Nyame Tsir no na Nkwagye ho Nhyehyɛɛ
Osiandɛ yɛwɔ nokwar a ɔfa Nyame Tsir no ho na yɛnyɛ Hɔn ntamu nkitahodzi ho, yɛwɔ kwankyerɛdze tsitsir no wɔ hɛn ɔnnkyebo abrabɔ akwantu yi mu.
I
Hɛn gyedzi ho nsɛmpɔw a odzi kan paa mu kã dɛ, “Yɛgye Nyankopɔn, Onnyiewiei Egya no, na Ne Ba Jesus Christ, na Sunsum Krɔnkrɔn no dzi.” Yɛnye Christianfo nkaafo no so wɔ gyedzi yi wɔ Egya na Ɔba na Sunsum Krɔnkrɔn no ho, mbom ɔson dza yɛgyedzi fa Hɔn ho na nkaafo no so hɔn gyedzi. Yɛnngye dza wiadze mu Christianfo frɛ no Baasakor Krɔnkrɔn nkyerɛkyerɛ no nndzi. Enyido-adzehu a Odzi Kan mu no, Joseph Smith hun nyimpa-su beenu pefee, beenufo, dɛm ntsi ɔdaa edzi dɛ Nyankopɔn na Nyame tsir ho gyedzi a nna wɔatahyɛ dɛm mber no nnyɛ nokwar.
Nsonsonee da gyedzi no dɛ Nyame wonnkotum enya No ho ntseasee na ɔyɛ esumasɛm a wonnkotum ehu, na nokwar no dɛ Nyame No su na Ne tsebea na hɛn ntamu nkitahodzi no wobotum ehu mu na ɔno nye hɛn nkyerɛkyerɛ nyina ho safee. Bible no akyerɛw Jesus No Ntotɔserɛ Mpaabɔ kɛse no, bea a Ɔpaa mu kãa dɛ, “Na iyi nye onnyiewiei nkwa, dɛ wobohu ɔwo, nokwar Nyame kor no, nye nyia esomaa no, mekyerɛ Jesus Christ” (John 17:3).
Mbɔdzembɔ dɛ yebohu Nyame na No ndwuma no hyɛɛ ase ana nyimpa reba asaase yi do, na onnkowie wɔ ha. Nkɔnhyɛnyi Joseph Smith kyerɛkyerɛɛ dɛ, “Yedua ntwamutam mu ewie no ɔbegye mber kɛse ana yesũa … nkwagye ntowdo ho nkyerɛkyerɛ nyina.”1 Nyimdzee a yenyaa no sunsum wiadze ansaana nyimpa reba asaase do yɛtow wɔ do. Dɛm ntsi, nkɔnhyɛnyi Isaiah robɔ mbɔdzen akyerɛkyerɛ Israelmba Nyame No su na mbrɛ Ɔnye Ne mba nya nkitahodzi no, dɛ mbrɛ wɔakyerɛw no wɔ Bible mu no, ɔpaa mu kãa dɛ:
“Woana ho mbɔ na hom dze Nyame bɔto? anaa suban bɛn na hom dze bosusu no? …
Aso hom nnhunii? aso hom nntsee? aso wommfi ahyɛse nnkãa nnkyerɛɛ hom? Aso hom mmfii asaase ne fapem ase nntsee ase? (Isaiah 40:18, 21).
Yenyim dɛ Nyame Tsir baasafo no wɔyɛ abɔdze ankorankor na wɔmmbɔ mu nnyɛ abɔdze kor. Yenyim iyi fi nkyerɛkyerɛ a Nkɔnhyɛnyi Joseph Smith dze mae no: “Egya no wɔ nyimpadua a ɔyɛ honam na mbiew dɛ mbrɛ nyimpa wɔ, Ɔba no so dɛmara, mbom Sunsum Krɔnkrɔn no nnyi nyimpadua a ɔyɛ honam na mbiew, mbom ɔyɛ Sunsum nyimpa-su. Sɛ ɔnntse dɛm a, nkyɛ Sunsum Krɔnkrɔn no nnkotum atsena hɛn mu.” (N&A 130:22).
