Ma Llomes el Dobang Bol Lolkael el mora Bekl el Beluu

Mla memong el rrak, me kusiou el sensei ra seminary, e ak rirengesii a tara ki mdak el loureor e luleker ra ngalk er a skuul me bol betebengii tial ker: Alsekum e ke mle chad er sel temel a Osobel, ngera meko mdasu el kmo kemo oltirakl er ngii el tara mesiungel? Me te kilngei el kmo tirkel mo oltirakl er a Osobel er chelechal taem e melasem elmo mesiungel a ultebechel el dirrek el rullii a osisiu el teko ra le chad ersel temel Osobel.

Seikid el mei, e ak kumtetab ersel ker mesel le tilbir. Ak blechoel el melebedebek el kmong ngera blo kulchesuar el lorenges ra Osobel sera lolekoi a ikal losisechakl ra le ngara Rois:

“Kemiu e a llomes er a beluulechad. A beluu el ngar bebul a ked a diak el lobart.

“Ng diak a chad el mekerdii a olbidel, e melekedek er ngii, ng bai nguu e loea; er sel kirel ngar ngii meng omekllomes er a re bek el chad el ngar a blai.

“Ma llemesiu a kirel ua isei el dmiich er mederir a rokui el chad, me te mo mes a ungil tekoi el moruul e mo odengesii a Demmiu el ngar a babeluades” (Matthew 5:14–16).

Ng sebechem el mesa el ua ngerang sel molechesuar e lorenges ra ngerel Osobel? E a klemerang, ngdiak el kired el lomdasu. Tiang a mlamo ngarngii el blekeradel me kede orenges er a ngerel a Rubak eleng sel dorenges ra ngirir a re mesiungel, eng dio sisiu.

Sera 1838, ra osisiu el cheldecheduch el mlodars er a Osisechakl ra Rois, e a Rubak a milketeklii a ikakid e lokiu a Profet Joseph Smith:

“Meng uaisei e a ikelesia er ngak a mokedong ra ikal luriul klebesei, el Ikelesia ra Jesus Kristo ra Uriul-klebesei el Santo.

Ng klemerang a kulekoi lekor kemiu el rokui: Bekiis e mo mekelomes, ma lemesiu bol mato ra bek el beluu” (D&C 115:4–5).

A ikal sils er kid a ngodech e a ikang a mlo cholt er a ues el mora profet Isaiah; ngii meng dirrek el milsang e ulemlauch ra ikal sils ra mo Olutel a Ikelesia ra Jesus Kristo ma moktek er ngii, e dilu el kmo, “E Ngii a mo chotii a mato el mora rokui el beluu, e mo mengederodel er tirkel meleuaoch ra Israel, e mengudel er tir elmo tmak tirkel milterakl ra Judah ra ikel leua el sous ra beluulechad” (Isaiah 11:12).

A ngara chedaol lechukl, e a mato, malechub eng olkael, a banderang el lolechotel el rechad a tmak el ta rengrir ra moktek. Sera uodel el taem, e a mato a olechotel a tekoi ra re soldau lou mekemad. Meng belkul a tekoi, e a Babier ra Mormon ma mloluut el Ikelesia ra Jesus Kristo a mato el mora rokui el beluu. (Mesa Guide to the Scriptures, “Ensign,” scriptures.lds.org.)

Ngdiak ke do mededenger, sel tara klou el mato er chelechal taem a tial meang el klou longdibel, elsel klou lurelel ma uldesuel a Demad ra Babeluades a “mo oterkeklii el diak el luut a kodall e mo nguu a diak a ulebengelel klengar a chad” (Moses 1:39) a melmolm el lomerk.

Sel molmolm el ngarngii a klou longdibel a tara klou el chais ra klemerang el kid ra Uriul-klebesei el Santo “ou merang el rokui el Dios a mla cholt, rokui el Ngii a olecholt, e kid oumerang el kmo Ngii a direke molcholt a betok el meklou e orechudel el tekoi el kirel sel Rengedel a Dios”(Articles of Faith 1:9).

Meng, ngerang kung, el Rubak a mla cholt e lokiu a President Thomas S. Monson el kid ousbech me bo dolmolm ma lemesed le bol mato ra bek el beluu? Ngera bebil ra orechudel el tekoi el kirel meketmokl er tial meang el taem el toketekii a Sion mesel cheldelel a Israel?

A Rubak a di blechoel lolecholt ra urungulel el me rekid “el lechukl ma llach, el dert el kib er tiang e dert el kib er sei” (2 Nephi 28:30). A le uaisei, e kid a kired el mechas a rengud ra kora mekerei el tekoi leng beot e mekedekudem el blekeradel, le Rubak a mla subedid, louchais er kid el kmo “te ngeltengat tirkel loltirakl a lechuk, e kongei e lorenges a tekingek, le te mesuub a llomes; leng ngkel ngmo ngmai a bsang a betok” (2 Nephi 28:30).

