Ewe Fosun ewe Kapas Allim
Osukun mi auchea a fokkun namot an epwe nonnom ewe kapas allim non ach famini, me mi namot epwe wor tiniken me pochokun.
Mwirin ai ua kokko ngeni ewe wis ren emon Meinap Unus, am me ai famini aua sai seni Costa Rica ngeni Salt Lake City ren ai we aewein angang upwe fori. Non Merika, ua kan feioch ne churi chommong sokkopaten aramas me ereni. Mei wor chommong neir, usi chok, mi uputiw non ekkewe muun Latin America.
Ua kuna pwe chommong ekkewe akaewin chon Hispanic mi tori ikkei mi kapas non fosun Spain akkomwan me ra ekkis sinei nafochun fosun Merika ar repwe fos. Nour kewe ir mi uputiw Merika are ra feito me nukukunur o ra fiti sukkun ikkei, ra sineiochu fosun Merika me naman pwan ekkis sinei fosun Spain. Me mwirin ewe ounungatin teten, fosun Spain, ina met ar kewe newo ra kakapas non, a poutuno. 1
Non pekin fosun fonu, a chok iteni “poutunon kapas.” Poutunon kapas a tongeni fis nupwen famini ra feino ngeni pwan ew fonu ikkeweia esap nenian fosun fonuer. Ese chok fis nein chon Hispanic nge a pwan fis nein aramas meinisin won fonufan ikkeweia ra nikitano fosun fonuer ren pwan ew minafon. 2 Pwan Nifai, emon soufos non ewe Puken Mormon, a osukosuk ren poutunon fosun ar newo nupwen i a amonata an epwe sai ngeni ewe fonuen pwon. Nifai a mak, “Iwe nengeni, iei miritin Kot pwe am aupwe angei ekkei uruo, pweam aupwe isonir ngeni mwirimwirim ewe kapasen ach kewe neuo.” ”3
Nge Nifai a pwan osukosuk ren ar repwe poutuno pwan ew sokkun fos. Non ewe wokisin mwirin, a sopwe, “Iwe am aupwe pwan isoni ngenir ekkewe kapas minne ra fen pin kapas seni awan meinisin ekkewe soufos, mi pin, minne a fen kawor ngenir seni ewe Ngun me manamanen Kot, seni nepoputan fonufan, pwan feito ngeni ei fansoun.” 4
Ua pwan kuna nennen nefinan tumunun fosun ach newo me tumunun ewe kapas allimen Jises Kraist non manauach.
Ikkenai non ai awewe, use mochen aucheani ew sokkun fosun fonufan nge fosun esemuch mi namwot sipwe tumunu non ach famini pwe ete poutuno. Ua fos usn ewe fosun5 ewe kapas allimen Jises Kraist. Ren “kapasen ewe kapas allim,” ua pworaus usun meinisin ekkewe soufos ar kewe afanafan, ach anneasochisi ekkan afanafan, me ach apwonueta ereniien tupwen.
Upwe kapas usun unungat napanapen tumunun ei sokkun fos.
Aewin: Anapanon Tiniken me Tipepwos non Imw
Non Doctrine and Covenants, ewe Samon a tingor ngeni chommong chon ewe Mwichefen mi itefouno, fiti Newel K. Whitney, are repwe anukunuku imwer. Ewe Samon a apungu Noun chon angang, Newel K. Whitney. Ewe Samon a era pwe mi namwot pwe i epwe anukunuku an famini, me tumunu pwe an famini repwene atiniken me atipepwos non imw, me iotek iteitan, are repwene atou seni nenier. 6
Ew popun mi efisi poutunon kapas a fis nupwen sam me in rese aiti nour kewe fosun fonuer. Ese naf are repwe chok kapasnon ewe fosun fonu non imwer. Ika sam me in ra mochen pwe repwene tumunu fosun fonuer, repwe fen aiti. Pekin chon stati ra kuna pwe napangeni sam me in mi kan achocho ne tumunuochu fosun fonuer mi chok fisioch. 7 Iwe met sipwene fori ne tumunuochu fosun ewe kapas allim?
