Kahtoiyacn Ma Muhtahl
Pahpah tuhmasr Inkuhsrao El use nuh sesr kunohkohn nuh kwewa kuht in kuh in muhtahl oacna El pa muhtahl.
Ke nga ahkolah nuh ke toeni se inge, insiyuck foracng nuh sin tahmtahel luhlahlfongi pucspucs nga ohsun nuh se uh, acn nuh kwewa. Nuh sihk, ohiyac wo emet in ahkuhtweyac oasr ke psalm in kuloh sel Tohkohsrah David: “Kaksakin Ine wolana lun Leum God; Fahsru nu in Tempul lal ac use mwe sang lowos nu sel. Epasr ye mutun El su Mutal ke El sikyak.”1
Nga liye kahtoiyacn ma muhtahl ke tahmtahel suc insiyac uh oasr infulwen ma wo nuh kwewa, suc kena in oacna Mwet Lahngo. Elos sang nguhn, insiyac, kuh, ac nuhnak lalos nohfohn nuh sin Leum ke ohiyacn moul lalos lwen nuh kwewa.2 Ohiyac muhtahl tuhkuh ke srihke in karihngihn masap ac ahkfuhlwactye wuhlweacng kuht oraclah yurun God. Ohiyac muhtahl pa in oraclah sulaclah ma kuh in karihngihn Nguhn Muhtahl in kol kuht.3 Ohiyac muhtahl pa in som liki kena luhn ikoac ac ekihn “mwet luhlahlfongi nuh ke iwaclah luhn Kraist suc Leum.”4 “Kais sie pacl nohfohn ke [moul lasr] enenuh in ahkmuhtahlyeyucklac nuh sin Leum.”5
God luhn inkuhsrao El sapkihn tuhlihk nuhtin Israel, “Nga pa Leum God lowos, ac kowos enenu in liyekowosyang sifacna tuh kowos in mutal, mweyen nga mutal.”6
Elder D. Todd Christofferson el luti, Pahpah Tuhmasr Inkuhsrao pa God se ke finsrak fuhlwact. … El siyuck kuht in muhtahl kuht in muh kuh in muhta ke wolacna luhn celestial (liye D&C 88:22) ac muhta yohrohl (liye Moses 6:57).”7 Lectures on Faith ahkuhtweyac, “Wacngihn mwet kuh in wi wolacna lal elos fin tiac oacna El ke suwohswohs ac muhtahl.”8 Pahpah tuhmasr Inkuhsrao El etwekuht. El luhngse kuht ac El use ma nuh kwewa kuht enenuh in ahkmuhtahlyeyucklac oacna El muhtahl.
Kuht pa muhtwacn nuhtin Pahpah Lucng, ac kais sie sesr sruok ma lucng me ke ohiyac muhtahl. Pahpah tuhmasr Inkuhsrao El fahkwack lah El pa God, ac Inel pa Mwet Muhtahl se.9 Ke facluh met liki kuht tuhkuh nuh facluh, kuht luhngse Pahpah tuhmasr ac alu nuh Sel. Kuht kena in oacna El. Ke srihpen luhngse suwohswohs luhn pahpah, El sang Wen Kuloh Nahtuhl, Jisus Kraist, in Mwet Lahngo ac Molwelah lasr. El pa Wen nuhtin Mwet suc Muhtahl.10 Inel pa Muhtahl,11 El suc Muhtahl luhn Israel.12
Finsrak lasr in muhtahl pa in infulwen Kraist, ke pahkomuhta Lal ac kuhlwacng Lal. Ke luhlahlfongi nuh sin Jisus Kraist ac Iwaclah Lal, kuht kuh in nwacsnwacslah ke tiac fohkfohk ke kuht lahfwekihn kuhtlac sifacna ke ma koluk uh13 ac auliyak na pwacye. Kuht pacptaislac ke kof in eis nuhnak muhnahs ke ma koluk lasr. Nguhnasr ahknwacsnwacsyeyucklac ke kuht eis Nguhn Muhtahl ke kuht ikacslah insiacsr. Wik nuh kwewa, kuht ipeis kuhfa luhn Leum. Ke sie nguhn luhn auliyak ke kena pwacye in suwohswohs, kuht olwelah in eis inen Kraist, Esamuhl, ac liyacng masap Lal kuht in muh kuh in eis Nguhn Lal in oasr yohrohsr. Tukun kuhtuh pacl ke kuht kampare srihke in ma sefanna yurin Pahpah, Wen, ac Nguhn Muhtahl, kuht eis ohiyac lucng me lalos.14
Muhtahliyac Pa Karihngihn Wuhlweacng Lasr Uh
Kuht akihlen sikeng, mwe sruhf, ac ma upac puhkantwen ma kuh in ul kuhtlac liki acn ma kuhlwacng ac ahkfuhlwact ye muhtuhn God. Tuhsruhktuh moul lasr lwelah kuht in sulwaclah ma muhtahl. Inkaiyacn pacl uh tuhkuh ke kihsac kuht oruh in karihngihn wuhlweacng lasr ma ahknwacsnwacsye kuht ac oruh kuht in muhtahl.