A kuchais el kmo ngokiu a “lechukl ma llach, el dert el kib er tiang, e dert el kib er sei” e mo oltirakl a tekingir a re meredeled, e kid a mo rengii a eluchul a olbteled meng meskid a llomes el mora re bebil sel loldurech er kid a Rubak.

Meng ngarngii a betok el tekoi el sebeched el remuul elmo llomes e mato el mora re bebil, eng soak el lomes a ikakid el keldei: menguul er a Chedaol sils, olengeseu ra ureor lolsobel ra re ngar ma re mla mad, e olsisechakl el ua Osobel.

Sel llomes el dosaod er ngii a mo rengii e lokiu a blak el reng sel donguul ra Chedaol sils, ra Ikelesia ma elsel a re keblid; tia e a llomes el mei sel dongikiid er kid er a tekingel a beluulechad; ng llomes el mei sel dolenget a telbiled ra Chedaol sils er Ngii mesel dolterkokl a rengud elmo re ngkel Kot el Ngarbab—rokui el meskid a techall me kede blechoel loba Reng er Ngii e lobengked. Ng seikid el llomes elmo klou e mo keltukl sel bo de rei ra blid le kede melechesiu ra klausubes el President Henry B. Eyring a milsaod er ngii ra mlo merek e Longeteruich el buil ra klou el longdibel sera dul kmo: “A ikel rokui el klengeltelngat el do mechur, sel kot el klou el dodengelii sel dolchesiu ra klausubes el dengue sel dolai ra chedaol belsoil. Kede melechesiu ra klou beltik el reng e ourreng a sulel Osobel, leng sel diak a ulebengelel lomelnget er ngii el milketmokl me kede klikiid er a klengit” (“Gratitude on the Sabbath Day,” Liahona, Nov. 2016, 100).

Mesel dongeluoleu ra Chedaol sils el chedaol e melai ra chedaol belsoil, eng diak kedi de klikiid, engdi lemsed a dirrek el mengai elmo klou.

A lemsed a dirrek elmo klou sel doterkeklid e emedolii a taem el losiik a ngklir a rechedad, e ngmai a ngklir el mora templo, e olsisechakl ra telungalk er kid ma re bebil el meruul osisiu el tekoi.

Tial chedaol el templo ma urrelel a reksi ra telungalk el domerek er ngii lobengterir a re Santo ra re ngar ma re mla mad a merael bedul luchei el lmuut el mesisiich ra kuk uchelel e chelechang e a templo ra Rubak a lomekedechor. Chelechang e a templo a mle morngii a tokubets el temel el kirir a retelungalek el mong lolab a kldmokl el ngakl, e a bechik me a ngak a kmal dmeu a rengmam er a taem el ki mosiou loureor er a templo lobengterir a rengelekam me a rengelkir a rengelkam.

Sel de betik e de ngai a ngakl el mora templo e olsisechakl ra re bebil elmo meduch el dirrek, e de dak, e kede medidiich el ua de mato malechub e ngolkael.

Mesuub el mo olsisechakl el ua Osobel sel lolsisechakl a tara rolel e kede mekiis e medidiich. A kutkeu lobengterir a re bekl el chad el mesuub el molsisechakl el ua Osobel. Knguu a techall el oieui ra beches el babier a dolsisechakl: “A lomes er ngii a re bekl el sensei—bekl el loungalk, bekl el mlo kedong el sensei, bekl el loldingel el sensei, ma re bekl el loltirakl er a Kristo—a molsisechakl er a klikiid el suobel ra ebangkelio, lokiu a Reng, … el lolngeseu ra rengelekel a Dios el toketek a klaumerang er tir ra Osobel e mengai elmo uai Ngii” (Teaching in the Savior’s Way [2016]).

Chelechang, e a re telael el mekedung el sensei er kid a oldars er a llomes el mesuub elmo olsisechakl e loltirakl ra Osobel. Ngokiu tial teletael, esel beches el sensei miting ra chelchad a tara rael el mekiis e medidiich e a re mesuub a kebtech e loltirakl er a mato ra omesubel a Kristo, le “sel kengei el molsisechakl el ua Osobel a lolsisechakl a mo kie el ua Osobel a le kiei” ( Teaching in the Savior’s Way, 4).

Mesel de rokui e lolsisechakl e dosuub loltirakl er Ngii e merael mengai elmo uai Ngii, e a lemsed a kmard el medidiich e diak el lobart e merael mo mato elmo er tirkel losiik er a lemsel Osobel.

Betik er a renguk el rodam ma rodos, kid a diak el kired e diak ke domart er a lemsed. A Osebeled a oldurech er kid ma lemsed el lolidiich el ua beluu el ngar bab malechub le ua llomes el ngar sel ngarngii. Mesel de uai sei, e kid a mo kobkellii a Demad el ngara Babeluades. A ebangkelio ra Osobel ma mla moluut el Ikelesia er Ngii a meskid a betok el techall ma lemsed bol telkib er a klou el mato el mora rokui el beluu.

A kuchais el kmo a Jesus Kristo a llomes el kired el lomes er ngii, loba ngklel a Jesus Kristo, amen.