Ngike el Kot el Ngarbab er Kemiu
Sel kot el ngarbab el nguked a mo er tirkel mesiou el diak e lolatk a mo ngkedir.
Betik er a renguk el rodam, sechelik, ng tmeu a renguk e lobengkemiu er tial klouk e lulekrael el longdibel ra priesthood. President Monson, ke mesaol ra tekingem ma klengeltengat. Aki mo blechoel locha ra rengmam a tekingem e lomekrael, olsisechakl, e omekelomes. Aki betik a rengmam e olngeseu er kau, e aki blechoel meluluuch el kirem. Kau a meral profet er a Rubak. Kau a Merredel er kemam. Aki oldubech er kau, e ebtik a rengmam, er kau.
Bekord el luich el rrak ra memong, e a Templo ra Madrid Spain a mlo terkokl e ulemuchel a urrellel el cheledaol blil a Rubak. A Harriet me ngak a ungil medengelii lek milesiou ra Europe Area Presidency ersel taem. Maki ulebenterir a re betok el chad, el mle klou el taem a kim chiloit el melketek a uldasu e mengederodel a ikel mo dubech el bedul sel bol moterkokl.
Mesel sils er a oterkeklel lolkedang, e ak mlo metebengii el kmo ng direkak nguu a siotaikeng el mo rengii. Tia kora mle telkib el ngodech. Leng diak el ngerang, sel ngerchelek el Area President, e ak chiloit a klou el temek er tial lureor ra templo e a le ble le kekerei engdi mle ngarngii a ngerechelek er ngii.
A kuleker ra Harriet alsekum meng milsa a siotaikeng. Ng dimlak.
Meng merael a taem el mei e ngak a mengai el mlamo bekikl. Mak melbedebek el kmo a siotaikeng er kemam a locha ririid—ng locha delakl ra delongelel a kingal ra sofa. Kelel bla le murachem er a komi el mechoit. A tonarii er kemam a ngarngii a cheremir el seksakt el katuu, esel kumtetab e kelel kuk bla le temelii ngil siotaikeng.
Mak mocha medengei el kmo: Ng dimlak el siotai er ngak.
Engdi tiang mekera uaisei? Ngarngii ak tilmelii el longasech a rengrir a rungerachel? Te kuk di ulemes el kmong kmal eroid a omerael el kibo rengii? Te mla bes er ngak?
E a uriul, e ak melchesuar el kmo tial teletael er a uldasu a ngoikak el mora basio el diak el soak el ngarngii.
A Harriet me ngak a mle kauklatk el kmo a oterkeklel a templo a diak el belkul a kmong ng kemam. Ngdiak el belkul a kmo ng techa kirel e le siotai er ngii ma lak. E tia diak el kirel lomsau a rengmam malechub eng lemeltam.
Tiang a kirel a oterkeklel a cheledaol el blai, ng templo ra Kot el Ngarbab el Dios. Ng sils ra deurreng el kirir a rechedal a Ikelesia ra Sebangiol.
Ulekum me te mle siotai er ngak el mong, eng mle ungil a renguk el mong. Engdi alsekum meng dimlak, e a deurreng er ngak meng diosisiu. A Harriet me ngak a oldeu lobengterir a re sechelimam, a re betik er a rengmam el lodam ma rodos, el ngarcheroid. Aki dirrek el loutkeu ra Dios el kirel tial klebokel el klengeltengat el semeriar el ngara blimam ra Frankfurt, el di ngii maki mngara Madrid.
Rengelekel a Derumk
A mle uldimukl ra re Teruich el mlo kedong ra Jesus e milchedaol a mle teru lodam, el Jacobus ma Johanes. Ke medengelii sel tar ngklir el le bilsterir?
Rengelekel a Derumk (Boanerges).1
A chad a diak el nguu a tara ngakl el uaisei a lak el ngarngii a ungil el luchul. Ng mekngit, le chedaol el lechukl a diak a tmolech el lomsodel ra mle uchul tial ngakl. Engdi, ng sebeched el mes a dertelkib el blekerdelel a Jacobus ma Johanes. Tirkang a tirkel losisiu el teru e lodam el lurdersii a okedong mel betengel a ngau ra babeluades el mora beluu ra Samaria leng dimlak el siotai er tir el mong.2
A Jacobus ma Johanes a mle chad er a omenged—eldi mle utsu el chad—engdi a kumdasu e te kmal mle medengei a betok el tekingel a beluu ma daob ma teletelel. Te meral, mle sechal chad.
