Te Atuara’a e te fa’anahora’a nō te fa’aorara’a
Nō te mea tē mau nei tātou i te parau mau nō ni’a i te Atuara’a ’e tō tātou aura’a ’e ’o rātou, tē mau nei tātou te hōho’a faa’ite ’avei’a hope nō tō tātou tere i te tāhuti nei.
I.
Tē parau nei tā tātou hīro’a fa’aro’o mātāmua ē : « Tē ti’aturi nei mātou i te Atua, te Metua Mure ’Ore, ’e i tāna Tamaiti ia Iesu Mesia, ’e i te Vārua Maita’i ho’i ». Fātata tātou e tū’ati i te mau keresetiano tā’āto’a i roto i teie ti’aturira’a i te hō’ē Metua ’e hō’ē Tamaiti ’e hō’ē Vārua Maita’i, terā rā, e mea ta’a ’ē tā tātou ti’aturira’a ia rātou i te mau ti’aturira’a a vetahi ’ē. ’Aita tātou e ti’aturi nei i te mea tā te ao keresetiano e parau nei ē, te ha’api’ira’a tumu o te Torutahi mo’a. I roto i tāna ’ōrama mātāmua, ’ua ’ite atu Iosepha Semita e piti ta’ata ta’a ’ē maita’i, e piti tino, e nā te reira e ha’apāpū mai ē, te mau ti’aturira’a rahi nō ni’a i te Atua ’e te Atuara’a, ’ua hape ïa.
Ta’a ’ē atu i te ti’aturira’a ē, ’ua riro te Atua ’ei mea mo’e ta’a-’ore-hia ’e te ’ite-’ore-hia, tē ti’aturi nei tātou ē, te parau mau nō ni’a i te nātura o te Atua ’e tō tātou aura’a iāna, e ’itehia ïa te reira, ’e ’o te tāviri ïa nō te mau mea ato’a i roto i tā tātou ha’api’ira’a tumu. ’Ua nā ’ō mai te Fa’aora iho ē : « teie ho’i te ora mure ’ore, ’ia ’ite rātou ia ’oe i te Atua mau ra ’e ia Iesu Mesia i tā ’oe i tono mai » (Ioane 17:3).
Te tauto’ora’a nō te ’ite i te Atua ’e tāna ’ohipa, ’ua ha’amata ïa hou te tāhuti nei, ’e e’ita te reira e hope i ’ō nei. ’Ua ha’api’i mai te peropheta Iosepha Semita ē : « I muri a’e i tō ’ōutou tomora’a nā roto i te pāruru, e taime roa roa tō ’ōutou hou ’a ’apo mai ai ’ōutou i [te mau parau tumu ato’a o te fa’ateiteira’a] ».1 E patu tātou i ni’a i te ’itera’a tei roa’a ia tātou i roto i te ao vārua hou te tāhuti nei. Nō reira, ’a tāmata ai ’oia i te ha’api’i i te ’āti ’Īserā’ela i te nātura o te Atua ’e tōna auta’atira’a i tāna mau tamari’i, ’ua parau te peropheta Isaia :
« ’O vai tā ’ōutou e fa’afāito i te Atua ? E aha tā ’ōutou hōho’a ’ia fa’aau iāna ?
« E’ita ā ’ōutou e ’ite ? E’ita ā ’ōutou e fa’aro’o? ’aita ā ’ōutou i fa’a’itehia mai mai te mātāmua mai ā ? aita ā ’ōutou i ’ite mai te ha’amaura’a mai o te tumu o te fenua nei ? » (Isaia 40:18, 21).
’Ua ’ite tātou ē, e mau tino ta’a ’ē nā melo e toru o te Atuara’a. ’Ua ’ite tātou i te reira mai roto mai i te ha’api’ira’a i hōro’ahia mai e te peropheta Iosepha Semita : « E tino ’i’o ’e te ivi tō te Metua mai te au iho i tō te ta’ata nei te huru ; ’e te Tamaiti ato’a ho’i ; ’āre’a rā ’o te Vārua Maita’i rā, ’aore ïa tōna e tino ’i’o ’e te ivi, terā rā e tino vārua ’oia. ’Āhiri ’aita rā, e ’ore roa ïa e ti’a i te Vārua Maita’i ’ia pārahi i roto ia tātou nei » (PH&PF 130:22).
