eetalil, a’an jun li ilob’aal neke’xch’utub’ wi’ rib’ li tenamit chi junajinb’ileb’ rajb’al. Sa’ li najter q’e kutan, li xaqxookil eetalil kik’anjelak choq’ jun na’ajej re xch’utub’ankileb’ rib’ laj pleet. Sa’ jaljookil ru aatin, lix Hu laj Mormon ut li Iglees k’ojob’anb’il wi’chik re li Jesukristo a’aneb’ xaqxookil eetalil chiruheb’ li tenamit. (Chi’ilmanq K’utul raqal reheb’ li loq’laj hu , “Eetalil Taqsinb’il.”)

Relik chi yaal, jun reheb’ li nimla xaqxookil eetalil sa’eb’ li roso’jik li kutan a’in a’an li xchaq’al ru jolomil ch’utub’aj-ib’ a’in, bar wi’ li xnimal ru k’anjel ut lix k’uub’anb’il na’leb’ li qaChoxahil Yuwa’ re “xkʼeebʼal chi uxmank lix kolbʼal chiru li kamk ut lix yuʼam chi junelik li winq” (Moises 1:39) junelik yoo chi jultikaak.”

Li xb’aanunkil li jolomil ch’utub’aj-ib rajlal a’an jun reheb’ li xnimal ru xnawom ch’oolej naq laa’o, jo’ aj Santil Paab’anel sa’ Roso’jikeb’ li Kutan “naqapaabʼ chixjunil li ak xkʼutbʼesi li Dios, chixjunil li naxkʼutbʼesi anajwan, ut naqapaabʼ naq toj tixkʼutbʼesi kʼiila naʼlebʼ li xninqalebʼ ru ut ninqebʼ xwankil chirix lix Awaʼbʼejihom li Dios” (Eb’ lix Raqalil li Paab’aal 1:9).

Jo’kan ut, k’a’ pe ru naxk’utb’esi li Qaawa’ chiru li Awa’b’ej Thomas S. Monson li tento toj taqab’aanu re naq li qasaqen taawanq jo’ jun xaqxookil eetalil chiruheb’ li tenamit? B’ar wan reheb’ li junjunq chi k’a’aq re ru aajel ru xb’aanunkil sa’ lix xchaq’alil ru hoonal a’in re xk’ojob’ankil Sion ut xxokb’aleb’ laj Israel?

Li Qaawa’ junelik xk’utum li rajom chiqu “chi junjunqil li raqal, chi junjunqil li na’leb’, b’ab’ay arin ut b’ab’ay aran” (2 Nefi 28:30). Jo’kan ut, ink’a’ raj taasachq qach’ool rik’in li nak’utun jo’ li kok’ na’leb’ xb’aan naq moko ninqeb’ ta ut k’iila sut neke’k’ulman, xb’aan naq li Qaawa’ ak xk’ehom qana’leb’, xyeeb’al qe naq “osobʼtesinbʼilebʼ li nekeʼabʼink chiru lin naʼlebʼ, ut nekeʼxkʼe xik chixkʼulbʼal li aatin tinkʼe, xbʼaan naq ebʼ aʼan teʼxtzol xchaabʼilal li naʼlebʼ; xbʼaan naq re li ani nakʼuluk, wan chik li kʼaʼru tinkʼe” (2 Nefi 28:30).

Ninch’olob’ xyaalal naq rik’in li tzolok “chi junjunqil li raqal, chi junjunqil li na’leb’, b’ab’ay arin ut b’ab’ay aran” ut rab’inkileb’ li qajolominel, taawanq li aseeyt re li qaxam li tixk’e qawankil chixsaqenob’resinkileb’ li qas qiitz’in jo’ koxtaqla li Qaawa’.

Us ta wan naab’al li k’a’aq re ru naru naqab’aanu re naq laa’aqo junaq li saqen ut jun li xaqxookil eetalil chiruheb’ li jun ch’ol chik, nawaj raj aatinak chirix oxib’: xk’uulankil li hilob’aal kutan, xseeb’ankil li k’anjel re li kolb’a-ib’ sa’ xka’pak’alil li tz’apleb’ t’ikr, ut k’utuk jo’ li Kolonel.

Li saqen li yooko wi’ chi aatinak nachal rik’in xloq’oninkil li hilob’aal kutan, sa’ Iglees jo’ ajwi’ sa’ qochoch; a’an li saqen li nak’i naq naqak’uula qib’ chi maak’a’ li qatz’ajnil xb’aan li ruchich’och’; a’an li saqen li nachal naq naqaq’axtesi li qaloq’laj k’anjel chiru lix santil kutan ut naq naqaq’axtesi li qaloq’onihom chiru li Q’axal Taqenaq Xwankil—chixjunil a’an nokoxtenq’a re naq lix Musiq’ taawanq junelik qik’in. A’ li saqen a’an li nak’i ut na’ilman naq nokoq’aj sa’ li qochoch rik’in lix musiq’ li kuyuk maak li ki’aatinak wi’ li Awa’be’j Henry B. Eyring sa’ li jolomil ch’utub’aj-ib’ re octubre naq kixye: “Sa’ xyanq chixjunileb’ li osob’tesink naqak’e sa’ ajl, li q’axal chaab’il a’an li eek’ahom naq kuyb’il qamaak naq naqak’ul li loq’laj wa’ak. Taanimanq li rahok ut li b’antioxink naqeek’a choq’ re li Kolonel. Lix mayej maak’a’ roso’jik naxk’e chi ruhank lix ch’ajb’ilob’resinkil li qamaak” (“Li b’antioxink sa’ li hilob’aal kutan, Liahona, nov. 2016, 100).

