Doulul in Anij im Karōk in Lo̧mo̧o̧r eo
Kōnke ewōr ippād m̧ool ko kōn Doulul in Anij im jem̧jerā eo ad Ippāer, ewōr ippād māp in iaļ eo eļap im jipan̄ eo kōn ito itak in ad ilo mour in.
I.
Laajrak in tōmak eo ad kein kajuon ej kwaļo̧k: “Kōmij tōmak ilo Anij, Jemed Indeeo, ilo Nejin, Jisōs Kraist, im ilo Jetōb Kwojarjar.” Jej kobaļo̧k ippān aolep Rikūrijin ro jet kōn tōmak in kōn juon Jemed Ilan̄ im Nejin im Jetōb Kwojarjar, ak ta eo jej tōmak kake kōn Er eoktak jān tōmak ko an ro jet. Jejjab tōmak ilo ta eo Rikūrijin ro ilo laļ in rej ņaetan Jilu ilo Juon. Ilo Visōn eo Kein Kajuon an, Josep Smith ekar lo ruo armej ro rejenolo̧k, ruo armej ro, āindein ekar lukkuun alikkar menin ilo tōre eo ekar mour bwe tōmak ko an armej ikkijeen Anij im Doulul in Anij rekar bōd.
N̄an keidi tōmak eo bwe Anij epen meļeļe kake im epen jeļā mennin ittino̧ ko An em̧ool bwe piktokin Anij im jem̧jerā eo ad n̄an E jej jeļā kake im ej kii eo eaorōk n̄an men otemjej ilo katak ko ad. Ilo Baibōļ epād ie Jar eo an Jisōs ilo Jon jebta 17, ijo Ekar kwaļo̧k bwe “en̄in mour indeeo, bwe ren jeļā Kwe juon wōt Anij e m̧ool, im Jisōs Kraist, eo Kwaar jilkintok” (Jon 17:3).
Ad kijejeto n̄an jeļā Anij im jerbal in An ekar ijjino m̧okta jān mour in im eban jem̧ļo̧k ijin. Rikanaan Josep Smith ekar katakin, “Enaaj juon men eļap ālkin am̧ naaj eļļā jān rōn̄ōl eo m̧okta jān am̧ naaj ekkatak … aolep pedped in katak ko an ijo eutiejtata.”1 Jej ejaake jeļā eo jekar bōke ilo mour in jetōb eo ad m̧okta. Men̄e, ilo kajjieon̄ katakin RiIsrael ro piktokin Anij im jem̧jerā eo An n̄an ajri ro Nejin, rikanaan Aiseia ekar kwaļo̧k, āinwōt an jeje ilo Baibōļ eo.
“Innām kom̧ naaj jon̄jon̄ Anij ippān wōn? Ak wāween rot kom̧ naaj keidi n̄an E? …
“Kom̧ jan̄in jeļā ke? Kom̧ ar jab ron̄ ke? Ar jab kōnnaanōk kom̧ kake jān jinoin ke? Kom̧ ar jab meļeļe ke jān ļon̄tak ko laļ?” Aiseia 40:18, 21.
Jej jeļā bwe membōr in Anij ko jilu rej jenolo̧k jān doon im armej ro roktak. Jej jeļā jān kōmeļeļe in kar letok jān Rikanaan Joseph Smith eaar katakin: “Jemān im Nejin ewōr ānbwinnin kanniōk im dii ippāer āinwōt maron̄ jibwe āinwōt armej. Jetōb Kwojarjar ejjeļo̧k juon ānbwinnin kanniōk im dii ak ej juon Jetōb wōt. Eļan̄n̄e en kar jab āindein, Jetōb Kwojarjar eo en kar jab maron̄ deļo̧n̄ ilo kōj (K&B 130:22).
N̄an kadkad eo eļap an Anij Jemād ilo Doulul in Anij, barāinwōt ilo eddo ko kajjojo iaer rej kōm̧m̧an, Rikanaan Josep ekar kōmeļeļeiki:
“Jabdewōt armej ro rekar lo an lan̄ peļļo̧k rejeļā bwe ewōr jilu armej ro ilo lan̄ ko ro rej kabwijer kii ko kōn kajoor, im juon ej tōl er aolep. …
“… Armej rein … rej ņaetaer Anij kein kajuon, Rikōm̧anm̧an; Anij kein karuo, Ripinmuur eo; im Anij kein kajilu, Rikam̧ool ak Rikōm̧m̧an Ankilan.
