2010–2019
Kwojarjar Eo Eaiboojoj
Eprōļ 2017


Kwojarjar Eo Eaiboojoj

Jemedwōj Ilan̄ eaar letok n̄an kōj aolep men ko remenin aikuj bwe jān maron̄ erom kwojarjar āinwōt E ekwojarjar.

Ke iaar kōppopo n̄an kweilo̧k in, būruwō eaar io̧kļo̧k elōn̄ kōrā ro retiljek me iaar ioon er, ijin im ijoko rettoļo̧k. N̄an n̄a, erro kar kōmeļeļeik ilo juon al in kam̧m̧oolol jān Kiin̄ David: “Leļo̧k n̄an Irooj aiboojoj kōn etan: bōktok juon joortak, im itok n̄an im̧aan: kom̧win kabun̄ n̄an Jeova ilo kwōjarjar e aiboojoj.”1

Ij lo kwojarjar eo eaiboojoj ippān sister ro me būruweer edāpdāp ilo aolep em̧m̧an otemjeļo̧k, ro rekōņaan āinwōt Rilo̧mo̧o̧r eo. Rej wūjļepļo̧k aolepān aer, būruweer, aer ļōmņak, im aer kajoor n̄an Irooj ilo jabdewōt wāween rej mour kake kajjojo raan.2 Kwojarjar ej ilo kajjieon̄ im kakkōt n̄an kōjparok kien ko im n̄an kautiej bujen ko jaar kōm̧m̧ani ippān Anij. Kwojarjar ej kōm̧m̧ani kālet ko me renaaj dāpij Jetōb Kwojarjar eo āinwōt ad tōl.3 Kwojarjar ej likūt aolep men ko ad im erom “juon rikwojarjar kōn pinmuur eo an Kraist Irooj.”4 “Aolep iien ilo [mour ko ad] reaikuj in kwojarjar n̄an Irooj.”5

Anij eaar kakien ro nejin Israel, “Bwe N̄a Jeova ami Anij; kōn men in kom̧win make kokwōjarjar kom̧, im kom̧win kwōjarjar; bwe N̄a I kwōjarjar. Im kom̧win jab kabwidejdej kom̧.”6

Elder D. Todd Christofferson eaar kwaļo̧k: “Jemedwōj Ilan̄ ej juon Anij eo eutiej kōtmāne ko an. … Jibadbad ko An n̄an kōkwojarjar kōj bwe jān maron̄‘pād ilo aiboojoj eo an celestial’ (K&B 88:22) im ‘pād im̧aan mejān’ (Moses 6:57).”7 Lectures on Faith ej kwaļo̧k, “Ejjeļo̧k armej emaron̄ lan̄lōn̄ ilo aiboojoj eo an ilo an ejjeļo̧k weppān ko im kwojarjar ko an.”8 Jemedwōj Ilan̄ ejeļā kajjeed. Ej iakwe kōj, im Eaar letok n̄an kōj aolep men ko remenin aikuj bwe jān maron̄ erom kwojarjar āinwōt E ekwojarjar.

Jej leddik ro nejin Jemedwōj Ilan̄, im kajjojo iaad ewōr juon an jolet kwojarjar ekwojarjar. Jemed Ilan̄ eaar ba, “Lo, N̄aij Anij; Armej in Kwōjarjar ej Eta.”9 Ilo mour eo m̧okta, jaar iakwe Jemed wōj im kar kabun̄jar n̄an E. Jaar kōņaan erom āinwōt E. Kōn iakwe eo An, Eaar letok Nejin Wōt Ejitōn Bōro, Jisōs Kraist, bwe en ad Rilo̧mo̧o̧r im Ripinmuur. E ej Nejin Armej Ekwojarjar.10 “Etan ej Ekwojarjar,”11 “eo Ekwojarjar in Israel.”12

Ad kōjatdikdik kōn kwojarjar en dāpdāp ilo Kraist, ilo tūriam̧o eo An im An jouj. Kōn tōmak ilo Jisōs Kraist im An Pinmuur, ekōm̧m̧an bwe jen erreeo, kōn ejjeļo̧k lippijinjin, n̄e jej kaarmejjete kōj make jen men ko renana13 im lukkuun ukwelo̧k. Jaar peptaij jān tulo̧k ilo dān n̄an jeorļo̧k jero̧wiwi ko. Jetōb ko ad kar kakkwojarjare ke jaar bōk Jetōb Kwojarjar kōn bōro ko rem̧ool. Kajjojo wiik, jej bōk m̧ōttan kain̄i eo an kwojkwoj. Ilo juon jetōbin ukwelo̧k, kōn ikdeelel n̄an wānōk, jej kallim̧ur bwe jenaaj bōk iood etan Kraist, keememej E, im kōjparok kien ko An bwe Jetōb eo An en maron̄ pād ippād iien otemjej. Aolep iien, ilo ad wōnm̧aanļo̧k im kajjieon̄ erom juon wōt ippān Jemen, im Nejin, im Jetōb Kwojarjar, jej erom ribōk kwojarjar eo Aer.14

Kwojarjar Ej Kōjparok Bujen ko Ad

Jej kile aolep mālijjon̄ ko, kapo ko, im apan̄ ko me remaron̄ bōk kōj jān aolep men ko rerreeo im em̧m̧an ekōnono im̧aan Anij. Ak en̄jake ko ilo mour in ad eletok ad iien em̧m̧an n̄an kālet kwojarjar. Enan̄in aolep iien kaarmejete eo jej kōm̧m̧an e n̄an kōjparok bujen ko ad me ej kōkwojarjar kōj im kōm̧m̧an ad ekwojarjar.

