Taian Atua ao te Baire ni Kamaiu
Bukina bwa ti karekea te koaua n aron te Aro N Atua ao rekerekera Nakoiia, ti karekea mwaben te kawai ae rianako ao karauan nanora ibukin ara mwananga n te maiu ae mamate.
I.
Ara moan bwai n taekan te onimaki e kamatata, “Ti kakoaua inanon te Atua te Tama ae Akea Tokina, ao Natina Iesu Kristo, ao te Tamnei are Raoiroi.” Ti reitaki ma tabeman Kiritian n te koaua inanon te Tama ao Natina ao te Tamnei are Raoiroi, ma te bwai are ti kakoaua Aroia e kaokoro man aia onimaki ake tabeman. Ti aki kakoaua n are a taku Kiritian n te aonaaba n te reirei ae Teniman ae Tabu n Temanna. N ana Moan Kaotioti, Iotebwa Timiti e nooria uoman aomata aika kaokoro, aomata aika uoman, e kamatata bwa te koaua ae tokanikai ibukin te Atua ao te Aro n Atua e aki koaua.
Ni kabotauaki nakon te koaua bwa te Atua e bon kaangaanga ataakina te kakoaua bwa n aron anuan te Atua ao tomara Nakoina a bon rangi n ataaki ao te rabakau aei bon te king nakon bwaai ni kabane inanon ara reirei. N te Baibara e taua mwin ana tataro ni bubuti Iesu, ike E taekinna bwa “te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia”(Ioane 17:3).
Te mwakuri n ataa te Atua ao Ana mwakuri e moanaki imwain te maiu ae mamate ao e na aki toki ikai. E reirei te burabeti are Iotebwa Timiti, “E bon rangi n tamaroa ngke ko a tia rinanon te rabunanimata imwain ae ko reiakin … reirein te karietataki.”1 Ti kateitei iaon te rabakau ae reke iroura inanon te aonaaba n tamnei ae aki mamate. N te kawai aei, ni kataakin reireiakiia Iteraera aron te Atua ao Tomana nakoia Natina, E taekinna te burabeti are Itaia, n are e koreaki n te Baibara:
“Ao ai antai ae kam na atonga te Atua ba ai arona? Ao te aro ra ae kam na taku ba ai arona? …
“Kam aki ataia? kam aki ongo? kam aki tuangaki mai moana? kam aki wanawana ma ngke a moa ni karikaki aonaaba?” (Itaia 40:18, 21).
Ti ataia bwa kaain te Aro n Atua ake Teniman a bon uamae ao aomata aika kakaokoro. Ti ataa aio man te kauring ae anganaki Iotebwa Timiti: “Iai rabwatan te Tama ae te iriko ao te rii ao e kona n ringaki n ai aron te aomata; te Nati ai arona naba; ma te Tamnei are Raoiroi akea rabwatana ae te iriko ao te rii, ma bon ti rabwatan te Tamnei. Ngkai bon akea, e aki kona te Tamnei are Raoiroi ni maeka inanora” (D&C 130:22).
Ngkai Ana tabo te Atua te Tama inanon te Aro n Atua e rietata, ai arona naba ma tabeia ae a tia ni katauaki ni karaoi ngaia n tatabemaniia, e kabwarabwara Iotebwa Timiti:
“Te aomata are e noora karawa ae kaukaki e noora te Atua te Tama ao Iesu Kristo e ataia bwa Teniman aomata i karawa ake iai irouia kingin te mwaaka, ao temanna e tararuaia ni kabane. …
“… Aomata aikai … a aranaki bwa te moan n Atua, te tia Karikibwai; te Atua te kauoman, te Tia Kamaiu; ao te Atua te kateniman, te Tia Kakoaua ke te Tia Tutuo.
[Bon] te kariaia iroun te Tama n tararua bwa te Mataniwi ke te Beretitenti, Iesu bwa te Tia Tei i marena, ao te Tamnei are Raoiroi bwa Te tia Tutuo ke te Tia Kakoaua.”2
II. Te Baire
Ti ataa ara itoman nakoia kaain te Aro n Atua man are e a tia ni kaotaki n aron te baire ni Kamaiu.
Taian titiraki n aekan “Ti roko ma ia?” “Bukin tera ti mena ikai?” ao “Ti na nakea?” a bane ni kaekaaki n aron are taekinna te boki ae tabu ae aranaki bwa te “babaire ni kamaiu are korakora,” ke te “baire ni kamaiu” (Aramwa 42:5, 8, 11). Ana Euangkerio Iesu Kristo e boboto iaon te baire aio.
Bukina bwa natin te Atua, ni menara imwain te maiu ae mamate, ti tangira nnera are te maiu are akea tokina man tia n rikirake ni kararoaira n aron are ti kona n akea ara taneiai n te maiu ae mamate inanon rabwatara. Ni katauraoa te anga anne, Tamara are i karawa e tararua aron Karikan te aonaaba aei, ike e kabuai man ara ururing bwaai are a mena imwain bungiakira, ti kona ni kakoaua ara motinnano ni kawakin Ana tua ao n namakina ao n rikirake inanon kaangaangan te maiu ae mamate. Man mwakurin te maiu ae mamate, ao n tokina bwakaia ara moan karo, e na reke irouia maten te tamnei man kanakoara mai matan te Atua, ni kabarekaaki n te bure, ao n reke irouia te mate n rabwata. Ana baire te Tama e katauaki ao e katauraoi kawai n tokanikai iaon kaangaanga akanne.
