2010–2019
Ina ia Avea Lo Tatou Malamalama ma Tagavai mo Atunuu
Aperila 2017


Ina ia Avea Lo Tatou Malamalama ma Tagavai mo Atunuu

E tuuina mai e le talalelei a le Faaola ma Lana Ekalesia ia i tatou le tele o avanoa mo lo tatou malamalama ina ia avea ai o se vaega o le tagavai silisili mo atunuu.

I le tele o tausaga ua mavae, a o ou auauna atu o se faiaoga seminare, sa ou faalogo ai i se tasi o ou tagata faigaluega o fai atu i ana tamaiti aoga e mafaufau i le fesili lenei: A faapea sa e soifua i le vaitaimi o le Faaola, aisea e te manatu ai o le a e mulimuli ia te Ia o se tasi o Ona soo? Sa latou oo i le faaiuga e faapea o i latou o ē o loo mulimuli i le Faaola i le taimi nei ma taumafai ina ia avea ma Ona soo masalo latou te ono faia foi i na taimi ua mavae.

Talu mai lena taimi, sa ou mafaufau ai i lena fesili ma lo latou faaiuga. E masani ona ou mafaufau poo a ni ou lagona i le faalogo atu i le Faaola lava Ia a o Ia fetalai mai i vaega nei i le Lauga i le Mauga:

“O outou o le malamalama o le lalolagi outou. E le mafai ona lilo le aai ua tu i luga o le mauga.

“Latou te le tutuina foi le lamepa i le tuu ai i lalo o le mea e fua ai saito, a e tuu i luga lava o le tuugalamepa ia pupula atu ai i e o i le fale uma.

“Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” (Mataio 5:14–16

E mafai ona e vaai faalemafaufau po o a ni ou lagona i le faalogo atu i le siufofoga a le Faaola? O le mea moni, tatou te le tau vaai faalemafaufau i ai. Ua avea ma se aafiaga faifai pea mo i tatou le lagonaina o le siufofoga o le Alii aua a tatou faalogo i siufofoga o Ana auauna, e tusa lava ia.

I le 1838, i se savali e pei o le savali na tuuina mai i le Lauga i le Mauga, sa folafola mai e le Alii vaega nei e ala i le Perofeta o Iosefa Samita:

“Aua o le a faapea ona taʼua o laʼu ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.

“E moni Ou te fai atu ia te outou uma: Tutulai ia ma susulu atu, ina ia avea lo outou malamalama ma tagavai mo atunuu” (MF&F 115:4–5).

E tulaga ese o tatou aso lea sa faaalia foi i se faaaliga i le perofeta o Isaia; sa ia vaaia ma valoia foi nei aso o le Toefuataiga o le Ekalesia a Iesu Keriso ma ona faamoemoega, e faapea, “E faatuina foi e ia le tagavai mo nuu ese, ma faapotopotoina e ua tulia i Isaraelu, ma aofai e ua faataapeapeina o Iuta i itu e fa o le lalolagi” (Isaia 11:12).

I se anotusi faaletusitusiga paia, o se tagavai, po o se sulu, o se fu’a lea e potopoto ai tagata i le lotogatasi o le faamoemoe. I taimi anamua, sa avea le tagavai o se tulaga e potopoto ai mo fitafita i le taua. E ta’ua faafaatusa, o le Tusi a Mamona ma le Ekalesia toefuataiina a Iesu Keriso o tagavai ia i atunuu uma. (Tagai Taiala i Tusitusiga Paia, “Ensign,” scriptures.lds.org.)

E aunoa ma le masalosalo, o se tasi o tagavai silisili o aso nei e gata ai o lenei konafesi aoao, lea e faaauau ai pea ona folafola atu le galuega sili ma le fuafuaga a lo tatou Tama Faalelagi “ia aumaia le tino ola pea ma le ola faavavau o le tagata” (Mose 1:39) .

O le faaauau pea o le faia o konafesi aoao o se tasi lea o molimau silisili i le mea moni o i tatou o Au Paia o Aso e Gata Ai e “talitonu i mea uma na faaali mai e le Atua, mea uma ua ia faaali mai nei ma matou te talitonu foi o le a ia faaali mai le tele o mea silisili ma le taua i le Malo o le Atua i le lumanai” (Mataupu Faavae o le Faatuatua 1:9).

O a la mea na faaalia mai e le Alii ia Peresitene Monson e tatau ona tatou faia pea ia mafai ai ona avea lo tatou malamalama o se tagavai mo atunuu? O a nisi o mea taua e faia i lenei taimi matagofie o le atiina ae o Siona ma le faapotopotoina o Isaraelu?

Ua faaali mai pea e le Alii Lona finagalo ia i tatou i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30). O lea, e le tatau ai ona tatou maofa i mea e foliga mai o mea itiiti ona o lo latou natura faigofie ma fai faafia, aua ua uma ona apoapoai mai le Alii ia i tatou e faapea “e manuia lava i latou o e e faalogologo i a’u mataupu, ma ua’i mai o latou taliga i la’u fautuaga, ona o le a latou aoaoina le poto; ona o ia o lē na te taliaina o le a Ou tuu atili i ai” (2 Nifae 28:30

Ou te molimau atu e ala i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” ma i le faalogo i fautuaga a o tatou taitai, o le a tatou maua suau’u i o tatou lamepa e mafai ai ona tatou tuuina atu i isi le malamalama e pei ona poloaiina ai i tatou e le Alii.

