2010–2019
O Le Gagana o le Talalelei
Aperila 2017


O Le Gagana o le Talalelei

O aoaoga mamana e matuai taua tele e faasaoina ai le talalelei i o tatou aiga, ma e manaomia ai le filiga ma taumafaiga.

Ina ua mavae ona valaauina o se Pulega Aoao, sa matou siitia atu ma lo’u aiga mai Costa Rica i le Aai o Sate Leki mo lo’u uluai tofiga. I le i ai iinei i le Iunaite Setete, ua faamanuiaina a’u e asiasi i tagata matagofie o talaaga ma aganuu eseese. O le toatele o i latou, e faapei o a’u, sa fananau mai i atunuu i Amerika Latina.

Na ou iloa o le toatele o le augatupulaga muamua o tagata Hispanics iinei o le faaSipaniolo la latou gagana autu e tautatala ai ma e lava foi le faaPeretania e fesootai ai ma isi.O le augatupulaga lona lua, a le o le Iunaite Setete na fananau ai pe na o mai ao laiti lava ma aooga iinei, e lelei tele le tautatala faaPeretania ma masalo e tautoai le faaSipaniolo. Ma e masani lava e oo atu i le augatupulaga tolu, o le faaSipaniolo, le gagana tautala a o latou tuaa, ua leiloa.1

I faaupuga faalegagana, e ta’ua lenei mea o le “leiloa o le gagana”. E mafai ona tupu le leiloa o le gagana pe a siitia atu aiga i se atunuu ese lea e le o avea ai la latou gagana ma se gagana tautala. Na tupu e le gata i le au Hispanics, ae faapea foi i le faitau aofai o tagata i le lalolagi atoa lea e sui ai se gagana moni i se gagana fou e mananao i ai.2 Na oo foi ia Nifae, o se perofeta i le Tusi a Mamona, sa popole i le leiloa o le gagana moni a ona tama ao ia sauniuni e masii atu i le nuu folafolaina. Na tusia e Nifae, “Ma faauta, o le poto o i le Atua ua tatau ai ona tatou maua o ia talafaamaumau, ia mafai ai ona tatou faasaoina mo a tatou fanau le gagana a o tatou tamā.3

Ae na popole foi Nifae i le leiloa o le isi ituaiga o gagana. I le fuaiupu e sosoo ai, sa ia faaauau ai, “Ma ia mafai ai foi ona tatou maua o ia talafaamaumau, ia mafai ai ona tatou faasaoina mo i latou upu na tulei mai fofoga o perofeta paia uma, na tuu mai ia te i latou e le Agaga ma le mana o le Atua, talu mai le amataga o le lalolagi, e oo mai lava i le taimi lenei.”4

Na ou matauina se mea e tutusa ai le faasaoina o se gagana moni ma le faasaoina o le talalelei a Iesu Keriso i o tatou olaga.

I le asō, i la’u tala faatusa, ou te fia faamamafa atu ai, e le o soo se gagana faalelalolagi faapitoa ae o se gagana e faavavau lea e tatau ona faasaoina i o tatou aiga ma aua lava ne’i leiloa. Ou te tautala atu i le gagana5 o le talalelei a Iesu Keriso. O le “gagana o le talalelei,” o lona uiga o aoaoga uma a o tatou perofeta, o lo tatou usiusitai i na aoaoga, ma lo tatou mulimuli i tu masani amiotonu.

O le a ou talanoa i auala e tolu e mafai ona faasao ai lenei gagana.

Muamua: Ia Matua Filiga ma Popole i le Aiga

I le Mataupu Faavae ma Feagaiga, ua valaaulia ai e le Alii le tele o tagata iloga o le Ekalesia, e aofia ai Newel K. Whitney, e faatulaga o latou aiga. Na fetalai mai le Alii: “O la’u auauna foi o Newel K. Whitney … ua manaomia foi ona aoaiina, ma faatulaga tatau lona aiga, ma vaai ia latou filiga atili ma popole i le aiga, ma tatalo e le aunoa, po o o le a aveesea i latou mai lo latou tulaga.”6

Se tasi o vaega e uunaia ai le leiloa o se gagana, pe a le faaaluina lea e matua se taimi e aoao ai le gagana moni ia latou fanau. E le lava le na o le tautala i le gagana i le aiga. A mananao matua e faasao a latou gagana, e tatau ona aoao atu. Ua maua i suesuega o matua o e faia se taumafaiga mataalia i le faasaoina o le latou gagana moni e masani ona manuia i le faatinoga.7 O le a la se taumafaiga mataalia e faasao ai le gagana o le talalelei?