Ɔfa Nyame Egya no Ne gyinabew no a ɔkrɔn wɔ Nyame Tsir mu no, na nyimpa-su kor biara so no dwumadzi a Odzi no, Nkɔnhyɛnyi Joseph Smith kyerɛkyerɛɛ mu dɛ:
“Obiara a oehu ɔsorsor a woebue no nyim dɛ nyimpa-su baasa na wɔwɔ ɔsorsor a wokitsa tum safee, na ɔbaako na ɔhwɛ hɔn nyina do. …
“… Nyimpa-su yinom … wɔfrɛ hɔn Nyame a odzi kan, Bɔadze no; Nyame a otsĩa ebien, Pomfo no; na Nyame a ɔtɔdo baasa, Dasefo no anaa Dasegyefo no.
“[Ɔyɛ] Egya no Ne ndzinoa dɛ Ɔhwɛ hɔn do dɛ Ɔhen anaa President, Jesus nye Ntamugyinafo no, na Sunsum Krɔnkrɔn no dɛ Dasegyefo anaa Dasefo.”2
II. Nhyehyɛɛ no
Yɛtse hɛn nkitahodzi a yɛnye Nyame Tsir kuw mba no wɔ no ase, ɔnam dza woeyi akyerɛ wɔ nkwagye ho nhyehyɛɛ ho no.
Nsɛmbisa tse dɛ “Henfa na yefi bae”? “Dɛn ntsi na yɛwɔ ha”? na “Henfa na yɛrokɔ?” ne nyiano no wɔ dza kyerɛwsɛm mu no wɔfrɛ no “nkwagye ho nhyehyɛɛ” no, “enyigye ho nhyehyɛɛ kɛse” no, anaa “ɔpon nhyehyɛɛ” no (Alma 42:5, 8, 11). Jesus Christ N’Asɛmpa no nye nhyehyɛɛ yi ne fapem tsim.
Yɛyɛ Nyankopɔn No sunsum mu mba no, asetsena ansaana yɛreba ɔnnkyebo abrabɔ yi mu no, yɛpɛɛ dɛ yenya onnyiewiei nkwa hyɛbea no, na mbom nna hɛn mpontu to ekodu mbrɛ yebotum enya a yenndua honandua abrabɔ sũahu mu. Ama yeenya dɛm akwanya no, hɛn Ɔsor Egya hwɛɛ wiadze yi no Mbɔe do, a, woyii hɛn nkaa wɔ dza osii ana wɔrowo hɛn aba ɔnnkyebo mu no, ama woeetum asɔ hɛn ahwɛ sɛ yebenya pɛ dze esie Ne mbrasɛm na na yenya sũahu na yedzi ɔnnkyebo abrabɔ mu ɔhaw do dze enyin. Mbom ɔnnkyebo abrabɔ sũahu mu no, na ɔnam hɛn awofo a wodzii kan hɔn Asehwe ho nsunsuando no, yebowu sunsum mu ber a woetwa hɛn efi Nyame enyim, bɔn bɛyɛ hɛn ho fĩ, na honandua mu wu aba hɛn do. Egya ne nhyehyɛɛ no enyi daa akwansiwdze do na ɔmaa akwan horow a wɔdze bedzi do konyim.
III. Nyame Tsir no
Yeehu Nyankopɔn Ne nhyehyɛɛ kɛse no botae no, afei yɛbosusu Nyame Tsir baasafo no mu kor biara n’asɛdze wɔ dɛm nhyehyɛɛ no mu.