Pija
Evangeline, juon jiron̄ in Ghana

Iaar lo ekwojarjar iturin mejen Evangeline, juon leddik 13 an iiō ilo Ghana. Juon iaan wāween ko ej kōm̧m̧an n̄an dāpij bujen ko ilo an kōm̧m̧ane kūr eo an āinwōt juon kūlaaj būreejtōn ilo Beehive. Eaar kwaļo̧k bwe eaar etal n̄an m̧oko m̧ōn ro m̧ōttan, leddik ro rejāniknik, im kōnono ippān ro jineer im jemāer n̄an kōtļo̧k bwe ren itok im jar. Ro jineer im jemāer raar jiron̄ leddik in ke ebwe an pen bwe Jabōt ajri ro rej aikuj kōm̧m̧ani jerbal ko ilo m̧weeo. Kōn menin Evangeline eaar ilo̧k im jipan̄ kōm̧m̧ani jerbal ko, im kōn kijejeto ko an ro m̧ōttan raar maron̄ itok im jar.

Eļan̄n̄e jenaaj kōjparok bujen ko ad, kain̄i ko an priesthood eo ekwojarjar renaaj ukōt kōj, kōkwojarjar kōj, im kōpooj kōj n̄an deļo̧n̄ im̧aan mejān Irooj.15 Kōn menin jej ineek eddo ko an doon; jej kōkajoor doon. Jej ettoļo̧k jān jerawiwi ko n̄e jej leļo̧k jipan̄ ilo jetōb im ilo kanniōk n̄an rijeram̧ōļ ro, ro rekwole, ro rekāālwan, im ro rinan̄inmej.16 Jej kōjparok kōj make jen anjiwiwi ko an laļ in n̄e jej kōjparok raan in Jabōt im erreo n̄an bōk kwojkwoj eo ilo raan eo ekwojarjar an Irooj.17

Jej kōjeram̧m̧an baam̧le ko ad im kōm̧m̧an bwe m̧o̧ko im̧ōd ren jikin ko rekwojarjar. Jej kōjekiik aolep ikdeelel ko ad bwe jen maron̄ obrak kōn iakwe.18 Jej loļo̧k ro jet kōn jouj, kōn tūriam̧o̧, n̄an jutak āinwōt rikam̧ool ro an Anij. Jej erom juon armej in Zaion, kōn juon wōt bōro im ļōmņak, juon armej eo ewānōk ro rej kuk ippān doon ilo kwojarjar.19 “Bwe Zaion eaikuj ļapļo̧k ilo wūlio, im ilo kwojarjar.”20

Sister raņ, itok n̄an tampeļ. Eļan̄n̄e jej aikuj in armej eo rekwojarjar n̄an pojak n̄an bōk Rilo̧mo̧o̧r ilo itok eo An, jej aikuj jerkak im kōņak karmen ko ad raiboojoj.21 Ilo kajoor im kautiej, jej juļo̧k kōm̧m̧an ko an laļ in n̄an kōjparok bujen ko ad, bwe jen maron̄ “kalibobo kōn erreeo, aaet, em̧ool kōn liboror ilo weeppān.”22

EKwojarjar Ej Bōk Jetōb Kwojarjar eo āinwōt Ad Unin Tōl

Ekwojarjar ej juon menin letok an Jetōb. Jej bōk menin letok in n̄e jej kālet n̄an kōm̧m̧ani men ko rem̧m̧an me naaj kōļapļo̧k kajoor in kōkwojarjar eo an Jetōb Kwojarjar ilo mour ko ad.

Pija
Meri eaar ron̄ naan ko an Rilo̧mo̧o̧r

Ke Marta eaar kadeļo̧n̄e Jisōs Kraist ilo m̧weo im̧ōņ, eaar en̄jake juon kōņaan in jerbal n̄an Irooj jon̄on wōt an maron̄. Im jaten kōrā etan Meri, ej jijet iturin “neen Jisōs’ im” ron̄ An in naan. Ke Marta eaar en̄jake eddo in jerbal ilo ejjeļo̧k jipan̄, liin kajjitōk, “Irooj, men in jekdo̧o̧n Ippam̧ ke, bwe jatū kōrā ear likūt eō bwe in make jerbal?”

