2010-2019
Ang Labing Daku sa Inyo
April 2017


Ang Labing Daku sa Inyo

Ang labing daku nga premyo sang Dios nagakadto sa mga nagaalagad nga wala nagapaabot sang balos.

Mahal kong mga kauturan, mahal kong kaabyanan, daku gid ang akon pagpasalamat nga mangin kaupod ninyo sa sining makainspirar nga kalibutanon nga miting sang priesthood. President Monson, salamat gid sa imo mensahe kag bendisyon. Tandaan gid namon ang imo mga ehemplo, laygay kag kaalam. Palangga kag ginasuporta ka namon, kag pirme ka namon ginapangamuyuan. Ikaw matuod-tuod nga propeta sang Ginuo. Ikaw ang amon Pangulo. Ginapalangga kag ginasuporta ka namon.

Halos duha ka dekada na ang nagligad, ang Templo sang Madrid sa España gindedikar kag ginsugdan ang pagserbisyo sini bilang balay sang Ginuo. Madumduman gid namon ini ni Harriet kay nagaalagad ako sa Area Presidency sang Europa sadto nga tion. Upod sang madamo nga iban pa nga mga tawo, naghatag kami sang madamo nga mga oras sa paghikot sa mga detalye sang pagplano kag pagpatigayon sang mga kahiwatan pakadto sa adlaw sang pagdedikar.

Sang nagahilapit na ang adlaw sang pagdedikar, nadiparahan ko nga wala pa ako nakabaton sang imbitasyon nga magtambong. Medyo wala ini ginapaabot. Kay, sa akon responsibilidad bilang Area President, daku ang akon partisipasyon sa sining proyekto sa templo kag nagabatyag ako nga responsible sini sa diutay nga paagi.

Ginpamangkot ko si Harriet kon nakabaton sia sang imbitasyon. Wala sia nakabaton.

Nagligad ang inadlaw kag ang akon kahangawa nagdugang. Ginpanumdum ko nga kon nadula ang amon imbitasyon—basi naipit ini sa tunga sang mga kutson sang amon sopa. Basi naimpon ini sa witi-witi nga mga sulat kag nahaboy. Ang amon tupad-balay may busisero nga kuring, kag asta sia ginsuspetsuhan ko.

Sang ulihi, napilitan ako sa pagbaton sang kamatuoran: Wala ako naimbitar.

Pero paano ina natabo? May nahimo bala ako nga nakasaklaw sa mga nagapamuno sang dedikasyon? May naghunahuna bala nga malayo kaayo para sa amon ang magbiyahe? Nalimtan bala ako?

Sang ulihi, narealisar ko nga ang pagpadayon sa amo sini nga klase sang panghunahuna magadala sa akon sang pamatasan nga indi ko luyag maangkon.

Ginpahanumduman namon ni Harriet ang amon mga kaugalingon nga ang dedikasyon sang templo indi parte sa amon. Indi ini parte sa kon sin-o ang nagakaangay nga imbitahon ukon indi. Kag indi ini parte sa amon mga balatyagon ukon pagpati nga may diretso kami sa pagtambong sa dedikasyon.

Parte ini sa pagdedikar sang isa ka balaan nga edipisyo, isa ka templo sang Labing Mataas nga Dios. Isa yadto ka adlaw sang pagkasadya para sa mga miyembro sang Simbahan sa España.

Kon gin-imbitar ako nga magtambong, himuon ko sing malipayon. Pero kon wala ako naimbitar, ang akon kalipay indi man magbuhin. Si Harriet kag ako magakalipay upod sa amon mga abyan, ang amon pinalangga nga mga kauturan sa Simbahan sa malayo. Pagadayawon namon sa gihapon ang Dios para sining manami nga bugay sing hugot-sa-tagipusuon halin sa amon puluy-an sa Frankfurt pareho lang sang sa Madrid.

Mga Anak sang Daguob

Upod sa Dose nga gintawag kag gin-ordinan ni Jesus amo ang duha ka mag-utod nga sanday Santiago kag Juan. Madumduman bala ninyo ang hayo nga ginhatag Niya sa ila?

Mga anak sang Daguob (Boanerges).1

Ang isa ka tawo indi paghatagan sang amo sina nga hayo kon wala sang pinasahi nga rason. Sa masubo, ang balaan nga mga kasulatan wala nagahatag sang bastante nga paathag parte sa kon ngaa ginhatagan sila ni Jesus sina nga hayo. Pero, ang balaan nga mga kasulatan nagahatag sang diutay nga impormasyon parte sa pamatasan nanday Santiago kag Juan. Amo man ini sila ang mag-utod nga nagpanugyan kay Jesus nga magsugo sang kalayo nga manaog halin sa langit sa isa ka banwa sa Samaria bangud wala sila gin-imbitar nga magkadto diri.2

Sanday Santiago kag Juan mga mangingisda—ayhan diutay ang tinun-an—pero sa banta ko, madamo ang ila nahibal-an parte sa dunang kapalibutan kag sa pwersa sini. Segurado, mga tawo sila nga maabtik mag-akto.

