Lah Kahlwem Lasr Kuh In sie Ohiyac Wo nuh ke Muhtuhnfacl uh

Yac ekahsr somlah ah, ke nga kuhlwacnsap ke mwet luti luhn seminacri, nga lohng sin sie mwet orekma yuruk el siyuck sin tuhlihk lutlut lal an in motko ke kihsen siyuck se inge: Fin kowos ac moul ke lwen luhn Mwet Lahngo, efuh kowos nuhnkuh lah kowos ac Ukwacl oacna sie sin mwet tuhma lutlut Lal? Elos otwelah nuhnak lalos lah elos suc ukwe Mwet Lahngo ke lwen se inge ac srihke in mwet tuhma lutlut Lal ac fah oruh oacna ke pacl se ingacn pac.

Nuh ke pacl sacn, nga motko ke kihsen siyuck se ingacn ac top lalos. Nga nuhnkuh pacl pucspucs fuhkah nga ac puhla ke lohngohl Mwet Lahngo sifacna ke El fahk ma inge ke Luti luhn Jisus Finohl uh:

“Kowos kalem nu sin faclunufon. Sie siti sumusaiyukla fin eol uh, tiaku in wikla.

“Wangin mwet akosak sie lam ac filiya ye sie ahlu, a el ac filiya fin sukan lam uh, yen ma kalem kac ac tolak in lohm uh nufon.

“Ouinge, kowos sang kalem lowos in tolak ye mutun mwet uh, tuh elos in ku in liye orekma wo lowos, ac kaksakin papa tomowos suinkusrao” (Matthew 5:14–16).

Yac kowos kuh in petsacelah puhla lowos ke lohng puhsren Mwet Lahngo? Pwacyena, kuht tiac enenuh in petsacelah. Tuh kuht kuh in lohng puhsren Leum pacl nuh kwewa ke srihpen kuht kuh in lohng puhsren mwet kuhlwacnsap Lal, pa oacna sie.

Ke yac 1838, oacna pweng oreklac ke Luti luhn Jisus Finohl uh, Leum El fahkwack ma inge nuh sel Mwet Pahluh Joseph Smith:

Ke lwen sahflah alu Lal fah pahngonyuck Alu luhn Jisus Kraist luhn Mwet Luhlahlfongi Lal ke Lwen-sahflah.

Leum El fahk nuh sin mwet nuh kwewa in tuyak ac ahkkahlwemye kahlwem lalos in liyeyuck sin muhtuhnfacl uh (liye D&C 115:4–5).

Lwen lasr uh arulacna utuftuf lah elos ahkkahlwemye ke aruhrruhma nuh sel mwet pahluh Isaiah; el liye pac ac palye ke lwen se inge ke Fohlohkihnyuckyak luhn Alu luhn Jisus Kraist ac srihpac la, fahklah, “Leum El ac fah kolak sie flag tuh in sie mwe akul nu sin mutunfacl uh lah El sifilpaeiseni mwet lisyukla lun Israel ac Judah, ac folokunulosme liki eng akosr lun faclu” (Isaiah 11:12).

Ke orekmakihnyuck luhn ma suhmuhslah, ensign se, kuh ohiyac wo, pa flag se ma mwet uh fah tuhkweni fahsrweni ke sie srihpac. Ke pacl mahtuh ah, ohiyac wo se pa acn in tuhkweni luhn mwet mweun ke mweun uh. Ke sramsram luhn akucl, Puk luhn Mormon ac Alu fohlohkihnyuckyak luhn Jisus Kraist pa ohiyac wo nuh sin muhtuhnfacl nuh kwewa. (Liye Mwe luti ke Ma Suhmuhslah, “Ensign,” scriptures.lds.org.)

Ke tiac ahlohloh, sie sin ohiyac wo inge ke lwen sahflah uh pa toeni luhlahp se inge, acn se ma orekma yohk ac plwacn luhn Pahpah tuhmasr Inkuhsrao in use moul ma pahtpaht yohrohlos luhn mwet (liye Moses 1:39) kalweni in fahkwack.