Elter David A. Bednar seni ewe Mwichen Engon me Ruemon Aposel a fonoukich pwe “apwangapwangan akaeon me poumwenin ewe kapas allim non ewe imw” mi ew popunapan famini mi atai nonnomwun mwirimwirir non ewe Mwichefen. 8
Iwe sia tongeni afatta pwe manamanan akaeo a kan auchea ne tumunuochu ewe kapas allim non imwach, me a namwot sipwe tiniken me achocho.
Sia fen angei ach tingor fan chommong pwe sipwe akkaneani pukefel pwisin pwan non ach famini iteitan ran. 9 Chommong famini mi foriei mi feioch iteitan ran ren ar awaten tipew fengen me ar akarapano ngeni ewe Samon.
Inet ach annea pukefel iteitan epwe fis? Epwe fis nupwen sam me in ra kamwoch ekkewe pukefel non pour o, non tong, ereni ar famini ne chufengen ne kaeo. A weires pwe ei kaeo epwe fis non pwan ew napanap.
Sam me in, ousap misini ekkei feioch mi nap. Ousap mangeiti!
Aruan: Ew Nenian Apiru mi Pechekun non ewe Imw
Emon soun kaeon kapasen fonu a mak pwe ika emon epwe tumunu fosun fonuan, “oupwe amanaua ewe fosun fonufan itan noumi.” 10 Sia “amanaua ewe fosun fonu” nupwen ach akaeo me ach apiruni mi aninis fengen.
Nupwen ngang ua emon anuan, ua angang non an semei we factory nupwen ua asoso me sukkkun. Ewe aewin kapas eis semei we eisiniei iteiten mwirin uwa angei niwini “Met kopwe for ngeni noum ewe moni?”
Ua sine penuan o ua penueni, “Watiw ai asorun ew ne engon me isoni och ngeni ai angangen misineri.”
Mwirin ai angang ngeni ren arapakan wanu ier, me ua chok pepenueni ewe chok kapaseis, semei a ekkieki pwe i a aitiei ai upwe monatiw ai asoren ew ne engon. Nge ese esinna pwe ua fen kaeo ei nongonong mi auchea non ew chok wiikent. Upwe erenikemi ifa usun ua kaeo na nongonong.
Mwirin ekkoch mettoch mi fis non ew maun non Central America, a kesipano ai na angang. Akkomwan a wor 200 [ruepuku] noun chon angang nge a turutiw ngeni nimon chon tete, mi angang non pwisin imwam. Ew ran non fansoun ekanan ran mi aweires, ua rong an semei me inei ra kakapas won ika repwe monatiw asoren ew ne engon are repwe moni anan nour kewe.
Non Raninifen, ua tapweno mwirin semei we ai upwe kuna met i epwe fori. Mwirin am fan, ua kuna an a angei echo taropwe o wanong an asorun ew na engon. Ina chok ew kinikinin ai kaeo. Ewe kapaseis mi chok nom rei ren met aupwe tongeni mongo.
Nessososrun Sarifan, ekkoch aramas ra fichifich won asamen imwam. Nupwen ua suki, ra tingor repwe kapas ngeni semei we. U kokori, me nupwen a torikem, ekkewe chon war ra ereni ar oruterin tete mi namwot epwe mwuitir chok. Ra ereni pwe ewe oruter mi chok atepwanapwanan iwe repwene chok monatiw me mwen epwe tawe ewe tete.. Ena ran ua kaeo nongonongun monatiw asorun ew ne engon me ekkewe feioch mi fiti.
