2010–2019
Puhsra in Sensenkackihn
Eprel 2017


Puhsra in Sensenkackihn

Ke mwet pahluh puhla muh ma kunaclos in sensenkackihn mwet sahyac, kunohkohn se inge ma pac luhn mwet sahyac.

Mwet pahluh Ezekiel el isuslac yac longoul met liki Lehi ac sucu lal som liki acn Jerusalem. Ke 597 BC, ke el yac 25, Ezekiel el sie sin mwet ma srohoh utucklac nuh Babylon sel Nebuchadnezzar, ac oacna ke kuht etuh, el sislah lusen moul lal luhlah uh we.1 El tuhkuh ke sucu lal Aaron suc ahkfahsrye orekma luhn mwet tol, ac ke el yac 30, el ekihn sie mwet pahluh.2

Ke El srihsrngilyac Ezekiel, Jehovah El orekmakihn puhpuhlyuck luhn sie mwet san.

“El [mwet san] fin liya lah mwet lokoalok elos tuku, na el ac ukya mwe ukuk in sensenkakin mwet uh;

“Sie mwet fin lohng ac pilesru, ac mwet lokoalok elos tuku ac unilya, mwatan misa lal ma na lal sifacna.”3

Tuhsruhktuh, “mwet san sac fin liye ke mwet lokoalok uh tuku ac el tia ukya mwe ukuk, na mwet lokoalok uh ac tuku ac uniya mwet koluk inge, a mwatan misa lalos ac fah ma luhn mwet san sac.”4

Na ke El sramsram nuh sel Ezekiel, Jehovah el fahk, “Inge, mwet sukawil, nga ac oru tuh kom in sie mwet san nu sin mutanfahl Israel. Kom enenu in tafwela nu selos kas in sensenkakin ma nga ac sot nu sum.”5 Mwe sensenkackihn sac pa in tui tiac orekma koluk.

“Nga fin fahkak lah sie mwet koluk el ac misa, ac kom tia sensenkakinul elan ku in forla liki orekma koluk lal ac molela moul lal, na el ac misa sie mwet koluk, ac nga ac fah filiya mwatan misa lal uh nuh fom.

“Kom fin sensenkakin sie mwet koluk ac el tia tui liki orekma koluk lal, el ac misa ke el srakna sie mwet koluk, a funu kom, kom ac moulna. …

“Nga ku pac in sensenkakin sie mwet koluk lah el ac misa, tusruktu el fin tui liki orekma koluk lal, ac oru ma wo ac suwohs; …

“Nga ac fah nunak munas ke ma koluk nukewa el tuh orala, na el ac fah moul mweyen el oru ma wo ac suwohs.”6

Ma se wo kac uh pa, kahs in sensenkackihn inge ma pac nuh sin mwet suwohs. “Nga fin wulela nu sin sie mwet wo mu el ac moul, tusruktu el fin nunku mu ma wo el orala meet ah ku in molella ac el mutawauk in orekma koluk, nga ac tia esam kutena ma wo ma el orala meet. El ac misa ke sripen orekma koluk lal.”7

Ke El kwacfe tuhlihk Nahtuhl, God El fahk nuh sel Ezekiel, “Fahk nu selos lah ke sripen nga LEUM GOD Fulatlana ac nga God moul, nga tia engankin in liye ke sie mwet koluk el misa. Nga kena liye elan tui liki orekma koluk lal, tuh elan moul. Mwet Israel, tui liki orekma koluk lowos an. Efu ku kowos lungse misa?”8

Elos tiac ke nuhnuhnkwekuht, Pahpah tuhmasr Inkuhsrao ac Mwet Lahngo lasr kena tuh kuht in engan ac Elos kwacfe kuht in auliyak, ac Elos etuh na pwacye lah “ma koluk tiana [ac fah tiana] pa engan.”9Ezekiel ac mwet pahluh nuh kwewa emet me, elos tahfuh kahs luhn God ke nuhnak loal lalos ac sensenkackuhnuhlos suc kena forlah liki Setuhn, suc pa mwet lokoalok luhn nguhnalos, ac “sulaclah moul sukohsohk ac moul ma pahtpaht, ke Mwet Iwe wo luhn mwet nuhkwewa.”10

Ke mwet pahluh uh puhla muh ma kunaclos in sensenkackihn mwet sahyac, kunohkohn se inge ma pac luhn mwet sahyac. Pwacyeiyac uh, ma kunacn mwet nuh kwewa ma sensenkackihnyuck tari in sensenkackihn mwet tuhlan lal.11 Kuht suc ma eis tari kahlwem la sin God ke plwacn wolacna luhn engan—ac masap ma wi plwacn se inge—enenuh in puhla kena in akacsruhi ke kahlwem se inge ke srihpen yohk ma e ekuhllah kwewana ke moul se inge ac moul ma pahtpaht uh. Ac fin kuht siyuck, “Suc mwet tuhlan luhn ma nga enenuh in sensenkackihn?” pwacyena lah top nuh kac uh ac sukokyak ke sie puhpuhlyuck ma muhtwacwacack, “Sie pacl ah mwet se oatui liki acn Jerusalem nu Jericho ke mwet pisrapasr elos sruokilya,”12 ac tuhtahflah.