Em̧m̧an ippa naan in kōkketak ko imaron̄ in antooniļo̧k. Kōn iakwe eo ewāppen im tūriam̧o̧ eo ejjeļo̧k jem̧ļo̧kin, Rilo̧mo̧o̧r eo eaar uwaak:

“Marta, Marta, kwōj inepata im abṇōṇō kōn elōn̄ men:

“A juon wōt men in aikuj: im Meri ear kāālōt ājinkōj eo em̧m̧an, im jāmin bōkļo̧k e jān e.”23

Sister raņ, bwe jen ekwojarjar, jej aikuj katak n̄an jijet iturin neen Juon eo Ekwojarjar in Israel n̄an leļo̧k iien n̄an kōkwojarjar. Jej ke likūt iturejet phonk ko nejid, laajrak in men ko kōm̧m̧ani, im men ko wujwaan mour in? Jar, ekkatak, im ron̄jake naan in Anij ej kinaak tok An jeo̧rļo̧k im iakwe in kemour n̄an jetōb ko ad. Jen bōk ad iien n̄an erom kwojarjar, bwe jān maron̄ obrak kōn An kwojarjar Jetōb in kokwojarjar. Kōn an Jetōb Kwojarjar eo āinwōt ad unin tōl, jenaaj pojak n̄an bōk Rilo̧mo̧o̧r eo ilo ekwojarjar e aiboojoj.24

Kwojarjar Ej Erom juon Rikwojarjar kōn Pinmuur eo an Jisōs Kraist.

Ekkar n̄an naan in im̧we ko an Kiin̄ Benjamin, e eo ej erom kwojarjar kōn Pinmuur eo an Jisōs Kraist rej ro rej ettā, ineem̧m̧an, ettā bōro, kem̧m̧aanwa, kijenmej, im obrak kōn iakwe, āinwōt Rilo̧mo̧o̧r eo ej.25 Eaar kanaan bwe Jisōs Kraist, “Irooj Ekajoor Bōtata eo ej irooj, eo Eaar, im ej jān indeeo n̄an indeeo, naaj wanlaļtak jān lan̄ ilubwiljin ro nejin armej, im naaj jokwe ilo ānbwinnin kle.” Enaaj ilo̧k im kōmour rinan̄inmej, kōjerkak ro rekūrro, im karon̄ ļo̧kjeņ ro rejaron̄jaron̄, im kāloļo̧kjeņ ro repilo, im kajerkak ro jen mej n̄an mour. Im aaet Eaar en̄taan “em̧ool eļapļo̧k jān armej emaron̄ en̄taan, ijello̧kun wōt n̄e n̄an mej.”26 Im aaet Ej make wōt bwe lo̧mo̧o̧r en itok, kar kajirere kake E, kar den̄ļo̧k E, im kar dōbweel. Ak Nejin Anij eaar jerkak jān lōb, bwe jen aolep maron̄ anjo̧ jen mej. E eo enaaj jutak im ekajete laļ ilo kwojarjar. E eo enaaj lo̧mo̧o̧reņ kōj aolep. E eo ej Rikwōjarjar Eo an Israel. Jisōs Kraist ej kwojarjar e eaiboojoj.

Ke armej ro an kiin̄ Benjaman raar ro naan ko an, raar pedo n̄an laļ, bwe aer ettā eļap im kautiej n̄an jouj im aiboojoj eo an ad Anij. Raar kile mour ko aer. Jej ke lo ad atartar ilo jouj im tūriam̧o̧ an Kraist, ad Irooj? Jej ke kile bwe aolep menin letok rem̧m̧an, jetōb im kanniōk, letok n̄an kōj kōn Kraist? Jej ke keememej bwe ekkar n̄an karōk eo an Jemed indeeo, aenōm̧m̧an ilo mour in im aiboojoj ko an indeeo rej ad make ilo im kōn Nejin Ekwojarjar?

Jen kobaļo̧k ippān armej ro an kiin̄ Benjamin ke raar lam̧ōj kōn juon wōt ainikien, im ba: “O Kwōn tūriam̧o, im kōjerbal bōtōktōkin pinmuur eo an Kraist bwe kōmin maron̄ bōk jeorļo̧k bōd in jero̧wiwi ko am̧, im būruōm̧ ren karreo; bwe kōmij tōmak ilo Jisōs Kraist, Nejin Anij, eo eaar kōm̧anm̧an lan̄ im laļ, im men otemjej.”27

Ij kam̧ool bwe ilo ad itok n̄an Eo Ekwojarjar in Israel, An Jetōb enaaj itok iood, bwe jen maron̄ in obrak kōn m̧ōņōņō, bōk jeo̧rļo̧kin bōd kōn ainikien aenōm̧m̧an.

Jemedwōj Ilan̄ eaar letok n̄an kōj jon̄an ad kwojarjar. Men bwe jen kōm̧m̧ane ijo em̧m̧an tata ilo kōj n̄an kōjparok bujen ko ad im bōk Jetōb Kwojarjar āinwōt ad ritōl. Kōn tōmak ilo Jisōs Kraist, jen kajieon̄ erom rikwojarjar ro ilo Pinmuur eo An, bwe jen maron̄ bōk mour jab wanbanban im mour indeeo im bōk aiboojoj eo an Anij Jemed kōn etan. Kōm̧m̧an bwe mour ko ad ren menin leļo̧k ekwojarjar, ilo ad jutakim̧aan Irooj ilo kwojarjar eo eaiboojoj. Ilo āt eo ekwojarjar etan Jisōs Kraist, amen.