Nga liye ma muhtahl ke luhmahl Evangeline, muhtwacn fuhsr se suc matwac yac 13 fin acn Ghana. Sie ohiyac el karihngihn wuhlweacng lal pa ke el ahkfalye kunohkohn lal ke prestuhn luhn Beehive. El puhsisacl in ahkuhtweyac lah el som nuh ke lohm sin kawuck lal, muhtwacn fuhsr suc tilac wi alu, in siyuck sin pahpah ninac kiyaclos in lwelah elos in tuhkuh wi alu. Pahpah ac ninac an fahk nuh sel lah upac mweyen Sacnri pa lwen tuhlihk an enenuh in oruh orekma lalos in lohm uh. Na Evangeline el som ac kahsruh ke orekma lalos, ac ke orekma lal kawuck lal an eis lwelah inkaiyacn pacl uh in wi alu.
Kuht fin karihngihn wuhlweacng inge, akwuck sacohk luhn pristut an fah ikihl kuhtlac, ahknwacsnwacsye kuhtlac, ac ahkoe kuhtlac in utyak nuh ye muhtuhn Leum.15 Na kuht kena in akacsruhi ke ma toasr luhn kais sie, kuht ahkfokokoye sie sin sie. Kuht eis nuhnak muhnahs ke ma koluk ke kuht sang kahsruh ke ma luhn nguhn ac mahno nuh sin mwet suhkahsruhp, mwet masrinsrwacl, mwet kohflohfohl, ac mwet mas uh.16 Kuht in sifacna liye kuhtyang liki ma koluk luhn facluh ke kuht karihngihn lwen Sahpuht ac eis ke nwacsnwacs kuhfa luhn Leum ke lwen muhtahl luhn Leum.17
Kuht ahkinsewowoye sucu lasr ac oraclah lohm sesr in acn muhtahl. Kuht kutongyac kena lasr kuht in muh kuh in sesseslah ke luhngse suwohs ac ma pahtpaht.18 Kuht saplakyang nuh sin mwet sahyac ke kuhlwacng, pahkomuhta, ac tu oacna sie mwet loh luhn God. Kuht eklac in mwet luhn Sion, ke insiyac sefanna ac nuhnak sefanna, mwet nwacsnwacs se suc muhta tuhkweni ke sefannalac ac suwohswohs.19 Sion enenuh in ahkyohkye ke ma kahto ac muhtahl.20
Tahmtahel an, tuhkuh nuh ke lohm tempuhl. Kuht fin mwet muhtahl suc ahkolah in eis Mwet Lahngo ke tuhkuh Lal, kuht enenuh in tuyak ac nokomwacng karmacn kahto lasr.21 Ke kuh ac suwohs, kuht som liki ohiyacn facluh ac karihngihn wuhlweacng lasr kuht in muh kuh in “nukumyuckyang ke nwacsnwacs, ahok, finne ke nuknuk luhn suwohswohs.”22
Muhtahliyac El Us Nguhn Muhtahl oacna Mwet Kol Lasr
Muhtahliyac pa mwe sang luhn Nguhn. Kuht insesekihn mwe sang se inge ke kuht sulwaclah in oruh ma ac fah ahkyohkye kuh in ahknwacsnwacsye luhn Nguhn Muhtahl ke moul lasr.
Ke Martha el eis Jisus Kraist nuh lohm sel, el puhla kena yohk in kuhlwacnsapuh Leum in oruh ma wo emet ke ma el kuh in oruh. Muhtwacn wiyacl, Mary, sulwaclah in muhta “sisken nien Leum” ac in lohng kahs Lal. Ke Martha el puhla toasr ke kuhlwacnsap sahyacn kahsruh, el tohrkahskahs, “Leum, ya pilasr sum ke tamtael se luk inge fuhlela ngan mukena oru orekma uh?”
Nga luhngse kahs fihsrwacsr in ahksuwohsye tuh nga kuh in nuhnkuh kac. Ke luhngse suwohswohs, ac pahkomuhta ma pahtpaht, Mwet Lahngo El topuk:
“Martha, Martha! Kom fosrnga ac lokoalok ke ma puspis, a ma sefanna pa enenyuk uh.