Nuhnkweyacn puhpuhlyuck se ke sie mwet Samaria wowo ac ahkacsmakihnye kuht lah kihsensiyuck se inge “Suc mwet tulan luk uh?” el kuhpahsr nuh ke masap luo ma fuhlwact emet: “Kom fah lungse Leum God lom ke insiom kewa, ke ngunum kewa, ke ku lom kewa, ac ke nunkom kewa’, ac ‘Lungse mwet tulan lom oana ke kom lungse kom sifacna.’”13 Srihpac nuh ke sruhkwack puhsra in sensenkackihn pa luhngse, luhngse lasr nuh sin God ac luhngse lasr nuh sin mwet uh. In sensenkackihn pa in nuhnkuh yohk kac. Leum el sapkihn tuh sensenkackihn uh in orek ke fihsrwacsr ac puhsisacl14 ac ke kwacfe, ke muhtweng, ke kuhlwacng … , ac ke luhngse pwacye.15 Kuh in ma elyah se, oacna ke kuht sensenkackihn sie tuhlihk srihsrihk in tiac sang pahol nuh ke e fihrihr uh. Enenuh in kahlwem ac kuh. Kuhtuh pacl uh, sensenkackihn uh tuhkuh oacna puhsren kaiyuck fin kolyuck sin Nguhn Muhtahl,16 tuhsruhk pacl nuh kwewa tuhkuh ke luhngse. Mwe loh, sie srihkasrak, luhngse ma ahkkweye kuhlwacnsap ac kihsackuhnlah luhn mwet misineri lasr uh.

Pwacye lah luhngse uh mokle pahpah ninac in sensenkackihn “mwet tuhlan”—tuhlihk nahtuhlos sifacna. Kalmac pa luti ac fahkwack ke ma pwacye luhn wosasuc. Kalmac pa luti tuhlihk uh ke mwe luti luhn Kraist, luhlahlfongi, auliyak, pacptais, ac eis mwe sang luhn Nguhn Muhtahl.17Leum El ahkacsmakihnye pahpah ninac lah El sapkihn nuh selos in tuhfahlah tuhlihk nahtuhlos ke kahlwem ac pwacye.18

Sie ip yohk srihpac ke kunohkohn luhn pahpah ninac in sensenkackihn pa in ahkuhtweyac tiac kweok ma ac sikyak kac uh muhkwena tuh in oacyacpac fahk engan yohk ma tuhkuh ke moulkihn ac ahkos masap uh. Esam kahs lal Enos lah meac kohlohl in suk God, eis nuhnakmuhnahs ke ma koluk lal, ac eklac:

“Liye, nga som in sruh kosro insack ah; ac kahs ma nga kwacna lohng pahpah tuhmuhk el sramsramkihn ke moul ma pahtpaht, ac engan luhn mwet luhlahlfongi, tihli loal nuh insiyuck.

“Ac nguhnihk masrinsracl; ac nga sikuck muhtuhnte ye muhtuhn Mwet Oraclah Luhk, ac nga wowoyak nuh sel ke pruhe ac siyuck na yohk ke nguhnihk sifacna.”19

Ke srihpen luhngse pwacye lal ac nuhnak yohk lal ke mwet sahyac ac engan lalos, Jisus El tiac tahfuh luo Elan sensenkackihn. Ke muhtwacwacackiyacn luti Lal, “Jesus El mutawauk in fahkak mwe luti lal ouinge; ‘Forla liki ma koluk lowos, tuh Tokosrai lun kusrao apkuran me!’”20 Mweyen El etuh lah tiac ana inkacnek kol nuh inkuhsrao, El sapkihn:

“Utyak ke mutunpot oasriksrik, mweyen nutunpot nu in hell uh sralap, ac inkanek nu kac uh fisrasr, ac pus mwet fahsr kac:

“A funu mutunpot nu ke moul uh oasriksrik, ac inkanek nu kac uh upa, ac pu na mwet konauk.”21

El sislah pacl Lal yurin mwet koluk, fahk, “Nga tia tuku in suk mwet suwoswos, a mwet koluk.”22

