2010–2019
Lingan en Me Sarawi
Epreil 2017


Lingan en Me Sarawi

Samatail Nanleng ketin kaunopadahr soahng koaros me kitail anahne pwehn kak wiahla aramas sarawi kei duehte Ih me sarawi.

Ni ahi kaunopehng tiepene wet, mohngiongi tamandahr riei lih pwoson tohto me I tuhwengehr, nan wasa koaros. Ohng ie, dahme keiou kak kasalehda mwomwarail pahn kohsang nan ehu melkahka en Nahnmwarki Dehpit: “Kumwail kapinga lingan en mwaren Kauno; kumwail patohwando amwail meirong, oh patohlong nan Tehnpese: kumwail poaridi mwohn Me Sarawio, ni eh pahn ketido.”1

I kin kilang lingan en me sarawi rehn riei lihakan me arail mohngiong kan kin kesempwalki soahng koaros me mwahu, me men duwehla Sounkomouro. Irail mweidala palingenarail koaros, mohngiong, roson, lamalam, oh kehl ohng Kauno ni mwomwen ahr momour ni ehu ehu rahn.2 Me Sarawi kin kohsang ni nananti oh kehlail en momourki kosonned kan oh wauneki inou kan kitail wiahngehr Koht. Me sarawi iei wihwiahda pilipil me pahn kolokol Ngehn Sarawi en wia atail sounkaweid. 3 Me Sarawi iei pwilikihdi pein insenatail kan oh wiahla souleng men sang Tomwpen Dihp en Krais atail Kaun.” 4 “Ansou koaros nan atail mour kan anahne kasarawiheng Kauno.”5

Koht en nanleng ruwesehier serihkan en Israel, “Ngehi Kauno amwail Koht: kumwail eri pahn sarawihla, pwehki ngehi me sarawi: kumwail dehr kasamine kumwailla.”6

Elder D.  Todd Christofferson padahngkiher; “Samatail Koht Nanleng wia Koht emen me kasik mehkot laud sang kitail. … Koht kupwurki kitail en sarawihla pwe kitail en kak ‘warohng klohri en selehstiel’ (D&C 88:22) oh ‘mihmihla rehn Kauno’ (Moses 6:57).”}).”7 Lectures on Faith kawehwe, “Sohte aramas kak insenamwahuki Sapwellime klohri ni ah sohte alehda Sapwellime unsek oh me sarawi kan.” 8 Samatail Nanleng mwangih kitail. E poakehng kitail oh E ketkiheng kitailehr koaros me anahn pwe kitail en sarawihla duwehte Ah ketin sarawi.

Kitail Sapwellimen Sahm Nanleng lih, oh emen emen kitail ahneki sohsohn me sarawi. Samatail Nanleng pakair kidahr me Ih me Koht, oh Mware iei Koht Sarawien Israel. 9 Nan sapwen ngehno, kitail poakehng Samataillo oh pwohngih Ih. Kitail men duwehla Ih. Pwehki Sapwellime limpoak en pahpa, E ketkiheng kitail Sapwellime Pwutak Kempoako, Sises Krais, en wia atail Sounkomour oh Soundoar. Ih iei Sapwellimen Koht Sarawien Israel Pwutak. 10 Mware me Sarawi,” 11 “Koht Sarawien Israel.” 12

Atail koapwoaroapwoar ohng me sarawi kin poahsoandahsang Krais, nan Sapwellime mahk oh kalahngan. Sang ni pwoson Sises Krais oh Sapwellime Tomwpen Dihp, kitail kak mwakelekela, ni sohte mwahi, ansou kitail mendahkihla pein kitail ohng soahng suwed kan13 oh koluhla ni mehlel. Kitail kin pepdaiskihla pihl ohng mahkpen dipatailkan. Pali ngenatail kan kin mwakelekelada ansou kitail alehda Ngehn Sarawi ni mohngiong mwahu. Ehu ehu wihk, kitail kin alehda tiahk sarawi en kamadipw sarawi. Ni ngenen koluhla, ni ineng mehlel ohng me pwung, kitail inoukihda me pein kitail men patohwan ale mwaren Krais, oh patohwan tamatamaniki Ih, oh kapwaiada Sapwellime kosonned akan pwe Sapwellime Ngehn en ketiket rehtail. Ni atail pahn doulahte oh nantiheng ehu ohng Sahmo, Ieroso, oh Ngehn Sarawi, kitail kakehr iang alehdi Sapwellimarail sohso sarawi. 14

Me Sarawi Iei Kolokol Atail Inou kan

Kitail kak kasawihada tohtohn mehn kaskuhl, kasongsong, oh kahpwal kan me kak kihsang kitail soahng koaros me mwakelekel oh warohng kaping mwohn Koht. Ahpw mouren sampah kiheng kitail ansou mwahu en pilada me sarawi. Pak tohto tohnmetei kan me kitail wia pwehn kolokol atail inou kan me kamwakelei kitail oh kiheng kitail sarawi.