Sa isa ka okasyon, sang ang Manluluwas nagahanda sa paghimo sang Iya katapusan nga pagpanglakaton sa Jerusalem, sanday Santiago kag Juan nagpalapit sa Iya nga may pinasahi nga pangabay—isa nga ayhan nagakabagay sa ila hayo.

“Luyag namon nga himuon mo sa amon ang bisan anong amon pangayuon sa imo,” siling nila.

Ginapanumdum ko si Jesus nga nagayuhum sa ila samtang ginasabat Niya sila, “Ano bala ang buot ninyo nga akon himuon sa inyo?”

“Itugot sa amon nga kami maglingkod sa imo himaya, ang isa sa imo tuo kag ang isa sa wala.”

Ang Manluluwas karon naghangkat sa ila sa pagpanumdum sing mas madalum parte sa kon ano ang ila ginapangabay kag nagsiling, “Ang paglingkod sa akon tuo kag sa akon wala indi akon ang pagtugot kundi ila ini sang gin-amanan sini.”3

Sa iban nga pulong, indi kamo mapasidunggan sa ginharian sang langit paagi sa pagpangampanya. Kag indi ninyo maangkon ang wala’y katapusan nga himaya paagi sa “palapit-lapit” sa mga lider sang Simbahan ukon sa Manlululuwas.

Sang ang napulo ka mga Apostoles nakabati parte sining pangabay halin sa mga Anak sang Daguob, nasaklaw sila. Nakahibalo si Jesus nga diutay na lang ang Iya nabilin nga tion sa duta, kag ang makita nga may mga pagbinais-bais sa tunga sang mga tawo nga magapadayon sang Iya buluhaton segurado gid nga nagtublag sa Iya.

Naghambal Sia sa Dose parte sa kinaiya sang gahum kag paano ini nagaapekto sinang mga nagapangita kag nagakapot sini. “Ang gamhanan nga mga tawo sa kalibutan,” siling Niya, “nagagamit sang ila poder sa pagdumar sa iban.”

Halos makita ko ang Manluluwas nga nagatulok sing may tuman kadaku nga pagpalangga sa mga guya sadtong matinuohon kag masinaligon nga mga disipulo. “Apang indi amo ini sa inyo. Kundi ang bisan sin-o sa inyo nga buot mangin daku mangin-alagad ninyo: Kag ang bisan sin-o sa inyo nga buot mangin-nahauna mangin ulipon sang tanan.”4

Sa ginharian sang Dios, ang pagkahalangdon kag pagkalider nagakahulugan sang paghangop sa iban sa kon ano gid sila—pareho sang pagtan-aw sa ila sang Dios—kag dayon pagdab-ot sa ila kag pag-alagad sa ila. Nagakahulugan ini sang pagkasadya upod sinang mga nagakalipay, paghibi upod sinang nagakalisod, pagbulig sinang mga nagaantus, kag pagpalangga sang aton mga kaingod subong sang pagpalangga sa aton ni Cristo. Ang Manluluwas nagapalangga sang tanan nga mga anak sang Dios bisan ano pa man ang ila kahimtangan sa kabuhi, rasa, relihiyon, lengguahe, huyog sa politika, nasyonalidad, ukon bisan ano nga iban pa nga paggrupo. Kag dapat kita amo man!

Ang pinakadaku nga premyo sang Dios nagakadto sa mga nagaalagad nga wala nagapaabot sang balos. Nagakadto ini sa mga nagaalagad nga wala nagapangita sang pagdayaw sang iban; sa sinang sekreto lang nga nagahimo sang mga pamaagi nga makabulig sa iban; sa sinang mga nagaalagad sa iban bangud lang kay palangga nila ang Dios kag ang mga anak sang Dios. 5

Indi Paghakloa

Indi madugay pagkatapos nga gintawag ako bilang bag-o nga General Authority, may prebilihiyo ako nga makaupod kay President James E. Faust para sa pagreorganisar sang isa ka Stake. Samtang ginamaneho ko ang awto padulong sa amon kaladtuan sa matahum nga Sur sang Utah, si President Faust mainulikdon nga naggamit sang tion agud laygayan kag tudloan ako. Gintudloan niya ako sang isa ka leksyon nga indi ko gid malimtan. Siling niya, “Ang mga miyembro sang simbahan maalwan gid sa mga General Authority. Tratohon ka nila sing mapinalanggaon kag mahambal sila sing maayo nga mga butang parte sa imo.” Dayon, nagpundo sia sing makadali kag nagsiling, “Dieter, magpasalamat gid pirme para sini, pero indi gid ini paghakloa.”