Na lapatai mai Elder David A. Bednar o le Korama a Aposetolo e Toasefulua faapea “o le vaivai o aoaoga o le talalelei ma le faataitaiga i le aiga” o se mafuaaga malosi lea e ono gausia ai le li’o o le tele o augatupulaga o aiga i le Ekalesia.8

E mafai la ona tatou faaiuina faapea o aoaoga malolosi e matuai taua tele e faasaoina ai le talalelei i o tatou aiga, ma e manaomia ai le filiga ma le taumafaiga.

Ua valaauliaina soo i tatou ina ia faia se mausa o le suesue o tusitusiga paia faaleaiga ma faaletagata lava ia i aso taitasi.9 O le toatele o aiga o loo faia lenei mea ua faamanuiaina i aso taitasi i le lotogatasi ma se mafutaga vavalalata sili ma le Alii.

Ata
O le tamā ma le afafine o loo suesueina tusitusiga paia

O a fea e tupu ai le suesueina o tusitusiga paia i aso taitasi? O le a tupu pe a taulimaina e matua tusitusiga paia faatasi ai, ma le alofa, valaaulia le aiga ina ia potopoto faatasi e suesue. E faigata le vaai atu o tupu lenei suesuega i soo se isi lava auala.

Ata
O le aiga o loo suesueina tusitusiga paia

Tamā ma tinā, aua nei misia nei faamanuiaga maoae. Aua le faatali seia tuai!

Lua. Faataitaiga Malosi i le Aiga

Sa tusia e se tasi o tagata faapitoa e suesue i gagana faapea o le faasaoina o se gagana moni “e tatau ona e faatumauina le ola o le gagana mo lau fanau.”10 Tatou te “faaolaina le gagana” pe a galulue faatasi a tatou aoaoga ma faataitaiga.

Ao o’u laitiiti, sa ou faigaluega i le fale suisui a lo’u tamā i taimi o tuuaga. O le fesili muamua e masani ona fesili mai ai lo’u tamā pe a maua lo’u totogi o le: “O le a lau mea e fai i lau tupe?”

Na ou iloa le tali ma tali atu ai: “Totogi la’u sefuluai ma sefe mo la’u misiona.”

Ina ua mavae le galue ai mo le valu tausaga pe ā, ma le tali atu pea i lea lava fesili e tasi, sa manatu ai lo’u tamā ua ia aoaoina a’u i le totogiina o la’u sefuluai. O le mea na te lei iloaina sa na o le tasi lava le faaiuga o le vaiaso na ou aoaoina ai lenei mataupu faavae taua. Sei ou ta’u atua le auala na ou aoaoina ai lena mataupu faavae.

Ina ua mavae ni mea na tutupu e fesootai i se taua i le lotoifale i Amerika Tutotonu, na gau le pisinisi a lo’u tamā. Na sau mai le 200 tagata faigaluega tumau pe ā i le itiiti ifo ma le lima tagata suisui o e na galulue pe a manaomia i le faletaavale o lo matou fale. I se tasi aso, i na taimi faigata, sa ou faalogo i o’u matua o talanoa pe tatau ona totogi le sefuluai pe faatau meaai mo tamaiti.

I le Aso Sa, sa ou taumulimuli atu i lo’u tama ia vaai po o le a le mea o le a ia faia. Ina ua maea a matou sauniga Lotu, sa ou vaai o ia aveina se teutusi ma tuu i ai lana sefuluai i totonu. Sa na o se vaega lena o le lesona. O le fesili na totoe mo a’u o le a se mea o le a matou aai ai.

I le taeao po o le Aso Gafua, na tuitui mai ai nisi tagata i lo matou faitotoa. Ina ua ou tatalaina, sa latou fesili mo lo’u tamā. Sa ou fonō atu ia te ia, ma ina ua taunuu mai, sa tau atu e le au asiasi ia te ia se oka suisui faavavave latou te manaomia vave lava pe a talafeagai ai. Na latou tau atu ia te ia e matuai manaomia vave lava le oka ma o lea o le a latou muai totogiina ai loa. I lena aso sa ou aoaoina ai le mataupu faavae o le totogiina o le sefuluai ma faamanuiaga ia e mulimuli mai ai.