Nō ni’a i te ti’ara’a teitei o te Atua te Metua i roto i te Atuara’a, ’e tae noa atu i tā rātou ’ohipa tāta’itahi e rave, ’ua fa’ata’a mai te peropheta Iosepha ē :
« Te ta’ata tei ’ite i te mau ra’i i te matarara’a, ’ua ’ite ’oia ē, e toru ta’ata e vai ra i ni’a i te ra’i, tei mau i te mau tāviri nō te mana, ’e nā te hō’ē e fa’atere ia rātou…
« Teie mau ta’ata… ’ua pi’ihia rātou te Atua te mātāmua, te Rahu nui ; te Atua te piti, te Tāra’ehara fa’aora ; ’e te Atua te toru, te ’ite ’e ’aore rā, te Fa’a’ite parau.
« Nā te Metua e fa’atere ’ei Ra’atira ’e ’aore rā, ’ei Peresideni, ’o Iesu ’ei Ārai, ’e te Vārua Maita’i ’ei Fa’a’ite parau ’e ’aore rā ’ei ’Ite ».2
II. Te fa’anahora’a
’Ua māramarama tātou i tō tātou aura’a ’e te mau melo o te Atuara’a mai roto mai i tei heheuhia mai nō ni’a i te fa’anahora’a nō te fa’aorara’a.
Te mau uira’a mai te huru ē : « Nō hea mai tātou ? » « Nō te aha tei ’ō nei tātou ? » ’e « Tē haere nei tātou i hea ? » ’ua pāhonohia ïa i roto i te mea tā te mau pāpa’ira’a mo’a e parau nei ē, « te rāve’a rahi fa’aora » te « rāve’a rahi ’oa’oa », ’e ’aore rā te « rāve’a fa’aora » (Alama 42:5, 8, 11). Te ’evanelia a Iesu Mesia, te pū nō teie fa’anahora’a.
’Ei mau tamari’i vārua nā te Atua, i roto i te hō’ē orara’a hou te tāhuti nei, ’ua hina’aro tātou i tō tātou haere’a o te ora mure ’ore, terā rā ’ua haere tātou i mua ’ia au i tei mara’a ia tātou, ma te ’ore te ’itera’a nō te tāhuti nei i roto i te hō’ē tino tāhuti. Nō te horo’a mai i te reira rāve’a, ’ua fa’atere tō tātou Metua i te Ao ra i te Poietera’a o teie ao, i reira ho’i e ti’a ai ia tātou ’ia fa’a’ite pāpū i tō tātou hina’aro ’ia ha’apa’o i tāna mau fa’auera’a ’e ’ia fāri’i i te ’itera’a ’e ’ia tupu i te rahi nā roto i te tahi atu mau tītaura’a o te orara’a tāhuti nei, ma te tāpe’ahia rā tō tātou ha’amana’ora’a i te mau mea i tupu hou te fānaura’a i te tāhuti nei. I roto rā i te terera’a o taua tāmatara’a tāhuti nei, ’e nā roto i te Hi’ara’a o tō tātou nā metua mātāmua, e ro’ohia tātou i te pohe vārua nā roto i te tāpū-’ē-ra’a-hia i te aro o te Atua, te vi’ivi’ira’a i te hara, ’e te fāri’ira’a i te pohe tino. ’Ua fa’aineine ’e ’ua hōro’a mai te fa’anahora’a a te Metua i te mau rāve’a nō te upo’oti’a i ni’a i taua mau pāruru tā’āto’a ra.
III. Te Atuara’a
’Ua ’ite tātou i te fā o te fa’anahora’a rahi a te Atua, i teienei, e hi’o tātou i te ’ohipa tāta’itahi a nā melo e toru o te Atuara’a i roto i te reira fa’anahora’a.