A tara taem, ra Osobel longetmokl ra mocha ulebonel el lomerolel el mora Jerusalem, e a Jacobus ma Johanes a mlo rengii el ngarngii a tokubets longterir—tia e a uchel e te mlokodong el uaisei.
“Ng somam a bo mruul el kirem a ngidil tekoi el ki molengit,” me te melekoi.
Ng sebechekel mesa a Jesus el klikmechur e onger tir, “Meng ngera somiu?”
“Ngontmam me kim dengchokl, a ta el ngara kidekmem, meng ke el tang el ngara katerum, el ngara klebkelem.”
A Osobel er chelechang a mocha melasem er tir meluut elmo ungil lomdasu el kirel a ongterir e dula el kmo, “Ngdi tirkel mo dengchokl er a kademek ma kateruk a diak; le ngak a melilit er tir e le ng Dios a meltuk er a re mor ngii.”3
A tara belkul, ngdiak el sebechem el kobkelii a rengedel a babeluades el ua mruret ra tekingel a beluu. Malechub ng sebechem el “melibech e moledaes” ra rolem el mora diak a ulebengelel el klebkall.
Me tirkel bebil ra re teruich el Apostol ra le renges el kirel tial longit er tirkel Ngelekel a Derumk, eng dimlak el lungil a rengrir. A Jesus a mle medengei el klengar er Ngii a diak el meketeket, e a lomes er a uldikel ra delongelir tirkal mo melemolem ra urellel a locha mlo mengesang er Ngii.
Ng milngidecheduch er tirkel Teruich ma terung el kirel a teletael ra klisiich e mekerang a le temelterir tirkel losiik er ngii e lurekodel er ngii. “Tirkel chad el metutk elmo merreder,” Ngii a dulang, “a kmal lolab a deruchelir el oumerreder e mengederedel ra re bebil.”
A ko er a di omes er a Osobel, e lomes e loba tmolech el beltik el reng lomes a mederir tirkel mekedung e oltirakl el mesiungel. Ngmo sebechek el rongesii e loba klechubechub longer: “Tial teletael a diak el bo le uaisei er a delongeliu. Ngdi, ngikel soal elmo kot el ngarbab er a delongeliu a kirel elmo mesiungiu: Ma lsekum ng ngar ngii er kemiu a soal elmo ruchei, eng kirel elmo sibmiu el rokui.”4
Sel rengedel a Dios, e a ngarbab ma omerredel a belkul omes ra re bebil ra meral blekerdelir—el ua lomes a Dios—e olengeseu e olsisechakl er tir. Ng belkul a de ngara deurreng lobengterir sel lungil a rengrir, lemangel lobengterir tirkel ngara chelbuul, melisiich er tirkel ngara ongarem, el betik a rengud ra ngara bita er kid eldi ua Kristo lou beltik el reng el me rekid. A Osobel a betik rengul ra rokui el ngelekel a Dios el diak el ior ra teletael er a klengar, deruchelem, klechelid, ng iltetem, bedengir a rechad, tekingem, klaumerang er kau, malechub eng beluam. Me kid meng kired el mo uaisei!
Sel kot el ngarbab el ngkedel a Dios a mo er tirkel mesiou el diak e losiik a mo omeksulir. Ng mo er tirkel mesiou el diak e losiik a etengakl; ng tirkel di lmuk e di osiik a rael lolngeseu ra re bebil; tirkel lolsisechakl el mora re bebil le te betik a rengrir ra Dios me rengelekek a Dios.5
Lak Mecheuid
Uriul ra mokedong elmo General Authority, ng mlo rengii a techelek el tmak ngak ma President James E. Faust el mo mengederodel ra stake. Ma kumekall ra mlai elmo er tial lureram el ngara klebokel el dims ra Utah, e a President Faust a mle ungil a rengul el ngiluu a taem el lolsisechakl er ngak. A imol losisechakl a diak kubes er ngii. Ng dilu el kmo, “A rechad er a Ikelesia a kmal otengeterir a re General Authorities. Te mo ungil er kau a melekoi a ungil tekoi el kirem.” E kora mlo lmuk e kmul kmo, “Dieter, k emo blechoel loureng a saul el kirel tiang, engdi ke le bom mecheuid.”