Kilel
Evangeline, serepein pwulopwul men nan Ghana

I kilangada me sarawi nan mesen Evangeline, kisin serepein sounpar 13-eisek siluh men nan Ghana. Ehu mwomwen ah kin kolokol ah inou kan iei sang kapwaiada ni unsek ah pwukoahn president nan pwihn en Beehive. Ni karakarahk e kawehwehda me e kin kohla ni imwen kempoakepah kan, serepein pwulopwul me solahr sarawi kan, pwe en lokaiahng pahpa oh nohno kan pwe irail en mweidehng irail en iang sarawi. Peneinei kin indahng me e apwal pwe Rahn Sarawi serihkan anahne wia arail doadoahken ihmw kan. Eri Evangeline kin kohla oh sewesehkin irail arail pwukoah kan, oh sang ni ah nantiheng kempoakepah kan kin pak tohto mweimweida en iang sarawi.

Ma kitail kolokol inou kan, tiahk sarawi kan pahn wekid kitailla, kamwakele kitailda, oh kaunopehng kitail en pidelong rehn Kauno.15 Eri kitail kin men wahda en emen emen katoutou kan; kitail kin kakehlailih emen emen. Kitail kin kolokol mahkpen dipatail kan ansou kitail sewesehda palingehn oh paliwar ohng me semwehmwe, me duhpek, me kilisou, oh me soumwahu.16 Kitail kin kanaiehng pein kitail en dehr saminla ansou kitail wauneki Rahn Sarawi oh warohng tungoale kamadipw sarawi ni Sapwellimen Kauno rahn sarawi.17

Kitail kin kapaiada atail peneinei kan oh wiahda atail wasahn kousoan kan en sarawi. Kitail kin koledi atail ineng kan pwe kitail en kak direkihla mwakelekel oh limpoak soh imwi. .18 Kitail kin sewese mehteikan ni kadek, ni limpoak, oh wia soun kadehde en Koht. Kitail kin wiahla aramas en Zion kei, me ahneki mohngiong tehieu oh lamalam tehieu, aramas mwakelekel kei me kin mihmi pene ni minimin oh pwung. 19 Zion anahne kehlailla ni lingan, oh ni sarawi. 20

Lih akan, kohdo nan tehnpas sarawi. Ma kitail pahn wia aramas sarawi kei me kaunopehngehr ketdohn Sounkomouro, kitail anahne kesihkerda oh likauihda atail likou sarawi kan. 21 Ni kehl oh wahu, kitail soikala mour en sampah oh kolokol atail inou kan pwe kitail en “likauihada mwakelekel, likoupuhp en pwung.”22

Sarawi iei Alehda Ngehn Sarawi en wia Atail Sounkaweid

Me Sarawi iei kisakis en Ngehno. Kitail alehda kisakis wet ansou kitail pilada wia soahng kan me pahn kalaudehla en Ngehn Sarawi manaman en kamwakel nan atail mour.

Kilel
Mary heard the Savior’s words

Ansou me Marda kasamwohlong Sises Krais nan ihmweho, e ahniki pepehmada ehu anahn laud en papah Kauno uwen ah kak. Rie liho, Meri, pilada en mwohd “impen aluweluwen Sises koa” oh karonge Ah Mahsen kan. Ansou me Marda toutoukilahr ah wie papah oh sohte sawasepe, e akpwungki, “Kaun, komw sohte kediropwki me riei lihet kiheng ie en kelehpw papah?”

