Tum Mein Bada Kaun
Parmeshwar ka sabse bada inaam unko diya jaata hai jo inaam ki aasha nahin karte.
Mere priye bhaaiyo, priye doston, mai abhaari hoon is prerit vishwabhar ke purohiti sabha mein aapke saath rehne ke liye. Pradhaan Monson, aapke sandesh aur ashirvaad ke liye dhanyevaad. Hum hamesha aapke nirdeshan, salaah, aur gyaan ke shabdon ko pyaar se swikaar karenge. Hum aapko prem aur samarthan hamesha karenge, aur aapke liye prarthna karenge, hamare priye Adhyakstha, aur Prabhu ke bhavishyevakta. Aap humare Pradhaan hain. Hum aap ko samarthan karte hain aur aap se prem karte hain.
Lagbhag bees saal pehle, Madrid Spain Mandir ka samarpan hua tha aur wahan se uski sewa shuru hui Prabhu ke pavitra ghar ke rup mein. Harriet aur mujhe achchi tarah yaad hai kyunki mai Europe Chetra Adhyakshta mein sewa kar raha tha. Kayi anye logon ke saath, humne kayi ghante bitaaye samarpan tak ke kaarwaayi ki yojna banate aur aayojit karte huwe.
Jab samarpan ka taarikh aayi, maine dekha ki abhi tak mujhe usmein jaane ka nimantran nahin mila hai. Iski maine apeksha nahin ki thi. Kyunki, meri zimmedaari Chetriye Adhyakshta ka tha, isliye maine is mandir project mein bahut kaam kiya tha aur mehsoos kiya ki mera bhi kuch hak banta hai.
Maine Harriet se pucha ki kya usne nimantran dekha tha. Usne nahin dekha.
Din beette gaye aur mera utsukta badha. Maine socha shaayad hamara nimantran kho gaya—shaayad hamare sofa ke gaddo ke beech daba ho. Shaayad unavashyak daak/mail ke saath milkar fek diye gaye ho. Padosi ki ek musibat waali billi thi, aur mai uspar bhi shak ki nazar se dekhne laga.
Ant mein mujhe sachchaai manna pada: mujhe nahin bulaya gaya tha.
Par yeh kaise mumkin tha? Kya maine kisi ko naaraaz kiya tha? Kya kisi ne socha ki hamare liye safar bahut lamba hoga wahan tak ka? Kya woh mujhe bhool gaye the?
Tab, maine jaana ki ayse sochte rehne se mera rawaiya waisa ho jaaega jo mujhe pasand nahin hai.
Harriet aur mai ne ek dusre ko yaad dilaya ki mandir ka samarpan hamare baare mein nahin tha. Hamein nahin jaanna tha kise bulaya gaya aur kise nahin. Aur yeh hamare ehsaason ya hamare hak ke baare mein nahin tha.
Yeh ek pavitra imaarat, Sarvashaktimaan Parmeshwar ke ek mandir ke samarpan ke baare mein tha. Girjaghar ke Spain ke sadasyon ka khushi manane ka din tha.
Agar mujhe amantrit kiya jaata, mai itne khushi se jaata. Par agar mujhe amantrit nahin kiya jaata, meri khushi bahut kam nahin hoti. Harriet aur mai hamare doston, priye bhaaiyon aur bahano ke saath anandit hote, dur se. Hum is ashcharyejanak ashirvaad ke liye Parmeshwar ki prashansa utne hi josh se apne Frankfurt waale ghar se karenge jitna Madrid se karte.
Garjan ke Putra
Jin Barah ko Ishu ne niyukt kiya unmein do bhaai the, James aur John. Usne unhe kya naam diya, tumhe yaad hai?
Garjan ke Putra (Boanerges).1
Kisi ko aysa naam nahi milta agar uske piche koi dilchasp kahani nahi hoti. Durbhaagye se dharamshaastra mein bahut kuch nahin likha kaise woh naam shuru hua. Haalaanki, hamein James aur John ke visheshtaaon ki jahlkiyaan milti hai. Yeh wohi do bhaai the jinhonne Samaria ke ek gaaon par aag barswaaya tha kyunki unhe shahar mein nahin jaane diya gaya tha.2
James aur John machwaare the—isliye thode anaadi the—par mera anumaan hai woh praktiti ke baare mein bahut kuch jaante the. Yakeenan, woh kuch kar dikhaane waale vyakti the.
