2010–2019
Pwe atail marain en kak Sansal ong Wehi kan.
Epreil 2017


Pwe Atail Marain En Sansalohng Wehi kan

Sapwellimen Sounkomouro rongamwahu oh Sapwellime Mwomwohdiso kapwurpwurdo kiheng kitail ahnsou mwahu tohto ong atail marain en sansal mwohn wehi kan.

Pahr kei samwalahr, ni ahi kin sounpadahk en semineri, I rong emen iengei tohn doadoahk ko, idek rehn tohn skuhl ko, ren medemedewe iren peidek wet: Ma ke momour nan mwein Sounkomouro, dahme ke medmedewehki me ke pahn idawehn Ih nin duwen sapwellime tohnpadahk? Irail pwungkihpene me irail akan me kin ideidawehn Sounkomouro nan ahnsou pwukat me kin nantihong en wiahla sapwellime tohnpadahk kakete idawehn Sounkomouro ma irail iang momour nan ahnsou-o.

Sangete ansou-o, I kin wie medemedewehte iren peidek-o oh dahme irail pwungkipenehu. I kin wie medemedewe ia mwomwen ahi pepehm ma I iang wie rongorong Sounkomouro ni ahnsou me e padpadahki padahk pwukat pohn dohlo:

“Kumwail me kamarainpen sampah. Kahnimw ehu me mi pohn dohl ehu sohte kak rirla.

“Aramas pil sohte kak isikada lamp oh kihdiong pahn kohpwa, pwe pohn dewe pwe en kamarainihada koaros me mi nan ihmwo.

“Amwail marail en sansal mwohn aramas akan pwe re en kilang amwail wiewia mwahu kan oh kapingahki Samwamwail me ketket nanleng.” (Madiu 5:14–16).

Ke kak medewe ma kowe me wie rongorong ngilen Sounkomouro? Ni mehlel, kitail sohte anahne medewehieng. Pwe e kin wihwiawihte ong kitail en rong ngilen Kauno pwe ni atail kin rongasang sapwellime ladu kan, e duwehtete atail rong sang pein Ih.

Nan pahr 1838, Kauno padahkiong Soukohp Joseph Smith padahkohte me E padahngki pohn dohlo ni E mahsanih:

“Pwe ni imwin rahn akan ahi mwomwohdiso pahn kahdaneki Mwomwohdiso en Sises Krais en Souleng en Imwin Rahn Akan.

“Ni mehlel I ndahiong kumwail koaros: Uhda oh marainpeseng, pwe ahmw marain en kak sansal ong wehi kan” (D&C 115:4–5).

Uwen kapwuriamwei en atail mwehi kat, soukohp Aiseia pil kilangada nan sansal ehu; e pil iang kilangada oh kokohpkiher duwen atail ahnsou duwen Kapwurpwurdohn Mwomwodiso en Sises Krais oh kahrepe, e mahsanih, “Kaun-o pahn ketin apihada ensain de pilaik ehu pwehn ketin kasalehiong wehi kan me e pahn pwurehng ketikipene mehn Israel oh Suda oh kapwureiraildo sang ni keimw pahiou en Sampah” (Aiseia 11:12).

Nan pwuhk sarawio, wewehn ensain, iei pilaik pwoat me aramas kin pokonpenehng ie ni miniminpene ni kahrepe tehieu. Nan mwein kawa, pilaik kin kapokonepene sounpei kan nan mahwen. Pwuhk en Mormen oh kapwurpwurdohng Mwomwodiso en Sises Krais iei me kilel sansal ong wehi kan. (Tehk Guide to the Scriptures, “Ensign,” scriptures.lds.org.)

Ehu me keiou sansal nan rahnpwukat iei ahnsou en Kapokon Lap, wasa me doadoahk lap oh koasoandi en Samatail Nanleng me kin padpadahngkihte “pwe en sowese aramas koaros en mour kokohlahte oh ale mour soutuk” (Moses 1:39).

Kapokon Lap ah kin wihwiawihte iei ehu kadehde lap me sansal me kitail Souleng en Imwin Rahn Akan kin “kamehlele mehkoaros me Koht kasalehdahr, mehkoaros me E pahn ketin kasalehda, oh kitail kamehlele me E pahn kasalehda me kapwuriamwei tohto oh me kesempwal me pahn dokdoke Wein Nanleng en Koht” (Iren Pwoson kan 1:9).

Kauno sou kasalehiengehr Thomas S. Monson me kitail anahne doudoulahte wiewiahte pwe atail marain en kak sansal ong wehi kan? Ia ekei mehkan me kesemwpwal akan me anahne wiawi nan ahnsou kapwuriamwei wet en kawadahn Saion oh kihpenehn tohn Israel kan?

Kauno kin ketin oretikieng kitail Sapwellime padahk mwahu oh “kin kapwkapwurehieng oh ni ekis ekis” (2 Nephi 28:30). Iei me, kitail sohte pahn pwuriamweiki ma e mwomwen mesen mehkot tikitik kei pwehki ar mengei oh kin kapwkapwurehieng, pwe kauno mahsaniongkitailehr, “meid pahi irail akan me kin idawehn ahi padahk kan, oh me kin rong ahi kaweid, pwe irail pahn kupwurakongla; pwe mehmen me kin alehdi I pahn kalaudehieng” (2 Nihpai 28:30).

I kadehde me sang ni atail “kin kapwkapwurehieng oh ni ekis ekis;” oh sang ni peikiong kaweid kan en atail kaun kan, e pahn mie pilen neitail lamp19 kan me pahn kak kahrehieng kitail en kak ehuki maraino ong mehteikan nin duwen Kauno padahkiong kitailehr.