I mwahuki mwomwen lipwoar ehu me lokaia kan inenen meleilei sang dahme I kak medewe. Ni limpoak unsek oh kadek soh imwi, Sounkomouro kaweidki

“Marda, Marda, ke pwunodkidahr oh soupisengkilahr soahng tohto:

“A ke en ese pwe soahng teieu me kesempwal kowalahpie: oh Mery piladahr mehkot mwahwie, eri, sohte me pahn adihasang.”23

Riei lihoako, pwe kitail en sarawihla, kitail anahne mwohd ni aluweluwen Koht Sarawien Israelo oh mweidehng ansoun me sarawi. Kitail kin kihlahsang kitail delepwohn, kediropw kan me sohte kin uhdi? oh kediropwen sampah, onop, mahsen en Koht. Lukehiong Sapwelime Mehn kamwakel oh kamwahuiala nan atail mour. Kitail kiheng ansou ohng me sarawi pwe kitail en audaudkihda Sapwellime Ngehn me sarawi oh kin kamwakelehda. Sang ni Ngehn Sarawi ah wia atail sounkaweid, kitail pahn onopehng alehda Sounkomouro ni lingan en me sarawio.24

Me Sarawi Iei wiahla Souleng men sang ni Tomwpen Sises Krais

Sang ni mahsen en kakehlail en Nahnmwarki Benjamin, irail ko me wiahla souleng sang Tomwpen Dihp en Sises Krais wia aramas kei me peik, ohpampap, karakarahk, kanengamah, oh direkihla limpoak me duehte Sounkomouro. 25 E kohpadahr me Sises Krais, “Kaun roson kouwahlapie, me ketier ni tapio oh pahn pil kohkohlahte soutuk, pahn ketido rehn aramas akan sang nanleng, oh pahn ketiket nan erikso ieu me wiawihkihda pwehl.” E ketidohn kapaida me soumwahu akan, me neh mwator akan, me salengopon akan, me maskun akan, oh kapwourda me melahr akan. Ahpw e ahneki lokolok “laudsang wen me aramas kakohng, ihte ma e mehla. 26 Oh menda Ih kelehpw kak wiahda komour, irail kapitih, kaloke, oh kalohpwuhala. Ahpw Sapwellimen Koht Pwutako iasadahsang nan sousouo pwe kitail koaros en kak powehdi mehla. Ihme pahn kopwungih sampah ni pwung. Ihme pahn doarehla kitail koaros. Ihme Koht Sarawien Israel. Sises Krais iei lingan en me sarawio.

Ansou me nein Nahnmwarki Benjamin aramas akoa rongada ah kaweid koa, irail pwupwidieng nan pwehlo pwehki uwen laud en arail karakarahk oh ahneki wahu ohng kalahngan oh klohri en atail Koht. Irail kasawihada irairen peinarail luwet. Kitail kak kilang atail kin wahkihla ni unsek mahk oh limpoak en Krais, atail Kaun? Kitail ese me kisakis mwahu koaros, en palingehn oh paliwar, kin kodohng kitail sang Krais? Kitail taman me sang en Sahmo kosoandi soutiko, meleilei nan mouret oh klohri kan en mour poatoapoat kak wia atail sang Sapwellime Ieroso?

Kitail en iang nein Nahnmwarki Benjamin aramas ko ni arail koaros ngillaudada, “Maing kupwurehla, oh ketin doadoahngki tomwpen intahn Sises Krais pwe sen kak alehda mahkepen dipat akan, oh aht mohngiong kan en kak mwakelekelada; pwe se kamehlele Sises Krais, Ieros en Koht, me ketin kapikadahr lahng oh sampah, oh mehkoaros.”27

I kadehdehki me ma kitail pahn kohdo rehn Me Sarawi en Israelo, Ngenen Kauno pahn ketido pohtail, pwe kitail en direkihla popohl, oh alehda mahkpen dipatail kan oh meleilei en pepehm.

Samatail Nanleng mweidohngehr emen emen kitail en kak wiahla aramas sarawi. Menlau kitail wia uwen atail kak koaros en kolokol inou kan oh alehda Ngehn Sarawi en wia atail sounkaweid. Sang ni pwoson Sises Krais, kitail wiahla Souleng kei sang Sapwellime Tomwpen Dihp, pwe kitail pahn alehdi mour poatoapoat oh mour soutuk oh kitail pahn kiheng Samatail Koht klohri pwehki Mware. Menlau atail mourkan en doulahte oh wia meirong sarawi, pwe kitail en kak uh mwohn Kauno ni lingan en me sarawi. Ni mwaren Sises Krais, ahmen.