Tial klou a ututelel el losisechakl el kirel omesiou ra Ikelesia a mora rokui el loba priesthood ra bekl el cheldebechel ra Ikelesia. Ng me rekid el rokui el ngar tial Ikelesia.
Sera President J. Reuben Clark ra lomeklatk er tirkel mlo kedong el mora deruchal ra omerredel ra Ikelesia, ng melekoi er tir me lak el lobes ersel lechul a ongelolem el lochur.
Ngdiak el meketeket, e a chad a oker, “Ngera sel ongelolem el llach?”
“Lak ke msal limis el lomtab ra kmo ngera tomdasu a bebil ra rechad el kirem,” ng melekoi.
Meng uaisei, e tiang a ulemdidel mora tara ker: “Nger a ikel bebil ra kleiim el llach?”
Meng kora klikmechur, e a President Clark a dula el kmo, “Ng diak a ngodech.”6
A bo dungil el merreder ra Ikelesia, eng kired el subii tiakid el lorechudel el losisechskl: a omerredel ra Ikelesia a diak el sal ior ra omtebechel ra re bebil el ua sel soad el moriimel ra Dios.
Okedong a Techall el Dosiou
Mesel de Santo er ngkel Kot el Ngarbab el Dios, e kede mo “melbedebek ra ikel bekl el tekoi tirkel mechebuul, a re ngesool, a re smecher, ma re mechitechut, le ngikel diak el ketmokl a ikang, ngkei a diak e lotirakl er ngak.”7 A techall el merael mo meruul a ungil e mesiou ra re bebil a diak a ulebengelel. A ikang a de betik er a basio er kid, ward ma branch, e tokuni a re keblid.
E dirrek, el rokui el chedal a Ikelesia a nguu a ulterkokl e ultebechel el techall elmo mesiou. Kede olker a ikal techall el kmo “okedong”—ng tekoi el kirel lomeklatk er kid el kmo ng techa ngkel lomekedong er kid elmo mesiou. Alsekum me kede omes a ikal lokedong el techall elmo mesiou ra Dios e olsisechakl el mora re bebil e loba klaumerang ma kle ngariou el reng, e a bekl el tekingel omesiou a bakes ersel rael el kmo kede chedal. Mesel uaisei, e a Dios a diak eldi le longederodel ra Ikelesia er Ngii engdi dirrek el mora re mesiungel. A Ikelesia a keltmokl el lolengeseu er kid elmo uterkokl e mekedung el chedal a Kristo, lungil e melmalt el rengelekel a Dios. Tiang a dubech ra diak el dil sel de bora ongdibel e dorenges a cheldecheduch, ng dirrek elsel dolatk ra re bebil e bo dosiou er tir. Tia rolel a kede mo “ngarbab” ra rengedel a Dios.
Kede kongei a ikal lokedong loba omenguul, kle ngariou el reng, ma omereng el saul. Sel de mengubet ra ikal lokedong, e kede kongei ersel lomelodech loba osisiu el lomengull, kle ngariou el reng, ma omereng el saul.
Sel lomes a Dios, eng diak a okedong ra rengedel el lmuut el klou a belkul ra kuk imong. A omesiunged—a blo le klou ma le kekerei—a michii sel reng el ngar kid, mekengii a tunglel a babeluades, meng mei a ikel klengeltengat er a Dios el diak eldi le bo er tirkel dosiou er tir ng dirrek el me rekid. Sel bo dolngeseu ra re bebil, eng sebeched el medengei le kede oba kelou el reng el kmo Dios a medengei a urrered e kongei e ungil a rengul. Ng klikmechur lomes er kid sel doldars a ikal lomeruul ra klebechub, tokuni a omeruul el diak el meues e ka lodengei a rechad.8
Bek el taem el dengesuir a tang, e kede nguu a telbakes el merael mo ungil e meral chedal ngike el Chimong el ngii a uldersii a klengar Ngii el kired el rokui: ngii el Osobeled.
Ngara Omerredel el mora Parade
Sera Dart ma Okeim el belsechel a ruchelir a re mlekot el mora Salt Lake Valley, e a Odam Myron Richins a milesiou el mle stake president er a Henefer, Utah. Tial lungil klebesei a mle uldimukl er ngii a klekool ra irechar ra re ruchelir ra belsiseb ra belual.