Ek samay, jab Uddhaarkarta Jerusalem jaane ki Apni antim yaatra ki tayaari kar raha tha, James aur John uske paas ek khaas vinti lekar aaye—woh jo unke diye gaye naam ke laayak tha.
“Hum chahate hai ki jo kuch hum tujhse maange wohi tu hamare liye kare,” unhonne kaha.
Mai kalpana kar sakta hoon kaise Ishu muskuraaya hoga jab Usne jawaab diya, “Tum kya chahate ho?”
“Hamein yah de ki teri mahima mein hum mein se ek tere daahine, aur dusra tere baaye baethe.”
Ab Uddhaarkarta ne unhe chunaoti di ki woh aur gehra soche ki woh kya maang rahe hai aur kaha, “Par jin ke liye tayaar kiya gaya hai, unhein chodh aur kisi ko apne daahine aur apne baaye bithaana mera kaam nahin.”3
Anye shabdon mein, tum chunaao prachaar ki tarah karke swarg ke raajye mein sammaan nahin paaoge. Na to tum apne tarike se “kisi ko fusla kar” anant mahima paaoge.
Jab anye das Chelon ne Gajar ke Beton se suna is maang ke baare mein, woh bahut khush nahin the. Ishu jaanta tha Uska samay khatm ho raha hai, aur Apne kaarye ko aage badhane waalon mein hi vivaad dekh Use takleef hua hoga.
Usne Barah se shakti ke prakriti par baare ki aur kaise usse unpar asar padta hai jo use dhoondhte aur kaayam rakhte hai. Usne kaha, “Jo log duniya mein prabhaaoshaali hai, woh auron par apne bade hone ka adhikaar jatate hai.”
Mai to Uddhaarkarta ko dekhne waala hoon, apne vishwaasi aur bharosemand chelon ke chehron ko anant prem se dekhte huwe. Mai to Unke niwedan ke aawaaz ko sunne waala hoon: “Tumhare mein aysa nahin hai. Balki, jo koi tum mein bada hona chaahe, woh tumhara sewak bane: Aur jo koi tum mein pradhaan hona chaahe, woh sab ka daas bane.”4
Parmeshwar ke raajye mein, mahaanta aur netadaari ka matlab hai logon ko aam rup se dekha jaaye—jaise Parmeshwar unhe dekhta hai—aur phir aage badhkar unki dekhrekh karein. Uska matlab hai jo khush hai ke saath khushi manana, dukhi dukhi ke saath rona, jo musibat mein hai use santaaona dena, aur apne padosi se utna prem rakh jitna Masih humse karta hai. Uddhaarkarta Parmeshwar ke sabhi bachchon se prem karta hai chaahe unke samaajik-aarthik stithi, jaati, bhaasha, raajnitik soch, ya naagrikta jo bhi ho. Aur hamein bhi aysa karna chahiye!
Parmeshwar ka sabse bada inaam unko diya jaata hai jo inaam ki aasha nahin karte. Woh unhein milta hai jo badhaai nahin chahate; jo shaamt se auron ki sewa ke tarike dhoondhte hai; woh jo dusron ki dekhrekh isliye karte hai kyunki woh Parmeshwar aur Parmeshwar ke bachchon se prem karte hai.5
Bura Asar Nahi Lena
Ek Maha Adhikaari niyukt hone se kuch pehle, mujhe mauka mila tha Pradhaan James E. Faust ke saath ka, ek stake ke dobara aayojan ke samay. Jab mai gaadi chala raha tha sundar Southern Utah ki or jahan hamein jaana tha, Pradhaan Faust ne mujhe achchi tarah samjhaaya aur salaah diya. Ek paath mai kabhi nahin bhulunga. Usne kaha, “Girjaghar ke sadasye Maha Adhikaariyon ko achchi tarah se dekhenge. Woh tumse achcha se pesh aayenge aur tumhare baare mein achchi baate karenge.” Phir usne thoda ruk kar kaha, “Dieter, hamesha iske liye abhaari rehna, par kabhi iska apneaap par bura asar nahin hone dena.”