Ining importante nga leksyon parte sa pag-alagad sa Simbahan nagakadapat sa tagsa ka nagakapot sang priesthood sa tagsa ka korum sang Simbahan. Nagakadapat ini sa tanan sa aton sa sini nga Simbahan.

Kon si President J. Reuben Clark, Jr. maglaygay sadto sa mga gintawag sa mga palangakuan nga may awtoridad sa Simbahan, ginahambalan niya sila nga indi pagkalimtan ang ika-anum nga pagsulundan.

Sa indi malikawan, ang tawo mamangkot, “Ano ang ika-anum nga pagsulundan?”

“Indi magpalibog sing sobra sa ginapanumdum sang iban sa imo,” siling niya.

Siyempre, sundan ini sang isa pa ka pamangkot: “Ano ang lima ka iban pa nga mga pagsulundan?”

Nga may yuhum sa iya guya, si President Clark nagasiling, “Wala na.”6

Agud mangin epektibo nga mga lider sang Simbahan, dapat naton tun-an ining importante nga leksyon: ang pagkalider sa Simbahan indi gid tuman parte sa paggiya sa iban sangsa aton kahanda nga giyahan sang Dios.

Ang mga Katungdanan sa Simbahan mga Oportunidad sa Pag-alagad

Bilang mga Santos sang Labing Mataas nga Dios, kinahanglan “dumdumon naton sa tanan nga mga butang ang imol kag nagakinahanglan, ang nagamasakit kag nagaantus, kay sia nga wala nagahimo sining mga butang, ang amo man indi Iya disipulo.”7 Ang mga oportunidad sa paghimo sang maayo kag pag-alagad sa iban tuman kadamo. Makita naton ang mga ini sa aton mga komunidad, sa simbahan, kag segurado gid sa aton mga puluy-an,

Dugang pa, ang tagsa ka miyembro sang Simbahan ginahatagan sang pat-od kag pormal nga mga oportunidad sa pag-alagad. Ginatawag naton ining mga oportunidad nga mga “katungdanan” —isa ka pulong nga dapat magpahanumdum sa aton sang kon sin-o ang nagatawag sa aton sa pag-alagad. Kon ginakabig naton ang aton mga katungdanan bilang mga oportunidad sa pag-alagad sa Dios kag sa iban nga may pagtuo kag pagpaubos, ang tagsa ka buhat sang pag-alagad mangin isa ka tikang sa alagyan sang pagkadisipulo. Sa sini nga paagi, ang Dios wala lamang nagapauswag sang Iya Simbahan kundi nagapatin-ad man sang Iya mga alagad. Ang Simbahan gindisenyo agud buligan kita nga mangin matuod-tuod kag matutum nga mga disipulo ni Cristo, maayo kag dungganon nga mga anak sang Dios. Matabo ini indi lamang kon magtambong kita sa mga miting kag magpamati sa mga pulong kundi kon kalimtan man naton ang aton mga kaugalingon kag mag-alagad. Amo sini kon paano kita mangin “daku” sa ginharian sang Dios.

Ginabaton naton ang mga katungdanan nga may dignidad, pagpakaubos, kag kapasalamatan. Kon ginabawi sa aton ining mga katungdanan, ginabaton naton ang pagbag-o nga may amo man nga kalipay, pagpakaubos kag kapasalamatan.

Sa panulok sang Dios, wala sang katungdanan sa ginharian nga mas importante sangsa isa. Ang aton pag-alagad— gamay man ukon daku—nagatinlo sang aton mga espiritu, nagabukas sang mga bintana sang langit, kag nagabubo sang mga bugay sang Dios indi lamang sa aton mga ginaalagaran kundi sa aton man. Kon nagadab-ot kita sa iban, sarang naton mahibaloan sing may mapainuboson nga pagsalig nga ang Dios nagabaton sang aton pag-alagad nga may kahamuot kag pagdayaw. Nagayuhum sia sa aton paghalad sining hugot-sa-tagipusuon nga mga buhat sang kaluoy, ilabi na gid inang mga buhat nga indi makita kag madiparahan sang iban. 8

 Sa tagsa ka tion nga nagahatag kita sang aton panahon kag ikasarang sa iban, nagatikang kita palapit sa pagmangin maayo kag matuod nga mga disipulo sa Isa nga naghatag sang Iya tanan para sa aton: aton Manuluwas.

Halin sa Pagpangulo asta sa Parada

Sa tion sang ika-150 nga anibersaryo sang pag-abot sang mga pionero sa Salt Lake Valley, si Brother Myron Richins nagaalagad bilang stake president sa Henefer, Utah. Ang selebrasyon nagalakip sang pagdrama-drama sang pag-agi sang mga pionero sa iya banwa.