Nuh sin mwet sihm ac Mwet Pharisee ac Mwet Luti masap, Jisus El arlac sramsram kuh nuh seltahl in nuhnuhnkwacltahl ke wosounkacs lalos. Masap ac kahs in sensenkackihn Lal arlac kohsroh: “We nu suwos, mwet luti Ma Sap ac mwet Pharisee! Kowos mwet wosounkas! Kowos sang nuh sin God sie tafu singoul, finne ke mahsrik mwe akyuye mongo, oana mint, dill, ac cumin; ac kowos tiana akos ma yohk sripa ke Ma Sap inge uh: moulkin nununku suwohs, pakoten, ac inse pwaye. Fal kowos in oru ma inge, ac tia pilesru ma saya uh.”23 Pwacyena lah wacngihn mwet kuh in fahk lah Mwet Lahngo el tiac luhngse mwet sihm ac Mwet Pharisee inge—tuh, El kweok ac misac in molweloslac pac. Ke srihpen El luhngse elos, El tiac kuh in fuhlweloslac in tahfwelah moul lalos ke ma koluk a in ahksuwohsyacltahl in kahlwemi. Sie mwet sihm el suhmuhslah, “Jisus el luti mwet fahsr tohkohl in oruh ma el oruh; in eis mwet nuh kwewa tuhsruhk in luti lah ma koluk, ke luhngse enenweyuck in sensenkackihn mwet uh ke ma ac ahkkweokyacltahl.”24

Kuhtuh pacl uh elos suc sensenkackihn uh mwet uh tiac lohng puhsrwaclos ke srihpen elos liye muh elos sesseslah ke nuhnuhnkuh. Tuhsruhktuh, tiac ohingacn, elos suc liye ma pwacye ac ohiyacn moul uh fal nuh ke nuhnak lalos sifacna pa elos suc kwacna ahkkolukye mwet suc tiac moulkihn ohiyac ma fal nuh ke luhngse luhn mwet uh. Sie mwet sihm el luhma ohiyac se inge muh “facsin luhn mwekihn”:

“Ke facsin luhn mwacta kom etuh lah kom wo kuh koluk wiwina puhla lom an. Ke facsin luhn mwekihn kom etuh lah kom wo kuh koluk wiwina ma mwet ke acn lom an fahk keim uh, lah elos ahkfuhlwactye kom kuh srikomlac. … [Ke facsin luhn mwekihn,] sie moul uh tiac muhsahiyuckyak ke mwet luti luhn ma pwacye ac suhtuhuh; el muhsahiyuck ke nuhnak luhn mwet ma fahk lah suc ac wi ac lah suc ac sisilac. …

“… Mwet nuh kwewa inse elyah ke kain in moul ma ukwe akwuck ma orekmakihn wi ac tiac wi. Wacngihn akwuck fokoko, ikwot ikme akwuck uh wiwina fahk luhn mwet uh lah suc ac wi ac suc ac tiac. Sie facsin ma upaclaclac inse srihsrihk kac upaclaclac mukwikwi ac fosrngah lah meac wo kuh koluk suc ma mokle mwet nuh kwewa in insese nuh ke nuhnak pwengpweng uh. … 

“Facsin luhn mwacta uh el upac tuhsruhk lwelah kom in sruhnga ma koluk tuh srackna luhngse mwet koluk sacn. Facsin luhn mwacta in pacl inge uh sacohkkihn wi ac muhtweng tuhsruhktuh ac kuh in wacngihn pahkomuhta nuh selos suc tiac insese ac elos ma ohiyac lalos tiac oacna inkaiyacn mwet uh.”25

Ke siena kain in ohiyac pa inge “yot luhn Mwet in Molwelah lasr,”26 sie pwelucng kuh ac kawihl luhn suwohs ac nwacsnwacs. Wona in eis masap luhn God ma tiac ekyek suc ma kuht kuh in mukwikwi in sulwaclah moul lasr likina in pahtokyuck sin mwet uh. Wo in etuh ma pwacye likina in “ikwot ikme ke noa ac eng uh, oana elos su srifeyuk ke mwe luti lun mwet kutasrik.”27 Wo in auliyak ac kwacfweacng in moulkihn akwuck luhn wosasuc likina in oruh in muh wacngihn ma wo ac koluk ac puhtatlac ke ma koluk ac auli.

Leum El fahkwack lah puhsra in sensenkackihn ac som sun mwet nuh kwewa sin mwet tuhma lutlut Lal suc ma El sulwaclah in lwen inge.28 Ke kuht ekihn mwet san ac mwet tuhma lutlut, kuht tiac kuh in muhta na tiac oruh kuhtwena ma ke “mwe sang ma yohk sripa uh.”29 Oacna Ezekiel, kuht tiac kuh in liye mwet lokoalok elos tuhkuh “ac tiac ukya mwe ukuk.”30 Ma in tiac fahk muh kuht in som tongtong nuh ke sruhngucl luhn mwet tuhlan lasr kuh tu ke acn mwet puhs mwet oasr we ac salac, “Auliyak!” Pwacye na, kowos fin nuhnkuh kac, oasr yohrohsr ke wosasuc fohlohkihnyuckyak ma mwet uh, ke insiyaclos, luhngse. Na puhsra in sensenkackihn uh tiacna ma kuhlwacng muhkwena, tuh oacna mwet suc sihmihs Psalm tuh fahk, “pusren kaksak wolana!”31