Girjaghar sewa ka yeh avashyak paath har ek purohiti rakhne waale se tallukh rakhta hai Girja ke har parishad mein. Yeh hum sab par laagu hota hai is Girjaghar mein.
Jab Pradhaan J. Reuben Clark ne Girjaghar mein niyukt huwe adhikaariyon ko salaah diya, woh unhe kehte ki rule numbar 6 mat bhulna.
Avashye hi, woh vyakti puchega, “Rule nambar 6 kya hai?”
“Chinta mat karo ki sab log kya sochte hai,” woh kahega.
Isse to, ek aur sawaal uthta hai: “Anye 5 rule kya hain?”
Aankhon mein chamak liye, Pradhaan Clark kahega, “Kuch bhi to nahin hai.”6
Achche Girjaghar neta banne ke liye, hamein yeh zaroori paath seekh lena hai: Girjaghar mein netadaari mein utna dusron ko nirdesh nahin karna hota jitna hamein Parmeshwar dwara nirdesh hone ki ichcha rakhna hai.
Niyuktiyaan Sewa Karne ke Mauke Hai
Sarvashaktimaan ke Sant hone ke naate, hamein “sabhi cheezon mein gareeb aur zarooratmand, beemaar aur peedit ko yaad karna hai, kyunki jo bhi aysa nahin karega, wohi mera chela nahin.”7 Achchaai karne aur auron ki sewa karne ke mauke to anginit hai. Hum use apne samaaj, ward aur shaakha, aur avashyak hamare gharon mein bhi paa sakte hai.
Iske saath saath, Girjaghar ke sar sadasye ko aupchaarik mauke milte hai sewa ke. Hum in maukon ko “niyuktiyaan” kehte hai—ek shabd jisse hum yaad kar lete hai ki kisne hamein sewa ki aagya di hai. Agar hum apne niyuktiyon ko Parmeshwar ka sewa karne ke mauka jaisa maano aur auron ki dekhrekh vishwaas aur vinamrata se karo, sewa ka har kaarye chelapan ke maarg par ek badhta kadam rahega. Is tarah se, Parmeshwar sirf Apne Girjaghar ko hi nahin badhata par Apne sewakon ko bhi. Girjaghar hamein Masih ke sachche aur vishwaasi chele banane ke liye madad karta hai, Parmeshwar ke achche aur shresht putriyaan. Yeh tabhi hota hai jab hum kewal sabha mein jaate aur bhaashan sunte nahin par jab hum auron ke baare mein soch kar unki sewa karte hai. Isi tarah hum Parmeshwar ke raajye mein “bada” bante hai.
Hum niyuktiyon ko gaorav, vinamrata, aur abhaar se dekhte hai. Jab hum in niyuktiyon se mukt hote hai, hum yeh badlaao usi gaorav, vinamrata, aur abhaar se apnaate hai.
Parmeshwar ke nazar mein koi niyukti nahin hai is raajye mein jo duje se zyaada avashyak hai. Hamara sewa— chaahe bada ya chota— hamare aatmaaon ko sudhaarta, swarg ke khidkiyaan kholta, aur Parmeshwar ke ashirvaadon ko sirf unpar nahin undelta jiski hum sewa karte par hamein bhi. Jan hum auron ki madad karte hai, hum jaan paate hai vinamra saahas se ki Parmeshwar hamare sewa ki prashansa swikriti aur santushti se karta hai. Woh humpar muskaata hai jab hum prem ke in kaaryon ko karte hai, khaaskar jo kaarye auron ne na dekha ya jaana ho. 8
Har baar hum kisi ke liye kuch karte hai, hum ek kadam nazdeek jaate hai achche aur sachche chelein banne ke Unke liye jisne Apna sab kuch hamare liye diya.