Ni eh soahng tohto me kitail kak wia pwe kitail en wia marain oh kitail en sansal ong  meteikan, apw mie soang siluh me I men kosoia me pahn dokdoke mehkan: wauneki rahn Sarawi; kamwadangahla doadoahk en kamour ni pali koaros en kahdengo;20 oh padahk ninduwen Sounkomouro kin padahk.

Marain me kitail kosokosoia kin sang ni nsenoh me kitail kin wia ong rahn en Sapad, nan Ihmw Sarawi oh pil nan imwetail kan; iei marain-o me kin maramarainla ni atail pahn kin kadohwanewei kitailsang dihp en Sampah; iei marain me kin sang atail kin kasarawi kamadipw sarawi nan Sapwellime rahn me sarawi oh sang ni atail kaudokiong Wasa Lapalahpie, mehkan koaros me kin kahrehieng kitail en warohng Sapwellime Ngehn en kin ketket rehtail ahnsou koaros. Iei marain-o me kin maramarainla oh sansalada ni atail pahn pwuralahng udeketail nanleng ni pepehm en saledeksang dihp me presiden Henry B. Hiring kosoiahng kitail nan Kapokon Lap en Oaketepe samwalahro ni ah inda: “Nan kapahi kan koaros me kitail pahieki, me inenen mwahu iei pepehm en lapwapen dipetail kan ni atail kin tungoale kamadipw sarawi. Kitail pahn kehn limpoak oh kalahngan ong Sounkomouro, pwehki sapwellime tohnmetei me kahrehieng atail kak mwakelekeldahsang dipetail kan.” (“Kalahngan en Rahn en Sapad, Liahona, Nov. 2016, 100).

Ni atail pahn wauneki rahn en Sapad oh tungoale kamadipw sarawi, kaidehnte me kitail mwakelkeldahte, apw atail marain pahn pil wie maramarainla.

Atail marain pil kin marainla ni atail kin meirongki atail ahnsou pwehn diarada ahd akan en atail peneinei me melahr akan oh wahla nan tehnpas sarawi, oh padahkiong atail peneinei oh mehteikan mwomwen wia doadoahk en tehnpas sarawi.

Doadoahk en tehnpas sarawi oh doadoahk en kihpene eden peneinei kan me kitail kin sawaski ong pali en kadeng koaros en me momour oh me melahr akan kin wie mwekmwekid kohwei laudsang mwowehu pwehki Sapwellimen Kauno tehnpas sarawihkan wie koukoudahte. Met pwehki tehnpas sarawihkan kakehr koasoanehdi ahnsou ong pwihn en peneinei ieu me kin kohla wa pein eden ar peneinei kan, ngehi oh ahi pwoud inenen perenki aht kin papahpene nan tehnpas sarawi rehn nait serihkan oh nein nait serihkan.

Ni atail kin diar ahd oh wahla nan tehnpas sarawi oh pil padahkiong mehteikan ia mwomwe, kitail wie maramarainla duwehte pilaik me kin sansal.

Onopki pwehn padahk duwehte Sounkomouro kin padahk iei ehu wiepen atail kin uhda oh marainpeseng. I pereperen rehn koaros me kin onohnepki mwomwen padahk nin duwen Sounkomouro kin padahk. I pahn wadekehng kumwail sang pohn kilin pwuhk en padahk kapw: “Dahme kitail pahn keiou dokdoke, kitail koaros me pahn padahki rongamwahu—pahpa nohno koaros, sounpadahk koaros, sounpadahk en pwarek peneinei kan oh sounpadahk en pwarek lih akan oh koaros me kin idawehn Krais—iei kitail en padahngki rongamwahu unsek, sang ni kaweid en Ngehn Sarawi, … pwehn sowese Sapwellimen Koht serihkan en keirda arail pwoson Sounkomouro oh ar kak duwehla Ih” (Padahk ninduwen Sounkomouro kin Padahk [2016]).

Ahnsou wet, kidalap en neitail sounpadahk loaloapwoat kan kin kolada marain ni arail kin esehla mwomwen ar pahn padahk nin duwen Sounkomouro ah kin padahk. Sounpadahk kapw akan ar kin mihtingpene pwehn ale kaweid iei ehu ahlen uhda oh marainpeseng ni tohn kaskuhl kan ar kin keipenehng ni mehn kamarain en rongamwahu en Krais, pwe “kih en padahk ninduwen Sounkomouro kin padahk iei kitail en kin momourki mour en Sounkomouro.” (Padahk ninduwen Sounkomouro kin Padahk, 4).

Ni ahnsou me kitail koaros pahn kin padahk oh esehla nin duwen Sounkomouro ah kin padahk oh duwehla Ih, atail marain pahn marmarainla oh sohte kak rirla oh kak sansalohng irail akan me kin raprapahki marain en Sounkomouro.

Riei ohl ako oh lih ako, kitail sohte konehng en ekihla oh kitail en dehr ekihla atail marain. Atail Sounkomour mahsaniheng kitailehr kitail en marainda duwehte kahnihmw ehu me mih pohn dohl ehu de duwehte marain sang ni lamp ehu. Ni atail pahn kin wia met, kitail pahn kalingane Samatail Nanleng. Sapwellimen Sounkomouro Rongamwahu oh kapwurpwurdohn Sapwellime Mwomwodiso khieng kitail ahnsou mwahu tohto ong atail marain en iang sansal mwohn wehi kan.

I kadehde me Sises Krais me iei maraino me kitail anahne idawehn. Ni mwaren Sises Krais, ahmen.