A o i ai le tele o mea e mafai ona tatou faia ina ia avea ai o se malamalama ma se tagavai mo isi, e tolu ni mea ou te manao e taulai i ai; tausiaina o le aso Sapati; faanatinatiina o le galuega o le faaolataga i itu uma o le veli; ma le aoao atu i le ala a le Faaola.

O le malamalama o loo tatou talanoa i ai e sau mai le tuuto tatou te tuuina atu i le tausiga o le aso Sapati, i le Lotu e faapena foi i le aiga; o le malamalama e tuputupu ae a o tatou tausia i tatou lava ia lē pisia mai le lalolagi; o le malamalama e sau mai le osi a’e o ō tatou faamanatuga i Lona aso paia ma mai le avatu o lo tatou tautinoga i le Silisili Ese, o mea uma ia e mafai ai ona tatou maua pea Lona Agaga e faatasi ma i tatou. O lena malamalama lea e tuputupu ae ma mafai ona vaaia pe a tatou toe foi i le aiga ma le lagona o le faamagaloga lea na saunoa i ai Peresitene Henry B. Eyring i le konafesi aoao ua tuanai ia Oketopa na ia faapea mai: “I faamanuiaga uma e mafai ona tatou faitauina, o le faamanuiaga aupito silisili, o le lagonaina o le faamagaloga lea e oo mai pe a tatou aai i le faamanatuga. O le a tatou lagonaina le alofa sili atu ma le talisapaiaina o le Faaola, o le ana le taulaga le mafuatia ua mafai ai ona faamamaina i tatou mai le agasala” (“Lotofaafetai i le Aso Sapati, Liahona, Nov. 2016, 100).

A o tatou tausia le paia o le aso Sapati ma aai ma feinu i le faamanatuga, e le gata ina faamamaina i tatou, ae e tupu susulu foi lo tatou malamalama.

E tupu foi lo tatou malamalama a o tatou tuuto atu ma faapaiaina le taimi e saili ai suafa o o tatou tuaa, ave o latou suafa i le malumalu, ma aoao o tatou aiga ma isi ia faia lea mea e tasi.

O lenei galuega faalemalumalu ma talafaasolopito o aiga lea tatou te tausoaina faatasi ma Au Paia i itu uma o le veli ua tele ina agai i luma i lo se isi lava taimi a o fausiaina malumalu o le Alii. I le maua ai e malumalu i le taimi nei o taimi faatulagaina faapitoa mo vaega faaleaiga o e o mai ma o latou lava kata o igoa faaleaiga, sa ma maua ai ma lou toalua ni aafiaga matagofie a o matou auauna atu faatasi i le malumalu ma le ma fanau ma fanau a fanau.

Pe a tatou maua ma ave ni igoa i le malumalu ma aoao foi isi i le auala e faia ai, o loo tatou susulu atu o ni tagavai po o le sulu.

O le aoaoina ina ia aoao atu e pei ona aoao le Faaola o se isi auala lea e mafai ai ona tatou tutulai ma susulu atu. Ou te olioli faatasi ma tagata uma o e o aoao pe faapefea ona aoao atu i le ala a le Faaola. Faataga au e faitau atu mai le faava’a o le tusi lesona fou o le aoao atu: “O le faamoemoega o faiaoga uma o le talalelei—matua uma, o faiaoga uma ua valaauina, o faiaoga o aiga ma paga asiasi uma, ma i latou uma e mulimuli ia Keriso—o le aoao o aoaoga faavae manino o le talalelei, e ala i le Agaga, … ia mafai ai ona fesoasoani i fanau a le Atua e fausia lo latou faatuatua i le Faaola ma avea atili e pei o Ia” (Aoao Atu i le Ala a le Faaola [2016]).

I le taimi nei, e uuina i luga e le faitau afe o o tatou faiaoga faatuatua se malamalama a o latou aoao le auala e aoao atu ai i le ala a le Faaola. I lenei tulaga, o le fonotaga faaleaufono fou a faiaoga o se auala e tutulai ai ma susulu atu a o feiloai tamaiti aoga i le tagavai o le aoaoga faavae a Keriso, aua “o le ki e aoao atu ai e pei ona aoao atu le Faaola o le ola ai i le ala na soifua ai le Faaola” (Aoao Atu i le Ala a le Faaola, 4).

A o tatou aoao atu ma aoaoina mai uma i Lona ala ma avea atili e pei o Ia, e tupu susulu lo tatou malamalama ma e le mafai ona natia ma e avea ma se tagavai ia i latou o e o loo saili mo le malamalama a le Faaola.

Ou uso e ma tuafafine pele, e le tatau lava ona tatou natiaina lo tatou malamalama. Sa poloaiina i tatou e lo tatou Faaola ina ia faasusulu atu lo tatou malamalama e pei o se aai i luga o se mauga po o le ia pei o se malamalama mai se tuugalamepa. A tatou faia lea mea, o le a tatou faamamaluina lo tatou Tama oi le Lagi. E tuuina mai e le talalelei a le Faaola ma Lana Ekalesia ia i tatou le tele o avanoa mo lo tatou malamalama ina ia avea ai o se vaega o le tagavai silisili mo atunuu.

Ou te molimau o Iesu Keriso o le malamalama lea e tatau ona tatou faataitai i ai, i le suafa o Iesu Keriso, amene.