Ke Deseret News sie mwet sihm lalos Hal Boyd el sihmihs ke sie ohiyac ma muhta na tiac sramsram uh tiac kuh in kahsruh mwet uh. El akihlen lah macruht uh sie “mwe akuhkuhin” inmahsrlon mwet pihsrlac luhn acn Macrke, tuhsruhk macruht uh tiac mwe akuhkuhin ke ma elos moulkihn uh. “Mwet pihsrlac elos macruhtlac ac tiac fahsrwelihk ac elos liyacacng tuhlihk nahtuhlos in engankihn kain in pahyuck ohinge.’ … Tuhsruhk, elyah se pa [elos] tiac luti ma elos moulkihn.” Elos tiac ke sang nuh sin mwet ma ac enenuh na pwacye srihkasrak lalos, tuhsruhk “sahp pacl luhn … elos suc oasr lutlut la ac sucu fokoko la in tui ke mahngol uh ac muhtwacwacack luti ohiyacn pahyuck lalos ac usyacn pahpah ninac lalos uh … [ac] kahsruh pac mwet wiyaclos fin acn Macrke in eis ac fahsr kac.”32

Kuht luhlahlfongi lah kowos fihl kapkapwack se inge, mwet fuhsr ac mwet wo matwac suc ma Leum El luhlahlfongi nuh ke ahkfahsryeyacn orekma Lal ke yac ekahsr fahsruh uh, ac fah tahpuhk mwe luti luhn wosasuc ac akwuck luhn Alu uh acn nuh kwewa ac oacyacpac acn luhn praifet. Nimet fahsr luhkwelos suc ac pain ma pwacye uh in muh tihkuclkucl ac puhtatlac ke ma suhtuhuh. Nimet sruhflah ke mwe luti suhtuhuh ke muhtweng kuh fuhlweack—ke sahngweng ke elyah, tiac insese, kuh finne kweok. Esam olwelah luhn Mwet Lahngo:

“Insewowo kowos ke mwet akangonye kowos, ac kalyei kowos, ac fahk kain koluk nukewa lain kowos in kikiap keik.

“Kowos enganak ac arulana insewowo, tuh yohk ma lacne lowos inkusrao; tuh ouinge elos kalyei mwet palu su muta meet liki kowos.”33

Ke sahflah uh, kuht nuh kwewa ac nuhnuhnkweyuck yurin God ke sulwaclah lasr ac ohiyacn moul lasr uh. Mwet Lahngo El fahkwack, “Ac Pahpah tuhmuhk El suhpweyucme tuh Nga in kuh in srihpsrihpyak fin sahksin soko; ac tukun Nga srihpsrihpyak fin sahksin soko, tuh Nga in kuh in kohlma mwet nuh kwewa nuh Yuruk, tuh ke Nga srihpsrihpyak sin mwet uh ohinge mwet uh ac srihpsrihpyak sin Pahpah, in tu ye muhtuhk, in nuhnuhnkweyuck ke orekma lalos, lah elos wo kuh lah elos koluk.”34

In akihlen ma se inge, fuhlwactlacna luhn Leum, nga siyuck ke kahs lal Alma:

“Ac inge, mwet wiyuck, nga finsrakkihn ke insiyuck nohfohn, ahok, ke fosrngah yohk tuh oruh in waek, tuh kowos in … sislah ma koluk lowos, ac tiac kohtwaclah pacl in auliyak lowos;

“Tuhsruhk tuh kowos in sifacna ahkpuhsisaclye kowos ye muhtuhn Leum, ac pahngon ine muhtahl Lal, ac liye ac pruhe pacl nuhkwewa, tuh kowos in tiac srihfeyuck ahluhkwelah kuh lowos, ac ohinge kolyuck sin Nguhn Muhtahl … ;

“In luhlahlfongi Leum; in finsrak tuh kowos fah eis moul ma pahtpaht; in luhngse God pacl nuhkwewa ke insiowos, tuh kowos in kuh in sruhkyuckyak ke lwen sahflah ac ilyak nuh in nien monglac Lal.”35

Lwelah kuht in kuh in fahk nuh sin Leum yohrohl David, “Nga tia sruokya pweng wo ke molela nu sik sifacna; in pacl nukewa nga sramsram ke oaru lom ac kasru lom. In walil lun mwet lom nga tiana misla in srumun ke oaru lom ac lungse kawil lom. Leum God, nga etu lah kom fah tiana tui in pakoten nu sik.”36 Ke inen Jisus Kraist, amen.