“[Ej] jim̧we eo an Jemād n̄an tōl āinwōt Irooj ļapļap ak Būreejtōn, Jisōs āinwōt Rijojomar, im Jetōb Kwojarjar eo āinwōt Rikōm̧m̧an Ankilan ak Rikam̧ool eo.”2
II. Karōk Eo
Jej meļeļe jem̧jerā eo ad ippān membōr ro ilo Doulul in Anij jān ta eo ekar waļo̧k kōn karōk in lo̧mo̧or.
Kajjitōk ko āinwōt “Ia eo jekar itok jān e?” “Etke jej pād ijin?” im “Ia eo jej etal n̄an e?” uwaak ko ilo jeje ko Rekwojarjar rej ņae etaer “karōk in lo̧mo̧o̧r eo,” “karōk in m̧ōņōņō eo eļap,” ak “karōk in pinmuur eo” (Alma 42:5, 8, 11) Gospel eo an Jisōs Kraist ej dilep in karōk in.
Āinwōt ajri in jetōb ro nejin Anij, ilo mour eo m̧okta jān mour in, jekar ikdeleel kōn juon mejān kajjik n̄an mour indeeo ak jeban kar eddōkļo̧k n̄e jejjab idajon̄jon̄e mour in im bōk juon ānbwin. N̄an letok wāween in, Jemedwōj Ilan̄ ekar tōl Kōm̧anm̧an eo an laļ in, ijo, ekar kōmakeļo̧kļo̧k kōj kōn ta ko rekar bōk jikier m̧oktaļo̧k jān ad kar ļo̧taktok ilo mour in, jemaron̄ kam̧ool ad m̧ōņōņō in kōjparok kien ko An im en̄jake im eddōkļo̧k jān apan̄ ko jet an mour in. Ak ilo iaļ in n̄an idajon̄jon̄e mour in, im āinwōt juon tōprak in Wōtlo̧k eo an ro jinen im jemād m̧oktata, jenaaj en̄taan kōn mej ilo jetōb ilo ad jekōdļo̧k jān im̧aan mejān Anij, ettonoon kōn jerawiwi, im jemaron̄ mej ilo kanniōk. Karōk eo an Jemād ekar waļo̧k im letok wāween ko n̄an anjo̧ jān aolep kapan̄pan̄ kein.
III. Doulul in Anij
Jeļā kōn jibadbad in karōk eo eļap an Anij, jej kiiō kile eddo ko an membōr ro jilu ilo Doulul in Anij ilo karōk in.
Jej ijjino kōn juon katak jān Baibōļ. Ilo jem̧ļo̧kin leta eo kein karuo an n̄an Korint, Rijilōk Paul ej letok meļeļein ilo an jab ļōmņak kōn Doulul in Anij Jemān, Nejin, im Jetōb Kwojarjar: “Jouj an ad Irooj Jisōs Kraist, im yokwe an Anij, im kōm̧m̧ao [ak jem̧jerā3]an Jetōb Kwojarjar, en pād ippemi otemjej” (2 Korint 13:14).
Eoon in ej kwaļo̧k kadkadin Doulul in Anij im meļeļe ko aolep rej kōmeļeļeik im kōketak iakwe an Anij Jemād, tūriam̧o̧ im mijen in lo̧mo̧o̧r eo an Jisōs Kraist, im jem̧jerā eo an Jetōb Kwojarjar.
Anij Jemād
Ej ijjino ippān Anij Jemād Men̄e jej jeļā jidik wōt kōn E, ta eo jejeļā kake elukkuun aorōk ilo ad meļeļe jerbal eo An eļap, kadkad eo ad n̄an E, im wāween tōl jerbal eo An ilo karōk in lo̧mo̧o̧r eo, Kōm̧anm̧an eo, im men otemjej rej ekkejeltok ippān.