III. Te Aro N Atua
Ataakin ana baire te Atua ae kakawaki, ti na iangoi oin aia mwakuri, kaain te Aro N Atua n te baire anne.
Ti na moanna man reirei man te Baibara. Ni kainakin ana kauoua n reta nakoia I-Korinto, te Abotoro are Bauro e karaoa aei n akea ana katauraoi ae kaineti nakon te Aro N Atua are te Tama, te Nati, ao te Tamnei are Raoiroi: “E na mena iroumi ni kabaneingkami ana akoi te Uea are Iesu Kristo, ma ana tangira te Atua, [ke ma ana iraorao3] te Tamnei are Raoiroi, e na mena iroumi ni kabane” (2 I-Korinto 13:14).
Taeka aika tabu n te Baibara e tei ibukin te Aro N Atua ao ni kaoti ni kabane kabwarabwara ao kaungaan tangiran te Atua te Tama, te akoi ae kororaoi ao ana mwakuri ni kamaiu Iesu Kristo, ao ana iraorao te Tamnei are Raoiroi.
Te Atua te Tama
A bane ni moanaki bwaai iroun te Atua te Tama. Ngkai kanga ti ataa teutana Arona, are ti ataia e boongana n ataakin Nnena ae rietata, reitakira Nakoina, ao tabena n tibwatibwa te mwakuri inanon te baire ni kamaiu, te Karikibwai, ao ake imwina riki.
Ngke E koroboki Unimwane Bruce R. McConkie boni imwain matena: “Ni kororaoina ao bonganan te taeka, ti temanna te Atua ae koaua ao ae maiu. Bon te Tama, Elohim ae Mwakaroiroi, te Aomata ae Rietata, te Tia Karikibwai ao n Tautaekana te aonaaba.”4 Bon Atuan ao Taman Iesu Kristo ao ai arora naba ni kabane. Beretitenti David O. MacKay e taekinna bwa te “koaua ae tau ae kamatoa Iesu Kristo aio, bwa i akuun, ietan ao iaona ni kabane iai te Atua te Tama, Uean karawa ao aonaaba.”5
Are ti a tia n ataa aron te Atua te Tama e mwaiti riki are ti kona n reiakinna man Ana tabo n reirei ao Ana reirei Natina ae te Rikitemanna, Iesu Kristo. E a tia n reirei Unimwane Jeffrey R. Holland, teuana mwakurin ana aro Iesu Kristo e kakaota te mate. “e kanga aekan te Atua Tamara ae akea tokina, … ni kaotia ao ni kaomataa nakoira aron koauan Tamana, Tamara are i karawa.”6 Kanoan te Baibara aia koaua taian Abotoro bwa Iesu bon te tamnei ni kabwarabwara” n aron.(Ebera 1:3), are e kamatatai ana reirei Iesu are taku “are e tia n noorai e noora naba te Tama.”(Ioane 14:9).
Te Atua Taman tamneira. Ngaira Natina. E tangirira, ao bwaai ni kabane aika E karaoi ibukira n aki toki. Bon ngaia te tia karaoa te baire ni kamaiu, ao man Mwaakana are Ana baire e kakoroa bukin te kantaninga n te mimitong ae akea tiana Ibukiia Natina.