Yɛdze Bible mu nkyerɛkyerɛ no bɛhyɛ ase. Oruwie ne krataa a otsĩa ebien a ɔdze kɛmaa Corinthfo no, Ɔsomafo Paul kã nsɛm yi ara fa Nyame Tsir Egya, Ɔba na Sunsum Krɔnkrɔn no ho. “Hɛn Ewuradze Jesus Christ adom, Onyankopɔn dɔ, nye Sunsum Krɔnkrɔn anyɛnkoyɛ [“ anaa fekuwbɔ”3] nkã hom nyina” (2 Corinthfo 13:14).
Bible mu kyerɛwsɛm yi kyerɛ Nyame Tsir no na ɔkã fa Nyankopɔn Egya no dɔ a okenyan, Jesus Christ No mbɔbɔrhu na No nkwagye dwuma no, na Sunsum Krɔnkrɔn n’anyɛkoyɛ no ne nyina.
Nyankopɔn Egya no
Nyankopɔn Egya no nye biribiara ahyɛse. Yenyim No ho asɛm kakrabaa dze, naaso dza yenyim no yɛ adze tsitsir a ɔma yɛtse Ne gyinabew a ɔkrɔn no ase, yɛnye No ntamu nkitahodzi, na mbrɛ Ɔhwɛɛ nkwagye ho nhyehyɛɛ, asaase no Mbɔe, nye dza ɔtoado no nyina do no.
Dɛ mbrɛ Elder Bruce R. McConkie ɔka kakra ara ma oewu no, ɔkyerɛɛw dɛ: “Ewiei no na nsɛm a otwa ekyir no nye dɛ, nokwar Nyame tseasefo kor nko na ɔwɔ hɔ. Ɔno nye Egya no, Elohim Kokroko no, Abɔdze Abɔso no, Bɔadze na wiadze nyina do Ɔhwɛfo no.”4 Ɔno nye Jesus Christ No Nyankopɔn na N’egya, nye hɛn nyina so hɛn Nyame. President David O. McKay kyerɛkyerɛɛ dɛ “nokwar fapem a Jesus Christ dze dzii kan too gua nye iyi, dɛ adze nyina ekyir, no sor na nyia ɔhwɛ ne nyina do nye Nyame Egya no, ɔsor na asaase do Ewuradze no.”5
Dza yenyim fa Nyame Egya no No su ho ne kɛse ara nye dza yetum sũa fi Jesus Christ, Ne Ba a Ɔwoo no Kortoo no, No somdwuma na Ne nkyerɛkyerɛ mu. Dɛ ma Elder Jeffrey R. Holland akyerɛkyerɛ no, Jesus No somdwuma ne tsirmpɔw nye dɛ Obeyi akyerɛ adasa a wɔnnkyebo no “mbrɛ Nyankopɔn hɛn Onnyiewiei Egya no tse, … dɛ Obeyi akyerɛ na Ɔama ankorankor yeehu N’egya, hɛn Egya a ɔwɔ Sor no subea ankasa no.”6 Ɔsomafo dasegye bi wɔ Bible mu dɛ Jesus yɛ N’Egya no Ne nyimpa-su “no subea saso” (Hebrewfo 1:3), a ɔda Jesus Nankasa Ne nkyerɛkyerɛ edzi dɛ “nyia oehu me no, oehu Egya no” (John 14:9).
Nyankopɔn Egya no yɛ hɛn sunsum mu Egya. Yɛyɛ Ne mba. Ɔdɔ hɛn, na dza Ɔyɛ nyina ɔyɛ ma hɛn onnyiewiei yieyɛ. Ɔno nye nkwagye ho nhyehyɛɛ ne farbaa, na ɔnam No tum do na No botae dzi dwuma na Ne mba nya hɔn onnyiewiei enyimyam no.