Adhyaksh Karne se Juloos Tak
Salt Lake Valley mein purvajon ke aagman ke 150th saal gira ke daoraan, Bhaai Myron Richins Henefer, Utah mein ek stake adhyaksh the. Samaroh mein purvajon ke maarg par chalna tha jab weh shahar mein aaye the.
Pradhaan Richins samaroh ke yojnaaon ko banane mein vyast tha, aur woh kayi sabhaaon mein bhaag leta tha Maha Adhikaariyon aur auron ke saath in ghatnaaon par baate karne ke liye.
Samaroh ke shuru hone se thode hi pehle, Pradhaan Richin’s ka stake dobara aayojit hua, aur use adhyaksh ke niyukti se mukt kiya gaya. Uske baad ke ek Raviwaar ko, woh apne ward ke purohiti sabha mein tha jab netaaon ke volunteers ki maang ki samaroh ke liye. Pradhaan Richins, aur anye logon ne, apne haath uthaaye aur unhe samjhaya gaya ki weh kaam karne waale kapde pahene aur apna lorry aur ek sabbal laaye.
Akhir mein, us bade samaroh ka din aaya, aur Pradhaan Richins apna volunteer kaarye karne gaya.
Sirf kuch hafte pehle, woh is samaroh ka prabhaaoshaali sahayak tha yojna banane aur kaam tay karne ka. Haalaanki, us din par, uska kaam tha juloos ke ghodon ka picha karna aur unke leedh ko saaf karna jab woh gire.
Pradhaan Richins ne yeh kaam gaorav aur khusyali se kiya.
Woh samajhta tha ki koi kaarye kisi aur se bada nahin hota.
Woh Uddhaarkarta ke shabdon ko jaanta tha aur usne amal mein laaya: “Jo tumse bada ho woh tumhara sewak bane.”9
Chelapan Ke Farz ko Sahi se Karna
Kabhi kabhi, Garjan ke Putron ki tarah, hamein bhi unche padhwi chahiye. Hamein sammaan chahiye. Hum aguwaai karna aur kuch yaadgaar kar dikhana chahate hai.
Prabhu ki sewa karne ki chaahat rakhna galat nahin hai, par jab hum Girjaghar mein prabhaaoshaali hona chaahe apne faede ke liye—taaki manushye se shabashi aur prashansa mile—hamein apna inaam mil gaya hai. Jab hamein auron ke shabashi “ka bura asar hota hai”, woh shabashi hamara inaam hoga.
Girjaghar mein sabse avashyak niyukti kya hai? Wohi jo abhi tumhara hai. Chaahe kitna bhi chota ya bada woh lage, jo ab tumhara niyukti hai ussi se tumhe madad milegi auron ko badhawa dene mein aur Parmeshwar ka woh chela banne ki jiske liye tumhe banaya gaya tha.
Purohiti ke mere priye doston aur bhaaiyo, tum jahan ho wahi se badhawa do!
Paul ne Philippians ko batlaya, “Virodh ya jhuti badhaai ke liye kuch na karo, par deenta se ek dusre ko apne se achcha samjho.”10
Gaorav se Sewa Karna
Sachche aur vinamra sewa ke badle mein Girjaghar mein gaorav aur prashansa chahana Esau ke jaisa vyapaar hai.11 Hum shaayad dharti par inaam paaenge, par ismein nuksaan bahut hai—swargiye santushti ka khona.
Aao hum hamare Uddhaarkarta ka uddharan lein, woh deen aur chota tha, jiske manushyon se aadar nahin chaha tha par Apne Pita ki ichcha karna.12
Aao hum auron ko vinamrata se sewa karein—furti, abhaar, aur gaorav ke saath. Bhale hi hamara karm chota, saada, ya kam mol ka lage, jo log auron ko daya aur prem dein ko ek din apne sewa ka mol pata lagega Sarvashaktimaan Parmeshwar ke anant aur ashish bhare upkaar se.13
Mere priye bhaaiyo, priye doston, hum sab purohiti ke sanchaalan ke is bahut avashyak paath par gaor karein, samjhe, aur use jiye: “Woh jo tum mein bada hai, wohi sewak bane.” Yeh hai mera prarthna aur ashirvaad, Ishu Masih ke naam se, amen.