2010–2019
Lub Hwj Chim ntawm Phau Ntawv Maumoos
Plaub Hlis Ntuj Xyoo 2017


Lub Hwj Chim ntawm Phau Ntawv Maumoos

Kuv taij thiab thov kom peb sawv daws yuav mob siab thov Vajtswv thaum kawm thiab ntsuam xav txog Phau Ntawv Maumoos txhua txhua hnub.

Kuv cov kwv tij thiab cov muam, kuv zoo siab tos txais nej dua hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg lub tuam rooj sab laj. Ua ntej kuv pib hais kuv zaj lus hnub no, kuv xav tshaj tawm txog tsib lub tuam tsev tshiab uas yuav ua hauv tej qhov chaw nram qab no: Brasília, Brazil teb; ib ncig lub nroog Manila, Filipis teb; Nairobi, Kenya teb; lub nroog Pocatello, lub xeev Idaho, Teb Chaws Amelikas; thiab lub nroog Saratoga Springs, lub xeev Utah, Teb Chaws Amelikas.

Tag kis no kuv xav hais lus ntsig txog lub hwj chim los ntawm Phau Ntawv Maumoos thiab qhov uas peb cov mej zeej hauv lub Koom Txoos no yuav tsum kawm, ntsuam xav txog, thiab muab phau no tej kev qhia nruab rau hauv peb lub neej. Kuv hais tsis tau tias txoj kev muaj ib zaj lus tim khawv ruaj thiab khov txog Phau Ntawv Maumoos tseem ceeb npaum li cas.

Peb nyob hauv ib lub caij uas muaj kev kub kev ntxov thiab kev phem kev qias. Yuav muaj dab tsi uas tiv thaiv peb los ntawm kev txog kev txhaum thiab kev phem uas nyob txhua qhov txhia chaw hauv ntiaj teb niaj hnub nim no? Kuv qhia tseeb tias ib zaj lus tim khawv txog peb tus Cawm Seej, Yexus Khetos, thiab Nws txoj moo zoo yuav pab peb mus dhau plaws tej no kom dawb kom huv. Yog tias nej tsis tab tom nyeem Phau Ntawv Maumoos txhua txhua hnub, kuv thov kom nej yuav ua li ntawd. Yog tias nej yuav thov Vajtswv thaum nej nyeem thiab muaj ib lub siab xav paub qhov tseeb tiag tiag, tus Vaj Ntsuj Plig Dawb Huv yuav qhia qhov tseeb rau nej. Yog tias phau no muaj tseeb—thiab kuv ua siab mos hais lus tim khawv tias nws muaj tseeb—ces yog li ntawd Yauxej Xamiv yog tus yaj saub uas tau pom Vajtswv Leej Txiv thiab Nws Leej Tub, Yexus Khetos.

Vim hais tias Phau Ntawv Maumoos muaj tseeb, Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiaj yog tus Tswv lub Koom Txoos nyob hauv ntiaj teb no, thiab Vajtswv lub pov thawj hwj dawb huv twb raug muab txum tim rov qab los kom thiaj pab tau thiab foom koob hmoov rau Nws cov me nyuam.

Yog tias nej tsis muaj ib zaj lus tim khawv ruaj khov txog tej no, cia li ua tej yam uas yuav tsum ua kom thiaj li muaj. Tseem ceeb heev kom nej muaj ib zaj lus tim khawv rau nej tus kheej hauv lub caij muaj kev kub ntxhov no, vim lwm tus neeg zaj lus tim khawv yuav pab nej me ntsis xwb. Tiam sis, tom qab nej muaj, nej yuav tsum pab txhawb nqa nej zaj lus tim khawv los ntawm kev mloog Vajtswv cov lus txib thiab los ntawm kev niaj hnub thov Vajtswv thiab kawm vaj lug kub.

Kuv cov me phooj ywg uas koom tes ua tus Tswv txoj hauj lwm no, kuv taij thiab thov kom peb sawv daws txhua tus yuav mob siab thov Vajtswv thaum kawm thiab ntsuam xav txog Phau Ntawv Maumoos txhua txhua hnub. Thaum peb ua li no, peb thiaj yuav muaj cuab kav hnov tus Ntsuj Plig lub suab, yuav tiv tau kev haub kev ntxias, yuav kov yeej kev poob siab thiab kev ntshai, thiab txais tau lub ntuj ceeb tsheej txoj kev pab hauv peb lub neej. Kuv ua tim khawv tag siab tag ntsws li no los ntawm Yexus Khetos lub npe, amees.