Ɔba no
Adasamba no, Nyame Tsir no kuwba a yeehu no yie nye Jesus Christ. Asɛmpa nkyerɛkyerɛ bi a ɔyɛ dur a President a Odzi Kan na n’Apamfo kãa no afe 1909 mu no paa mu kã dɛ Ɔno nye “Nyankopɔn Ne mbabanyin mu abakan—abakan wɔwoo no sunsum mu, na nyia wɔwoo no kortoo wɔ honam mu.”7 Ɔba no, okunyin no, Egya no saan mu yii No dɛ ɔmfa Egya Ne nhyehyɛɛ no mbedzi dwuma—dɛ Ɔmfa Egya no tum mbɔ wiadze a wonntum nnkan (hwɛ Moses 1:33) na Ondua No Wusoɛr mu ngye Nyame ne mba mfi owu mu na Ondua No Werdambɔ do ngye hɔn mfi bɔn mu. Nokwar ara wɔfrɛ afɔrbɔ krɔnkrɔn yi no “adasa abakɔsɛm nyina mu dwumadzi tsitsir.”8
Dɛm mber soronko krɔnkrɔn no a Nyankopɔn Egya nankasa daa Ɔba no edzi no, Ɔkãa dɛ, “Iyi nye mo Dɔba no: hom ntsie no” (Mark 9:7; Luke 9:35; hwɛ 33 Nephi 11:7; Joseph Smith—abakɔsɛm 1:17). Dɛm ntsi, ɔyɛ Jesus Christ, Jehovah, Israel Ewuradze Nyankopɔn no, ɔno na ɔkasa dua nkɔnhyɛfo mu no.9 Dɛm ntsi ber a Jesus puee Nephifo do wɔ No Wusoɛr ekyir no, Ɔdaa Noho edzi dɛ “asaase nyinara do Nyankopɔn … no” (3 Nephi 11:14). Dɛm ntsi na Jesus taa kasa kyerɛ Mormon Nwoma mu nkɔnhyɛfo na Latter-day Saintfo no dɛ “Egya na Ɔba no,’ dzin a President a Odzi Kan na n’Apamfo na Duebien no hɔn Quorum dze nkenyan kyerɛkyerɛɛ asɛmpa nkyerɛkyerɛ no mu mfe 100 ara abɛsen yi.10
Sunsum Krɔnkrɔn no
Nyame Tsir mu nyi a ɔtɔdo ebiasa nye Sunsum Krɔnkrɔn no, wɔfrɛ no Sunsum Krɔnkrɔn, Ewuradze no Sunsum, na Ɔwerɛkyekyefo no so. Ɔno nye Nyame Tsir mu nyi a ɔyɛ ankorankor nyikyerɛ ne farbaa. Ɔyɛ sunsum nyimpa-su no, (hwɛ N&A 130:22) Obotum atsena hɛn mu na Oedzi dwuma a ohia wɔ nkitahodzi ɔda Egya na Ɔba no na Nyame Ne mba a wɔwɔ asaase yi do no ntamu. Kyerɛwsɛm pii na ɔkyerɛ hɛn dɛ No somdwuma nye dɛ Ɔgye Egya na Ɔba no ho dase (hwɛ John 15:26; 3 Nephi 28:11; N&A 42:17). Agyenkwa no bɔɔ anohoba dɛ Ɔwerɛkyekyefo no bɛkyerɛkyerɛ hɛn ndzɛmba nyina, Ɔbɛkaa hɛn ndzɛmba nyina, na Ɔama hɛn kwankyerɛ wɔ nokwar nyina ho (hwɛ John 14:26; 16:13). Dɛm ntsi, Sunsum Krɔnkrɔn no boa hɛn ma yehu nokwar na ndaadaa ntamu, Ɔma hɛn kwankyerɛ wɔ adwenpɔwbɔ etsitsir ho, na Ɔboa hɛn ma yedua ɔnnkyebo abrabɔ mu ɔhaw mu.11 Ɔno so nye kwan a wodua do san hɛnho, ɔno nye dɛ, wɔtsew hɛnho ma yɛyɛ krɔngyenn fi bɔn ho (hwɛ 2 Nephi 31:17; 3 Nephi 27:20; Moroni 6:4).