Kalweni in fahsr nuh ke toeni luhlahp uh pa testimoni yohk emet in ahkpwacye lah kuht ke Mwet Luhlahlfongi ke Lwen-sahflah “luhlahlfongi kwewa ma God El ahkkahlwemye tari, kwewa ma El tuhfahna ahkkahlwemye, ac kuht luhlahlfongi muh El ac tuhfah ahkkahlwemye ma wowo pucspucs ac yohk srihpac nuh ke Tohkohsrahi luhn God” (Articles of Faith 1:9).

Na, meac Leum El ahkkahlwemye nuh sel Prestuhn Thomas S. Monson ma kuht enenuh in kalweni in oruh tuh kahlwem lasr kuh in sie ohiyac wo nuh ke muhtuhnfacl uh? Meac kuhtuh ma yohk srihpac in oreklac ke pacl utuftuf ke muhsaheack Saion ac fahsrweni luhn Israel?

Leum El ahkkahlwemye ma luhngse Lal pacl nuh kwewa nuh sesr “ip nuh ke ip, luti nuh ke luti, kuhtuhsrihsrihk inge ac kuhtuhsrihsrihk ingoh” (2 Nephi 28:30). Na, kuht tiac enenuh puhla lut ke ma luhman srihk ke srihpen ohiyacn fihsrwacsr ac sulpac sikyak lalos, mweyen Leum El kai kuht tari, fahk nuh sesr “ac insewowo elos suc porongo luti Luhk, ac sang insrwaclos nuh ke kahs in kahsruh Luhk, tuh elos fah lotwelah lahlmwetmwet; tuh nuh sel suc eis Nga fah sang in yohk pac; ac nuh selos suc fah fahk, tuh fal ma inge nuh sesr, fah eisyucklac luhkwelos finne ma suc oasr yohrohlos.” (2  Nephi 28:30).

Nga fahkwack lah ke “ip nuh ke ip, luti nuh ke luti, kuhtuhsrihsrihk inge ac kuhtuhsrihsrihk ingoh” ac ke porongo mwe luti luhn mwet kol lasr uh, ac oasr oil ke lahm lasr ma ac lwelah kuht in sang kahlwem nuh sin mwet sahyac suc Leum El sapkihn nuh sesr.

Pwacye oasr ma puhkantwen kuht kuh in oruh in sie kahlwem ac ensign nuh sin mwet sahyac, nga ke sramsramkihn ma tolu inge: ahkmuhtahlye lwen Sahpuht, salkweack orekma luhn molwelah ke facluh se inge ac facluh luhn nguhn, ac luti ke ohiyacn Mwet Lahngo.

Kahlwem ma kuht sramsramkihn tuhkuh ke oaru ma kuht sang in ahkmuhtahlye lwen Sahpuht, ke Alu oacna ke lohm ah; el pa kahlwem ma kapwack ke kuht karihngihn kuht sifacna in nwacsnwacs liki facluh; el pa kahlwem ma tuhkuh ke kihsac ke kuhfa luhn Leum ke lwen muhtahl Lal ac ke moli oaru lasr nuh sin El suc Fuhlwact Emet, ma nuh kwewa ma lwelah Nguhn Lal in wi kuht pacl nuh kwewa. Pa kahlwem ma kapwack ac liyeyuck ke kuht fohlohk nuh lohm ah ke puhla in sang nuhnak muhnahs ma Prestuhn Henry B. Eyring el sramsramkihn ke toeni luhlahp ke Ohktohpa tari ah ke el fahk: “Ke mwe insewowo nuh kwewa kuht kuh in wek, ma wo emet uh pa puhla ke nuhnak muhnahs ma tuhkuh ke kuht ipeis ke kuhfa luhn Leum. Kuht fah puhla luhngse ac tarilacna yohk nuh sin Mwet Lahngo, suc kihsackuhnlah ma pahtpaht la oreklac kuh nuh sesr in nwacsnwacslah liki ma koluk” (“Srui ke Lwen Sahpuht,” Liahona, Nohfuhmpuh 2016, 100).