I le Feagaiga Fou, o loo talanoa ai le Alii i faataitaiga. Na Ia fetalai: “E moni, e moni, ou te fai atu ia te outou, e le mafai e le Atalii ona fai o se mea, na o ia lava, a o mea na te vaai atu i le Tamā o faia: o mea foi o faia e ia, o loo faia foi ia lava mea e le Atalii.”11

Ata
Auai atu i le malumalu

E le lava le na o le talanoa i a tatou fanau e uiga i le taua o le faaipoipoga faalemalumalu, anapogi, ma le tausia ia paia o le aso Sapati. E tatau ona latou vaavaai mai ua tatou faaavanoaina o tatou taimi faatulagaina ia auai soo i le malumalu i le tele tatou te mafaia. E manaomia lo latou vaai i la tatou tautinoga ia anapogi soo12 ma tausia ia paia le aso Sapati atoa. Afai e le mafai ona anapogi la tatou autalavou mo ni ‘aiga se lua, e le mafai ona suesue soo i tusitusiga paia, ma e le mafai ona tapeina le TV i le taimi o se taaloga tele i le Aso Sa, mata o le a latou maua le malosi faaleagaga e pulea ai i latou lava e tetee atu ai i faaosoosoga malolosi o le lalolagi luitauina i le asō, e aofia ai le faaosoosoga o ponokalafi?

Tolu: Uputuu

O se isi auala e mafai ona suia ai pe leiloa ai se gagana o le faafefiloi lea o isi gagana ma uputuu ma se gagana moni.13

I le popofou o le Ekalesia toefuataiina, na valaaulia ai e le Alii le tele o tagata iloga o le Ekalesia ina ia faatulaga tatau o latou aiga. Na amata Lana valaaulia i le faailoa mai o ni auala se lua e mafai ona leiloa ai le malamalama ma upumoni mai o tatou aiga: “Ma ona sau lea o le amioleaga e toatasi lena ma aveese mai le fanauga a tagata le malamalama ma le upumoni, e ala i le lē usiusitai, ma ona o le uputuu a o latou tamā.14

I le avea ma ni aiga, tatou te manaomia le aloese mai soo se uputuu o le a taofia ai i tatou mai le tausia o le aso Sapati ia paia po o le faia o suesuega o tusitusiga paia i aso taitasi ma tatalo i le aiga. E tatau ona tapunia faitotoa faatekinolosi o o tatou aiga i ponokalafi ma isi uma faatosinaga leaga. Ina ia tetee atu i uputuu faalelalolagi o o tatou aso, e manaomia lo tatou faaaogaina o tusitusiga paia ma leo o o tatou perofeta o aso nei e aoao atu ai a tatou fanau e uiga i lo latou faasinomaga paia, lo latou faamoemoega i le olaga, ma le misiona paia a Iesu Keriso.

Faaiuga

I tusitusiga paia, tatou te maua ai le tele o faataitaiga o le “leiloa o le gagana.”15 Mo se faataitaiga:

“O lenei sa oo ina sa toatele tupulaga faiaʼe sa lē mafai ona malamalama i upu a le tupu o Peniamina, ona o ni fanau laiti i latou i le taimi na saunoa mai ai o ia i lona nuu; ma sa latou lē talitonu i uputuu a o latou tamā. …

“Ma o lenei ona o lo latou lē talitonu sa lē mafai ai ona latou malamalama i le afioga a le Atua; ma sa faamaaa o latou loto.”16

Mo le tupulaga faia’e, na avea le talalelei ma se gagana ese. Ma a o avea faamanuiaga o le faatumauina o se gagana moni ma finauga i nisi taimi, i le talaaga o le ata o le faaolataga e leai se finauga e uiga i taunuuga e faavavau o le leiloa o le gagana o le talalelei i o tatou aiga.

Ata
O le tinā ma lana tama tama laitiiti

I le avea ai ma fanau o le Atua, o i tatou o ni tagata lē atoatoa o loo taumafai e aoao se gagana atoatoa.17 E pei lava ona alofa se tinā i ana fanau laiti, e onosai lo tatou Tama Faalelagi i o tatou le atoatoa ma mea sese. Na te faatauaina ma malamalama i a tatou taumafaiga vaivai ia tatalo, memumemu ma le faamaoni, e pei o se solo matagofie. E olioli o Ia i le leo o a tatou uluai upu faaletalalelei.Na te aoaoina i tatou ma le alofa atoatoa.