E ha’amata tātou nā roto i te hō’ē ha’api’ira’a nō roto mai i te Bibilia. Nō te ’opani i tāna ’episetole i tō Korinetia, ’ua fa’ahiti te ’āpōsetolo Paulo i teie parau nō ni’a i te Atuara’a o te Metua, te Tamaiti ’e te Vārua Maita’i : « E ia ’ōutou ato’a na te aroha mau a te Fatu ra a Iesu Mesia, ’e te hina’aro o te Atua, ’e te au [’aore rā te auhoara’a3] a te Vārua Maita’i ra » (2 Korinetia 13:14).
Te parau nei teie pāpa’ira’a mo’a nō te Bibilia i te parau nō te Atuara’a e te here mau e te maita’i o te Atua te Metua, te misioni aroha e te fa’aora a Iesu Mesia, e te auhoara’a a te Vārua Maita’i.
Te Atua te Metua
’Ua ha’amata te mau mea ato’a nā ni’a i te Atua te Metua. Noa atu ē e mea iti tō tātou ’ite nō ni’a iāna, e mea faufa’a rā te mea tā tātou i ’ite nō te hāro’aro’a i tōna ti’ara’a hanahana, tō tātou aura’a e ’ōna, e tāna ’ohipa fa’aterera’a i roto i te fa’anahora’a nō te fa’aorara’a, te Poietera’a, ’e te mau mea ato’a i muri mai.
Mai tā Elder Bruce R. McConkie i pāpa’i nā mua noa a’e i tōna pohera’a : « I roto i te aura’a rahi ’e te faufa’a o te ta’o, hō’ē ana’e Atua mau ’e te ora. ’Oia te Metua, te Elohima Mana hope, te Ta’ata teitei, te Rahu nui ’e te ha’avā nō te Ra’i nui ātea ».4 ’Oia te Atua ’e te Metua o Iesu Mesia, ’e nō tātou pā’āto’a ato’a. ’Ua ha’api’i mai te peresideni David O. McKay ē, « te parau mau faufa’a mātāmua i hōro’ahia mai e Iesu Mesia ’o teie ïa, nō te fa’atere i ni’a i te mau mea ato’a, ’o te Atua ïa te Metua, te Fatu o te ra’i ’e te fenua ».5
Te mea tā tātou i ’ite nō ni’a i te nātura o te Atua te Metua ’o te mea ïa tā tātou e nehenehe e ’apo mai i roto i te tau ’ohipara’a ’e te mau ha’api’ira’a a tāna Tamaiti fānau tahi, ’o Iesu Mesia. Mai tā Elder Jeffrey R. Holland i ha’api’i mai, te hō’ē o te mau fā faufa’a rahi o te tau ’ohipara’a a Iesu, ’o te heheura’a mai ïa i te ta’ata nei « i te huru o te Atua tō tātou Metua Mure ’Ore… te heheura’a mai ia tātou iho i te nātura mau o tō tōna Metua, tō tātou Metua i te Ao ra ».6 Tei roto i te Bibilia te hō’ē fa’a’itera’a ’āpōsetolo ē, ’o Iesu, « ’o te hōho’a mau ïa » o tōna Metua (Hebera 1:3), tei hōro’a mai i te ha’api’ira’a a Iesu ē, « ’o tei hi’o mai iā’u ra, ’ua hi’o ïa i te Metua » (Ioane 14:9).
Te Atua te Metua ’o te Metua ïa o tō tātou vārua. ’O tātou tāna mau tamari’i. Tē here nei ’oia ia tātou, ’e te mau mea ato’a tāna e rave, nō tō tātou ïa maita’i mure ’ore. ’O ’oia te fatu nō te fa’anahora’a nō te fa’aorara’a, ’e e mea nā roto i tōna mana e fa’atupu ai te reira fa’anahora’a i te mau ’ōpuara’a o te hanahana rahi o tāna mau tamari’i.