Āinwōt an Elder Bruce R. McConkie kar jeje m̧okta jān mej eo an: “Ilo naan eo eļaptata im āliktata, ewōr wōt juon Anij em̧ool im emour. E ej Jemād, Ekajoor Pōtata Elohim, Armej Eutiejtata, Rikōm̧anm̧an im Rikien an aolepān laļ in.”4 E ej Anij Jemān Jisōs Kraist, barāinwōt kōj aolep. Būreejtōn David O. McKay ekar katakin bwe “m̧ool eo jinointata me ekar jojomar jān Jisōs Kraist ej bweiturin, ilōn̄in im ioon aolep men otemjej ewōr Anij Jemād, Irooj in lan̄ im laļ.”5
Ta eo jejeļā kōn piktokin Anij Jemād ej kalikkar eļaptata ta eo jemaron̄ ekkatak jān kwaļo̧k eo im katak ko an Nejin Wōt Ejitōn Bōro, Jisōs Kraist. Āinwōt an Elder Jeffrey R. Holland kar katakin, juon iaan jibadbad ko raorōktata an kwaļo̧k eo an Jisōs ekar n̄an kwaļo̧k n̄an armej “ta eo Anij Jemād Indeeo ej einwōt, … n̄an kwaļo̧k im kalikkar n̄an kōj piktok eo em̧ool an Jemād, Jemād ilo Lan̄.”6 Ilo baibōļ eo epād ie juon kam̧ool an rijilōk bwe Jisōs ej “āinwōt E ilo aolep wāween” an nememein Jemān (Hibru 1:3), eo me ej kōmeļeļeikļo̧k katak ko an Jisōs make bwe “Eo ear lo N̄a, ear lo Jema” (Jon 14:9).
Anij ej Jemād ej Jemān jetōb ko ad. Jej ajri ro Nejin. Ej iakwe kōj, im aolep men ko Ej kōm̧m̧ani ej n̄an em̧m̧anļo̧k eo ad indeeo. E ej rijeje an karōk in lo̧mo̧o̧r, im ej jān kajoor eo An karōk eo An ej bōk jibadbad ko An n̄an aiboojoj eo eļap an ajri ro Nejin.
Nejin Maan
N̄an armej, membōr in Doulul in Anij eo ekar lukkuun waļo̧k n̄an kōj ej Jisōs Kraist. Juon ennaan in katakin jān Būreejtōnji eo Kein Kajuon ilo 1909 ej kwaļo̧k kōn E n̄an erom “m̧aanje ilubwilijin aolep em̧m̧aan ro nejin Anij—eo jinointata ekar ļo̧tak ilo jetōb, im e wōt ekar ļo̧tak ilo kanniōk.”7 Nejin, eo eļaptata iaan aolep, kar kālet jān Jemān n̄an lolorjake karōk eo an Jemān—n̄an kōjerbal kajoor eo an Jemān n̄an kōm̧anm̧an laļ ko jejjab maron̄ bwini (lale Moses 1:33) im n̄an lo̧mo̧o̧ren ajri ro nejin Anij jān mej kōn Jerkakpeje im jān Pinmuur. Katok in eļap em̧ool ej ņaetan “m̧akūtkūt eo eļap ilo bwebwenato.”8
Ilo iien kein rejenolo̧k im kwojarjar ke Anij Jemān ekar make kwaļo̧k kadkadin Nejin, Ekar ba, “En̄in ej Nejū Jitōn Bōro: ron̄jake E” (Mark 9:7; Luk 9:35; bar lale 3 Nipai 11:7; Josep Smith—Bwebwenato 1:17). Aaet, ej Jisōs Kraist, Jeova, Irooj in Israel, eo ej kōnono n̄an im kōn rikanaan ro.9 Kōn menin, ej iien eo me Jisōs ekar waļo̧k ļo̧k n̄an RiNipai ro ālkin Jerkakpeje eo An, Ekar kwaļo̧k kadkadin Make āinwōt “Anij an aolepān laļ” (3 Nipai 11:14). Innām bwe ekkā an Jisōs ba n̄an rikanaan ro ilo Bok in Mormon im n̄an Armej ro Rekwojarjar ilo Raan-ko Āliktata āinwōt “Jemān im Nejin,” juon taitōļ kar kōmeļeļeiki ilo katak eo eim̧we an Būreejtōnji eo Kein Kajuon im Doulul eo an Jon̄oulruo Rijilōk ro 100 iiō ko remootļo̧k.10
Jetōb Kwojarjar eo
Membōr eo kein kajilu an Doulul in Anij ej Jetōb Kwojarjar eo, kōnono kake āinwōt Jetōb Kwojarjar eo, Jetōb in Irooj, im Rikaenōm̧m̧an eo. Ej membōr eo kein kajilu an Doulul in Anij eo ej juon rijerbal in revelesōn ko an kajjojo armej. Āinwōt juon jetōb nememein wōt armej (lale K&B 130:22), Emaron̄ pād ilo kōj im jerbale eddo eo eaorōk an juon rikōnono ikōtaad im Anij im Nejin im ajri ro nejin Anij ioon laļ in. Elōn̄ eoon ko rej katakin bwe mijen eo An ej n̄an kam̧ool kōn Jemān im Nejin (lale Jon 15:26; 3 Nipai 28: 11; K&B 42:17). Rilo̧mo̧o̧r eo ekar kallim̧ur bwe Rikaenōm̧m̧an eo enaaj katakin kōj men otemjeļo̧k, kakeememej kōj kōn men otemjeļo̧k, im tōl kōj n̄an m̧ool eo (lale Jon 14:26; 16:13). Aaet, Jetōb Kwojarjar eo ej jipan̄ kōj jeļā m̧ool im riab, tōl kōj ilo jokālet ko ad reļļap, im jipan̄ kōj rōļo̧k jān apan̄ ko an mour in.11 E ej barāinwōt kein jipan̄ eo me ej ko̧kwojarjar kōj, āinwōt, karreo im ko̧kwojarjar kōj jān jerawiwi (lale 2 Nipai 31:17; 3 Nipai 27:20; Moronai 6:4).