Daku ang papel ni President Richins sa pagplano sang selebrasyon, kag nagtambong sia sa madamo nga mga miting upod sa mga General Authority kag iban pa agud hambalan ang mga kahiwatan. Nagapasakop gid sia sing lubos.

Sa malip-ot nga tion antes magsugod ang selebrasyon, ang stake ni President Richins gin-organisar liwat, kag ginbawi sa iya ang pagkapangulo. Pila ka Dominggo pagkatapos sadto, sang nagatambong sia sa priesthood miting sang iya ward ang mga lider nagpangita sang mga miyembro nga maboluntaryo sa pagbulig sa selebrasyon. Si President Richins, upod sa iban pa, nag-alsa sang iya kamot kag ginhambalan nga magsuksok sang biste sang trabahador kag magdala sang iya trak kag pala.

Wala madugayi, ang adlaw sang daku nga hitabo nag-abot, kag si President Richins nagpakita agud maghimo sang iya tulumanon bilang isa sang mga nagboluntaryo.

Pila lang ka semana antes, isa sia sang importante nga mga tawo nga nagbulig sa pagplano kag pagdumala sining daku nga kahiwatan. Sa adlaw mismo sang selebrasyon, ang iya obra amo ang magsunod sa mga kabayo sa parada kag magtinlo sang ila higko.

Ginhimo ini ni President Richins sing malipayon kag sing masinadyahon.

Nahangpan niya nga ang isa ka klase sang pag-alagad indi maglabaw sa isa.

Nahibaloan niya kag ginahimo ang mga pulong sang Manluluwas: “Ang bisan sin-o sa inyo nga buot mangin daku, mangin alagad ninyo.”9

Paghimo sang Pagkadisipulo sa Husto nga Paagi

Kon kis-a, pareho sang mga Anak sang Daguob, luyag naton sang bantug nga mga katungdanan. Nagapangita kita sang pagkilala. Luyag naton magpanguna kag maghimo sang halandumon nga mga kontribusyon.

Wala sing may malain sa kaluyag nga mag-alagad sa Ginuo, pero kon nagapangita kita nga mag-angkon sang impluwensiya sa Simbahan para sa aton kaugalingon nga benepisyo—agud makabaton sang pagdayaw kag pasidungog sang tawo— may aton kita nga premyo. Kon “ginahaklo” naton ang pagdayaw sang iban, inang pagdayaw amo ang aton mangin kabayaran.

Ano ang pinakaimportante nga katungdanan sa Simbahan? Ina amo ang imo nga ginakaptan sa karon. Bisan daw ano man kakubos ukon kabantug ini, ang imo katungdanan karon amo ang magatugot sa imo indi lang nga magtib-ong sa iban kundi man maghimo sa imo nga mangin ang tawo sang Dios nga sa amo nga katuyuan gintuga ka.

Pinalangga ko nga mga kaabyanan kag kauturan sa priesthood, magbulig bisan sa diin kamo!

Si Pablo nagpanudlo sa mga taga-Filipos, “Dili maghimo sang bisan ano gikan sa pagkamaiyaiyahon ukon pagpadayawdayaw, kundi sa pagpaubos magbilang sa iban nga maayo pa sa inyo kaugalingon.”10

Pag-alagad nga may Dungog

Ang paglagas sang pasidungog kag kadayawan sa Simbahan kabaylo sang matuod kag mapainubuson nga pag-alagad sa iban abilidad ni Esau.11 Mahimo kita magbaton sang dutan-on nga premyo, pero maangkon ini sa daku nga bili—ang pagkadula sang langitnon nga pagpakamaayo.

Sundon naton ang ehemplo sang aton Manluluwas, nga mapainumuron kag mapainubuson, nga wala nagalagas sang himaya halin sa mga tawo kundi ang pagtuman sang pagbuot sang Iya Amay.12

Mag-alagad kita sa iban sing mapainubuson—nga may kapagsik, pagpasalamat, kag dungog. Bisan pa nga ang aton mga buhat sang pag-alagad dawsa kubos, indi pinasahi, ukon diutay lang ang kapuslanan, ang mga nagadab-ot sa kaayo kag kaluoy sa iban, sa adlaw nga magaabot makahibalo sang bili sang ila pag-alagad paagi sa wala’y katapusan kag balaan nga grasya sang Dios nga Labing Gamhanan.13

Mahal kong mga kauturan kag kaabyanan, kabay kuntani nga hunahunaon naton, hangpon, kag ipangabuhi ining tuman ka importante nga leksyon sang liderato sang Simbahan kag pagdumalahan sang priesthood: “Ang labing daku sa inyo mangin alagad ninyo. ” Ini ang akon pangamuyo kag bendisyon sa sagrado nga ngalan sang aton Agalon, aton Manunubos, sa ngalan ni Jesucristo, amen.