Ata
O le aiga o loo tatalo faatasi

E leai se faamanuiaga i lenei olaga, e ui e taua, o le a talafeagai pe a leiloa la tatou gagana o le talalelei i totonu o o tatou aiga.18 O la’u molimau o le a faamanuia i tatou e le Tama Faalelagi i a tatou taumafaiga ao tatou taumafai e uumau i Lana gagana, e tusa lava pe sei lelei la tatou tautatala i lenei tulaga maualuga o fesootaiga, lea sa avea pea ma o tatou gagana moni. I le suafa, o Iesu Keriso, amene.

Faamatalaga

  1. I le au Hispanics, e oo atu i le augatupulaga tolu “o le tulaga e na o le faaPeretania e tautatala ai e … 72 pasene” (Richard Alba, “Bilingualism Persists, but English Still Dominates,” Migration Policy Institute, Feb. 1, 2005, migrationpolicy.org/article/bilingualism-persists-english-still-dominates).

  2. “O le tautatala i le na o le faaPeretania o se mamanu autu lea i le augatupulaga tolu” (Alba, “Bilingualism Persists, but English Still Dominates).

  3. 1 Nifae 3:19; faaopoopo le faamamafa.

  4. 1 Nifae 3:20; faaopoopo le faamamafa.

  5. E mafai ona faaiugaina se gagana o “se polokalama o fesootaiga na faaaogaina i se atunuu po o se itumalo faapitoa” (Oxford Living Dictionaries, “language,” oxforddictionaries.com).

  6. Mataupu Faavae ma Feagaiga 93:50; faaopoopo le faamamafa.

  7. “E mafai ona [faasaoina se gagana moni], ae e manaomia ai le tuuto ma le fuafuaina” (Eowyn Crisfield, “Heritage Languages: Fighting a Losing Battle?” onraisingbilingualchildren.com/2013/03/25/heritage-languages-fighting-a-losing-battle). “Mo se faataitaiga, o tagata tautatala i le faaSiamani i Sisifo Ogatotonu, sa manuia le faatumauina o lo latou gagana moni i le tele o augatupulaga” (Alba, “Bilingualism Persists, but English Still Dominates”).

  8. David A. Bednar, “Multigenerational Families,” i le Fonotaga mo Taitai o le Konafesi Aoao, Ape. 2015, broadcasts.lds.org.

  9. O se tasi o faataitaiga o aso nei o se faatonuga mai le Au Peresitene Sili: “Matou te fautua atu i matua ma fanau ina ia tuu atu le faamuamua aupito maualuga i tatalo faaleaiga, afiafi faaleaiga, suesuega ma aoaoga o le talalelei, ma gaoioiga lelei atoatoa faaleaiga” (Tusi a le Au Peresitene Sili, 11 Fep., 1999).

  10. “E tatau ona e faaolaina le gagana mo lau fanau, ina ia mafai ona latou malamalama ma fesootai ma lagona se vaega o tagata o fai ma sui o le gagana” (Crisfield, “Heritage Languages: Fighting a Losing Battle?” emphasis added).

  11. Ioane 5:19.

  12. “O le tausiga sa’o o se aso anapogi e aofia ai le le tagofia o meaai ma vaiinu mo ‘aiga sosoo e lua i se umi e 24-itula, ia auai i le sauniga anapogi ma molimau, ma tuuina atu se taulaga anapogi lotofoai e fesoasoani ai e tausia i latou o e le tagolima” (Tusitaulima 2: Taitaiina o le Ekalesia [2010], 21.1.17).

  13. Tagai Ominae 1:17.

  14. Matand Covenants 93:39; faaopoopo le faamamafa.

  15. I le talaaga o lenei lauga, o le “leiloa o le gagana” e faasino i le auala e mafai ona leiloa ai le talalelei (tagai Faamasino 2:10; Ominae 1:17; 3 Nifae 1:30).

  16. Mosaea 26:1, 3; faaopoopo le faamamafa.

  17. Tagai Mataio 5:48; 3 Nifae 12:48.

  18. Tagai Mataio 16:24–26.