Te Nati
Nakoia aomata, te moan nonoraki ni kaoti te membwa n te Aro n Atua bon Iesu Kristo. Te moan rongorongo man te Moan Beretitentii inanon 1909 e taekinna bwa Ngaia te “moan bungiaki ibuakoia natin te Atua mwaane—te moan nati n te tamnei, ao te moan nati n te iriko.”7 Te Nati te mwaane, te kabanea ni korakora, are e rineaki iroun te Tama ni karaoa kanoan ana baire Tamana—ni kamwakura mwaakan te Tama ni kariki aonaaba n akea tokina (taraa Moses 1:33) ao ni kawakiniia natin te Atua man te mate nakon te Mangauti ibukin kabwaraan ara bure ni matena. Aio te korakai ni maraki are e kakoauaki ao e atongaki bwa “rongorongon aia makuri aomata.”8
N taai aika okoro ao n tabu ngke te Atua te Tama E taekina te Nati te mwaane, E taku, “Aio Natiu ae tangiraki: ongo Irouna” (Mareko 9:7; Ruka 9:35; taraa naba 3 Nibwaai 11:7; Joseph Smith—History 1:17). N te aro aio, bon Iesu Kristo, Iehova, te Uea ae Atuan Iteraera, are taetae nakoia ao rinanoia burabeti.9 Ma ngaia are bon Iesu Kristo are kaoti nakoia Nibwaite imwin Utina, E kabwarabwara bwa Ngaia “Atuan aonaaba” (3 Nibwaai 11:14). Ma ngaia are bon Iesu Kristo are aki toki n taetae nakoia burabeti n Ana Boki Moomon ao nakoia aika Itiaki ni Boong Aika Kaitira bwa “te Tama ao te Nati,” te ara ae kabwarabwaraaki n aia reirei Moan Beretitentii ao te Kooram n te Tengaun ma Uoman ae anainano ae kaotinakoaki tebubua te ririki n nako.10
Te Tamnei are Raoiroi
Te Kateniman n te Aro N Atua bon te Tamnei are Raoiroi, e aranaki naba bwa te Tamnei ae Tabu, Tamnein te Uea, ao te Tia Karaunano. Bon kaain te Aro N Atua are te tia tei ibukin te kaotioti nakon te aomata. Ngkai ngaia te aomata ae te tamnei (taraa D&C 130:22), E kona ni maeka iroura ao ni karaoa tabena ae te tia itoman imarenan te Tama ao te Nati ao Natin te Atua i aonaaba. E mwaiti koroboki aika tabu n reireia bwa Ana mwakuri bon kakoauan te Tama ao te Nati (taraa Ioane 15:26; 3 Nibwaai 28:11; D&C 42:17). E berita te Tia Kamaiu bwa te Tia Karaunano e na reirei bwaai ni kabane, ni kaoki bwaai nakon ara ururing ao ni kairira nakon te koaua (taraa Ioane 14:26; 16:13) N te kawai aei e buokira n taraa marenan te koaua ao te kairua, ni kairira nakon ara baire aika korakora, ao ni buokira n rinanon taian kataaki n te maiu ae mamate.11 Boni ngaia naba te buoka are ti a kaitiakaki iai, are te tebokaki ao ni kaitiakaki man te bure (taraa 2 Nibwaai 31:17; 3 Nibwaai 27:20; Moronaai 6:4).
IV.
Ngkanne, a na kanga ni buokira te ataibwai mai karawa n aron te Aro N Atua ao te baire ni kamaiu n ara kaangaanga n te bong aei?
Bukina bwa ti karekea te koaua n aron te Aro N Atua ao rekerekera Nakoiia, aron te maiu, ao aron kawaira ae akea tokina, ti karekea mwaben te kawai ae rianako ao karauan nanora ibukin ara mwananga n te maiu ae mamate. Ti ataa ae ti taromauriia ao bukin taromauriakina. Ti kinaira bwa antai ngaira ao arora are ti na kona n riki nako iai (taraa D&C 93:19). Ti ataa ae karaoi bwa a na kona ni karaoaki, ao ti ataa are ti na riai ni kukurei iai te kakabwaia are moan te boongana are e na roko man Ana baire ni kamaiu te Atua. Ti kanga n atai baikai ni kabane? Ti ataia man ana kaotioti te Atua nakoia Ana burabeti ao nakoira n tatabemaniira.
N roko n are taekinna te Abotoro are Bauro “ao tiara bon onraken Kristo” (I-Ebeto 4:13) e tangira ae mwaiti riki nakon kakaean te ataibwai. E bon aki tau nakoira bwa ti na kairoroaki ibukin te euangkerio; ti na riai ni mwakuri ao ni iango bwa ti aonga n rairaki mai iai. Ni kabotauaki nakon reirein aonaaba, are e reireiniira bwa ti na atai bwaai tabeua, te baire ni kamaiu ao Ana Euangkerio Iesu Kristo e kakaewenakoira bwa ti na riki bwa te bwai ae iai bukina.
N aron are reireiniira Beretitenti Thomas S.Monson n ara maungatabu ae nako:
“Ae kakawaki n te baire ni [kamaiu] bon ara Tia Kamaiu, Iesu Kristo. N akean ana karea ni kamaiu, ti na bane ni bua. E aki tau, e ngae n anne, ngke ko kakoaua ma Ana mwakuri. Ti kainnanoa te mwakuri ao te reirei, ni ukeuke ao n tataro, n rairi nanora ao ni katamaroaki riki. Ti kainnanoa ataakin ana tua te Atua ao ni maiuakin. Ti kainnanoa karekean Ana otenanti ni kamaiu. Tii man karaoakia ti na karekea te koaua, te kukurei are akea tokina. …
“Mai kabin nanou ao n nanorinano,” e kabwarabwara Beretitenti Monson, “I kakoaua te bwai n tangira ae korakora are ana baire Tamara ibukira. Bon te kawai ni koaua nakon te rau ao te kukurei ikai ao n te aonaaba ae na roko.”12
I kaota au koaua ibukin ara burabeti-beretitenti ae tangiraki. I kakoaua bwa iai Tamara are i Karawa, are e tangiriira. I kakoaua bwa iai te Tamnei ae Raoi, are e kairiirira. Ao I kakoaua Iesu Kristo, ara Tia Kamaiu, are e kangaraoi bwaai ni kabane, n aran Iesu Kristo, amen.