Ke kuht karihngihn ahkmuhtahlyeyacn lwen Sahpuht ac ipeis ke kuhfa luhn Leum, kuht tiac ahknwacsnwacsyeyuck muhkwena, tuh kahlwem lasr uh oacyacpac kahlwemi.

Kahlwem lasr oacyacpac kapwack ke kuht sang pacl muhtahl in konwacack inen mwet mahtuh ke sucu lasr, us inelos nuh ke tempuhl, ac luti sucu lasr ac mwet sahyac in oruh oacna.

Tempuhl muhtahl ac orekma ke sramsram mahtuh luhn sucu inge ma kuht akacsruhi yurin Mwet Luhlahlfongi ke facluh inge ac facluh luhn nguhn lihksreni fahsr yohk likina pacl met ke tempuhl luhn Leum muhsahiyucklac ah. Ingena mweyen oasr pacl mwesahs ke tempuhl nuh ke u luhn sucu suc tuhkuh ke inen sucu lalos sifacna, muhtwacn kiyuck uh ac nga eis pacl wo ke kuht kuhlwacnsap in tempuhl tuhkweni yurin tuhlihk nahtuhsr ac tuhlihk nuhtin nahtuhsr.

Ke kuht konwacack ac us ine nuh tempuhl uh ac luti mwet sahyac ohiyac in oruh oacna, tuhkweni, kuht kahlwem oacna ensign kuh ohiyac wo.

Lotwelah in luti oacna Mwet Lahngo El luti pa sie pac ohiyac kuht kuh in tuyak ac kahlwem. Nga engan wi pac mwet nuh kwewa suc lotwelah fuhkah in luti ke ohiyacn Mwet Lahngo. Lwelah nga in riti ke muhtuhn puk ke puk sasuc in luti se: “Finsrak luhn mwet luti nuh kwewa luhn wosasuc—pahpah ninac nuh kwewa, mwet luti pahngonyuck, mwet luti luhn sucu ac mwet forfor luti nuh kwewa, ac mwet fahsr tukun Kraist nuh kwewa—enenuh in luti ip yohk pwacye ke wosasuc, ke Nguhn, … in kahsruh tuhlihk nuhtin God ahkfokokoye luhlahlfongi lalos nuh sin Mwet Lahngo ac in eklac oacna El” (Teaching in the Savior’s Way [2016]).

Ingena, mwet luti luhlahlfongi pucspucs lasr ahkkahlwemye kahlwem se ke elos lotwelah fuhkah in luti ke ohiyacn Mwet Lahngo. Ke ma inge, toeni sasuc in kahsruh mwet luti pa ohiyac se in tuyak ac kahlwem oacna mwet lutlut uh tuhkweni infulwacn ohiyac wo ke mwe luti luhn Kraist, mweyen “ki in luti oacna Mwet Lahngo El luti pa in moul oacna Mwet Lahngo El moul” (Teaching in the Savior’s Way, 4).

Ke kuht luti ac lotwelah ke Ohiyacl ac eklac yohk in oacna El, kahlwem lasr kahlwemi ac tiac kuh in wihklac ac eklac sie ohiyac wo nuh sin elos suc suk ke kahlwem luhn Mwet Lahngo.

Tamuhlwel ac tahmtahel sacohk wiyuck, kuht tiac enenuh in okanlah kahlwem lasr. Mwet Lahngo El sapkihn nuh sesr in lwelah kahlwem lasr in liyeyuck ke city ke ohl uh kuh oacna sie kahlwem ke kacntuhl. Ke kuht oruh ohinge, kuht fah ahkfuhlwactye Pahpah tuhmasr Inkuhsrao. Wosasuc luhn Mwet Lahngo ac Alu fohlohkihnyuckyak Lal use ohiyac pucspucs tuh kahlwem lasr kuh in sie ip ke ohiyac wo yohk nuh ke muhtuhnfacl uh.

Nga fahkwack lah Jisus Kraist pa kahlwem suc kuht enenuh in akacsruhi. Ke inen Jisus Kraist, amen.