“Mary el sulela ma se ma wo uh, su ac fah tiana itukla lukel.”23
Tahmtahel, kuht in ahkmuhtahlyeyucklac, kuht enenuh lutlut fuhkah in muhta ke nien El suc Muhtahl luhn Israel ac sang pacl nuh ke ma muhtahl. Yac kuht ac fihliyac phone, tahk ke ma in orek wacngihn sahflah kac, ac luhngse luhn facluh? Pruhe, riti, lutlut, ac ukwe kahs luhn God suli kuh in ahknwacsnwacs ac ahkkweye Lal nuh ke nguhnasr. Lwelah kuht eis pacl in muhtahl kuht in muh kuh in sesseslah ke Nguhn muhtahl ac nwacsnwacs Lal. Ke Nguhn Muhtahl in mwet kol lasr, kuht ac ahkolah in eis Mwet Lahngo ke kahtoiyacn ma muhtahl.24
Muhtahl Pa ekihn Mwet Luhlahlfongi se nuh ke Iwaclah luhn Jisus Kraist
Ke kahs moklweyuck lal Tohkohsrah Benjamin, elos suc eklac nuh ke mwet luhlahlfongi ke Iwaclah luhn Jisus Kraist pa elos suc fihlpacp, fakpacp, mongfihsrwacsr, muhtweng, ac sesseslah ke luhngse, oacna Mwet Lahngo.25 El palye lah Jisus Kraist, “Leum Kuhlacna Suc kol, Suc tuh, ac pa moul ma pahtpaht nuh ke moul ma pahtpaht nuhkwewa, fah oactui liki inkuhsrao inmahsrlon tuhlihk nuhtin mwet, ac fah muhta ke lohm muhtahl ma oreklac ke kle.” El tuhkuh in ahkinsewowoye mwet mas, suhkahpahs, sohlohngkahs, ac kun ac ahkmoulyeack mwet suc misac ke moul. Tuhsruhktuh El kweok “yohk liki ma mwet uh kuh in kweokkihn, sahyacn na misac.”26 Ac finne El pa mwet sefanna suc molwelah kuh in tuhkuh, El isruhnyuck, ahkngalyeyuck, ac srihpsrihpyak. Tuhsruhktuh Wen nuhtin God moulyak liki inkuclyuck kuht in muh kuh in kuhtanglah misac. El pa sie suc fah tu in nuhnuhnkuh facluh ke ohiyac suwohswohs. El pa sie suc fah molikuhtlac nohfohn. El pa El suc Muhtahl luhn Israel. Jisus Kraist pa kahtoiyacn ma muhtahl.
Ke mwet lal Tohkohsrah Benjamin lohng kahs lal, elos puhtatlac nuh infohk uh ac yohk inse puhsisacl ac efahl lalos ke kuhlwacng ac wolacna luhn God lasr. Elos akihlen moul in ikoac lalos. Yac kuht ac liye mwe enenweyuck lasr nuh ke kuhlwacng ac pahkomuhta luhn Kraist Leum lasr? Yac kuht akihlen lah mwe sang wo nuh kwewa, ke ma luhn facluh ac nguhn, tuhkuh nuh sesr sin Kraist me? Yac kuht esam lah ke srihpen plwacn ma pahtpaht luhn Pahpah, mihslac ke moul se inge ac wolacna luhn ma pahtpaht pa ma lasr ke ohiyac sefanna nuh sin Wen Muhtahl Nahtuhl?
Lwelah kuht in wi mwet lal Tohkohsrah Benjamin ke elos tuhng ke puhsra se fanna, “O pahkotwen, ac orekmakihn srah in iwaclah luhn Kraist tuh kuht in eis nuhnak muhnahs ke ma koluk lasr, ac insiacsr in nwacsnwacslah; tuh kuht luhlahlfongi Jisus Kraist, Wen nuhtin God, suc oraclah inkuhsrao ac facluh, ac ma nuhkwewa.”27
Nga fahkwack ke kuht tuhkuh nuh sin El suc Muhtahl luhn Israel, Nguhn Lal fah tuhkuh nuh sesr tuh kuht ac kuh in sesseslah ke engan ac eis nuhnak muhnahs ke ma koluk ac mihslac ke nuhnak lasr.
Pahpah Lucng El use nuh kais sie sesr ohiyac in eklac nuh ke ma muhtahl. Lwelah kuht in oruh kuh lasr in karihngihn wuhlweacng lasr ac eis Nguhn Muhtahl ke mwe kol lasr. Ke luhlahlfongi ke Jisus Kraist, kuht in eklac in Mwet Luhlahlfongi nuh ke Iwaclah Lal lah kuht kuh in eis moul ma pahtpaht yurin God ac sang nuh sin God Pahpah tuhmasr wolacna ke Inel. Lwelah moul lasr in mwe sang muhtahl lah kuht kuh in tu yac muhtuhn Leum ke kahtoiyacn ma muhtahl. Ke inen sacohk Jisus Kraist, amen.