Non ewe Testamen Sofo, ewe Samon a fos usun apiru. A apasa, “Ewer upwe apasa ngeni kemi: ewe Nau ese tongeni pwisin fori och mettoch. A chok fori minne a kuna seman we a fori. Minne ewe Sam a fori, ewe Nau a pwan fori.”11
Ese naf ach sipwe chok fos ngeni nouch usun auchean apupunu non tempel, echikifen, me epini Raninifen. Namwotan repwe kuna ach achocho ne awora neni non ach fori ototen met sipwe fori pwe sipwe no non tempel iteiten inet sia tongeni 12 me ach epini unusan ewe Raninifen. Ika nouch rese tongeni echikifen non ru atun mongo, rese tongeni statini ekkewe pukefel iteitan, me offei ewe tifi atun eu watten urumot non Raninifel, ifa usun epwe nom rer ewe tiniken non ngun ar repwe ungeni pechekunun ekkewe sosotun ei fonufan ikkenai, fiti ewe sosotun sasing mi ngau?
Eunungatin: Eoreni
Pwan ew napanap fosun fonu a tongeni ekisiwin are potuno a fis nupwen pwan ekkoch fosun fonu are ureni ra nofit ngeni ewe fosun newo. 13
Non ekkewe akkomwan ierin ewe Mwichefen mi niwinsefanito, ewe Samon a tingor ngeni chommong ekkoch meinapen ewe mwichefen ar repwe anukunuku imwer. A poputa an tingor ren an fos usun ru napanap sia tongeni poutuno saram me ennet me nom imwach: A apas pwe ewe soun tipis a feito o a sonani saram me ennet, ren anneasonap, seni ekkewe noun aramas, o pwan fan itan urenien ar newo. ”14
Non famini, a namwot sipwe suseni eoreni mi epetikich seni ach sipwe epini Raninifen are stati pukefel me iotek iteitan ran non imw. Mi namwot sipwe espano ekkewe asamen pekin internet non imwem ngeni sasing mingau me sokopaten minen tipis. Pwe sipwe maun ngeni ekkewe eorenien fonufan ikkenai, mi namwot pwe sipwe nounou pukefel me kapasan ekkewe soufosun ikkenai ne aiti nouch usun manauer me nang, popun manauer, me ewe popunap mi pin an Jises Kraist.
Amuchunon
Non ekkewe Pukefel, sia kuna fitu esinnan “poutunon fos.” 15 Ren awewe:
“Iei non ewe fansoun pwe a chommong me nein ewe maritan tappin aramas ekkewe rese weweiti ewe kapas an king Benjamin, pokiten ir mi chok kukkun semirit atun ewe fansoun a kapas ngeni noun kewe aramas; iwe rese nuku eerenien semer kewe. …
“Pokiten ar nukunukumangrese tongeni weweiti ewe kapasen Kot; me netiper ra pochokunono.”16
Ngeni ekkewe mi marita iei, ewe kapas allim a winiti ew fos sise sisinei. Me ikkamwo ekkoch mi anini won feiochun tumunun fosun newo, non pekin ewe kokkotun manau esemuch, ese wornenian anini won niwinich esemuch ika sia poutano fossun ewe kapas allim non imwach kewe.
Pun kich noun Kot, sise unusoch nge sia achocho ne kaeo ew sokkun fos mi unusoch. .17 Usun chok emon in a umoumoch ngeni noun kewe kukkun, Samach won Nang a engino ngeni ach osukosuk me tipis. A aucheani me weweiti ach kewe iotek mi apwangapwang, mi neuekukun non tipemosonoson, usun pwe ir mi amwaar; A mwareiti ewe neuan ach akkaewin kapasen ewe kapas allim. A aitikich non tong mi unusoch.
Ese wor met sia tongeni fori non ei manau, ikamwo auchean, epwe namwot ika sia poutano ewe fosun ewe kapas allim non ach famini. 18 Ai kapasen pwarata pwe Samach won Nang epwe effeiochukich ren ach achocho ne amwochu An fos, tori sia wesewesen sinei an fos, epwe chok fosun netipach. Non itan Jises Kraist, amen.