IV
Ntsi, yɛretse nkyerɛkyerɛ a woeyi akyerɛ efi sor a ɔfa Nyame Tsir na nkwagye nhyehyɛɛ yi ase no si dɛn boa hɛn wɔ ndɛ hɛn haw ho?
Osiandɛ yɛwɔ nokwar a ɔfa Nyame Tsir no ho na yɛnyɛ Hɔn ntamu nkitahodzi ho, abrabɔ ne tsirmpɔw, na hɛn onnyiewiei nkrabea no su no, yɛwɔ kwankyerɛdze tsitsir no na awerɛhyɛmu wɔ hɛn ɔnnkyebo abrabɔ akwantu yi mu. Yenyim nyia yɛsom no na siantsir a yɛsom. Yenyim hɛn nyimpa ban na dza yebotum abɛyɛ (hwɛ N&A 93:19). Yenyim nyia ɔma iyinom nyina tum ba, na yenyim dza otwar dɛ yɛyɛ ama yeetum eenya onnyiewiei nhyira no a ofi Nyankopɔn No nkwagye ho nhyehyɛɛ mu ba no. Iyinom nyina yesi dɛn hu? Ɔnam Nyankopɔn nyikyerɛ a Ɔdze ma No nkɔnhyɛfo na hɛn mu kor biara na yɛdze hu.
Yebodu ma Ɔsomafo Paul kyerɛ mu dɛ “Christ amayɛ esusudze no pɛn do” (Ephesusfo 4:13) hia dza ɔbor irinya nyimdzee ara. Ɔnndɔɔ sõ mma hɛn ara dɛ yɛbɛgye asɛmpa no edzi ara; otwar dɛ yedzi ho dwuma na yɛdwen ho ama wɔasakyer hɛn. “Nsonsonee a ɔda wiadze asoɛe horow, a wɔkyerɛ hɛn ma yehu biribi no, nkwagye ho nhyehyɛɛ no na Jesus Christ N’asɛmpa no to hɛn taferbanyinmbɔmu ma yɛbɛyɛ ekunyin.”
Dɛ mbrɛ President Thomas S Monson kyerɛkyerɛɛ hɛn wɔ ndaansa yi wiadze mfɛndzanan ehyiadzi mu no:
“Jesus Christ hɛn Agyenkwa no, Noho hia papaapa wɔ [nkwagye] nhyehyɛɛ no mu. Ɔnnyɛ No werdam afɔrbɔ no a, nkyɛ obiara ayew. Naaso, onnwie payɛ ara dɛ yɛbɛgye No edzi nye No dwuma no. Ohia dɛ yɛyɛ edwuma na yesũa, yɛhwehwɛ na yɛbɔ mpaa, yenu hɛn ho na yetu mpon. Ohia dɛ yebohu Nyankopɔn Ne mbra na yɛdze bɔ bra. Ohia dɛ yɛgye No nkwagye ayɛdze horow no. Dɛm saso ne nyɛe no nko na yebotum enya onnyiewiei nokwar, enyigye no. …
President Monson paa mu kãa dɛ “Fi me kra no bun mu na medze ahobrɛadze nyina no, megye dase wɔ akyɛdze kɛse a ɔyɛ Egya Ne nhyehyɛɛ ma hɛn no. Ɔno nye kwan tɔɔtsen kortsee no a ogya kɔ asomdwee na enyigye mu no wɔ ha nye wiadze no ɔbɛba nyina mu no.12
Medze me dasegye kã hɛn nkɔnhyɛnyi-President dɔfo no ne dze ho. Megye dase dɛ yɛwɔ Ɔsor Egya a, Ɔdɔ hɛn. Megye dase dɛ yɛwɔ Sunsum Krɔnkrɔn a, Ɔma hɛn kwankyerɛ. Na megye dase wɔ Jesus Christ, hɛn Agyenkwa a, Ɔma iyinom nyina tum ba mu, wɔ Jesus Christ Ne dzin mu, amen.