Te Tamaiti
Nō te ta’ata tāhuti nei, te melo ’ite-mata-rahi-hia a’e o te Atuara’a, ’o Iesu Mesia ïa. Tē parau ra te hō’ē fa’ahitira’a parau ha’api’ira’a tumu nā te Peresidenira’a Mātāmua i te matahiti 1909 Nōna ē, « te fanau tahi i rotopū i te mau tamaiti ato’a a te Atua—te fānau tahi i roto i te vārua, ’e te fānau tahi i te tino nei ».7 Te tamaiti, tei rahi a’e i te ta’ata ato’a, ’ua mā’itihia ïa e te Metua nō te fa’atupu i te fa’anahora’a a te Metua—no te fa’a’ohipa i te mana o te Metua nō te hāmani i te mau ao hope ’ore ’ia tai’o (hi’o Mose 1:33) ’e nō te fa’aora i te mau tamari’i a te Atua i te pohe nā roto i tōna ti’a-fa’ahou-ra’a ’e i te hara nā roto i tōna tāra’ehara. Teie « tusia fa’ahiahia » ’ua parauhia ïa « te ’ohipa tumu o te ’ā’amu tā’āto’a o te ta’ata nei ».8
I taua mau taime ta’a ’ē ra ’e te mo’a ’a fa’a’ite tino roa mai ai te Atua te Metua i te Tamaiti, ’ua parau mai ’oia : « Ta’u Tamaiti here teie : ’a fa’aro’o iāna » (Mareko 9:7; Luka 9:35; hi’o ato’a 3 Nephi 11:7 ; Iosepha Semita—’Ā’amu 1:17). Nō reira, ’o Iesu Mesia, ’o Iehova, te Fatu te Atua o ’Īserā’ela, te paraparau i ’e nā roto i te mau peropheta.9 ’A fā mai ai Iesu i te ’āti Nephi i muri a’e i tōna ti’a-fa’ahou-ra’a, ’ua fa’a’ite mai ’oia iāna iho ’ei « Atua nō te ao ato’a nei » (3 Nephi 11:14). Nō reira Iesu e paraparau pinepine ai i te mau peropheta o te Buka a Moromona ’e i te feiā mo’a i te mau mahana hope’a nei ’ei « Metua ’e te Tamaiti », hō’ē ti’ara’a tei fa’ata’ahia i roto i te fa’a’itera’a parau ha’api’ira’a fa’auruhia a te Peresidenira’a Mātāmua ’e te pupu nō te Tino ’Ahuru Ma Piti 100 noa matahiti i ma’iri a’enei.10
Te Vārua Maita’i
Te toru o te melo o te Atuara’a ’o te Vārua Maita’i ïa, tei parau-ato’a-hia te Vārua Mo’a, te Vārua o te Fatu, ’e te Fa’aa’o. ’Oia te melo nō te Atuara’a tei riro ’ei ti’a mana nō te heheura’a nā te ta’ata iho. Nō te mea e ta’ata vārua ’oia (hi’o PH&PF 130:22), e nehenehe tāna e pārahi i roto ia tātou ’e ’ia rave i te ’ohipa faufa’a o te aparaura’a i rotopū i te Metua ’e te Tamaiti ’e te mau tamari’i a te Atua i ni’a i te fenua nei. E rave rahi pāpa’ira’a mo’a e ha’api’i nei ē, tāna misiōni ’o te fa’a’itera’a ïa i te Metua ’e te Tamaiti (hi’o Ioane 15:26; 3 Nephi 28:11; PH&PF 42:17). ’Ua fafau mai te Fa’aora ē, e ha’api’i mai te Fa’aa’o ia tātou i te mau mea ato’a, e fa’aha’amana’o ia tātou i te mau mea ato’a, ’e e arata’i ia tātou i te mau parau mau ato’a (hi’o Ioane 14:26; 16:13). Nō reira, e tauturu te Vārua Maita’i ia tātou ’ia ’ite i te parau mau ’e te parau ha’avare, e arata’i ia tātou i roto i tā tātou mau fa’aotira’a rarahi, ’e e tauturu ia tātou i roto i te mau tītaura’a o te tāhuti nei.11 ’Oia ato’a te rāve’a e ha’amo’ahia ai tātou, ’oia ho’i, e hōroihia ’e e tāmāhia i te hara (hi’o 2 Nephi 31:17; 3 Nephi 27:20; Moroni 6:4).
IV.
Nō reira, nāhea te hāro’aro’ara’a i teie parau tumu tei heheuhia mai mai te ra’i mai nō ni’a i te Atuara’a ’e te fa’anahora’a o te fa’aorara’a, i te tauturu ia tātou i roto i tā tātou mau tītaura’a i teie mahana ?
