Kuh luhn Puk luhn Mormon

Tamuhlwel ac tahmtahel sacohk wiyuck, nga paing kowos ke kuht sifil tuhkweni ke toeni luhlahp ke Alu luhn Jisus Kraist luhn Mwet Luhlahlfongi ke Lwen-sahflah uh. Met liki nga muhtwacwacack sramsram in suhnahk luhk uh, nga luhngse in tuhkahkuhnlah tempuhl sasuc limekohsr ma ac fah muhsahiyuck ke acn ten inge: Brasília, Brazil; acn luhlahp Manila, Philippines; eria; Nairobi, Kenya; Pocatello, Idaho, USA; ac Saratoga Springs, Utah, USA.

Lututacng se inge ngwac sramsram ke kuh luhn Puk luhn Mormon ac ma enenuh yohk srihpac se ma oasr sesr ke kuht ekihn mempucr ke Alu se inge in lutlut, nuhnkuh, ac moulkihn luti inge ke moul lasr. Yohk srihpaciyacn testimoni fokoko ac pwacye ke Puk luhn Mormon uh tiac kuh in lahesyucklac.

Kuht oasr ke pacl na elyah ac koluk se. Meac ac loangwekuhtlac liki ma koluk ac fohkfohk ma fahsrelihk fin facluh mihsenge? Nga fahkwack lah testimoni fokoko lasr ke Mwet Lahngo lasr, Jisus Kraist, ac wosasuc Lal ac kahsrwe kuht kol kuht nuh ke molwelah. Fin kom tiac riti Puk luhn Mormon ke kais sie lwen, nuhnak muhnahs oruh. Fin kom ac riti pruhe ke kena pwacye in etuh ma pwacye, Nguhn Muhtahl ac fah ahkkahlwemye pwacyeiyacn ma inge nuh suwos. Fin ma inge pwacye—ac nga fahk na pwacye lah ma se inge pwacye—lah Joseph Smith el tuh mwet pahluh se suc liye Pahpah God ac Wen Nahtuhl, Jisus Kraist.

Ke srihpen Puk luhn Mormon pwacye, Alu luhn Jisus Kraist luhn Mwet Luhlahlfongi ke Lwen-sahflah uh pa Alu luhn Leum fin facluh, ac pristut muhtahl luhn God fohlohkihnyuckyak nuh ke ma wo ac mwe insewowo luhn tuhlihk Nahtuhl.

Fin tiac oasr testimoni fokoko lom ke ma inge, oruh ma enenweyuck nuh kac in oasri sum. Yohk srihpac in oasr testimoni fokoko lom in pacl upac inge, tuh testimoni luhn mwet sahyac ac us kom ke lusen pacl se. Tuhsruhktuh, ke kom eis, testimoni uh enenuh in ahkmoulyeyuck ac yohk srihpac ke tuhtahflah luhn ahkostwen ke masap luhn God ac ke pruhe ac rit ma suhmuhslah ke lwen nuh kwewa.

Mwet sacohk wiyuck ke orekma luhn Leum, nga ahkkweye kowos kais sie in pruhe in lutlut ac nuhnkuh ke Puk luhn Mormon ke kais sie lwen. Ke kuht oruh uh, kuht ac oasr ke sie ohiyac ma kuht ac lohng puhsren Nguhn, lain mwe sruhf, in kuhtanglah ahlohloh ac sahngweng, ac in eis kahsruh inkuhsrao me ke moul lasr. Nga fahkwack ke insiyuck nohfohn, ke inen Jisus Kraist, amen.