IV.
Innām, ewi wāween an jeļāļo̧kjeņ eo ad kōn katak kein litok jān lan̄ ikkijeen Doulul in Anij im karōk in lo̧mo̧o̧r ej jipan̄ kōj kōn apan̄ ko ad rainin?
Kōnke ewōr ippād m̧ool ko kōn Doulul in Anij im jem̧jerā eo ad Ippāer, unleplep in mour in, im piktokin mejān kajjik eo ad indeeo, ewōr ippād māp in iaļ eo eļap im jipan̄ eo kōn ito itak in ad ilo mour in. Jejeļā wōn ro jej kabun̄jar n̄an er im etke jej kabun̄jar n̄an er. Jejeļā wōn kōj im ta eo jenej erom (lale K&B 93:19). Jejeļā wōn eo ej kapidodoik men otemjej, im jejeļā ta eo jej aikuj in kōm̧m̧ane n̄an lan̄lōn̄ kōn kōjeraam̧m̧an ko reļļap me rej itok jān karōk in lo̧mo̧o̧r eo an Anij. Etke jejeļā aolep men kein? Jejeļā jān revelesōn ko an Anij n̄an rikanaan ro An im n̄an kōj wōj kajjojo.
Jej bok ta eo Rijilōk Paul ekar kōmeļeļeiki āinwōt “jon̄an rūttoun an Kraist obrak” (Epesōs 4:13) ej aikuj eļapļo̧k jān bōk jeļāļo̧kjeņ. Ejjab bwe n̄an kōj bwe jen tōmak gospel eo; jej aikuj jerbal im ļōmņak bwe jen oktak kōn e. N̄an keidi n̄an jikin ekkatak ko ilo laļ in, ko rej katakin kōj n̄an jeļā juon men, karōk in lo̧mo̧o̧r eo im gospel eo an Jisōs Kraist rej kipel kōj bwe jen erom juon men eo ewōr tokjān.
Āinwōt an Būreejtōn Thomas S. Monson kar katakin kōj ilo kweilo̧k eo eļap:
“Men eo eaorōk n̄an karōk in [lo̧mo̧o̧r] ej ad Rilo̧mo̧or, Jisōs Kraist. Eļan̄n̄e en kar jab katok in Pinmuur in An, aolep ren kar jako. Ejjab bwe, ijoke, baj tōmak ilo E im mijen eo An. Jej aikuj in jerbal im ekkatak, kappukōt im jar, ukweļo̧k im kōm̧anm̧anļo̧k kōj. Jej aikuj in jeļā kakien ko an Anij im mour kaki. Jej aikuj bōk kain̄i in lo̧mo̧o̧r ko An. Jān wōt ad kōm̧m̧an wāween in, jenaaj bōk m̧ōņōņō eo ejjeļo̧k jem̧ļo̧kin. …
“Jān m̧wilaļ in buruō im ilo ettā,” Būreejtōn Monson ekar kwaļo̧k, “Ij kam̧ool kōn menin letok eo eļap eo ej karōk eo an Jemād n̄an kōj. Ej juon iaļ ejim̧we n̄an aenōm̧m̧an im mōņōņo̧ jim̧or ijin im ilo laļ eo ej itok.”12
Ij kakobaik ļo̧k naan in kam̧ool eo aō ippān rikanaan-būreejtōn eo ad ejitōn bōro. Ij kamo̧ol bwe ewōr juon Jemedwōj Ilan̄, eo ej iakwe kōj! Ij kamo̧ol bwe ewōr juon Jetōb Kwojarjar, eo ej tōl kōj. Im ij kam̧ool kōn Jisōs Kraist, ad Rilo̧mo̧o̧r, eo ej kōmaron̄ men otemjej, ilo etan Jisōs Kraist, amen.