Naq yooko chixk’uulankil li santil hilob’aal kutan ut yooko chi tz’aqonk sa’ li loq’laj wa’ak, ink’a’ yal junes nokoch’aje’, nak’i b’an chi us lix lemtz’unkil li qasaqen.

Li qasaqen nak’i ajwi’ naq naqak’e qahoonal re xtawb’aleb’ xk’ab’a’ li qaxe’ qatoon, naq naqak’ameb’ lix k’ab’a’ sa li santil ochoch, ut naqatzol li qajunkab’al ut xkomon ut li jun ch’ol chik xb’aanunkil ajwi’ a’an.

Li loq’laj k’anjel re li santil ochoch ut li resilal li junkab’al li naqawotz rik’ineb’ laj Santil Paab’anel sa’ xka’pak’alil li tz’apleb’ t’ikr, yoo chi xik chi uub’ej jo’ maajun wa naq yookeb’ chi kab’laak lix santil ochoch li Qaawa’. Anajwan naq sa’eb’ li santil ochoch wan li hoonal choq’ reheb’ li junkab’al re te’chalq rik’ineb’ lix kok’ hu tz’iib’anb’il wi’ xk’ab’a’eb’ lix junkab’al, li wixaqil ut laa’in ak wanjenaq xsahil qanumsihom naq nokok’anjelak sa’ li santil ochoch qochb’eeneb’ li qakok’al ut li qimam.

Naq naqataw ut naqak’am li k’ab’a’ej sa’ li santil ochoch ut naqak’ut chiruheb’ li jun ch’ol chik chanru xb’aanunkil, nokolemtz’um sa’ komonil jo’ li xaqxookil eetalil.

Xtzolb’al li k’utuk jo’ li Kolonel, a’an jun chik chanru nokoru chi wakliik ut lemtz’unk. Nasaho’ inch’ool rik’ineb’ li yookeb’ chixtzolb’al li k’utuk jo’ li Kolonel. Tinwil ru li rix li ak’ hu re li k’utuk: “Li rajom li junjunq chi aj k’utunel re li evangelio—li junjunq chi na’b’ej yuwa’b’ej, li junjunq chi aj k’utunel li b’oqb’il, li junjunq chi aj tzolonel ochochnal ut ixq aj ula’anel, ut li junjunq aj taaqenel re li Kristo—a’an xk’utb’al li tz’aqal tzol’leb’ re li evangelio, rik’in li Musiq’ej, re xtenq’ankileb’ li ralal xk’ajol li Dios chixnimob’resinkileb’ xpaab’aal chirix li Kolonel ut chi wulak jo’ chanru a’an” (Li k’utuk jo’ li Kolonel [2016]).

Anajwan k’iila mil reheb’ li qatiikil k’utunel neke’xwaklesi jun li saqen naq yookeb’ chixtzolb’al li k’utuk jo’ li Kolonel. Sa’ li na’leb’ a’in, li ak’ ch’utam reheb’ laj k’utunel a’an jun reetalil li wakliik ut lemtz’unk naq eb’ li naqatzoleb’ nee’xch’utub’ rib’ chixk’atq li xaqxookil eetalil re lix tzol’leb’ li Kristo, xb’aan naq “li laaw re k’utuk jo’ kik’utuk li Kolonel a’an li wank sa’ laa yu’am jo’ kiwan li Kolonel” (Li k’utuk jo’ li Kolonel, 4).

Naq nokok’utuk ut nokotzolok jo’ a’an ut nokowulak jo’ a’an, li qasaqen nalemtz’un ru chi us ut ink’a’ naru chi muqe’k ut nawulak jo’ jun xaqxookil eetalil choq’ reheb’ li ani yookeb’ chi sik’ok re lix saqen li Kolonel.

Ex raarookil was wiitz’in, ink’a’ raj ut ink’a’ nokoru chixmuqb’al li qasaqen. Laj Kolol qe koxtaqla chixkanab’ankil naq li qasaqen taalemtz’unq jo’ jun li tenamit sa’ xb’een li tzuul malaj jo’ jun li saqen sa’ xna’aj li xam. Naq taqab’aanu chi jo’kan, taqaloq’oni li qaYuwa’ li wan sa’ choxa. Lix evangelio li Kolonel ut lix Iglees k’ojob’anb’il wi’chik neke’xk’e naab’al li qahoonal re naq li qasaqen a’anaq xkomon li xaqxookil eetalil chiruheb’ li tenamit.

Ninch’olob’ xyaalal naq li Jesukristo a’an li saqen li tento taqak’utb’esi, sa’ xk’ab’a’ li Jesukristo, amen.