Mormon Nwoma no Tum
Mototɔ serɛ hɛn mu kor biara dɛ mpaabɔ mu ara yensũa na yɛdwendwen Mormon Nwoma no ho dabiara.
Mo nuanom na nkyerɛbaa adɔfo, mikyia hom ɔdɔ mu ara ber a yehyia mu bio wɔ Jesus Christ N’asɔr a ɔwɔ hɔ Nda a Odzi Ekyir Ahotseweefo ne wiadze mfɛndzanan ehyiadzi kɛse yi ase. Ansaana mebɛhyɛ m’asɛm a wɔakyerɛw ase ndɛ no, mebɛpɛ dɛ medze temple afofor enum a, wobesi no wɔ mbea yinom a odzi do yi no to gua: Brasília, Brazil; Manila kɛse mu, Philippines apaamu; Nairobi, Kenya; Pocatello, Idaho, USA; na Saratoga Springs, Utah, USA.
Anapa yi mekɛsa fa Mormon Nwoma no no tum ho na hia ohia tsitsir dɛ yɛyɛ Asɔrmba yi dɛ yesũa, yɛdwendwen ho, na yɛdze ne nkyerɛkyerɛ no bɔ hɛn bra. Yennkotum akasa pii afa siantsir a ohia ara yie dɛ yenya Mormon Nwoma no ho dasegye a otsim na osi pi.
Yɛtse mber a ɔhaw kɛse na emumuyɛdze ahyɛ mu mã. Ebɛnadze na ɔbɔbɔ hɛn ho ban efi wiadze bɔn na emumuyɛ a atahye kɛse yi ho? Mepaa mu kã dɛ Agyenkwa Jesus Christ ho dasegye a ɔyɛ dzen, na N’Asɛmpa no bɔboa hɛn ma yedua mu dwudwoodwo. Sɛ erennkenkan Mormon Nwoma no daa daa a, meserɛ kenkan. Sɛ ibɛkenkan no mpaabɔ mu ara na edze nokwar akoma pɛ dɛ ihu nokwar no a, Sunsum Krɔnkrɔn no bɛda no nokwar no edzi akyerɛ wo. Sɛ ɔyɛ nokwar a—na enyidahɔ mu ara megye dase dɛ ɔyɛ nokwar—nna Joseph Smith yɛ nkɔnhyɛnyi a ohun Nyame Egya no na Ne Ba, Jesus Christ.
Mormon Nwoma no yɛ nokwar no ntsi, Jesus Christ N’asɔr a ɔwɔ hɔ Nda a Odzi Ekyir Ahotseweefo no nye Ewuradze N’Asɔr a ɔwɔ asaase yi do, na Nyankopɔn asɔfodzi krɔnkrɔn no a wɔdze asan ananmu aba ma Ne mba hɔn mfaso na nhyira no.
Sɛ innyi iyinom ho dasegye a osi pi a, yɛ dza ohia biara dɛ ibenya bi. Nkõdzen mber yinom mu no ohia tsitsir dɛ ibenya wankasa wo dasegye, osiandɛ binom dasegye nnkɔsoa wo ekodu ekyir. Naaso, enya bi no, dasegye hia dɛ ewɔwdo yɛ setsie ma Nyankopɔn ne mbrasɛm na edua daa daa mpaabɔ do dze sie no dɛ adze tsitsir a ɔbɔ hyew.
Mo ndwumayɛfo adɔfo wɔ Ewuradze edwumayɛ mu, mototɔ serɛ hɛn nyina dɛ mpaabɔ mu ara dɛ yensũa na yɛdwendwen Mormon Nwoma no ho daa daa. Ber a yɛyɛ dɛm no, yebegyina gyinabew a yɛbɛtse Sunsum no ndze, yetsĩa nsɔhwɛ, na yedzi ekyingye na suro do nyim, na yenya ɔsor no mboa wɔ hɛn abrabɔ mu. Medze m’akoma nyina gye iyi ho dase wɔ Jesus Christ ne dzin mu, amen.