Nō te mea tē mau nei tātou i te parau mau nō ni’a i te Atuara’a ’e tō tātou aura’a ’e ’o rātou, te fā o te orara’a e te nātura o tō tātou haere’a mure ’ore, tē mau nei tātou i te hōho’a fa’a’ite ’avei’a hope nō tō tātou tere i te tāhuti nei. ’Ua ’ite tātou ’o vai tā tātou e ha’amori ’e nō te aha tātou e ha’amori ai. ’Ua ’ite tātou ē, ’o vai tātou ’e e riro mai tātou e aha (hi’o PH&PF 93:19). ’Ua ’ite tātou ē, nā vai e fa’atupu i te mau mea ato’a, ’e ’ua ’ite tātou ē, e aha te ti’a ia tātou ’ia rave nō te fāna’o i te mau ha’amaita’ira’a hōpe’a ’o te tae mai nā roto i te fa’anahora’a nō te fa’aorara’a. Nāhea tātou e ’ite ai i teie mau mea ato’a ? E ’ite tātou nā roto i te heheura’a a te Atua i tāna mau peropheta ’e ia tātou tāta’itahi.
Nō te tāpae i te mea tā te ’āpōsetolo Paulo i parau ē, « te fāito i te ’ī o te Mesia i te rahi » (Ephesia 4:13) ’e ’ere ïa i te ’ite noa te tītauhia. E’ita e nava’i te ’ite-noa-ra’a tātou i te ’evanelia ; tītauhia rā ia tātou ’ia ’ohipa e ’ia feruri ’ia ti’a i te reira ’ia fa’afāriu ia tātou. Tē ha’api’i nei tō te ao nei ’ia ’imi i te ’ite nō ni’a i te hō’ē mea ; ’āre’a te fa’anahora’a nō te fa’aorara’a ’e te ’evanelia a Iesu Mesia ra, tē tītau nei ïa ’ia riro mai tātou ’ei hō’ē mea.
Mai tā te peresideni Thomas S. Monson i ha’api’i mai ia tātou i roto i tā tātou ’āmuira’a rahi i ma’iri a’enei :
« E mea faufa’a tō tātou Fa’aora ’o Iesu Mesia nō te fa’anahora’a [nō te fa’aorara’a]. ’Aita tāna tusia tāra’ehara, ’ua mo’e ïa te tā’āto’ara’a. Teie rā, ’aita i nava’i te ti’aturi-noa-ra’a iāna ’e i tāna misiōni. Tītauhia ’ia ’ohipa tātou ’e ’ia ha’api’i ho’i, ’ia ’imi ’e ’ia pure, ’ia tātarahapa ’e ’ia ha’amaita’i ia tātou. Tītauhia ’ia ’ite tātou i te mau ture a te Atua ’e ’ia ora i te reira. Tītauhia ’ia fāri’i tātou i tāna mau ’ōro’a fa’aora. Mea nā reira noa e noa’a ai ia tātou te ’oa’oara’a mau ’e te mure ’ore…
« Mai roto roa mai i te hōhonura’a o to’u vārua ’e ma te ha’eha’a hope », ’ua nā ’ō te peresideni Monson, « tē fa’a’ite pāpū nei au i te hōro’a rahi o te fa’anahora’a a tō tātou Metua nō tātou. ’O te hō’ē noa iho haere’a ti’a mau e tae atu ai i te hau ’e te ’oa’oa i teienei ’e i roto i te ao a muri a’e ».12
Te ’āpiti nei au i tō’u ’itera’a pāpū i tō tō tātou peropheta-peresideni. Tē fa’a’ite pāpū nei au ē, e Metua i te Ao ra tō tātou e here nei ia tātou. Tē fa’a’ite pāpū nei au ē, e Vārua Maita’i nō tātou e arata’i ra ia tātou. ’E tē fa’a’ite pāpū nei au nō Iesu Mesia, tō tātou Fa’aora, nā roto iāna i matara ai te mau mea ato’a, i te i’oa o Iesu Mesia, ’āmene.