A President Richins a kmal mle mechesang el kirel a uldasu er tial lungil klebesei, e ngii a mlara betok el mitings lobengterir a re General Authorities ma re bebil mesaod a ikel mo dubech. Ng kmal mle blak a rengul.
Uchei er sel lungil klebesei sils, esel stake er a President Richins a blo lolodech er ngii, e ngii a mlo merek el president. E a uriul ra tara Sunday, eng mlara ward priesthood miting e a re merredel a ulengit ra re sebechir el molengeseu er tial lungil klebesei. A President Richins, ma re bebil ra rechad, a uleldars imorir me te mlo durech elmo oubail a bail ra ureor e leguu a torak er ngii ma osebelel.
Eng mocha, tutau er tial klou el lungil klebesei, e a President Richins a mlo dum el kirel a ureor.
Ng kesai el sandei ruchei, eng mle ta er tirkel mesisiich loltobed a uldasu ra omengetmeklel ma omengerderel tial klou el lungil klebesei. Esel sils ra, ungil klebesei, e a kuk mlo urellel a okiuelel a uos ra parade e meliik a decherir.
A President Richins a miruul er ngii el lungil a rengul.
Ng mle medengei el kmo a tara bedengel omesiou a diak el ngarbab ra tang.
Ng mle medengei e mlo dolmii sel tekingel a Osobel: “Ngkel kot el ngarbab er kemiu a mo sibmiu.”9
Mengetmokl Omerelled ra Omesiou el Ngara Lemeltel
A bebil ra taem el ua Ngelekel a Derumk, eng soad a ngarbab el deruchal. Ng soad a chetngakl. Kede osiik elmo menguteling e loldars a suled me le ues a rechad el bo lodengei.
Ngdiak el mekngit a le soad el mesiou ra Rubak, engdi sel dosiik el kirel a blekeradel ra elsel a Ikelesia el kirel a bedenged—me bol sebeched el ngmai a chetengakl el chat er kid a rechad—e kede mla ngmai a omeksuled. Sel de “mecheuid” er a chetengakl ra re bebil, e seikid el chetengakl e a mo omeksuled.
Ngera sel kot el lorechudel el lokedong ra Ikelesia? Ng sel kau obang er chelechang. Ngdiak el ior ra kmong ngariou malechub eng ngarbab a belkul, a okedong el mobang er chelechang a sel mo meskau a techal elmo ngosuterir a re bebil engdi ke dirrek el merael mo mesiungel a Dios el kau a ulebeob el kirel.
Betik er a renguk el sechelik ma rodam ra priesthood, bo mesisiich ersel lokedong el kau obang!
A Paulus a ulsisechakl ra re Philipians, “Bai lak ke mouedikel er a mekngit el ues ma keldidai el reng, e a derta er kemiu, le ngara kle ngariou el reng, louedikel el kerekikl ra derta er kemiu el lmuut el klou a belkul er kemiu.”10
Mesiou loba Chetengakl
Sel losiik a chetengakl ma ised ra Ikelesia ra bai klemerang ma omesiou lokiu a kle ngariou reng el kirel a re bebil a omerrelel a Esau.11 Kede locha nguu a omeksuled er tial beluulechad, engdi ng kmal klou belsel—ng sel doridii a kengei ra Dios.
Mei me doltirakl ersel lokesiul a Osebeled, el ngii a medemdemk e ngariou a rengul, ngii a diak el losiik a chetengakl ra rechad, engdi meruul a soal a Demal.12
Mei me dosiou ra re bebil loba kle ngariou el reng—loba klisiich, omereng el saul, ma chetengakl. Ma ltang e a omerreled a dosiou a locha diak a belkul, beot, malechub eng diak a ultutelel, tirkel loldars loba bekururau ma klubechub el reng el mora re bebil a tara klebesei a mo medengelii sel belkul a omesiungir e lokiu sel diak a ullbengelel e klengeltengat el gracia ra Mesisiich el Dios.13
Betik er a renguk el rodam, sechelik, a kureng me domes el kirel, el mo medengelii, e kie er tial klou a belkul el losisechakl er a omengerderdelel a priesthood: “Ngkel kot el ngarbab er kemiu a mo sibmiu.” Tia e a nglunguchek e klengeltngat, el ngara chedaol ngklel a Mastang er kid, e Osobeled, el ngara ngklel a Jesus Kristo, amen.